Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto ma Jo'oungu ma Dutu wi 'umati gee niopiakorika 'o Pontusoka, 'o Galatiaka, 'o Kapadokiaka, 'o Asiaka, de 'o Bitiniaka niaika, ngini niiriki ma ngale niodadi ma Jo'oungu ma Dutu wi 'umati moteke nanga Dea, ma Jo'oungu ma Dutu 'awi mau. De 'o Ngomasa 'Itebi-tebini nisidadiokau 'o 'umati 'itebi-tebini duga ka to ma Jo'oungu ma Dutu, la ngini niosingounu ma Yesus Kristusika de nisitebini de to 'una 'awi 'aunu gee 'ipoa de wosongene. Ngoi 'o Petrus 'o Yesus 'awi su-suloko, tomau la tanu ma Jo'oungu ma Dutu winikula 'o co-catu de 'o singina 'isa-sanangi kaidogo-dogo.

² (1:1)

³ Nou ngone nanga 'amalaha positedene ma Jo'oungu ma Dutude, nanga Jou Yesus Kristus ma Deade! 'Una wonasibosono ma sala, so 'o 'ahu ma sungi wonakula, ma ngekomo ma Yesus Kristus wosongenokau de wisimomikoli. Ma ngale ge'ena so nanga singina nganono 'ikuata.

⁴ Ngone pongano-nganonou pomadamake 'o co-catu gee ma Jo'oungu ma Dutu wadua-duangou ma ngale 'awi 'umati, ge'ena la 'o co-catu gee 'idaotikau 'o sorogaaka, so koitorouwau bolo koiwederuawau, bolo ma sure koiisanguawau.

⁵ 'Iodumu ge'ena ma ngale ngini, sababu ngini niongaku. So de ma Jo'oungu ma Dutu 'awi kuasa winisowohi la niadawongo 'o laha gee 'idua-duangou, dua wosidumutu 'o dunia ma do-dogumoka.

⁶ Sababu ge'ena ngini tanu niomore-morene, ngaro ma 'orasi ne'ena ngini 'o 'orasi moi salingou niobalisasi ngano niamake 'o bo-baja 'i'ini-'inioka.

⁷ 'O bo-baja 'i'ini-'inioka nidutuku, ge'ena ma dumutu la 'isinyata 'ato ma gou-goungu winingaku ma Kristusika. 'O guraci kaidadiokasi 'itorou mita yataili de 'o 'uku. De to ngini nia ngo-ngaku ge'ena 'ifoloi 'ibaraguna de 'o guraci so salingou yataili mita la 'idadi 'ikuata. De ge'enau dua ngini nisiarene de nihoromati de nisiie gee ma 'orasi ma Yesus Kristus woboali.

⁸ Ngini winisibosono 'unaka ngaro ma sira ngini koma'iwa winimake, de winingaku 'unaka ngaro ma 'orasi ne'ena ngini kowinimakewa. Ge'enau so ngini niomorene de niamao nia singina ma sanangi kokiawa positaili.

⁹ Sababu nia ngo-ngaku ma dumutu niamakekau, ge'ena la niamake 'o laha.

¹⁰ 'O laha ne'enau gee 'o nabii-nabii yalega ma diai, de yosidemosira ma co-catu ge'ena gee dua ma Jo'oungu ma Dutu wokula nginika.

¹¹ 'Ona yalega ma diai kokia de muruoka dua 'o laha ge'ena 'idadi, 'isoka gee ma Kristus wi Ngomasa 'onaka naga ma dumutu. Ma 'orasi ge'ena 'awi Ngomasa 'isidemosira 'onaka 'o sagala sangisara gee salingou ma Kristus wamoku, de 'awi kumati gee ge'ena 'iduanga de.

¹² 'O nabii-nabiika go'ona ma Jo'oungu ma Dutu wongose 'ato 'okia naga gee yosidemosira ge'ena ka 'onawa ma sirete yomaleleani, so 'ena ngini nileleani; ge'ena la 'okia naga gee ma 'orasi ne'ena nio'isene 'iwai-waiti 'o nyawano gee yositota-totara 'o Habari ma Owa ma ngale ma Yesus Kristus. 'Ona nisitotara ge'ena de 'o Ngomasa 'Itebi-tebini ma kuasa gee yakisidingotuku 'o sorogaaku. De 'o mala'ekati mita 'imau yanako 'o habari gee 'ona yositota-totara ge'ena.

¹³ Sababu ge'ena nimajaga-jaga. Nimasitiari de nimasinganono ma gou-goungu 'o co-catuka gee dua nikula nginika ma 'orasi ma Yesus Kristus woboali.

¹⁴ Niosingounu ma Jo'oungu ma Dutuka, de 'uwa nio'ahu moteke ka to ngini nia mau 'isoka ma sira, ma 'orasi ngini kowininakowasi ma Jo'oungu ma Dutu.

¹⁵ Ma 'ena salingou niotebini naga 'o sagala moi-moioka 'ania 'ahu ma sigoronaka 'isoka ma Jo'oungu ma Dutu gee wini'aso-'asoko nginika, 'una ge'ena wotebini.

¹⁶ Naga 'o Buku 'Itebi-tebinoka 'isilefoku ma Jo'oungu ma Dutu wongose 'ato, "Nginioka salingou koi'iwa 'o dorou sababu ngoioka 'o dorou koi'iwa."

¹⁷ Gee ngini nimalahidoa, ngini niongose 'ato ma Jo'oungu ma Dutu ge'ena to ngini nia Dea. Aa, ma Jo'oungu ma Dutu gu'unau gee 'o nyawa wahakimi kowoiri-irikuwa moteke moi-moi manga di-diai. Sababu ge'ena ma 'orasi ngini ka ne'ena 'o duniakasi matero kanioboano, 'ania 'ahu ma sigoronaka salingou winisitedene ma Jo'oungu ma Dutu.

¹⁸ Ngini nianakokau 'ato nituusokau ma ngale nisipidili 'o 'ahuoka gee ma faedaa koi'iwa, gee niadawongino nia edete de nia dotumoka. Nisituusu ge'ena ko de 'o guraciwa de 'o saakawa gee kaitorouokasi,

¹⁹ ma 'ena de gee 'ihali-hali moi, ge'ena la ma Kristus ma sirete, gee wodadi 'isoka 'o domba 'isisuba-suba ma Jo'oungu ma Dutuka gee koibo-bolohiwa bolo ko ma kiawa moi 'ikurangi.

²⁰ 'Una ge'ena ma Jo'oungu ma Dutu wiirikokau ka 'o dunia ma koisidadiwasi. De dua gee 'o dunia ne'ena ma do-dogumu 'isori-sori, 'una woboa 'o duniano ma ngale winisilaha.

²¹ Ma ngekomo 'una, so ngini niongaku ma Jo'oungu ma Dutuka gee wisimomikokali ma Kristus wosongenuku, de wisitedene. So ma Jo'oungu ma Dutukau ngini niongaku, de 'unakau ngini nimasinganono.

²² Sababu ngini niosingounu ma Jo'oungu ma Dutu wi do-dotoko, so ngini niotebini de niakidora de nia singina ma gou-goungu 'o nyawa-nyawaka gee ka 'o ngo-ngaku moi de de ngini. Sababu ge'ena, ngini salingou nimakadora moi de moi de nia singina ma gou-goungu.

²³ Sababu de ma Jo'oungu ma Dutu gee wo'ahu kaisi'ado-'adonika wi demo, ngini nia 'ahu ma sungiou gee nanga Deano woka-kakali gu'una, so ko 'o nyawanowa gee koika-kakaliwa.

²⁴ Naga 'o Buku 'Itebi-tebinoka 'isilefoku, "'O nyawa 'iodumu 'isoka 'o 'ubutu, de manga kumati 'isoka 'o 'ubutu ma bunga. 'O 'ubutu ge'ena kaimaaioka, de ma bunga kaitotaoka.

²⁵ Duga ma Jou 'awi demo ge'ena kaisi'ado-'adonika." 'O demo ge'ena la 'o Habari ma Owa gee nisitota-totarokau nginika.

1 Petrus

Video 1 Petrus 1

Ikuti Kami:

KONTAK | PARTISIPASI | DONASI