Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Serioq berembẽ belẽq kasih Allah lẽq ite, sehingge ite teakuq jari bije-bije dowẽ-Ne. Dait mule ite niki bije-bije dowẽn Allah. Keranaq nike dunie saq jahat niki ndẽq kenal kance ite, sẽngaq dunie ndẽq kenal kance Allah.

² Semeton senamian saq tiang kasihin! Mangkin ite niki bije-bije dowẽn Allah, laguq keadaante ẽraq ndẽqman jelas. Laguq ite nenaoq bahwe lamun Almasih rauh, ite gen jari maraq Ie, sẽngaq ite gen serioq Ie lẽq dalem keadaan-Ne saq setetune.

³ Selapuq dengan saq bedowẽ harepan maraq niki lẽq Almasih, jagaq diriqne adẽqne tetu-tetu suci, bersi lẽman dose maraq Almasih nike suci.

⁴ Dengan saq piaq dose, ngelanggar hukum Allah; sẽngaq dose nike pelanggaran hukum Allah.

⁵ Side pade nenaoq bahwe Almasih sampun rauh jari ngapus dose-dose manusie, dait bahwe ndẽq araq dose lẽq dalem diriq-Ne.

⁶ Selapuq dengan saq idup lẽq dalem Almasih, ndẽq terus-terusan piaq dose. Dengan saq tetep piaq dose, ndẽq uwah serioq dait kenal kance Almasih.

⁷ Bije-bije tiang, ndaq alurang sai juaq nyesatang side pade. Sai-sai saq ngelaksaneang napi saq kenaq, nike kenaq, pade maraq Almasih nike kenaq.

⁸ Laguq dengan saq tetep piaq dose, nike anak Belis, sẽngaq Belis gawẽq dose lẽman penembẽqne. Nike lantaranne Bije saq asalne lẽman Allah rauh, jari ngancurang pegawẽan Belis.

⁹ Dengan saq asalne lẽman Allah, ndẽq terus-terusan piaq dose, sẽngaq sipat Allah mẽsaq araq lẽq ie. Dait lantaran Allah nike jari Bapane, make ie ndẽq bau terus-terusan piaq dose.

¹⁰ Niki bẽdene antare bije-bije dowẽn Allah kance anak-anak dowẽn Belis: Sai-sai saq ndẽq ngelaksaneang prẽntah Allah, atao ndẽq ngasihin semetonne, ie ndẽqne bije dowẽn Allah.

¹¹ Lẽman penembẽqne sampun tesampẽang berite niki tipaq side: Ite harus saling kasihin sopoq kance saq lain.

¹² Ndaq ite maraq Kain, saq jari anak Belis dait nyematẽq semetonne mẽsaq. Napi penyebapne Kain nyematẽq semetonne? Sẽngaq ie ngelaksaneang hal-hal saq jahat, laguq hal-hal saq telaksaneang siq semetonne nike kenaq.

¹³ Keranaq nike, semeton-semeton, ndaq bengaq lamun dengan-dengan dunie niki meriq lẽq side pade.

¹⁴ Ite nenaoq bahwe ite sampun sugul lẽman kematẽan, dait ngalih tipaq idup. Ite nenaoq nike, sẽngaq ite ngasihin sepade semetonte. Dengan saq ndẽq ngasihin sepadene manusie, artine masih tekuasein siq kematẽan.

¹⁵ Dengan saq meriq lẽq semetonne, pade maraq tukang nyematẽq, dait side pade nenaoq bahwe tukang nyematẽq ndẽq bedowẽ idup sejati dait kekel.

¹⁶ Langan hal niki ite nenaoq kasih Almasih. Bahwe Ie sampun nyerahang idup-Ne umaq ite. Keranaq nike, ite ẽndah harus nyerahang idupte umaq semeton-semetonte!

¹⁷ Lamun sopoq dengan bedowẽ lebih, serioq semetonne saq ndẽq bedowẽ, laguq ndẽq mẽlẽ nulung semetonne nike, berembẽ dengan nike bau bebase bahwe ie ngasihin Allah?

¹⁸ Bije-bije tiang! Ndaq ite ngasihin cume lẽq biwih atao cume siq ucapan doang. Ite harus ngasihin siq kasih saq sejati, saq tebuktiang siq perbuatante dait lẽq dalem kebenaran.

¹⁹ Maraq nike entane ite nenaoq bahwe ite niki asalne lẽman kebenaran. Maraq nike ẽndah atẽnte iniq tentrem lẽq arepan Allah.

²⁰ Sẽngaq ite nenaoq, bahwe lamun ite tesalaqang siq atẽnte, Allah belẽqan lẽman atẽnte, dait Ie wikan selapuqne.

²¹ Jari, semeton senamian saq tiang kasihin, lamun atẽnte ndẽq nyalahang ite, ite parek tipaq Allah siq keyakinan saq pasti.

²² Dait napi saq ite tunas lẽman Ie, ite gen nerimaq, sẽngaq ite taat lẽq prẽntah-prẽntah-Ne dait ite ngelaksaneang napi saq nyenengang Ie.

²³ Niki prẽntah-Ne tipaq ite: Ite harus percaye lẽq Bije-Ne, nike Deside Isa Almasih, dait ite harus saling kasihin, maraq saq sampun teprẽntahang siq Almasih tipaq ite.

²⁴ Selapuq dengan saq taat lẽq prẽntah-prẽntah-Ne, idup lẽq dalem Allah, dait Allah araq lẽq dalem ie pade. Dait ite nenaoq bahwe Allah araq lẽq dalem ite, sẽngaq Ie sampun ngicanin Roh-Ne tipaq ite.

1 Yohanes

Video 1 Yohanes 3

Ikuti Kami:

KONTAK | PARTISIPASI | DONASI