Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sampesuvu-sampesuvu anu nipelisi majadi todea nu Alatala bo nonturo mpo topesovo nasimpotare ri umba-umba ri propinsi Pontus, Galatia, Kapadokia, Asia bo Bitinia: Sura hitu lako nte yaku, i Petrus, *suro i Yesus Kristus. Kuperapi Alatala mpuu-mpuu mabelo nte komiu bo nompakatinonto raramiu. Komiu nipelisi nTuamata Alatala majadi todeaNa nangoseaka niaNa mboto lako ri lamba pamulana. Bo Nosa Gasa nompakajadi komiu todea nagasa, nipatani ka Alatala, ala komiu matundu nte i Yesus Kristus bo dosamiu raampungiNa sabana raaNa natiti ri *kayu salib.

² (1:1)

³ Masipato kita mombatoiya Alatala, Tuama nTuputa Yesus Kristus! Nambaso mpuu asi mataNa ka kita, sampe nidekeiNa katuvu nabaru ka kita. Bo katuvu nabaru haitu nitarimata sabana i Yesus Kristus nipakatuvu mpanjili lako ri kamateNa. Haitumo sabana panjarumakata naroso.

⁴ Kita nanjarumaka manggava belo nipakasadia nu Alatala ka pura-pura todeaNa. Belo haitu ledo magero, ledo mapopo, ledo mabali, bo nijagaiNa ri suruga ka kita.

⁵ Sampesuvu-sampesuvu, komiu masipato mantarima belo haitu, sabana komiu nomparasaya i Yesus. Bo komiu batena nijagai nu Alatala ante kuasaNa ala komiu mamala mombarasai belo anu nasadiamo radekeiNa ka komiu ri kaupu nu dunia.

⁶ Komiu kana madamba-damba sabana belo nisarumakamiu haitu. Komiu kana madamba naupa sii-sii tempo komiu da natuvu ri dunia komiu nombarasai kasusa bo nambela mpengaya-ngaya pesori.

⁷ Patuju nu pesori-pesori haitu ala rasani kaliangu pomparasayamiu. Bulava nigonu ante apu ala rasani bara maria galona bara ledo. Pomparasayamiu noalipa pade bulava anu namala magero. Jadi pomparasayamiu kana rapesori muni ante mpengaya pesori. Bo ane pomparasayamiu mpuu-mpuu maliangu, komiu ratoiya bo rabila bo rapakaoge tempo i Yesus Kristus makava mpanjili ri dunia.

⁸ Nau ledo nikitamiu Ia bara ipia, komiu nompotove Ia. Bo nau ledo nikitamiu Ia sii-sii, tapi komiu batena nomparasaya Ia. Bo kadamba raramiu naoge mpuu sampe ledo rapakule mombasovadakana.

⁹ Nadamba mpuumo raramiu sabana nitarimamiumo asele pomparasayamiu, haitumo komiu nipakasalama lako ri pehuku sampe ri kasae-saena.

¹⁰ Nabi-nabi nu Alatala nggaulu nangelo pakabelo-belo ala rasanira berimba Alatala mompakasalama manusia lako ri dosara. Nibotosira belo nidekei nu Alatala ka komiu, anu nirasaimiu sii-sii. Nosa Gasa i Kristus riara ntaira nompopaisani ka ira kasusa bo kapari anu mambela ka i Kristus, bo nipopaisaniNa muni kuasa bo kaoge rakava i Kristus maliu kasusa bo kapari haitu. Tapi dopa nisani nu nabi-nabi berimba kadupa nu tesa-tesa nibotora. Haitumo sampe niparesara pakabelo-belo ala rasanira tempona bo berimba kadupana pura-pura anu nibotora haitu.

¹¹ (1:10)

¹² Bo Alatala nompakalanto ka ira anu nibotora haitu ledo nosinggambela ante ira mboto tapi nosinggambela ante komiu anu natuvu sii-sii. Kajadia-kajadia nibotora haitu, nipatolele ntopanggeni Kareba Belo ka komiu sii-sii. Nikenira kareba haitu ante petulungi Nosa Gasa nu Alatala, anu nipopanau lako ri suruga. Kakanana *malaeka-malaeka nTupu mboto nadota mangisani batuana kajadia-kajadia pangane anu nipatolele ka komiu.

¹³ Sampesuvu-sampesuvu, naria mamimo panjarumakata naroso. Sabana haitu, komiu kana mompakanoto raramiu bo mainga, bo maroo manjarumaka belo radekei ka komiu tempo i Yesus Kristus makava mpanjili.

¹⁴ Komiu kana matuvu mpo ana-ana nu Alatala anu natundu nte Ia. Nee mangoseaka dota raramiu nadaa anu nombakuasai komiu tempo komiu da natuvu ri kalandana.

¹⁵ Tapi komiu kana magasa ri mpengaya-ngaya anu nipoviamiu, sabana Alatala muni nagasa bo Iamo nompokio komiu majadi todeaNa.

¹⁶ Apa naria tesa nu Alatala riara Buku Gasa nanguli, "Komiu kana mokainggu magasa, sabana Yaku nagasa."

¹⁷ Sampesuvu-sampesuvu, komiu nanggasangai Alatala Tuamamiu tempo komiu nosambaya. Jadi komiu kana matuvu mekou nte Ia ane komiu da nonturo mpo topesovo ri dunia hitu. Apa Iamo mombatangara pura-pura tona nangoseaka pokainggura mboto bo Ia ledo nompelenje.

¹⁸ Pekoumo nte Alatala sabana nisanimiu mbotomo sompo nibayariNa mombakabasaka komiu lako ri katuvumiu nggaulu. Katuvumiu ledo ria gunana haitu, nipasialamiu lako nte ntotua nggaulu. Tapi Alatala nombakabasaka komiu lako ri katuvumiu nokolu haitu. Ledo nibayariNa sompo ante mbara-mbara anu ledo nainti evamo bulava atau salaka

¹⁹ tapi nibayariNa ante anu nelabi noali, haitumo raa i Kristus. I Kristus nireke mpo *ana bimba nadoli bo ledo nasala nisambale manjambei komiu.

²⁰ Dopame dunia nipajadi, Ia nipakatantu nu Alatala mami majadi topantolo dosa manusia. Bo ri tempo sii-sii napara kaupu nu dunia Ia nakava ri dunia hitu mompakasalama komiu.

²¹ Iamo sampe komiu nomparasaya Alatala. Alatala nompakatuvu mpanjili Ia lako ri kamateNa bo nombadekei kuasa bo kaoge nipokumaaka ka Ia. Jadi haitumo sampe komiu nomparasaya bo nanjarumaka Alatala.

²² Sampesuvu-sampesuvu, katuvumiu nipakagasamiu sabana komiu nangoseaka pepatuduki nakana. Haitumo sampe komiu namala nompotove sampesuvumiu sampomparasaya ante rara naliangu. Sabana haitu, posipotovemo ante rara mpuu-mpuu.

²³ Apa komiu nipajadi nu Alatala manusia nabaru, bo katuvumiu nabaru haitu ledo nopuna lako ri manusia anu mamate. Katuvumiu nabaru nopuna lako nte Alatala anu ledo mamate. Komiu nanggava katuvu nabaru haitu sabana komiu nomparasaya Tesa nu Alatala anu natuvu bo naroo sampe ri kasae-saena.

²⁴ Riara Buku Gasa nitulisi ivei: "Katuvu manusia pura-pura nasimbayu mpo kavoko, bo pura-pura kuasa bo kagayana mpo sese nggavoko. Kavoko haitu nalele bo sesena naronto.

²⁵ Tapi Tesa nu Alatala bate-batena sampe ri kasae-saena." Tesa nu Alatala haitumo Kareba Belo anu nipatolele ka komiu.

1 Petrus

Video 1 Petrus 1

Ikuti Kami:

KONTAK | PARTISIPASI | DONASI