Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dang niku keras ngebutong jelma sai lebih tuha jak niku melainko uraudo ia ngedengi cawa-cawamu seolah-olah ia bakmu. Perlakukodo jelma-jelma ngura sebagai puari,

² rik bebai-bebai tuha sebagai emak. Bebai-bebai ngura hagani niku perlakuko sebagai adik, jama sikap sai murni.

³ Hormati randa-randa sai benor-benor hurik tenggalan.

⁴ Kidang kik sai randa ngedok anak-anak rik umpu-umpu, tian anodo sai mula-mula harus dikeni pengertian bahwa tian wajib memperhatiko kaum keluarga tian, rik ngebalos budi ulun tuha rik nenek tian. Mani hal senodo nyenangko hati-Ni Allah.

⁵ Randa sai temon-temon tenggalan rik mak ngedok sapa-sapa sai dapok meliharani, angkah beharap jama Allah. Di rani di bingi ia terus bedua jama Allah untuk ngilu tulungan-Ni.

⁶ Kidang randa sai gering hurik besenang-senang, radu mati meskipun ia masih hurik.

⁷ Sampaikodo petunjuk-petunjuk inji jama tian, in tian hurik tanpa cela.

⁸ Kidang kik wat jelma sai mak melihara sanak puarini, lebih-lebih keluargani tenggalan, ulun udi menyangkal kepercayaanni; ia lebih burak jak jelma sai mak percaya.

⁹ Angkah randa sai memenuhi syarat-syarat injuk reji ngasi dikurukko mik delom daptar randa-randa: umorni harus mak kurang jak enam puluh tahun, tumbai angkah sekali kawin,

¹⁰ tekenal sebagai bebai sai ngelakuko hal-hal sai betik injuk misalni: radu betik-betik ngebalakko anak-anakni, senang nerima kuari-kuari minok di lambanni, ngelayani jelma-jelma percaya, ngebantu jelma sai susah rik temon-temon ngelakuko sunyin guai sai betik.

¹¹ Dang dikurukko mik delom daptar udi randa-randa sai masih ngura. Mani kik rasa birahi tian jadi kuat nihan, tian haga kawin luot; rik ninggalko Almasih.

¹² Maka tian besalah mani mungker janji sai dikeniko jama Ia.

¹³ Lagi muneh tian ngetok-ngetokko waktu jama luah kuruk lamban ulun. Rik sai lebih burak lagi, iado bahwa tian belajar ngefitnah gelar ulun bareh rik nyampori urusan jelma rik nyawako hal-hal sai mak patut dicawako.

¹⁴ Udido sebabni nyak haga in randa-randa ngura kawin luot, mansa anak rik ngurus rumah tangga, in musuh-musuh ram mak mansa kesempatan untuk ngeburak-burakko gelarni ram.

¹⁵ Mani wat randa-randa sai radu sesek nutuk ruh jahat.

¹⁶ Kidang kik sai bebai Kristen ngedok anggota keluarga sai radu jadi randa, ia harus ngebantu randa-randa udi; dang naganko jemaah sai nanggung tian. Jama injuk reno jemaah dapok ngebantu randa-randa sai mak ngedok sama sekali sanak puari.

¹⁷ Sai jelma mimpin jemaah sai ngelakuko tugas, patut dikeni penghargaan rua kali lipat, terutama nihan tian sai rajin bekhotbah rik ngajar.

¹⁸ Mani delom Alkitab tetulis, "Jawi sai sedang ngilik-ilikko gandum untuk ngelepasko biji gandum jak bulirni dang disalok bangukni", juga, "Jelma sai beguai, berhak nerima upahni".

¹⁹ Dang nerima tuduhan tehadap sai mimpin jemaah, kecuali kik diperkuat ulih rua jelma saksi atau lebih.

²⁰ Jelma sai bebuat dusa, harus diingokko di hadap sunyin jemaah, in sai bareh jadi rabai.

²¹ Di hadap-Ni Allah, Isa Almasih, rik malaikat-malaikat sai tepilih, nyak ngilu nihan in niku nutuk petunjuk-petunjuk inji tanpa sakwa sangka tehadap sapa pun, rik tanpa memihak-mihak.

²² Dang geluk nihan ngepikko culuk atas sai jelma guna ngeresmiko pengangkatanni sebagai jelma sai ngebantu Tuhan. Kik ulun sai bedusa, dang nutuk terlibat delom dusa udi. Jagado dirimu in tetap murni.

²³ Dang lagi nginum way gaoh; nginumdo juga cutik anggor untuk nulung pencernaanmu, mani niku risok meruyuh.

²⁴ Dusa sebagian jelma semakkung diadili, radu jelas keliakan. Kidang dusa sai bareh ampai kepandaian radu jak seno.

²⁵ Reno juga perbuatan-perbuatan betik langsung keliakan. Rik sai mak mudah keliakan sekalipun mak dapok tesegok.

1 Timotius

Video 1 Timotius 5

Ikuti Kami:

KONTAK | PARTISIPASI | DONASI