Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tigo ari sasudah Festus tibo didaerah tu, inyo payi ka Yerusalem dari Kaisarea.

² Kutiko inyo tibo disinan, imam-imam kapalo sarato jo pamimpin-pamimpin urang Yahudi, mangadukan si Paulus kabake inyo. Urang-urang tu ba usawo mambujuak Festus,

³ supayo ateh kabaiakkan atinyo kabake urang-urang tu, inyo namuah manyuruah urang untuak mambawok si Paulus ka Yerusalem; dek karano urang-urang tu lah supakaik, untuak ka mambunuah si Paulus di tangah jalan.

⁴ Tapi Festus manjawab, "Si Paulus, inyo sadang ditahan di Kaisarea; ambo sandiri, indak ka lamo lai, babaliak pulo kasinan.

⁵ Jadi, biyalah urang-urang nan takamuko di antaro angku-angku sajo, nan ka payi samo-samo jo ambo ka Kaisarea, untuak mamparundiangkan parkaro si Paulus, jikok iyo, inyo lah mampabuwek suatu kasalahan."

⁶ Sasudah Festus barado di Yerusalem, kiro-kiro salapan atau sapuluah ari lai, mako babaliaklah inyo ka Kaisarea. Bisuak arinyo, inyo ma adokan sidang pangadielan, inyo parentahkan supayo si Paulus dijapuik untuak mangadap.

⁷ Baru si Paulus lah tibo, mako urang-urang Yahudi nan datang dari Yerusalem, bi tagak di sakuliliangnyo, mako muloilah inyo mangamukokan tuduahan-tuduahan nan barek, taradok si Paulus. Tapi, urang-urang tu indak dapek doh mambuktikan sagalo tuduahannyo tu.

⁸ Dalam pambelaannyo si Paulus mangatokan, "Ambo indak ado doh mangarajokan sasuatu nan salah, taradok paratuaran agamo nan di ajakan dek Nabi Musa, atau taradok Rumah Tuhan, atau pun taradok Kaisar Roma."

⁹ Tapi Festus, dek karano inyo nak ma ambiak ati urang Yahudi. Mako batanyolah inyo kabake si Paulus, "Layi namuah angkau payi ka Yerusalem, untuak manyidangkan parkaro angkau di adok-an ambo?"

¹⁰ Paulus manjawab, "Kiniko ambo sadang tagak di adok-an mahkamah Kaisar Roma; mako di tampaik ikolah ambo samustinyo disidangkan. Apak sandiri lah tawu, baraso ambo indak basalah taradok urang Yahudi.

¹¹ Jikok ambo lah malangga paratuaran, atau lah mangarajokan sasuatu kasalahan, nan patuik di ukun jo ukunan mati, ambo rilah untuak mati. Tapi jikok sagalo tuduahan urang-urang tu indak batua, mako indak ado doh urang nan bahak manyarahkan ambo kabake urang-urang tu. Ambo mintak disidangkan dipangadielan Kaisar!"

¹² Sasudah barundiang jo panasiyaik-panasiyaiknyo, mako bakatolah Festus, "Jikok angkau mintak disidangkan dipangadielan Kaisar, angkau musti payi mangadap ka Kaisar."

¹³ Indak bara lamo kamudian, Rajo Agripa jo Bernike datang ka Kaisarea untuak mangucapkan salamaik kabake Festus.

¹⁴ Sasudah inyo lah babarapo ari disinan, mako dicuritokanlah dek Festus tantang parkaro si Paulus kabake Rajo Agripa. Festus mangatokan, "Kiniko disiko ado surang urang tahanan nan ditinggakan dek Feliks.

¹⁵ Kutiko ambo sadang di Yerusalem, imam-imam kapalo jo pamimpin-pamimpin urang Yahudi, mamasuakkan pangaduan taradok urang nan tatahan ko, inyo bi mamintak, supayo ambo ma ukun urang nan inyo kadukan tu.

