Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kakěllako kai kereapa Ruata e kụkěndag'i kitẹ, hakịu i kitẹ e niakuwe kere manga anạ'E. U mambeng kerene i kitẹ e kai manga anạ u Ruata. Kai ene hakịu runia ral᷊akisẹ̌ ini e wẹ̌gaweng kitẹ, batụu dunia e wẹ̌gawen Duata.
2 Manga anạ u sěmbaụ ikẹ̌kěndagẹ̌! Orasẹ̌ ini e i kitẹ kai manga anạ'u Mawu Ruata, kaiso kakakoạ i kitẹ e ren tawẹ nạl᷊ahẹ. Kaiso i kitẹ e masingkạ u kamageng i Kristus e ruměnta, i kitẹ e sarung mariadi kere i Sie, u i kitẹ e sarung makasilo si Sie su ral᷊ungu kakakoạ e kahěngang.
3 Patikụ taumata apam piạ lẹ̌harapeng ini si Kristus, mẹ̌děndiagạ batangenge takadeạu mamben těngadẹ̌be susi, burěsi wọu rosa e kerẹewe i Kristus e kawe mal᷊aing susi.
4 Taumata kụ nẹ̌dosa e, limampa titan Mawu; u rosa e kai ral᷊awang su manga titan Mawu Ruata.
5 I kamene masingkạ u i Kristus diměnta waugu měndẹ̌dasẹ̌ dosan taumata, ringangu masingkạu tawẹ dosa su watangenge.
6 Kěbị taumata kụ nẹ̌biahẹ̌ nasěmbaụ dingangi Kristus, tawe hanesẹ̌ měbẹ̌baradosa. I sai měngkai měbẹ̌baradosa e, tawe nakạsilo si Kristus arau tawe nakạkiral᷊a.
7 Manga anạku, kumbahang mapakawalan sai-sai wue mapakapal᷊idi kamene. I saing měkẹ̌koạ kapulun Duata e kai anạ u Ruata kerẹewe i Kristus kawe Ahusu Ruata.
8 Kai arawe i saing měngkai měbẹ̌baradosa e ute kai anạ u setang, u setange kai měbẹ̌barạdosa reng dokeng bọu tětạe. Kai waugu ini e Ahusu Ruata e riměnta mědeạu měnggoghahẹ̌ munaran setang.
9 I sai-saịewen nakoạ Ahus'u Ruata e tawe měngkai mẹ̌baradosa, batụu lulung Mawu Ruata e sẹ̌sane měngkai ene si sie. Ual᷊ingken Duata e kai i Amange, ute i sie e, tawe měngkai mẹ̌barạdosa.
10 Kai ini e pẹ̌kakiral᷊aěngu manga anạ u Ruata ringangu manga anạ u setang: i sain tawe mẹ̌kakoạ kapulun Duata, arau ta kumakěndagu anạ u sěmbaụ e, i sie wal᷊inewe anạ u Ruata.
11 Deng dokeng bọu tětạe seng nipaul᷊ikangu habarẹ̌ ini e si kamene: I kitẹ e harusẹ̌ mẹ̌kakakěndagẹ̌ sěmbaụ su wal᷊ine.
12 Kumbahang bue i kitẹ makoạ kere i Kain, makoạ anạ u setang kụ měmate tuarine sẹ̌sane. Unụe i Kain němate tuarine? Batụu apan nikoạ e kai nẹ̌sal᷊a, arawe apan kinoạu tuarine e kai nihino.
13 Ual᷊ingu ene manga anạ u sěmbaụku, abe kěngkaherang kereu taumatan dunia e mẹ̌binsị i kamene.
14 I kitẹ masingkạ u i kitẹ e seng simẹ̌bang bọu papate, bọu e něngal᷊ing sol᷊ong pẹ̌bawiahẹ̌ tutune. I kitẹ masingkạ u ene, u i kitẹ e kụkěndagu sěndinganeng i kitẹ. Taumata tawe kumakěndagẹ̌ e, ute i sie wẹ̌dang su kawasan papate.
15 Taumata kụ měbẹ̌binsị u anạ u sěmbaụ e ute kai tahapěmate ringangu i kamene masingkạ u tahapate e tawe kawuakengu pẹ̌bawiahẹ̌ tutune ringangu kakalẹ̌.
16 Kětạeng kere ini ral᷊enge i kitẹ makakasingkạu mẹ̌kakakěndagẹ̌ e sěmbaụ dingangu wal᷊ine: i Kristus seng nanarakangu pẹ̌bawiah'E waugi kitẹ. Ual᷊ingu ene, i kitẹ e harusẹ̌be měnarakangu pẹ̌bawiah'i kitẹ e waugu manga anạ u sěmbaụ i kitẹ!
17 Mạeng pẹ̌sěngkatau kụ mạnaghuang arětạ mạngělemboe kụ makasilo anạ u sěmbaụe kinakawusang, kụ tawe mẹ̌tul᷊ung anạ u sěmbaụ e ene, kụ kereapa wue i sie makapẹ̌berau i sie kụkěndagu Ruata?
18 Manga anạku! Kumbahang i kitẹ kětạeng kụkěndagẹ̌ su wiwihẹ̌ arau kětạeng dingangu wawera. Karimạko i kitẹ e kuměndagẹ̌ben kakěndagẹ̌ tutune, ipakal᷊ahẹ su kakanoạ i kitẹ kahěngang.
19 Kai kerene katatainge tadeạu i kitẹ e makoạbe rekenangu manga anạ u Ruata e kahěngang, mase ral᷊ungu naung'i kitẹ e mal᷊enehẹ̌ su těngon Duata.
20 I kitẹ masingkạ u kereu i kitẹ e iapakasal᷊an dal᷊ungu naung i kitẹ e, ute kasingkạ u Mawu Ruata e nangělembong kasěllahe wọu kasingkạ i kitẹ e, u i Sie kai masingkạ u patikụ sabarang.
21 Kụ manga anạ u sěmbaụku ikẹ̌kěndagẹ̌, kereu naungi kitẹ e tawe mapẹ̌sal᷊ang kitẹ e, ute i kitẹ makapẹ̌těngomben Duata e ringangu karal᷊oahẹ̌.
22 Kụ apan dẹ̌dorongang i kitẹ si Sie, sarungbe makahombang, batụu i kitẹ e matuhụ su apan titan'E mase měkẹ̌koạ apam makạl᷊ahimpulu ral᷊ungu naung'E.
23 Laorone si kitẹ e ute kai: I kitẹ e hinong mangimang su Ahus'E, i Yesus Kristus, kụ i kitẹ e harusẹ̌be mẹ̌kakakěndagẹ̌, kerẹewe semben ilẹ̌orong Kristus e si kitẹ.
24 Patikụ taumata apam matuhụ su manga titan Duata e, měbẹ̌biahẹ̌ mạkauhu Ruata, ringangu Ruata e nasěmbaụ dingangi sire. Mase i kitẹ e masingkạu Ruata e kai wiahẹ̌, nasěmbaụ dingangi kitẹ, batụu i Sie seng nangonggọu Rohkẹ̌ e si kitẹ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA