Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nee makasara mangonteaka langgai anu natuakapa pade iko, tapi popatoramo ia ante tesa nalusu nasimbayu eva nipoviamu ka tuamamu mboto. Popatoramo langgai namuda nasimbayu eva nipoviamu ka sampesuvumu mboto.
2 Popatoramo mombine natuakapa pade iko nasimbayu eva tinamu mboto. Popatoramo mombine namuda nasimbayu eva pompatudukimu ka tueimu mboto, bo pakabelo ala pokainggumu bo pekirimu masipato.
3 Bilamo bo tulungimo timbala-timbala anu mpuu-mpuu ledo ria tona nompeili ira.
4 Tapi ane maria anana bara tupuna, ira haitumo masipato rapatuduki mokolu mantulungi totuara mboto bo mombabalasi kabelo ntotuara. Haitumo pokainggu nabelo anu nompakadamba rara nu Alatala.
5 Timbala anu mpuu-mpuu natuvu saitona bo ledo mpuu naria isema-sema mompiarana, aga natuvu manjarumaka Alatala. Eo bongi ia nosambaya njuu merapi tulungi nte Ia.
6 Tapi timbala anu natuvu aga nompesana-sana, ia eva tomate, nau karona da natuvu.
7 Ulimo petevai-petevai hitu ka ira ala ira matuvu ante pokainggu anu ledo namala rasalai ntona.
8 Tapi ane maria tona ledo nantulungi sampesuvu-sampesuvuna, nemopa ira sambanua, tona haitu nompoara pepatuduki nakana. Nadaapa ia pade tona ledo nomparasaya.
9 Timbala anu masipato rasuaraka sangana riara buku timbala ratulungi ntopomparasaya, aga mombine umuruna nagana onopulu mpae, anu nipoberei aga sanggani.
10 Bo nisani ntonamo pokaingguna nabelo. Jonjona: nipakambasona pakabelo anana, nadamba rarana nantarima torata riara banuana, nijampangina topomparasaya, nitulungina tona nasusa, bo ia nabiasamo novia mpengaya-ngaya anu nabelo.
11 Tapi nee rasuaraka sanga ntimbala da namuda riara buku haitu. Sabana, ane dota rarara mompene sampe mombadagi dota rarana mangoseaka Kristus, ia madota rapoberei vai.
12 Bo kaupuna ia mambela pehuku sabana ia nombaliunaka pojanjina aga mokarajaa ka i Kristus.
13 Ledo aga haitu, timbala namuda bara aga majadi tosanda bo aga manjayo-njayo mompene ri sou ntona. Ia ledo aga majadi tosanda ia muni manggeni tesa bo mombagalo urusa ntona ntanina bo motesa mpengaya-ngaya anu nadaa anu ledo masipato ratesa.
14 Haitu sampe niuliku timbala-timbala da namuda aginamo moberei vai bo moana bo mompakasiayu avura mboto ala nee radekei loga ka balita manjalai kita.
15 Niuliku ivesia sabana naria mamimo timbala nasalandala bo domo nangoseaka dota i Kristus, tapi aga nangoseaka dota Magau nu Seta.
16 Tapi ane mombine topomparasaya naria sampesuvuna natimbala, ia kana mombatulungi timbala haitu. Nee aga rapalambana todea sampomparasaya mantulungi timbala haitu. Ivesiamo, todea topomparasaya mompakule mantulungi timbala-timbala anu mpuu-mpuu ledo ria tona nompeili ira.
17 Pakeni ntodea topomparasaya anu nabelo pekeniakara, masipato rabila ronggani kadeana pade tona ntanina, nelabipa ira anu nompasimbuku mpuu nompatuduki bo nompatolele Tesa nu Alatala.
18 Masipato kita mombabila pakeni ntodea topomparasaya, sabana riara Buku Gasa naria tesa nanguli ivei: "Nee rapou sumba nu japi tempo ia noini pae." Bo naria tesa ntanina nanguli, "Topokarajaa masipato mantarima gajina."
19 Ane maria pakeni ntodea topomparasaya nirai ntona, nee mutarima ane ledo maria randua bara tatalu sabi mompakakana perai haitu.
20 Tapi ane pakeni ntodea haitu mpuu-mpuu novia dosa, ia kana raonteaka ri ngayo ntodea ala topomparasaya ntanina maeka movia dosa.
21 Timotius, ri ngayo Alatala bo i Yesus Kristus bo *malaeka-malaekaNa anu nipelisiNa, kuuli ka iko: oseakamo parenta-parenta nitesaku pangane ante noa rara. Nee mompelenje bo nee manjairaka.
22 Nee masalisa gaga mombadika palemu ri karo ntona manganggataka ia majadi pakeni ntopomparasaya. Paresa ntani ruru ingguna, apa ane ia movia dosa ngena, ikomo rapakasala. Nee sampe karomu matekeni nte dosa ntona ntanina. Jagaimo pokainggumu mboto ala iko batena matuvu ante pokainggu nagasa.
23 Tumo aga uve nggoo muinu, tapi inu muni sakide uve *anggur ala mompakulisi tai likomu, apa iko nasaro nadua.
24 Naria tona nalantomo dosana nau dopa nitangara. Tapi dosa ntona ntanina damo riara potangara pade nalanto. Jadi nee masara gaga manganggataka tona majadi pakeni ntopomparasaya.
25 Ivesia muni pokainggu nabelo, biasa nalanto nikita ntona. Tapi nau ledo nikita, kana rakita ngena, apa pokainggu nabelo ledo namala ratabuniaka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA