Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Uwa nakidorofu 'o nyawa gee yosiriaika de de ngona, ma 'ena nakigaro la yosigisene 'ani demo-demo, de nakidiai 'onaka matero ka to ngona ni deaka. 'O do-dogu'uruka nakidiai matero ka 'ani 'esa moi.

² 'O ngeweka yope-pereki ge'ena to ngona ni 'esa, 'o mo-mosolese nakidiai 'isoka to ngona 'ani biranga de ni singina 'itebi-tebini.

³ Nakihoromati 'o nge-ngeweka yobao-bao, gee ma gou-goungu kayomatengokau.

⁴ Ma nako 'o bao-bao gumuna la 'ami ngowaka de mi dangono de ma 'ena, ge'ena mi ngowaka de mi dangonou 'isira-sira salingou mikalesangi 'o bao-bao gumuna de manga woa ma dodaku. La 'ona yabalasi manga balusu de manga edete manga singina ma 'ofi. Sababu ge'enau ma Jo'oungu ma Dutu 'awi singina yadaene.

⁵ 'O ngeweka yobao-baoku gee ma gou-goungu kayomatengokau de komoi-moiwau yakiriwo, yomasinganono duga ka ma Jo'oungu ma Dutuka. 'O wange de 'o obiri koitogu-togumuwa yomalahidoa ma ngale yomaga'asoko wakiriwo.

⁶ Ma nako 'o bao-bao gee yomau ka manga kia sonaa 'ikudai de yoduaka ka to 'ona manga mau yamoteke, 'ona ge'ena kaimatero de yosongenokau ngaro kayowango-wangosi ma.

⁷ Salingou nakisingano-nganono 'iodumu ge'ena, la manga 'ahu 'uwa 'itorou.

⁸ Ma nako moikani koyakiriwowa manga 'esa moi, 'ifoloiosi gee kayomasiwoa-moiku, 'ona ge'ena yomasipongonokau manga ngo-ngakuka; so de koyongaku-ngakuwa ma 'onasi 'ifoloi manga 'ahu 'itorou.

⁹ 'O bao-bao manga ronga niosingosama 'o bukuku ge'ena ka gee manga 'umuru 'o taunu nagi butanga de 'isiie de ma sira yongaamoko ka ma moi;

¹⁰ 'o kawasa yanako manga di-diaioka 'itero, 'isoka gee manga ngowaka yomadaamokokau yapaliara yosidi-diai; yoduaka 'o nyawa yadawongo manga woano; yakileleani 'o nyawa yongaku-ngakuka; yakiriwo 'o nyawa yosusa-susaka; de yadiai yosigou-goungu 'o sagala manarama gee yaowa-owa.

¹¹ Ma 'o bao-bao gee koyoperekiwasi manga ronga 'uwa nialefo. Sababu nako manga nyafisuu yamao 'ifoloi 'ikuata, dua 'ona yomau yongaamokoli de yaparenokau manga jaji ma Kristusika,

¹² de 'ona yosowono sababu koyosingounuwa manga jaji ma Jouka ma ngale koyongaamokuwau.

¹³ De 'ifoloiosi gee 'o 'orasi ya'umo-'umo yosupuwosama 'o nyawa manga woa-woaka. De 'ifoloiosi 'itorou ge'ena 'ona yomadotoko 'o nyawa manga ronga ma dorou yodiai, de yomadi-diriwo 'o nyawa manga hali de yosijarita 'okia naga gee koyadaenuwa yosibicara.

¹⁴ Ge'enau so ngoi tomau 'o bao-bao kayope-perekiwasi ge'ena kayomodokasi ngaro, la 'o ngowaka yamake de manga woa ma dodaku yaleleani, la nanga saturuu 'uwa yamake 'o 'orasi ma ngale yosito-torou nanga ronga.

¹⁵ Sababu naga de ma 'ena 'o bao-bao yolibakau yodomoteokau 'o Tokata ma Koana.

¹⁶ Ma nako 'o ngeweka mimoi mongaku-ngaku naga 'ami 'esa moi yobaokou, muna salingou makiriwo 'o bao-bao go'ona; 'uwa makisipidilika ka 'o jamati yakiriwo. De koge'ena, 'o jamati 'idadi yoriwo 'o bao-baoka gee manga 'esa moi koi'iwa.

¹⁷ 'O jamati ma balusu gee manga manarama ya'ao yaowa-owa, yadaene 'ifoloi niakibaraguna de manga parasengi 'ilape modidiku, de 'ifoloiosi gee yotangaro 'o Habari ma Owa yositotara de yodotoko.

¹⁸ Sababu ma Jo'oungu ma Dutu wi bukuoka 'isilefoku: "'O sapi gee 'imanarama yadoko-doko 'o gandum ma ngale ma sakuroka yosipidili, ge'ena ma 'uru 'uwa niapusukoka la 'idadi 'i'odomo." De mita, "'O nyawa gee yoma-manarama, to 'ona de manga hak ma ngale yamake manga parasengi."

¹⁹ 'Uwa nomaha-mahamaka gee 'o jamati ma balusu moi yakikalaki nako ma sakisii koi'iwa. Duga nako la ma sakisii yamididi bolo yaruange ge'ena nosigisene.

²⁰ 'O nyawa gee 'o sowono yodiai, salingou nakitawanono 'o jamati 'iodumu manga bionoka, la gee 'iregu-regu yakimodongo.

²¹ Ma Jo'oungu ma Dutu de ma Kristus Yesus manga bionoka, de mita 'o sagala mala'ekati gee ma Jo'oungu ma Dutu wairi-iriki ma bionoka, ngoi toga'asoko tosigou-goungu, la ngona namoteke 'o do-dotoko dakunguku gee tonidongosekau, de 'uwa noiri-iriki.

²² 'Uwa kaifoloi 'itaiti 'ani giama nakidatami moi manga saeke ma dekuku ma ngale nakisitatapu nakigoraka yodadi ma Jo'oungu ma Dutu wi gilaongo; nako 'o nyawa yosowono, 'uwa ngona mita nisidaatete. Nomajaga la kanotebi-tebini.

²³ De sababu ngona 'ijaga nopanyake, 'uwa duga ka 'o 'akere no'oke-'okere, ma ma eta na'okere 'o 'anggur la 'ani doda 'isanangi.

²⁴ Naga 'o nyawa munuka koyaki'urusuawasi 'ena panakokau manga sowono. Ma to 'iregu-regu 'ona 'iduanginosi 'asa panako.

²⁵ Koge'enali mita, 'o sagala di-diai yaowa-owa ge'ena munuka kapodanakoka. De ngaro naga gee kopanakowasi ma dua kapanakoka.

1 Timotius

Video 1 Timotius 5

Ikuti Kami:

KONTAK | PARTISIPASI | DONASI