Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ya aboto ba dõdõda ha wa'ebua wa'omasi Lowalangi khõda, irege tefaduhu'õ ita tobali ono Lowalangi. Sindruhu da'õ wa no ono Lowalangi ita. Da'õ mbõrõ wa ulidanõ si lõ sõkhi andre lõ aboto ba dõdõra ita, bõrõ me ulidanõ andre lõ saboto ba dõdõra Lowalangi.
2 Ya'ami ira talifusõ ni'omasi'õ! Ono Lowalangi ita iada'e, ba lõ nasa mu'oroma'õ khõda, hewisa ita dania. Ba no ta'ila wa na so Keriso, tobali ita dania si mane Ya'ia, bõrõ me tanehegõ dania Ia, hewisa Ia zindruhunia.
3 Dozi niha sanõtõna da'e khõ Keriso, i'amoni'õ mbotonia, ihaogõ ia moroi ba horõ si mane Keriso gõi si lõ horõ.
4 Niha samazõkhi horõ, no lasawõ goroisa Lowalangi; bõrõ me horõ andrõ no fanawõ oroisa Lowalangi.
5 Ba no mi'ila wa so Keriso ba wangeheta horõ niha, ba wa lõ hadõi horõ sa'ae ba mboto-Nia.
6 Ba fefu niha sauri ha sambua awõ Keriso, ba lõ latohugõ wamazõkhi horõ. Niha si lõ mo'aetufa wamazõkhi horõ, lõ nasa falukha ira khõ Keriso ba ma lõ nasa saboto ba dõdõra.
7 Ya'ami iraonogu, bõi mitehegõ ifaelungu ami niha, haniha ia gõi. Niha samalua somasi Lowalangi, no ono Lowalangi, si mane Keriso gõi si no Ono Lowalangi.
8 Ba niha si lõ mo'aetufa mamazõkhi horõ, no ono Gafõkha ia, bõrõ me i'otarai mbõrõta ifazõkhi horõ Afõkha. Da'õ wa tohare Nono Lowalangi ya'ia ba wanudugõ halõw̃õ Gafõkha.
9 Niha si no tobali Ono Lowalangi, lõ ifatohutohu wamazõkhi horõ, bõrõ me no i'okhõgõ gamuata Lowalangi. Bõrõ me no Amania Lowalangi, andrõ ibõhõi wamalua horõ.
10 Da'e gamaehutania Nono Lowalangi ba ono Gafõkha: Haniha zi lõ mamalua somasi Lowalangi, ba si lõ mangomasi'õ talifusõnia, ba tenga Ono Lowalangi ia.
11 I'otarai mbõrõta no mu'ombakha'õ duria da'e khõmi: Wa lõ tola lõ faoma ta'omasi'õ nawõda.
12 Bõi si mane Ka'ino ita, si no tobali ono Gafõkha irege ibunu dalifusõnia samõsa. Hadia mbõrõ wa ibunu dalifusõnia Ka'ino? Bõrõ me ngawalõ nifaluania oi si sala, ba ngawalõ nilau dalifusõnia, no samalua somasi Lowalangi.
13 Bõrõ da'õ ya'ami ira talifusõgu, bõi ahõlihõli dõdõmi na fatuwu ba niha gulidanõ ami.
14 No mi'ila wa no aheta ita moroi ba wa'amate, ba awu'a ita ba wa'auri sindruhu. No aboto ba dõdõda da'õ, bõrõ me ta'omasi'õ nawõda. Niha si lõ mamalua fa'omasi, no nifatõrõ wa'amate nasa ia.
15 Ba niha si fatuwu ba dalifusõnia no samunu niha, ba no mi'ila wa samunu niha lõ i'okhõgõ wa'auri sindruhu, si lõ aetu.
16 Ba no aboto ba dõdõda wa'omasi Lowalangi: No Itehegõ wa'auri-Nia Keriso salahida. Ba ya'ita gõi lõ tola lõ tatehegõ wa'aurida salahi dalifusõ!
17 Na so samõsa niha sokhõ harato gulidanõ andre, ba na i'ila ambõ khõ dalifusõnia, ba lõ omasi iforoma'õ wa'ahakhõ dõdõnia khõ dalifusõnia andrõ, hewisa niha si mane da'õ tola iw̃a'õ wa sangomasi'õ Lowalangi ia?
18 He ya'ami iraonogu! Bõi ha ba mbawa ba ma ha ba wehede manõ ta'omasi'õ nawõda. Ya ta'omasi'õ faoma fa'omasi sindruhu, soroma ba mbuabuada.
19 Da'e zinangea tafalua ba wangi'ila wa farahu ita ba niha si otarai Lowalangi, irege tola sahono ita tanõ fõna Lowalangi.
20 No ta'ila wa na iw̃a'õ tõdõda fasala ita, aboto ba dõdõda wa abõlõ ebua Lowalangi moroi ba wangi'ilada andrõ, ba oi I'ila ma'afefu.
21 Tobali, ya'ami ira talifusõgu ni'omasi'õ, na lõ iw̃a'õ tõdõda fasala ita, ba lõ ata'u ita wangondrasi Lowalangi.
22 Ba hadia ia ni'andrõda khõ-Nia, ba Ibe'e khõda, bõrõ me ta'o'õ goroisa-Nia ba tafalua zomasi dõdõ-Nia.
23 Da'e gamakhoita-Nia khõda: Lõ tola lõ faduhu dõdõda khõ Nono-Nia, ya'ia Yesu Keriso, ba lõ tola lõ faoma ta'omasi'õ nawõda si mane si no I'oroi'õ Keriso khõda.
24 Ba fefu niha solo'õ amakhoita Lowalangi, tobali ha sambua ba khõ Lowalangi, ba Lowalangi ha sambua khõra. Ba no ta'ila wa Lowalangi ha sambua khõda bõrõ Geheha Lowalangi, nibe'e Lowalangi khõda, samaduhu'õ ba dõdõda da'õ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA