Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq dalem jemaah lẽq Antiokia araq nabi-nabi dait guru-guru, aranne Barnabas, Simeon saq tejulukin Niger, Lukius lẽman Kirene, Menahem saq tebelẽqang bareng kance Raje Herodes, dait Saulus.

² Sewaktu ie pade beribadah tipaq Tuhan dait puase, Roh Suci bemanik lẽq ie pade, "Pilẽq Barnabas dait Saulus husus umaq Tiang, adẽq ie pade ngelaksaneang tugas saq sampun Tiang tentuang tipaq ie pade."

³ Sesampun puase dait bedo'e, ie pade noloq imene lẽq atas Barnabas dait Saulus, terus ngutus ie pade.

⁴ Lantaran teutus siq Roh Suci, Barnabas dait Saulus berangkat ojok Seleukia. Lẽman derike ie pade belayar ojok pulao Siprus.

⁵ Sewaktu ie pade dateng lẽq Salamis, ie pade nyampẽang Manik Allah lẽq balẽ-balẽ ibadah Yahudi. Yahya Markus tulung ie pade dalem kelampanne.

⁶ Selapuq pulao nike ie pade jelajahin jangke dateng Papos. Lẽq derike ie pade bedait kance sopoq dengan Yahudi, aranne Baryesus. Ie tukang sẽhẽr saq ngaku diriqne nabi.

⁷ Sergius Paulus, gubernur pulao nike batur tukang sẽhẽr nike. Gubernur nike dengan saq pinter dait bijaksane. Ie ngempoh Barnabas dait Saulus, sẽngaq ie melẽt pirengang Manik Allah.

⁸ Laguq Barnabas dait Saulus tetentang siq Elimas tukang sẽhẽr nike, sẽngaq Elimas (nike aranne dalem base Yunani) berusahe adẽq gubernur nike ndaq jangke percaye lẽq Deside Isa.

⁹ Laguq Saulus -- saq tesebut ẽndah Paulus -- tekuasein siq Roh Suci, sehingge ie peler ahli sẽhẽr nike,

¹⁰ terus bebase, "Hai, penipu belẽq, anak durhake! Side musuh selapuq saq kenaq. Kembẽq side pengẽngoh Langan saq tepetitoqang siq Junjungan Saq Mulie nike?

¹¹ Mangkin serioq, Tuhan gen ngukum side! Pire jelo ngonẽqne side ndẽq gen bau serioq jelo." Waktu nike ẽndah Elimas beridap araq awun-awun saq bideng nutup penentengne, sehingge ie lampaq beganggam-ganggam boyaq dengan jari dẽndẽn ie.

¹² Sewaktu Gubernur nike cingakin napi saq sampun telaksane, ie percaye lẽq Deside Isa; sẽngaq ie takjub gati lẽq ajahan mengenai Tuhan.

¹³ Lẽman Papos, Paulus dait batur-baturne belayar ojok Perga lẽq Pampilia. Lẽq derike Yahya Markus bilin ie pade, beterus tulak ojok Yerusalem.

¹⁴ Lẽman Perga ie pade ngelanjutang kelampan ojok Antiokia lẽq Pisidia, dait lẽq jelo Sabat ie pade lumbar terus melinggih lẽq dalem balẽ ibadah.

¹⁵ Sesampun Hukum Taurat dait kitab nabi-nabi tebaceang, pemimpin-pemimpin balẽ ibadah nike suruq dengan beketuan lẽq Paulus dait batur-baturne, "Semeton-semeton, lamun side pade bedowẽ nasẽhat tipaq dengan-dengan niki, silaq sampẽang nasẽhat nike."

¹⁶ Paulus nganjeng, terus ngebẽng tande kadu imene, dait bebase, "Semeton-semeton tiang dengan-dengan Israel dait semeton-semeton saq takut lẽq Allah! Silaq dengahang tiang:

¹⁷ Allah bangse Israel sampun milẽq leluhurte, dait jariang bangse niki bangse saq belẽq sewaktu ie pade ndot lẽq Mesir jari pendateng. Beterus siq kuase saq belẽq Allah gadingang ie pade sugul lẽman Mesir.

¹⁸ Allah sabar lẽq tingkah laku ie pade lẽq padang gurun petang dase taun ngonẽqne.

