Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ndaq side rengas lẽq dengan saq toaqan lẽman side, laguq bẽng ie nasẽhat maraq amaqde mẽsaq. Peringet dengan-dengan saq kodẽqan maraq semetonde mẽsaq, dait dengan-dengan nine saq toaq maraq inaqde mẽsaq.

² Dengan-dengan nine saq bajangan harus side perlakuang maraq adiqde mẽsaq, siq angen saq tulus.

³ Pade hormatin bebalu-bebalu saq tetu-tetu idup mẽsaq.

⁴ Laguq lamun sopoq bebalu bedowẽ bije atao bai, ie pade saq penembẽq harus tebẽng pengertian bahwe ie pade wajib merhatiang keluarge ie pade, dait bales budi dengan toaq dait papuq ie pade. Sẽngaq hal nike saq nyenengang Allah.

⁵ Bebalu saq tetu-tetu idup mẽsaq, dait ndẽqne bedowẽ sai-sai saq meliharaq ie, cume beharep lẽq Allah. Kenjelo kekelem ie tekun bedo'e nunas tulung lẽq Allah.

⁶ Laguq bebalu saq demen idup beseneng-seneng, sampun matẽ timaq ie masih idup.

⁷ Sampẽang petunjuk-petunjuk niki tipaq ie pade, adẽq ie pade idup ndẽq bedowẽ cacat cele.

⁸ Laguq lamun araq dengan saq ndẽq meliharaq semeton jarine, lebih-lebih keluargene mẽsaq, dengan nike murtat; ie lengẽan lẽman dengan saq ndẽq beriman.

⁹ Cume bebalu saq bedowẽ syarat-syarat niki saq bau tame dalem daptar bebalu-bebalu: Umurne harus ndẽqne kurang lẽman enem dase taun, saq cume sekali merariq,

¹⁰ terbukti jari dengan nine saq ngelaksaneang hal-hal saq solah, meliharaq bije-bijene jangke belẽq secare bagus, bẽng dengan nyodoq lẽq balẽne, ngelayanin dengan-dengan saq percaye, nulung dengan-dengan saq susah, dait pacu-pacu ngelaksaneang segale macem pegawẽan saq solah.

¹¹ Ndaq tamaq ojok dalem daptar nike bebalu-bebalu saq masih bajang. Sẽngaq lamun napsu birahine masih kuat, ie pade mẽlẽ merariq malik, dait bilin Almasih.

¹² Make ie pade salaq sẽngaq nilas janji saq teicanin tipaq ie dait datengang hukuman lẽq diriqne mẽsaq.

¹³ Selain nike ie pade girang mayus dait sugul tame ojok balẽ dengan. Dait saq lengẽan malik, ie pade berajah pitnah aran dengan lain dait turut campur lẽq urusan dengan lain, dait ngeraosang hal-hal saq ndẽq patut teraosang.

¹⁴ Keranaq nike tiang mẽlẽ adẽq bebalu-bebalu saq masih bajang merariq malik, bedowẽ bije, dait ngurus keluargene, adẽq musuh-musuhte ndẽq mauq kesempatan jari ngelengẽ-lengẽang arante.

¹⁵ Sẽngaq araq bebalu-bebalu saq sampun sesat turut Belis.

¹⁶ Laguq lamun sopoq dengan nine saq percaye lẽq Almasih bedowẽ semeton jari saq sampun jari bebalu, ie harus nulung bebalu-bebalu nike; ndaq alurang jemaah saq nanggung ie pade. Siq care nike jemaah bau nulung bebalu-bebalu saq tetu-tetu ndẽq bedowẽ semeton jari.

¹⁷ Pemimpin jemaah saq ngelaksaneang tugasne secare solah, patut tebẽng penghargean due kali lipet, terutame gati ie pade saq rajin hotbah dait ngajahang.

¹⁸ Sẽngaq lẽq dalem Kitab Suci tetulis, "Sampi saq kenyeke begawẽan ngicaq-icaq gandum jari nyugulang tolang gandum ndaq tetungkem biwihne", dait maraq nike ẽndah, "Dengan saq begawẽan berhak nerimaq upaqne".

¹⁹ Ndaq percaye tuduhan tipaq sopoq pemimpin jemaah, kecuali lamun tebuktiang siq due saksi atao lebih.

²⁰ Dengan saq gawẽq dose, harus teperinget lẽq julun selapuq jemaah, adẽq saq lain jari takut.

²¹ Lẽq arepan Allah, Deside Isa Almasih, serte malaẽkat-malaẽkat saq Ie pilẽq, sanget siq tiang tunas adẽq side turut petunjuk-petunjuk niki ndaq bedowẽ rase curige lẽq sai juaq, dait ndaq bepihak lẽq sai-sai.

²² Ndaq side becat gati toloq imende lẽq atas sopoq dengan jari ngesahang pengangkatanne sebagẽ pelayan Tuhan. Lamun dengan lain bedose, ndaq milu terlibat lẽq dalem dose nike. Jagaq diriqde adẽq tetep suci.

²³ Ndaq malik nginem aiq doang; laguq inem ẽndah anggur sekediq adẽq solah idap tiande, sẽngaq side girang sakit-sakitan.

²⁴ Dose separo dengan sendẽqman teadilin sampun penggitan secare jelas. Laguq dose dengan lain baruq tetaoq sesampun teadilin.

²⁵ Maraq nike ẽndah perbuatan-perbuatan solah langsung penggitan. Dait timaqne ndẽq mudaq penggitan, ndẽqne bau terus teseboq.

1 Timotius

Video 1 Timotius 5

Ikuti Kami:

KONTAK | PARTISIPASI | DONASI