Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Antiokhia ma jamatioka naga 'o nyawa gee yositota-totara de yodoto-dotoko ma Jo'oungu ma Dutu 'awi demo, ge'ena la: 'O Barnabas, 'o Simeon (wisironga-ronga 'o Taromo), 'o Lukius ('o Kirene ma nyawa), de 'o Menahem (gee yakisidapaliara de ma Koana 'o Herodes), de 'o Saulus.

² Ma moi ge'ena 'ona de 'o jamati yosuba ma Jouka de yopuasa, 'ena 'o Ngomasa 'Itebi-tebini kaingosekau 'onaka, "'O Barnabas de 'o Saulus niakiiriki la 'ona ya'ao to ngoi 'ai manarama gee takikulakau."

³ Yopuasa de yomalahidoa 'iduanga, de manga giama yakidatamiku 'o Barnabas de 'o Saulus manga saekoka, de yakisuloko 'ona yamididi yositotara 'o Habari ma Owa 'o ngii 'ireguka.

⁴ Sababu 'o Ngomasa 'Itebi-tebini 'isuloko so 'o Barnabas de 'o Saulus yotagi dakuie 'o Seleukiade. Ge'ena 'o Seleukiaka de yosidete 'o Siprus ma pulode.

⁵ So gee 'o Siprusoka yototarie 'o Salamis ma kotaka, de ma Jo'oungu ma Dutu wi demo yosihabari 'o Yahudioka manga lo-lomu ma woa-woaka. 'Ena manga do-dagi ma sigoronaka, 'o Yohanes Markus wakiriwo.

⁶ Ma pulo moi ge'ena yodakadagi yabootuku, sigado 'o Pafosoka yaika. Ge'enaka doka yaika de yomakamake de 'o Yahudioka ma nyawa wimoi wi ronga 'o Bar Yesus. 'Una wotawa-tawara ma womadongose 'ato 'una 'o nabii moi ma Jo'oungu ma Dutuno.

⁷ To 'una wi manai ge'ena 'o Sergius Paulus, 'una wogubernur ma puloka ge'ena. Ma gubernur gu'una wobarija de wi 'akali 'idoto. So 'o Barnabas de 'o Saulus waki'asoko, sababu woduaka wosigisene ma Jo'oungu ma Dutu wi demo.

⁸ Ma 'o Elimas wotawa-tawara gu'una kawakisika'ini-'inikoka 'o Barnabas de 'o Saulus. 'Una wosikangekomo kokia la ma gubernur gu'una 'uwa wongaku 'o Yesusika. 'O ronga 'o Elimas ge'ena 'o Bar Yesus wi ronga 'o Yunanioka ma demo.

⁹ Ma 'o Saulus gee wisironga-ronga mita 'o Paulus, 'o Ngomasa 'Itebi-tebini wiparetano so widi-diriidi wotawa-tawarika gu'una,

¹⁰ de kawongosekau, "Ee tabangeluku ma siho, ngona 'isoka 'o tokata! Ngona konoduakuwa 'o barangi ma owa. 'Ido'oa so nooluku nomaogoro nositorou ma Jo'oungu ma Dutu wi mau ma ngale wosilaha 'o nyawa?

¹¹ Ne'ena nolega-lega, ma Jo'oungu ma Dutu wonihukumu! Dua nopiloko so 'o wange ma siwara ma konamakewa 'o wange muruono naga." Kage'enaka de 'o Elimas wamao 'isoka 'o marasa 'itaro-taromo wi akoka yatamunoko, so wotagi ma kawomasisa-samaou 'o nyawa womadononu ma ngale wituda.

¹² Ma gubernur gu'una kawamakeka 'okia naga 'idadiokau ge'ena, de wongakuokau 'o Yesusika; 'una kawoki-kiliri ma Jou Yesus wi do-dotoko.

¹³ 'O Pafosoka de 'o Paulus de wi ma-manai yosidete 'o Perga ma kotaku 'o Pamfilia ma daeraaka. Ge'enaka yauku de 'o Yohanes Markus 'una wakimadakau de woliokau 'o Yerusalemude.

¹⁴ Ge'ena 'o Perga ma kotaka de yogila-gila 'o Antiokhia ma kotaku 'o Pisidia ma daeraaka. So Pomaoma-omasa ma Wange, de yotagi 'o lo-lomu ma woaka ma Jo'oungu ma Dutu wisuba.

¹⁵ Gedagee 'o Musa de 'o Nabii 'iregu manga buku yabacaka, de 'o lo-lomu ma woa ma balu-balusu go'ona yosuloko 'o nyawa yoga'asoko 'o Paulus de wi ma-manaika la yobicara. Yongose 'ato, "'Esa moi, nako naga de ma 'ena 'o kianikia niomau niakidongose ma ngale niakisikuata 'o nyawa no'ona, de niakidongosekau."

¹⁶ 'O Paulus waie woma'oko de 'awi giama wagorakokasi ma ngale wobicarau, de kawongosekau, "'Esa moi riaka dodoto 'o Israel ma nyawa de ma Jou wi kawasa nioodumu ne'enaka dau gee! Bika niosigisene 'ai demo.

¹⁷ Ma Jo'oungu ma Dutu gee 'o Israel ma nyawa powisu-suba gu'una wakiirikokau to ngone nanga edete de nanga dotumu, de wadiai 'o bangsa ma amoko moi ma 'orasi 'ona yogogere 'o Mesiroka yodadi yongosi. Ge'enaka de to 'una 'awi kuasa waki'asa wakisisupu 'o Mesiroka.

¹⁸ 'Una wosabari to 'ona manga gokoieka 'o tonaka 'ika-kakasaka ma do'ingo 'o taunu nagi soatino.

¹⁹ 'O Kanaan ma tonaoka 'o suku tumudiingi wasotumu ma ngale wakisibula-bula ma tonaka ge'ena la 'idadi to 'onau.

²⁰ Ge'ena 'iodumu 'idadi ma do'ingo 'o taunu ratusu soata de 'o nagi motoano. 'Iduangino wosibula-bula 'o Kanaan ma tonaka ge'ena, de ma Jo'oungu ma Dutu wakikula manga balusu gee yakisironga 'o hakimi. 'O hakimi ma du-du'uruoka ge'ena la Nabii Samuel.

²¹ Ge'enaka de yomaga'asoko 'o koana moi. So ma Jo'oungu ma Dutu wigoraka 'o Saul 'o Kis wi ngowaka 'awi 'asali 'o Benyaminino. 'Una wodadi to 'ona manga koana ma do'ingo 'o taunu nagi soatino.

²² Gedagee ma Jo'oungu ma Dutu wisiogoroka 'o Saul wokoana, de wigorakoli 'o Dautu wodadi to 'ona manga koana. De ne'enau gee ma Jo'oungu ma Dutu wongosekau ma ngale 'o Dautu, 'Ngoi towimakekau 'o Dautu 'o Isai wi ngowaka, 'una ge'ena 'ai singina yadaene. 'Unau ge'ena 'asa wadiai to ngoi 'ai mau.'

²³ 'O Dautou 'awi ngowaka de wi dangonuku wimoi ma Jo'oungu ma Dutu Wiirikokau wodadi Koana 'o Israel ma Nyawa Wakisilaha gee ma Jo'oungu ma Dutu wojajiokau. De 'o Yesusou gu'una 'o Koana gee 'o Nyawa Wosilaha-laha.

²⁴ 'O Yesus 'awi manarama kowosidagiwasi 'ena 'o Yohanes 'o Nyawa Wo'osi-'osiki wosikawasakau 'o Israel ma nyawaka, la yomaogoro 'o sowono yodiai de yolio ma Jo'oungu ma Dutuka, de waki'osiki.

²⁵ De 'o Yohanes wi manarama rekeni wosido-dogumoka de kawongosekau 'o nyawa-nyawaka, 'Moteke ngini, ngoi ne'ena nagu'una? Ngoi ne'ena ko 'unawa gee winida-damaa. Niongano-nganono: 'O nyawa gu'una dua ngoi toboakasi 'asa de 'una; duga 'una 'awi bionoka ge'ena ngoi kokiawa 'idaene. Ka wi tarupa ma gumini tosose ma koyadaenuwa!'

