Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Surad gini dau dang, Petrus, anai Yesus Krisdus enin eng eigdoumesa dan. Hanoba en arougb dan naugb dan desai Mer Geigouhw eisaugb en dou lusud laugwan toua. Dan dog surad gini dou yeng yedag irinya se Pontus, Galatia, Kapadokia, Asia, dara Bitania meren hancob yen yaugwan. Anai maman Mamina Allah en ecinaga deb dau sug yen youman Mer Geigouhw eisaugb Krisdus gin, kaba, dag yen yemesbes an en mer gin touwero. Doba yen meigdoc ebdebin an en terimda. Sug en ecinaga augwan deb dag ginohob, kaba, en ouci yen deb toua, aimo dau areg enin esedeb dangga naugb yen sug acgunogohob. Hanoba Mena Gogoufu ouci yen debinim dag Allah enin men lusud. Dauntoba sug Yesus Krisdus en mogwihi edu yen meigdoc mes ecabeci dau sesar augwanohob, kaba, yen yemohoiya en mer toua deitero. Doba yen yowun yenin meigdoc mes arjaga naugb yen yaimo en mer se areg en arougb yen an gin toua terimda. Dangga hang, dan dacgeij Allah naugb en medoc eigouhw an yen beiseisaugb namcir. Dara en eseyeiyo yen dara en eic gesgigouhwesa dou yen dougwo areg gecgu augwan terimda toua.
2 (1:1)
3 Eigouhw naugb maman man sijo dou maman Adehsud Yesus Krisdus en Mena Allah gin besesa terimda. Anai sug en medoc eineg an maman beiseisaugb namcir dag ginohob, kaba, maman mamomom toua deitero. Doba en eigdoumesa maman dau gomom aud maireseb menau gin touohob. Dara maman macinaga dag maireseb menau gin, kaba, emediyebeiya dau maman touwero. Doba eb naugb maman beb huhugb namcir. Anai maman macinaga dau sug Yesus Krisdus en omom sug nosa, kaba, dag en emomom terimda touwero. Doba Allah eigdoumesa en dau gomom aud maireseb menau geb huhugb gin touohob. Hang emeic dag maman maod mamina debsa Allah an gin dag buc gototo toua namcir.
4 Dangga hang, yen yemeija meijuwesa en an areg en esedeb naugb men lusud yen gin touwero. Doba sug en eic maireseb menau geb huhugb dou yen dag ginohob, kaba, yen yod meijina debsa en dag en emeic augwan gini dou yen toues. Anai en obdeb augwan gini se bogo naugb yenohob. Hang emetaha, dara emogor, dara emombrerij dau yen touwero. Doba ebsugeb naugb yen terimda.
5 Anai sug yen meigdoc ebdebin an Krisdus dag ginohob, kaba, Allah esedougwo yen dara men goubesa namcir. Dauntoba yen yemobsara dau ucina aud maireseb menau geb huhugb gin touwero. Doba yen yaimo ucina gini terimda edebeij Lona Sug Ouwedoc gin toua. Anai en esedeb naugb sug en ens dau maireseb menau geb huhugb gini eb ainyes se Lona ingga dou yen toues. Hang areg en esedeb se bogo naugb yenohob gin, kaba, hom emediyebeiya dau yen touwero. Doba en esedougwo augwan naugb yen terimda.
6 Dangga hang, sug aremer aingma aingma eb naugb yen, kaba, yen meigdoc emeijesan gin touwero. Doba sug Allah esedeb areg geb se bogo augwan naugb yen dag ginohob, kaba, yen meigdoc erleij icira gin namcir sug yen yaimo ucina mog erij gin toua. Anai gogom gin, kaba, eisa bainyen yen cum cum dangga dous, aimo dau areg Allah enin eng esedeb naugb yenohob.
7 Anai en eicara dag gini dou yen, dauntoba yen yens yenin ainyes dou en dag yen meigdoc ebdebin an en dag misenohobei? Era dag aibibra dousei? Anai sug lusud louwan lecinaga emas misen, kaba, len lec se smougb toua. Sug edag emas misenohob, kaba, smougb emait touwero. Doba sug emedag emas misenero, kaba, cum smougb ait bediyebeiya namcir. Dangga hang, sug lusud lainyen emas misen dag ginohob, kaba, Allah ainyen yen toua. Dauntoba yen yaiyan meigdocesem naugb yen yes agadgeij terimda. Anai emas misen gin, kaba, cum ediyebeiya dous. Doba yen meigdoc ebdebin an gin, kaba, mera eisaugb bedreg dau emas misen gin namcir. Dangga hang, sug Allah en eiya dag yen yemobsara dau ucina mog erij ginero, doba yen yes agadgeij naugb yen meigdoc ebdebin an en terimdohob, kaba, eic dag en eimiman dau meijen geicara gini se Lona sug en ens Yesus Krisdus ainyes dou lusud laugwan toua. Hanoba en ogugwo men gogouf cucugb ingma dou yen. Dara en eigdoumesa yen meijoho agas se Lona ingga toua namcir.
8 Sug nosa, kaba, yen yemeiya Yesus gini en mog mougwa hom touwero. Doba yen meigdoc gororougb enohob. Dara iteitogini, kaba, yen yemeiya en touebma. Doba yen meigdoc ebdebin an en terimda. Dangga hang, eic dag yen meigdoc erleij dara agahugouhw medam an en bedreg dau areg yen yecic dou lusud gini toua namcir.
9 Anai yen yecinaga dau sug yen yemobsara dau Krisdusero. Doba yen meigdoc ebdebin an en terimda, kaba, dag maireseb menau geb huhugb emediyebeiya dau yen touwero. Doba Allah emeic dou yen toues.
10 Eisaugb maireseb menau geb huhugb gin, kaba, leng lesai Allah en moro sug nosa len logmac. Hanoba len lesa lauweila dougwo namcir naugb len lecinaga meijouhw dau augwan gini asesa toua. Anai len lens deb dau areg geigouhw gini gedig Allah esedeb naugb yen dou lusud sug nosa touohob.
11 Len leicara dag gin, anai sug Krisdus esa Mena Gogoufu se len merdoc mes sug nosa, kaba, en enara dou len deb, endagai: Cum, kaba, sud hom en emagunya debin yen. Hanoba en aimo ucina mog erij naugb yen, dauntoba en eigdoc yen dau sesar men gogom augwan. Dauwohob, kaba, Allah emeigdoumesa en moho agas medam ucugb toues. Dangga hang, sug len louman dau ginohob, kaba, len meru laisa naugb len lecinaga dau areg Mena Gogoufu ens dou lenohob meijouhw augwan asesa toua. Hanoba len leijidougwo Allah an gin toua, lendagai: Areg Mena Gogoufu en ens dou emen endag sud hom en emen naugb en eigdoc emen dau sesar men gogom augwan, kaba, gini naugb emen touei? Era naugb lusud se lona daiyamo gacin dousei?
12 Doba Allah auni dou len dag areg len lesai gin, kaba, emousa len se lona inggaro. Doba eb naugb yeng daiyamo gin dous. Dara areg Mena Gogoufu ens deb dou len sug nosa ingga, kaba, yen youman dau augwan gini dag misen touohob. Anai Allah esa en dau bogo. Hanoba en eic mou ouforoho dara goubesa dou leng lesai Mer Geigouhw eisaugb Krisdus naugb len ledidib meijouhw dau augwan gini asesa dou yen touohob. Dara leng lesai Allah en moro sug nosa, kaba, len louwan lecinaga dau meijouhw augwan gin dousero. Doba malaikadir len toua louwan lecinaga meijouhw dau augwan gini asesa toua. Dobnaro.
13 Dangga hang, sug Allah en esedeb areg geigouhw augwan deb naugb yen dag ginohob, kaba, yen yemeisan gurog touwero. Doba yen yesedeb yen meigdoc mes dara yen meiju naugb yen yaimo areg geigouhw toua terimda. Hanoba yen meiju auti ucina aud maireseb menau geb huhugb. Dara yen yod meijina debsa Allah an areg en os dou yenohob dara yen meigdoc augwan toua namcir. Anai se Lona sug en ens Yesus ainyes dou lusud, kaba, en emogugwo areg geigouhw gini dou yen toues.
14 Dara yen yemeicara yemaiga Allah men hancob touwero. Doba yen yeicara yaimo en an areg en arougb yen an gini terimda. Hang yen yemaimo areg yen meigdoc etrij icira aud areg gecgu hom toua deitero. Doba se meijen geicara augwan, kaba, yen yeicara yaimo areg asesa Allah enin medoc mes dous. Aninim dag Allah enin toua emaimo areg gecgu touwero. Doba se men geicara augwan, kaba, en aimo areg gedag beim dara obosboro an lusud toua terimda. Yen yeicara dag gini terimda, anai se lona sug yen yemecinaga en dag misenbuma, kaba, yen yaimo areg gecgu ginohob.
15 (1:14)
16 Augwan gini esogwa deisa areg Allah arougb maman an se Surad Injil Meb Mohon deb sug nosa touohob, endagai: Indan geicara augwan ecabeci namcirohob. Dangga hang, meijen geicara augwan, kaba, ecabeci namcir toua.
17 Dara Allah gin, kaba, en emobsara aud sud hom touwero. Doba sug en ogod aremer aga lusud, kaba, en ogod augwan gini dara en medoc edag beim an gin terimda, aimo dau meren geicara an len toua. Dangga sug yen meijireseb sousougb se cinogo ginaba, kaba, yen yaimo areg en ouwan dareg yen meigdoc ahau dau en toua namcir. Anai sug yen yocuncum dou en, kaba, yen yeigdoumesa en moho dag yen Meijina ginohob.
18 Hang yen yemedreg dau en mer gin mougwa hom touwero. Doba yen yeicara yaimo augwan gini dara yen meigdoc hom terimda. Anai yen yecinaga dau sug Krisdus encoho aga yen sug nosa, kaba, en emeic areg getaha dag emas era perag naugb en emancoho aga yen touwero. Doba en eic enin dag domba gedig mougb mogud. Hanoba ecabeci namcir naugb en eigdoc yen dau yen meijemouwer meren gomnomna ogdoc en mogwihi mera eisaugb gin dous. Anai areg len lomnomnan deb naugb yen gin, kaba, mera emeisaugwero. Doba dag augwougb namcir.
19 (1:18)
20 En, kaba, Allah emouci en dau iteitogin touwero. Doba en ouci en deb naugb gini sug en emahasesei cinogo dara bogo touebma. Dangga se Lona Gouwedoc gin, hang Allah emesa en ainyes se cinogo gini naugb en ousa yen. Dauntoba en eigdoc yen dau sesar men gogom aud maireseb menau geb huhugb gin toua.
21 Ogdoc en, hang yen yemod meijina debsa Allah an areg gin augwan touohob. Hang gini emedag augwougb touwero. Doba areg yen meigdoc ebdebin an dara areg yen yod meijina debsa en an ginohob, kaba, augwan dag buc gototo naugb yen namcir. Anai Allah gin, kaba, eni sud hom gedig en eigdoumesa Krisdus dau gomom ucugb. Hanoba en eigdoumesa en moho se gogouf cucugb naugb yen touohob.
22 Dangga hang, yen meigdoc mog mog anim touwero. Doba yen yeic meijuwemougb esesa naugb yen meigdoc gororougwim dara yen meigdoc augwan toua terimda. Anai gareg en aimo Allah mer misen gin, kaba, en emaimo areg gecgu an en maguner dara en medamouwer se Krisdus len toua deitero. Doba en edu enin medoc mes dau aremer graga augwan namcirohob. Hanoba en aimo areg ecabeci dara obosboro an len dous.
23 Dara yen yemobsara dau gin touwero. Doba yen yeicara dag gini doum terimda. Anai Allah en mer gin, kaba, edag maireseb dara eb huhugb namcir. Hang emahwan yen aud en naugb en emeic maireseb menau geb huhugb dou yen toua. Dangga hang, yen yedag Allah mehir menau gin, kaba, emogdoc yen meijiner misen se cinogo gin touwero. Doba ogdoc yen Meijina Allah hom gin dous. Anai enin eng eis huhugb namcir.
24 Augwan gini esogwa deisa areg Yesaya en og deb se Surad Injil Meb Mohon deb sug nosa touohob, endagai: Lusud laugwan, kaba, ledag arec mec dous. Dara meren areg moho agas augwan, kaba, dag aremerij toua. Anai arec mec, kaba, cum en maga agaci. Dara merij toua, cum og an namcir.
25 Doba areg maman Adehsud en en deb ginohob, kaba, augwan emediyebeiya touwero, doba eb huhugb terimda. Dara yen, kaba, yen youman dau en mer gin touohob. Anai sug lusud lesai Mer Geigouhw eisaugb Krisdus dou yen sug nosa, kaba, len lens en mer gin eng dou yen dous.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA