Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rat ni Pétrus, rasul Yésus Keristus — Kuan amung-amung lemulun luk pinili', ieh ineh lun sakai luk nepatad déi' Pontus, Galatia, Kapadokia, Asia, idi Bitinia.
2 Muyuh pangeh pinili' maya' pian Allah Taman, idi muyuh pangeh linigan RohNeh mangun ku pupuNeh luk meligan, pad muyuh maya' bala Yésus Keristus idi baruin ku dara'Neh. Idi do' katu idi awang amé'-amé' mula' kuan muyuh.
3 Do' tau ngubur Allah Taman Tuhan tau Yésus Keristus! Ngaceku éi'Neh luk pelaba rayeh, Ieh nemaré ulun luk mebaruh kuan tau, dengan nui Yésus Keristus ratnan até. Ngaceku ineh tau mepanu' ku rapet luk mulun.
4 Ineh punneh tau merapet ngalap peruan luk rayeh luk tinina' Allah kuan pupuNeh, ieh ineh luk na miak melu, idi na miak melutak, idi na miak mekarang, idi luk dinug bang surga kuan muyuh.
5 Peruan ineh isa' dengan lalud Allah ngaceku anu, pad muyuh miak ngalap ulun luk inau' temina' idi luk miak uen ngegala' bang aco kekiped.
6 Bang luk kudeng ini muyuh mawang niat, sagan pana' segageh mo', kudeng petulu, muyuh ngalap susa' bang anid-anid tutun,
7 pad anu muyuh luk matu uen ngegala'. Amas pana' luk miak melu ineh uen nutun ku apui, idi anu muyuh luk meluun raga ratnan amas, na miak na uen nutun, pad ieh meraben. Kareb ineh muyuh miak ngalap ubur, rayeh, idi dita', kareb Aco Yésus Keristus uen ngegala'.
8 Muyuh mawa Neneh; sagan pana' muyuh nateh nenier Neneh. Muyuh manu Neneh sagan pana' muyuh na miak nier Neneh. Idi muyuh pelaba awang niat dengan awang idi rayeh luk na miak belén,
9 ngaceku muyuh ngalap ulek anu muyuh, ieh ineh ulun kuan niat muyuh.
10 Idi ratnan ulun ineh, nabi-nabi pangeh nenakap idi nengelio do'-do', idi ideh nemada' ratnan katu luk miak barén Allah kuan muyuh.
11 Ideh nenakap karebneh idi kudeng apeh ayu kareb luk bida' Roh Keristus luk idi bang nedeh. Idi Roh ineh nemaré kali' atun ratnan amung-amung dereh Keristus, dengan amung-amung rayeh luk miak macing muci.
12 Idi kuan nabi-nabi ineh pangeh ginala' Allah, baken ideh ngakem kuan bururdeh sebuleng, iamo' kuan muyuh, bang luk amung-amung luk pangeh bida' kuan muyuh nekini lemaba nabi-nabi ineh luk tigio Roh Meligan luk paneh icuk macing rat surga pad ngacing Bala luk Do' kuan muyuh. Idi ratnan luk kudeng ineh melaikat-melaikat pana' sikal kali'.
13 Ngaceku ineh do' terawé muyuh metadem, idi do' muyuh ngerawé, idi merapet tu-tu inan peruan luk miak macing kuan muyuh kareb Yésus Keristus uen ngegala'.
14 Do' muyuh mulun mepad kudeng anak-anak luk lutep maya' ukum, idi aleg muyuh mulun maya' pian burur muyuh luk atun ineh, luk bang kareb muyuh mebacé.
15 Iamo' mepad kudeng Tuhan luk pangeh nenawar nemuyuh ineh meligan, kudeng ineh teh muyuh pana' do' meligan bang amung-amung ulun muyuh.
16 Ngaceku pangeh inayud, "Do' muyuh meligan ngaceku Ui meligan."
17 Kudeng muyuh neten Neneh Taman, luk ngukum lemulun dengan na mili' lemulun iamo' maya' mepad kudeng luk kikem anid-anid burur, idi do' muyuh matot seruked muyuh tudo bang tana' ini.
18 Muyuh kali' idi muyuh pangeh inuli' ratnan ulun muyuh luk mo'-mo' luk nacing ratnan tepun muyuh, baken dengan binaweh luk miak melu, mepad kudeng pirak idi amas,
19 iamo' dengan dara' luk meligan, luk mepad kudeng dara' anak dumba luk na melutak idi na mesala', ieh ineh dara' Keristus.
20 Ieh pangeh pinili' Allah kareb nateh tana' ini pinudut, iamo' pangeh ginala' bang kareb ini luk kekiped ngaceku muyuh.
21 Idi ngaceku Keristus muyuh pangeh mangun ku lemulun luk manu inan Allah, luk pangeh nenui Neneh rat arang lun naté, idi luk nemaré rayeh kuanNeh, pad anu muyuh idi rapet muyuh lutep bang Allah.
22 Ngaceku muruh pangeh nemaru' niat muyuh idi lutep maya' luk matu, pad muyuh mawa dengan amung-amung kinanak dengan na siayu, idi do' muyuh mawa seburur dengan seburur, dengan niat luk matu.
23 Ngaceku muyuh pangeh tinganak mebaruh idi baken ratnan inul luk miak maté, iamo' luk na miak maté, ieh ineh dengan bala Allah luk mulun idi luk meruked.
24 Maya' kudeng luk inayud, "Amung-amung lemulun mepad kudeng uduh idi amung rayehdeh mepad kudeng busakneh, Uduh ineh mekarang, idi busakneh merurug,
25 iamo' bala Tuhan ineh macing ruked-ruked." Idi bada' ini, ieh ineh Bala luk Do' luk bida' kuan muyuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA