Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tõlu ngaluo me no aefa irugi danõ andrõ Feso, numalõ ia ba Yeruzalema moroi ba Kaizarea.

² Lasao'õ khõnia wangadura khõ Waulo andrõ ira ere sebua awõ ndra salaw̃a niha Yahudi. Lahalõ dõdõ Weso

³ ena'õ ebua dõdõnia khõra, ena'õ ifatenge niha wolohe Faulo andrõ numalõ ba Yeruzalema, bõrõ me no mamagõlõ ira ba wamunu ya'ia ba dalu lala.

⁴ Itema li Feso imane, "No mutaha Waulo ba Kaizarea; ba lõ ara tõ mangawuli ndra'o ba da'õ.

⁵ Tobali, akha fao khõgu numalõ ba Kaizarea zalaw̃a khõmi wangadugõ ya'ia ba da'õ, na duhu no mosala ia."

⁶ Me no w̃alu irugi fulu ngaluo torõi ia ba Yeruzalema, mangawuli Weso ba Kaizarea. Mahemolunia ilau rafe ba wanguhuku ba ifaretakõ ena'õ la'ohe Waulo fõnania.

⁷ Me tohare Waulo, lafasui ia niha Yahudi si no tohare moroi ba Yeruzalema, ba labe'e wangadugõra sebua khõnia. Ba hiza, tebai lafaduhu'õ wangadura andrõ.

⁸ Ba wameta ba hulunia, imane Faulo, "Lõ hadõi nilaugu sala ba goroisa Lowalangi nifa'ema Moze ma ba Nomo Zo'aya ma zui khõ Kaizaria ba Roma."

⁹ Ba omasi ihalõ dõdõ niha Yahudi Feso andrõ. Imane wanofu khõ Waulo, "Hadia edõna ndra'ugõ we'amõi ba Yeruzalema ena'õ te'etu'õ hukumõ ba da'õ fõnagu sanandrõsa ba wangadugõra andrõ?"

¹⁰ Itema li Faulo, "No muzizio ndra'o fõna rafe zanguhuku Kaizaria ba Roma; ba nahia andrõ omasido te'etu'õ hukugu. Aboto gõi ba dõdõu, Tuha, wa lõ hadõi salagu ba niha Yahudi.

¹¹ Na no ulaw̃a huku ma ulau hadia ia zi tola te'etu'õ huku famunu, aoha gõlõgu wa'amate. Ba hiza, na lõ duhu wangadura, samõsa lõ si tola mame'e ya'odo ba dangara. Omasi ndra'o te'etu'õ hukugu fõna rafe wanguhuku Kaizaro!"

¹² Me no aefa mamagõlõ ira ndra samenesi, imane Feso, "Õ'andrõ ena'õ te'etu'õ hukumõ ba wanguhuku Kaizaro, tobali lõ tola lõ'õ mõi ndra'ugõ fõna Kaizaro."

¹³ Lõ ara aefa da'õ, mõi Razo Agerifa ba Berenike ba Kaizarea ba wangowai Feso.

¹⁴ Ba me no mato ha'uga ngaluo ira ba da'õ, itutunõ Feso warakaro Waulo khõ Razo Agerifa. Imane Feso, "So ba da'e niha nitaha nirõi Weliki.

¹⁵ Me so ndra'o ba Yeruzalema, labe'e wangadura ere sebua ba ira salaw̃a niha Yahudi ena'õ tehuku niha andrõ.

¹⁶ Ba umane wanema li, tebai tebe'e manõ tehuku niha ba zi to'õlõ niha Roma, fatua lõ falukha bawa ira nihuku faoma sangadugõ ya'ia, ba tebe'e ginõtõ khõnia wobelegõ ya'ia.

¹⁷ Tobali me mõi ira ba da'e, lõ u'arakõ sa'ae. Mahemolunia ulau rafe zanguhuku ba ube'e wareta wolohe niha andrõ fõnagu.

¹⁸ Me labe'e wangadugõra sangadu andrõ, ma'ifu lõ hadõi si lõ sõkhi ba wangadugõra khõnia molo'õ era'eragu.

¹⁹ Ha bõrõ wa'afaehu zinõndrara sanandrõsa khõ Yesu. No mate niha andrõ, ba hiza imane Faulo, auri niha andrõ.

²⁰ Ba me abu dõdõgu he moroi uhalõ kataranga ba warakaro andre, usofu khõ Waulo hadia omasi ia we'amõi ba Yeruzalema ba te'etu'õ huku warakaro andrõ dania ba da'õ.

²¹ Ba hiza i'andrõ wanguhuku tanõ yaw̃a Faulo; i'andrõ torõi manõ ia ba tahana irege i'etu'õ warakaronia Kaizaro. Bõrõ da'õ ube'e wareta ena'õ lataha manõ ia, irege usõndra ginõtõ wama'ohe'õ ya'ia khõ Kaizaro."

²² Imane Agerifa khõ Weso, "Omasi gõi ndra'o wamondrongo niha andrõ." Imane Feso, "Mahemolu, Tuha, tola õrongo."

²³ Mahemolunia tohare Razo Agerifa ba Berenike fo'omonia. Mõi ira ba nahia rafe si fao ira hõgõ zaradadu ba ira salaw̃a ba mbanua andrõ. Ibe'e wareta Feso ba la'ohe bakha Waulo.

²⁴ Imane Feso, "Razo Agerifa nifosumange ba sowulo fefu! No la'angadugõ niha da'e khõgu fefu niha Yahudi, he ba Yeruzalema ba si manõ gõi ba da'e. Mu'ao'ao ira wangandrõ ena'õ bõi mube'e auri niha andre.

²⁵ Ba hiza ma'ifu lõ nisõndragu nilaunia si tobali danedane wame'e huku famunu. Bõrõ da'õ, ya'ia samõsa zi no mangandrõ ena'õ ta'etu'õ huku khõnia ba rafe zanguhuku khõ Kaizaro.

²⁶ Ba hiza lõ hadõi kataranga khõgu sanandrõsa khõnia nisuragu dania ba zura khõ Kaizaro. Da'õ mbõrõ wa u'ohe ia fõnami, mendrua manõ fõna Razo Agerifa nifosumange! Era'eragu, ena'õ na no awai wamareso andrõ, so zi tola ube'e ba zura.

²⁷ Bõrõ, molo'õ era'eragu, lõ sõkhi na mufa'ohe'õ niha nitaha na lõ muforoma'õ hadia zala ni'angadugõ khõnia."

Kisah Para Rasul

Video Kisah Para Rasul 25

Ikuti Kami:

KONTAK | PARTISIPASI | DONASI