²⁶ 'Esa moi riaka dodoto 'o Abraham wi ngowaka de wi dangonuku, de 'o riaka dodoto 'iregu-regu ne'enaka naga gee ma Jo'oungu ma Dutu wisingou-ngounu! Ma Jo'oungu ma Dutu wonakulakau 'o habari ma ngale wonasilaha.

²⁷ 'O Yerusalemuoka yomanoa-noa de manga balu-balusu go'ona kowinakowa 'ato 'unau ge'ena Wosilaha-laha. 'Ona koyasahewa 'o nabii manga do-dotoko gee yabaca-baca Pomaoma-omasa ma Wange 'isinoi-noimi, so wihukumu 'o Yesus. Ma koge'enau yodiai ge'ena moteke 'okia naga 'o nabii yosidemokau ma sirasi.

²⁸ Ngaro koyodamakewa wi so-sowono kogee salingou wihukumu wito'oma, ma yoga'asoko 'o Pilatusika 'ato salingou wito'oma.

²⁹ De gee yadiaiokau 'iodumu gee 'isoka 'isilefokau ma Jo'oungu ma Dutu wi bukuoka ma ngale 'una, deika wi songene yosiguti 'o salipoka so yapo'osuku.

³⁰ Ma ma Jo'oungu ma Dutu wisimomikokali ngaro wosongenukou ma.

³¹ Ge'enaka de 'o wange muruono naga womasidumu-dumutu gee ma sira yomasida-da'asaka de de 'una 'o Galileaka de yaino 'o Yerusalemuno. 'Onau ge'ena ne'ena naga yosisa-sakisii ma ngale 'una 'o Israel ma nyawaka.

³² So ne'ena ngomi miositotara nginika 'o Habari ma Owa ge'ena la 'okia naga gee ma Jo'oungu ma Dutu wojajiokau nanga edete de nanga dotumika,

³³ ge'ena wadiaiokau naga ngoneka. Ge'ena la wisimomiokali 'o Yesus ngaro wosongenokau ma. Sababu ge'ena, 'o Mazmur ma go-goraka modidioka naga 'isilefoku, ma Jo'oungu ma Dutu wongose, 'Ngona ge'ena la to ngoi 'ai Ngowaka. Ne'ena ma wange tosidemo ma gou-goungu, ngoi to ngona 'ani Dea!'

³⁴ Ma Jo'oungu ma Dutu wisiwangokau 'una. Ne'ena 'una dua kowidonoawau 'o bo'osukoka. Ma ngale ge'ena ma Jo'oungu ma Dutu wongose, 'Ngoi 'asa tonikula 'ai jaji 'itebi-tebini gee ma raiokau 'idadi, gee tojajiokau 'o Dautika.'

³⁵ Koge'enali mita naga 'O Mazmur ma bo-bula 'ireguoka 'ingose 'ato, 'Ngona 'asa konosimadakawa 'ani Ro-riwo wosingou-ngounu gu'una kawodewederuku 'o bo'osuku ma dodaka.'

³⁶ 'O Dautu wosongenokau mita de wipo'osuokau 'awi edete de wi dotumu manga bo'osuku ma dateuku, gee wakokidiaioka 'okia naga ma Jo'oungu ma Dutu wisuloko wadiai. 'O Dautu wi maieti mita 'iwedere 'ibootokau.

³⁷ Ma 'o Yesus gee ma Jo'oungu ma Dutu wisimomikokau, 'una kowowederuwa.

³⁸ Sababu ge'ena 'Esa moi riaka dodoto, salingou nianako 'ato ma ngekomo 'o Yesusou so 'o habari ma ngale ma Jo'oungu ma Dutu wonasipidili 'o sowonoka 'isitotara nginika. Ngini salingou nianako 'ato 'o nyawa gee yongaku-ngaku 'unaka yakisipidili 'o so-sowonoka. 'O sowono ge'ena koidadiwa ya'ikiri ka de 'o Musa wi besesongo.