¹⁹ Pituq bangse Ie musnahang lẽq negeri Kanaan jari bagi-bagiang negeri nike tipaq bangse Israel adẽq negeri nike jari dowẽn ie pade.

²⁰ Selapuqne nike telaksane empat ratus sẽket taun ngonẽqne. Sesampun negeri Kanaan nike tebagi-bagi, Allah ngicanin ie pade hakim-hakim jangke jaman Nabi Samuel.

²¹ Beterus ie pade tunas sopoq raje. Allah ngicanin ie pade Saul bije Kis lẽman suku bangse Benyamin jari raje ie pade petang dase taun ngonẽqne.

²² Sesampun Saul tesingkirang, Allah ngangkat Daud jari raje ie pade. Dait niki saq temanikang Allah mengenai Daud, 'Sampun tiang ndait Daud bije Isai dengan saq nyenengang angen Tiang. Ie saq gen ngelaksaneang selapuq pekayunan Tiang.'

²³ Lẽman keturunan Daud nike Allah nyedieang tipaq bangse Israel sopoq Juruselamet, sesuai kance janji-Ne. Nike Deside Isa.

²⁴ Sendẽqman Deside Isa rauh, Yahya sampun nganjurang tipaq dengan-dengan Israel adẽq ie pade betobat lẽman dose-dose ie pade dait tebaptis.

²⁵ Dait lẽq waktu Yahya gen nutuqang karyene, ie bebase tipaq dengan-dengan nike, 'Sai tiang niki menurut side pade? Tiang ndẽqne Dengan saq side pade antih. Inget, Dengan nike gen rauh sesampun tiang; jari ngelekaq tali sepatu-Ne doang tiang ndẽq patut.'

²⁶ Semeton-semeton keturunan Ibrahim, dait side pade selapuq saq lainne lẽq deriki saq takut lẽq Allah! Allah sampun ngirim tipaq ite berite keselametan nike;

²⁷ sẽngaq dengan-dengan saq ndot lẽq Yerusalem dait pemimpin-pemimpin ie pade ndẽq kenal sai Deside Isa nike. Siq mutusang hukuman matẽ tipaq Deside Isa, ie pade genepang ucapan nabi-nabi saq tebaceang sebilang jelo Sabat.

²⁸ Timaq ie pade ndẽq ndait sopoq hal lẽq Deside Isa saq patut tehukum siq hukuman matẽ, laguq ie pade tunas lẽq Pilatus adẽq Ie tematẽq.

²⁹ Dait sesampun ie pade tutuq ngelaksaneang selapuqne saq araq tetulis dalem Kitab Suci mengenai Deside Isa, ie pade turunang jenazah-Ne lẽman kayuq salib, terus ie pade makamang.

³⁰ Laguq Allah ngidupang Ie malik lẽman ninggal.

³¹ Beterus sengonẽq pire jelo Deside Isa rauh nyatayang diriq tipaq dengan-dengan saq ngiring Ie lẽman Galilea ojok Yerusalem. Mangkin niki ie pade nike saq jari saksi-saksi-Ne tipaq bangse Israel.

³² Jari, mangkin niki tiang pade nyampẽang Kabar Solah nike tipaq side: Napi saq Allah sampun janjiqang tipaq leluhurte,

³³ nike sampun Ie laksaneang tipaq ite siq care ngidupang Deside Isa malik lẽman ninggal. Sẽngaq lẽq dalem Kitab Suci Zabur saq kedue araq tetulis, 'Deside Bije saq asalne lẽman Tiang, lẽq jelo niki Tiang angkat Deside jari Bije Tiang.'

³⁴ Allah sampun ngidupang Ie malik lẽman ninggal. Mangkin Ie ndẽq gen ngalamin ninggal malik lẽq dalem makam. Mengenai hal nike Allah bemanik, 'Tiang gen ngicanin Deside janji suci saq pasti gen tetepatin, saq sampun Tiang janjiqang lẽq Daud.'

³⁵ Keranaq nike lẽq Kitab Suci Zabur lẽq ayat saq lain tetulis, 'Deside nẽnten gen menengang Dengan Suci Deside cingakin kebinasean.'