¹⁶ Tapi ambo katokan, urang Roma indak bisa doh manyarahkan urang, nan dikadukan bakcando itu sajo, untuak ka di ukun, jikok urang tu alun ba adok-an jo urang-urang nan manuduahnyo, baitu pulo jikok inyo alun di agiah kasampatan untuak mambela diri.

¹⁷ Jadi, dikutiko urang-urang tu bi datang kamari, ambo indak mananti lamo-lamo doh. Bisuaknyo lansuang ambo adokan sidang pangadielan, ambo parentahkan supayo urang tahanan tu dijapuik untuak mangadap.

¹⁸ Kutiko urang-urang nan manuduahnyo tu, bi tagak mangamukokan tuduahannyo, indak ado doh nan dituduahkan tu, nan marupokan suatu karajo jahek, bakcando nan ambo sangko.

¹⁹ Urang-urang tu hanyo basalisiah pandapek jo urang nan ditahan tu, tantang parkaro agamonyo, sarato jo tantang parkaro surang urang, nan banamo Isa Almasih. Nan Isa Almasih tu lah mati, tapi si Paulus nan dikadukan tu, basikareh mangatokan, baraso Isa Almasih tu iduik.

²⁰ Dek karano ambo lah pana ma agak-i, baa caronyo ambo ka bisa dapek katarangan, tantang duduak parkaro tu, mako batanyolah ambo ka si Paulus, layi koh inyo namuah payi ka Yerusalem, untuak manyidangkan parkaronyo tu.

²¹ Tapi si Paulus mintak nayiak bandiang; inyo mintak supayo inyo tatap sajo ditahanan, sampai parkaronyo diputuihkan dek Kaisar. Dek karano itu, ambo parentahkan supayo inyo tatap ditahan, sampai ambo dapek kasampatan untuak mangirin inyo ka Kaisar."

²² Mako bakatolah Rajo Agripa kabake Gubenur Festus, "Ambo niyo pulo tu nak mandangakan curito urang tu." "Bisuaklah, dapek tu apak mandangakannyo," kecek Gubenur Festus.

²³ Bisuak arinyo, Rajo Agripa jo bininyo Bernike datang jo upacara kabasaran. Inyo mamasuak-i ruwang sidang samo-samo jo kumandan-kumandan tantara parang, sarato jo urang-urang nan takamuko di kota tu. Gubenur Festus mamarentahkan, supayo si Paulus dibawok masuak.

²⁴ Mako bakatolah Gubenur Festus, "Tuanku Rajo Agripa, sarato jo kasadonyo urang nan datang! Urang ko lah dikadukan dek kasadonyo urang Yahudi kabake ambo, biya urang Yahudi nan di Yerusalem, baitu pulo urang Yahudi nan disiko. Inyo bi manuntuik sambia ma ariak-ariak, inyo katokan, baraso urang ko indak patuik dipadiyakan iduik.

²⁵ Tapi, indak ciyek juwo doh ambo manamukan kasalahannyo, nan patuik inyo di ukun jo ukunan mati. Dek karano itu, inyo sandiri lah mamintak, supayo parkaronyo disidangkan dipangadielan Kaisar, ambo lah mamutuihkan untuak ka mangirin inyo kabake Kaisar.

²⁶ Tapi ambo alun mandapek katarangan nan jaleh tantang dirinyo, nan ka untuak ambo tulihkan dalam surek kapado Kaisar. Itulah sababnyo, mangko ambo mambawok inyo ka adok-an angku-angku kasadonyo, nan tarutamu sakali, kapado baliau nan mulie, Rajo Agripa! Mukasuik ambo iyolah, sasudah inyo dipareso, mako ambo lah mandapek katarangan, apo nan samustinyo nan ka ambo tulihkan di dalam surek.

²⁷ Dek karano manuruik parasaan ambo, indaklah pado tampaiknyo, jikok mangirin urang tahanan, tapi indak mambari tawu, tantang apo tuduahan nan dibabankan kabake inyo."

Kisah Para Rasul

Video Kisah Para Rasul 25

Ikuti Kami:

KONTAK | PARTISIPASI | DONASI