Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Manga anạ u sěmbaụ umatẹ̌ pinilen Mawu Ruata, kụ nasawuhẹ̌ surarạganeng su wanuan Pontus, Galatia, Kapadokia, Asia ringangu Bitinia! Iạ e i Petrus, darolohang'i Yesus Kristus, měkẹ̌kahumangu mal᷊owọko Mawu Ruata e měngonggọu al᷊amatẹ̌ dingangu karal᷊unsemahẹ̌ mẹ̌dẹ̌dal᷊embo si kamene. I kamene e seng nipile nariadi ral᷊ohon jamạat'u Mawu natuhụ suhingidu Ruata i Amang. Dingangu Rohkẹ̌ u Ruata e napakariading kamene jamaatẹ̌ susi, nihae waugu Ruata, tadeạu i kamene tumuhụ si Yesus Kristus ringangu iapakasusin dahan'E.

² (1:1)

³ Mahịe i kitẹ mẹ̌dalo Ruata, i Amangu Mawung kitẹ i Yesus Kristus! I Sie měngkai kụkěndagi kitẹ hakịu ene i Sie něngonggọ si kitẹ pẹ̌bawiahẹ̌ buhu, dingangu napẹ̌bangung i Yesus Kristus kapia wọu kapapohonge. Kai ini e nakatoghasẹ̌ pělaharapi kitẹ.

⁴ I kitẹ mělẹ̌harapẹ̌ mědeạu makapěmusakạ kal᷊awọu al᷊amatẹ̌ kụ seng niriahin Duata waugu umat'E, mangal᷊ene kal᷊awọu al᷊amatẹ̌ mạdaresọ su sorga, hakịu tawe mal᷊ahenẹ, arau tamawawuhụ dingangu tạ turạ e.

⁵ Kěbị ene kai waụgi kamene, ual᷊ingu pangangimang i kamene su Mawu Ruata e. Tangu i kamene kai rẹ̌diagatengu kawasan Duata e, tadeạu i kamene makatarimạbe kasasal᷊amatẹ̌ seng mạdariahi sarung iapakal᷊ahẹ su ěllo pangěnsueěnge.

⁶ Ual᷊ingu ene ute, pakaral᷊uasẹ̌ko i kamene, maningbe orasẹ̌ ini e kạdodọ tempo e reng rụl᷊ahunsusa e watụ u i kamene kawe makạhombang haghin sasal᷊ukạ e.

⁷ Timonane ute kai pělahekangu měnsangbe kahěnga-hěngang i kamene e mạngimang su Mawu arau tala. Bul᷊aeng kụ mahenẹ̌ e mal᷊aing wẹ̌banikatengu putung. Kerene pangangimang i kitẹ e kai něngalembong kaarěgane wọu wul᷊aeng, kụ mal᷊aing harusẹ̌ banikateng tadeạu matoghasẹ̌. Kụ ual᷊ingu ene i kamene e sarung daloěng dingangu lẹ̌lahunggeětang dingangu iapakarangẹ su tempọen darěntan Yesus kapia.

⁸ I kamene e kụkěndag'i Sie, maniweng nạung kal᷊amona e i kamene e tawe nakasilo. Dingangu i kamene mạngimang si Sie maningbe orasẹ̌ ini e i kamene tawe nakasilo. Kai ene hakịu i kamene e mạhul᷊uasẹ̌, dingangu makạpěndang dal᷊iagẹ̌ masaria ta ikawera.

⁹ Batụu timonam pangangimang i kamene e seng kinaratingang, kụ kai kasasal᷊amat'u himukudi kamene e.

¹⁰ Kasasal᷊amatẹ̌ ini e kai tẹ̌titikang dingangu sẹ̌sẹ̌suiangu manga nabi e, ringangu i sire e mạněbal᷊u tatal᷊ěntụ u Ruata e sarung mawuạ si kamene e.

¹¹ I sire e mẹ̌naněsui měnsang kereapa wue ringangu angerẹ tempone hal᷊ẹ̌ ene mariadi, kere ipẹ̌sẹ̌sasěbạu Rohkẹ̌ i Kristus kụ seng ene su ral᷊ungu naungu watangeng i sire. Su tempo ene Rohkẹ̌ e nanẹ̌bal᷊u haghin sigěsạ kụ kahombangeng i Kristus ringangu mạanung kawawantuge kụ makarol᷊osẹ̌ e sarung si sire.

¹² Su manga nabi ene Mawu Ruata e něhabarẹ̌ u apang kinoạ i sire wal᷊inewe waugu pandungang i sire, kaiso kawe waugi kamene. Kụ kěbịewe apang kinaringih'i kamene mal᷊ahẹ bọu mělahabaru Injil'i Yesus Kristus. I sire mělẹ̌habaru ene si kamene ute kai ringangu kawasan Rohkẹ̌ u Ruata niroloh'E wọu sorga. Orelai manga malạekatẹ̌ e mal᷊aing mapulu makakasingkạu habarẹ̌ ikẹ̌keken sire ene.

¹³ Ual᷊ingu ene, pakarariagạko i kamene. Pakaral᷊ěndị dingangu pěmpěharapẹ̌be pakatinalung su tatal᷊ěntụ sarung mawuạ si kamene su tempon i Yesus sarung duměnta.

¹⁴ Pakatuhụko su Mawu Ruata, kụ kumbahang měngkai tụtuhụ kapulun biahu nạung kal᷊imona těntal᷊angbe wẹ̌gan Mawu Ruata.

¹⁵ Su sěmběkane, kaiso pakasusiko su patikụ apang koatengu, kerẹewe lai Mawu Ruata e nẹ̌kui si kamene e kai susi.

¹⁶ Su ral᷊ungu Winohẹ Susi kạbawohẹ u, "Pakasusiko i kamene, u Iạ e kai susi."

¹⁷ I kamene mẹ̌sěbạ Duata e kai i Amang su tempong kamene mẹ̌kal᷊iomaneng si Sie. Kụ Duata ene kai něhukungu taumata tuhụewe kakanoạ u sěmbaụ-sěmbaụ tawe měmamile ghahị. Ual᷊ingu ene ute karěngụewen bẹ̌dang ene su dunia ini e, ute i kamene pěmpěmantugẹ̌ko Mawu Ruata e su ral᷊ungu pẹ̌bawiahu.

¹⁸ I kamene e masingkạ u apa seng piněmaehẹ̌ baugu karal᷊iwir'i kamene wọu pẹ̌bawiahẹ̌ tạ kahumpakenge seng niẹ̌king'i upung gaghurang i kamene. Bawaehe wal᷊inewe apang mahenẹ, kere sal᷊aka arau wul᷊aeng,

¹⁹ kaiso kawe sěmbaụ arětạ kaarěgaěnge; kụ kai watangeng'i Kristus sẹ̌sane nakoạ kere rumba nisarakang su Mawu Ruata e tawẹ sěngkul᷊e ringangu tawẹ turạe.

²⁰ I Kristus nipilen Duata e reng dongkeng dunia tawẹ nạdiadi. Kụ su tempo kakạdanineng manga ěllo pěhěpusangu dunia ini e, i Sie ruměnta su dunia e tadeạu i kamene maambang.

²¹ Kai wọu anun Sie e i kamene harusẹ̌ mangimang su Mawu kụ seng napẹ̌bangung i Sie kapia wọu kapapohonge ringangu mapạkawantugẹ̌. Kụ kai Ruata e pạngimangeng i kamene ringangu kai su Mawu Ruata e lai pěmanggilangu pělaharap'i kamene.

²² Ual᷊ingu i kamene kawe masatia su těntiron Mawu Ruata ute i kamene hinong mẹ̌těngkawurẹ̌sing batangeng dingangu i kamene hinong kuměndagu l᷊awọ taumata mạngimang dingangu karal᷊uasẹ̌. Ual᷊ingu ene tangu i kamene e pẹ̌kakakěndagẹ̌ko sěmbaụ dingangu wal᷊ine e ringangu kasěllahu naungu.

²³ Batụu limiung hengetang'u Mawu Ruata kụ biahẹ̌ dingangu kakalẹ̌ e, i kamene sen nikoạ taumata wuhu kụ bal᷊inewe piněhanạ u taumata, kaiso kawe wọu i Amang kakalẹ̌ e.

²⁴ Su ral᷊ungu Winohẹ Susi mạbawohẹ kere ini, "Patikụ taumata e tabidạu rěmpugẹ̌, dingangu kěbị kawantugẹ̌ e tabidạu wurạu rěmpugẹ̌. Děmpugẹ̌ e mạlolang, dingangu wurạe lai mạhondosẹ̌;

²⁵ arawe hengetangu Mawu e mang tatapẹ̌ sarang marěngụ-děngụ." Hengetange kai Injilẹ̌ kụ seng nihabarẹ̌ si kamene.

1 Petrus

Video 1 Petrus 1

Ikuti Kami:

KONTAK | PARTISIPASI | DONASI