Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Patolu arihon dung di luat i si Pestus, manangkok ma ia sian Kaisarea tu Jerusalem.

² Ro ma disi angka sintua ni malim dohot angka pamimpin ni halak Jahudi tusia laho pasahatkon pangaduan ni halahi taringot tu si Paulus. Sai dielek-elek halahi ma si Pestus

³ anso ibo jolo rohania tu halahi; sugari ra ma ia nian marsuru oban si Paulus tu Jerusalem, harana madung satahi halahi laho mamunu si Paulus di tonga dalan.

⁴ Hape dialusi si Pestus ma, "Ditahan dope si Paulus di Kaisarea; au sandiri pe nada pola sadia honok dison, tibu do au mulak tusi.

⁵ Jadi dumenggan ma sanga na piga-piga halak sian bagian hatobangonmunu kehe rap dohot au tu Kaisarea laho mambuka parkaro i disi, muda na tutu ma ia sala."

⁶ Dung adong hira-hira salapan tu sampulu ari si Pestus di Jerusalem, mulak ma ia mangulahi tu Kaisarea. Ancogotna i dibuka ia ma sidang pangadilan jana diparentahon ia ma anso dioban si Paulus mangadop tu jolonia.

⁷ Jadi disi lalu si Paulus, marjongjongan ma halak Jahudi na marroan i sian Jerusalem mangkaliangi ia. Dipungka halahi ma pajojorkon angka pangaduan ni halahi na borat adop si Paulus. Hape nada tarbuktihon halahi i.

⁸ Dialusi si Paulus ma, "Sada pe nada adong hubaen na sala, bope maradopkon Tona ni halak Jahudi, bope maradopkon Bagas Ni Debata, sanga pe maradopkon Kesar."

⁹ Tapi giot mambuat roha do si Pestus tu halak Jahudi. Jadi marsapa ma ia tu si Paulus, "Ra do ho sugari nioban tu Jerusalem anso disi niadilan ho di jolongku taringot tu angka pangaduan ni halahi i?"

¹⁰ Tapi didok si Paulus ma, "Di jolo ni pangadilan ni Kesar Rom do au na jongjong on; jana angkon disi do niadilan au. Tangkas do diboto tuan i na so marsala au tu halak Jahudi.

¹¹ Muda na sala ma au tu aturan jana muda na patut ma au mate niuhuman, rade do au mate. Tapi anggo na so tutu do adu-aduan ni halahi i, sanga ise pe nada marhak laho pasahatkon au tu halahi. Hupangido, di jolo ni Kesar i ma au niadilan," ning ia.

¹² Dung martahi si Pestus dohot angka donganna paruhum, ning si Pestus ma, "Uhum sian Kesar do dipangido ho, jadi angkon kehe do ho mangadop tu Kesar i."

¹³ Jadi dung adong sanga sadia honok, ro ma Raja Agrippa dohot si Bernike tu Kaisarea laho mangkoras-horasi si Pestus.

¹⁴ Dung piga-piga ari halahi disi, dipajojor si Pestus ma parkaro ni si Paulus i tu Raja Agrippa. Didok si Pestus ma, "Adong dison sahalak tahanan na nitadingkon ni si Peliks.

¹⁵ Jadi hatiha kehe au tu Jerusalem, ro ma angka kapala ni malim dohot angka hatobangon ni halak Jahudi pasahat pangaduan ni halahi salaho tu bayo on jana dipangido halahi anso hudabu uhuman tusia.

¹⁶ Tapi hualusi do disi, na so tola do pasahaton ni halak Rom songon i sajo sada halak na hona tudu anso niuhuman, anggo so jolo nipaadop tu angka na mangaduhon i jana dilehen tusia hatiha laho mambela dirinia.

¹⁷ Jadi dung lalu halahi tuson, nada hupalolot-lolot be. Ancogotna i manigor hubuka ma sidang pangadilan jana huparentahon ma anso dioban bayo i mangadop.

¹⁸ Dung jongjong angka na mangaduhon i pajojorkon pangaduan ni halahi, hape nada adong sanga aha dibaen bayo i na jahat songon na hupikir hian giot dokkonon ni halahi.

¹⁹ Hum hara ni na paasing-asing pandapot sajo do halahi taringot tu ugamo ni halahi sandiri dohot hara ni sada halak na margoar Jesus. Anggo Jesus na nidokna i, ma mate do i, tapi digogohon si Paulus mandok laing mangolu.

²⁰ Jadi hara ni na so huboto be sanga na tarbia baenonku manjalahi angka hatorangan satontang tu parsalisian i, gabe husapai ma si Paulus sanga na ra ia kehe tu Jerusalem anso disi noma niadilan parkaro i.

²¹ Hape mangido banding ma si Paulus; dipangido ia: padiar ma laing di bagasan tahanan ia lopus sidung diputuskon Kesar parkaronia i. Jadi gabe huparentahon ma anso laing ditahan ia torus, lopus dapot au hatiha na denggan laho marsuru ia tu Kesar i."

²² Jadi ninna si Agrippa ma mandok si Pestus, "Au pe por do rohangku umbege bayo i." "Ancogot bisa do tangihononmu ia," ning si Pestus mangalusi.

²³ Ancogotna i ro ma si Agrippa rap dohot si Bernike di bagasan sada upacara hasangapan. Masuk ma halahi tu bagasan pangadilan i rap dohot angka tentara na pangkat-pangkat dohot angka halak na godang na di kota i. Dung diparentahon si Pestus, disuru ma masuk si Paulus tu bagasan.

²⁴ Dung i didok si Pestus ma, "Boti ma da dohonon, di raja i Baginda Agrippa maradu sude dongan na marlagut di inganan on! Madung diaduhon sude halak Jahudi bayo on tu au, sanga pe na di Jerusalem sanga pe na adong dison. Marsurahi do halahi mandok na so tola be ia mangolu.

²⁵ Hape nada adong bagi aha dapot au na sala dibaen ia anso mate niuhuman ia. Boti muse hara ni pangidoannia sandiri angkon di jolo ni Kesar i noma ia adilan, gabe hupaputus ma di bagasan rohangku angkon suruon noma ia mandapotkon Kesar i.

²⁶ Tapi nada huboto sanga aha na tontu sisuratkononku di Kesar i. Hara ni i ma umbaen huoban ia tu jolomunu tarlobi tu adopan ni Raja Agrippa, anso muda dung sidung ia dipareso adong ma sisuratkononku.

²⁷ Harana anggo ninna rohangku, hurang do sumanna suruon sahalak tahanan anggo so nipaboa sanga aha hasalaan na nituhaskon tusia."

Kisah Para Rasul

Video Kisah Para Rasul 25

Ikuti Kami:

KONTAK | PARTISIPASI | DONASI