³⁹ (13:38)

⁴⁰ Ge'enau so salingou niatibangi niosidi-diai, 'uwa sigado nginioka nidaene 'o hukumani gee 'o nabii yosidemokau ma sirasi konee:

⁴¹ 'Niosigisene niosidi-diai ngini gee nioduaka 'ai demo niosito-torou! Ngini 'asa nioherangi, de niosongene! Sababu ne'ena naga ngoi tadiai ma gu-gudaioka 'okia naga gee dua ngini koniangakuwa, ngaro naga 'o nyawa nisiwaiti nginika ma.'"

⁴² Gee 'o Paulus de 'o Barnabas yosupuou 'o lo-lomu ma woaka, de ma nyawa ge'ena 'o lo-lomu ma woaka gee yoga'asoko la Pomaoma-omasa ma Wange 'o 'ahadi dokaeda de yainoli ma ngale 'ifoloiosi yosiwaiti ge'ena gee.

⁴³ 'O nyawa yoku-kudai yokokisupuoka ge'ena ma lo-lomu ma woaka de manga gudai 'o Yahudioka de ko 'o Yahudiokawa gee yowosangokau 'o Yahudioka manga 'agamaka, yakimoteke 'o Paulus de 'o Barnabas. So 'o su-suloko go'ona yakidongose 'onaka la 'uwa yomaogoro yo'ahu wi co-catu ma sigoronaka.

⁴⁴ De Pomaoma-omasa ma Wange ma gilionoli, ma kotaka ge'ena rekeni yoodumoka yoboano yosigisene ma Jo'oungu ma Dutu wi demo.

⁴⁵ Ge'enaka de 'o Yahudioka yakimake 'o nyawa yoku-kudai go'ona, de yakitu'uduku ma sala. 'Ona wisito-torou 'o Paulus, yaributu gee 'okia naga wongose-ngose.

⁴⁶ Ma 'o Paulus de 'o Barnabas kayomoroini monga yobicara koyosipongo-pongonuawau. 'Ona yongose, "Ma Jo'oungu ma Dutu wi demo ge'ena ma goungu salingou nginika 'isira 'isitotara. Duga ngini niooluku niadawongo, ngini ma sirete nimasitantuuokau 'ato ngini koyadaenuwa niadawongo 'o 'ahu ma dutu 'ika-kakali. De ne'ena minimada ngini de miosikaika 'o nyawa 'ireguka.

⁴⁷ Sababu konee ma Jo'oungu ma Dutu wopareta ngomino, wongose: 'Ngoi tiniirikokau ngini niodadi 'o darangi ko 'o Yahudiokawa ma nyawaka, la ngini niosiboa 'o laha 'o dunia yasuluunuku.'"

⁴⁸ 'O nyawa-nyawa gee ko 'o Yahudiokawa yogi'isenoka ge'ena, de yomorene ma sala, ge'enaka de kayosiare-arene ma Jou wi demo. De 'o nyawa gee ma Jo'oungu ma Dutu wositatapuokau yamake 'o 'ahu kaisi'ado-'adonika, 'ona yongaku.

⁴⁹ De ma Jou wi demo 'isidagi kiaka naga bato ma daeraaka ge'ena.

⁵⁰ Ma 'o nyawa yola-laagomo ma kotaka ge'ena, de 'o nge-ngeweka gee 'o nyawa yola-laagomo manga bolu-boluno de wiho-horomati ma Jo'oungu ma Dutuka, 'o Yahudioka ma nyawa yakisisau-sauku. 'Ona yakikaditigi de 'o Paulus de 'o Barnabas, de yakiginiiki ge'ena ma daeraaka.

⁵¹ Ma rai 'o su-suloko yamididi go'ona manga dou ma kakawo yodabarisi ge'ena 'o Yahudioka manga bionuku ma ngale 'o no-nako moi 'onaka, ge'enaka de yotagiokau 'o Ikoniumisa.

⁵² Ma yongaku-ngaku 'o Antiokhiaka gee yomorene ma sala de yakiparetano 'o Ngomasa 'Itebi-tebini.

Kisah Para Rasul

Video Kisah Para Rasul 13

Ikuti Kami:

KONTAK | PARTISIPASI | DONASI