³⁶ Daud sampun ninggal dait temakamang ẽndah bareng-bareng kance leluhurne, dait ie mule teserahang tipaq kebinasean.

³⁷ Laguq Deside Isa, saq teidupang siq Allah lẽman ninggal, nẽnten ngalamin kebinasean.

³⁸ Keranaq nike semeton-semeton, harus side pade nenaoq bahwe langan Deside Isa nike berite mengenai pengampunan dose teberiteang tipaq side; side pade harus nenaoq bahwe sebilang dengan saq percaye lẽq Ie, tebẽbasang lẽman selapuq dose saq ndẽq bau teapus langan prẽntah-prẽntah Allah saq tesampẽang siq Musa.

³⁹ (13:38)

⁴⁰ Keranaq nike side pade harus perhatiang bagus-bagus, adẽq ndaq jangke telaksane lẽq side pade napi saq tesampẽang siq nabi-nabi niki.

⁴¹ 'Perhatiang bagus-bagus, hai side dengan-dengan saq girang menghine! Side gen bengaq, terus ninggal! Sẽngaq lẽq jaman niki Tiang kenyeke ngelaksaneang sopoq hal saq side mẽsaq ndẽq gen percaye ie, timaq araq dengan saq jelasang tipaq side.'"

⁴² Waktu Paulus dait Barnabas bilin balẽ ibadah nike, dengan-dengan lẽq balẽ ibadah nike tunas ie pade tulak malik lẽq jelo Sabat saq gen dateng, jari ngelanjutang penjelasan mengenai hal-hal nike.

⁴³ Sesampun inggas ibadah, luwẽq dengan Yahudi dait dengan bangse-bangse lain saq tame agame Yahudi, turut Paulus dait Barnabas; kedue rasul nike ngajah ie pade dait bẽng nasẽhat adẽq ie pade tetep idup lẽq dalem rahmat Allah.

⁴⁴ Lẽq jelo Sabat selanjutne, aroh-aroh selapuq dengan lẽq kote nike dateng dengahang Manik Allah.

⁴⁵ Waktu dengan-dengan Yahudi serioq dengan luwẽq nike, ie pade talon atẽ gati. Ie pade menghine Paulus dait nentang selapuq saq ie sampẽang.

⁴⁶ Laguq Paulus dait Barnabas sayan bani doang bebaos terus terang. Ie pade bebase, "Manik Allah mule harus tesampẽang tipaq side pade juluq. Laguq lantaran side pade ndẽq mẽlẽ nerimaq ie, side pade sampun nentuang mẽsaq bahwe side pade ndẽq patut nerimaq idup sejati dait kekel. Dait mangkin tiang pade bilin side pade dait lalo tipaq dengan bangse-bangse lain.

⁴⁷ Sẽngaq niki prẽntah Tuhan lẽq tiang pade; Tuhan bemanik, 'Tiang sampun nentuang side jari terang tipaq bangse-bangse saq ndẽq kenal kance Allah, adẽq side datengang keselametan tipaq seantẽro dunie.'"

⁴⁸ Sewaktu dengan bangse-bangse lain dengah hal nike, ie pade seneng gati, terus mulieang Manik Tuhan. Dait dengan-dengan saq sampun tetentuang siq Allah jari mauq idup sejati dait kekel ẽndah jari percaye.

⁴⁹ Manik Tuhan nike nyebar ojok mbẽ-mbẽ lẽq selapuq daẽrah nike.

⁵⁰ Laguq pembelẽq-pembelẽq kote nike dait dengan-dengan nine saq tehormatin, saq takut lẽq Allah, tehasut siq dengan-dengan Yahudi. Ie pade nimbulang permusuhan tipaq Paulus dait Barnabas, dait deduaqne tetundung lẽman daẽrah nike.

⁵¹ Beterus, rasul-rasul nike kerapang kerepuk lẽq naẽn ie pade lẽq julun dengan-dengan nike jari peringetan, terus lumbar ojok Ikonium.

⁵² Pengiring-pengiring lẽq Antiokia gembire gati dait tekuasein siq Roh Suci.

Kisah Para Rasul

Video Kisah Para Rasul 13

Ikuti Kami:

KONTAK | PARTISIPASI | DONASI