Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siruh, kudeng apeh kirayehneh awa Taman luk pangeh biré kuan tau pad amung-amung tau miak tetanen ku anak-anak Allah: idi kali' rungen tau ini anakNeh. Idi ini punneh tana' ini na ngiti netau, ngaceku tana' ini na ngiti Allah.
2 O amung-amung luk inanku mawa, nekini tau ini anak-anak Allah, idi nateh tau kali' kudeng apeh luk mangun kuan tau muci. Iamo' tau kali' idi kareb Ieh pangeh megala', tau pana' mepad kudeng Ieh, ngaceku tau nier Neneh mepad kudeng Ieh idi.
3 Anid-anid lemulun luk merapet inan Keristus ineh, matar bururneh pad ieh meligan mepad kudeng Keristus pana' meligan.
4 Idé-idé luk nganau' sala', ieh pana' ngelaba ukum Allah ngaceku sala' ineh, ieh ineh ngelaba ukum.
5 Muyuh kali' Keristus ineh pangeh ginala' pad Ieh ngiu' amung-amung sala' idi bang Neneh ineh na luk idi sala'.
6 Idé-idé luk mulun bang Keristus, na ieh megéi' nganau' sala', idi teh idé-idé luk megéi' nganau' sala', nateh ieh nekali' Keristus idi na ieh ngiti Neneh.
7 O anak-anakku, aleg muyuh uen lun naluk! Lemulun luk nganau' luk matu ineh, ieh teh matu, mepad kudeng Keristus matu teh.
8 Lemulun luk megéi' nganau' sala', ieh nacing ratnan Iblis, ngaceku Iblis ineh nganau' sala' rat pun-pun. Ini punneh Anak Allah pangeh ginala', pad Ieh miak ngusag amung-amung kekamen Iblis ineh.
9 Idé-idé luk tinganak ratnan Allah, na ieh megéi' nganau' sala', ngaceku ulun Allah idi bang neneh, idi na ieh megéi' nganau' sala', ngaceku ieh tinganak ratnan Allah.
10 Ini tanu'neh anak-anak Allah idi anak-anak Iblis pana'. Idé-idé luk na nganau' luk matu ineh baken ieh anak Allah, kudeng ineh teh lemulun luk na mawa inan kinanakneh.
11 Bala luk pindenger muyuh rat pun-pun, ieh ineh do' tau mawa seburur dengan seburur.
12 Aleg tau ini mepad kudeng Kain, luk nacing ratnan Luk Dat, idi nengaté kinanakneh. Anunké punneh ieh nengaté neneh? Ngaceku amung-amung kekamen Kain dat, iamo' kekamen kinanakneh ineh matu.
13 O kinanak-kinanakku, aleg muyuh mawa kudeng lun bang tana' ini megateh nemuyuh.
14 Tau kali' tau ini pangeh nepuit ratnan até amé' inan ulun, ngaceku tau mawa inan amung-amung kinanak. Idi lemulun luk na mawa lutep bang até.
15 Idé-idé luk megateh inan kinanakneh, ieh ineh selemulun luk ngaté; idi muyuh kali' seburur lemulun luk ngaté na luk idi ulun luk meruked bang neneh.
16 Ratnan luk kudeng ineh tau kali' awa luk matu: Keristus nemaré ulunNeh ngaceku tau. Idi do' tau pana' maré ulun tau ngaceku kinanak-kinanak.
17 Kudeng seburur lun do' kali' kinanakneh masi', iamo' na méi' neneh, kudeng apehké ieh miak ngamo awa Allah idi bang niatneh?
18 O anak-anakku, aleg tau mawa dengan bala idi dengan dila'mo', iamo' dengan kekamen idi dengan luk matu.
19 Ratnan luk kudeng ineh tau kali' netau nesemuet bang luk matu, idi tau miak ngeletep niat tau pa kiung Tuhan.
20 Kudeng niat tau ngesala' netau, tau kali' Allah ineh meluun rayeh ratnan niat tau, idi Ieh kali' luk amung-amung.
21 O amung-amung luk inanku mawa, kudeng niat tau na ngesala' netau, kali' rungen tau mekuu' pa kiung Allah.
22 Anun-anun luk pituen tau, tau miak ngalap rat Neneh, ngaceku tau maya' amung-amung ukumNeh, idi nganau' anun-anun luk petulu denganNeh.
23 Ini ukumNeh, ieh ineh, do' tau manu inan ngadan AnakNeh Yésus Keristus, idi mawa seburur dengan seburur mepad kudeng luk icuk Keristus kuan tau.
24 Lemulun luk maya' ukum-ukum Allah, ieh mulun bang Allah, idi Allah mulun bang neneh. Idi ratnan ini tau kali' idi Allah mulun bang netau, ieh ineh ngaceku Roh luk biréNeh kuan tau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA