Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tanu ngini nimariwo ma ngale 'o nyawa niakidora de niadawongo 'o co-catu 'o Ngomasa 'Itebi-tebinino. 'Ifoloiosi ge'ena 'o co-catu ma ngale nia'akunu niositotara ma Jo'oungu ma Dutu 'awi demo.

² 'O nyawa gee yobi-bicara de 'o demo 'ihera-herangi, ge'ena ma dumutu ko 'o nyawakawa. 'Ona yobicara ma Jo'oungu ma Dutuka. Komoiwa yasahe 'okia naga gee 'ona yongose-ngose, sababu ka 'o Ngomasa 'Itebi-tebini so 'ona yobi-bicara 'okia naga gee ka ma Jo'oungu ma Dutu duga wanako.

³ Ma nako 'o nyawa gee yositota-totara 'o habari ma Jo'oungu Dutuno, ge'ena ma dumutu yositotara 'o nyawaka, ma ngale yakisikuata, yakisimagae, de yakiaru.

⁴ 'O nyawa gee yobi-bicara de 'o demo 'ihera-herangi ge'ena duga ka 'ona ma sirete yomasikuata, ma gee 'o nyawa yositotara 'o habari ma Jo'oungu ma Dutuno, yakiriwo 'o jamati la 'ifoloi yokuata.

⁵ Ma sureka nako ngini 'Esa moi nioodumu niadadi niosibicara 'o demo 'i'ini-'inioka gee 'ihera-herangi. Ma 'ifoloiosi 'isure ge'ena nako ngini nia'akunu niositotara 'o habari ma Jo'oungu ma Dutuno. Sababu 'o nyawa gee yositota-totara 'o habari ma Jo'oungu ma Dutuno, 'ona 'ifoloi yobaraguna de 'o nyawa gee yobi-bicara de 'o demo 'i'ini-'inioka 'ihera-herangi. Duga nako la ya'akunu yosiwaiti 'o demo 'i'ini-'inioka 'ihera-herangi gee yosibi-bicara ge'ena, ge'ena 'o jamati 'iodumu yamake ma faedaa.

⁶ Nako kogee ngoi toboa nginika de tobi-bicara de 'o demo 'i'ini-'inioka 'ihera-herangi, ge'ena ma faedaa ka ma eta ma koi'iwa! 'Imakaregu de nako ngoi tosiwaiti 'o demo moi ma Jo'oungu ma Dutuno, bolo tosiwaiti 'o kianikia ma ngale ma Jo'oungu ma Dutu, bolo tositotara 'o habari ma Jo'oungu ma Dutuno, bolo todotoko.

⁷ Tosi'ade-'ade 'isoka yosulingi de yomadukuti de ma 'ilingi koiwaituwa, so 'o nyawa koyosidongoowa 'okia ma nyanyi yosinyanyi.

⁸ 'O 'ade-'ade 'iregu moioli: Nako 'o torompet yauaka ge'ena ma no-nako yotagi yoparangi. Duga nako ma torompet yauwaka de ma 'ilingi koiwaituwa, ge'ena dua komoiwa yomasadia ma ngale yoparangi.

⁹ Koge'enali mita ngini gee niobi-bicara de 'o demo 'i'ini-'inioka 'ihera-herangi. Nako niosibicara 'o demo-demo gee koiwaituwa, komoiwa moi yasahe 'okia naga gee ngini niongose-ngose. 'Ania demo-demo ge'ena 'asa kayodingisanika koyosidongoowa.

¹⁰ Kokia naga ma gudaioka 'o demo-demo 'o duniaka ne'ena, ma 'o demo-demo ge'ena koi'iwa moi ma ngale koi'iwa.

¹¹ Ma nako ngoi kotasahewa 'o demo gee wimoi wosibicara, ge'ena ngoi tamaoku 'una ge'ena 'isoka 'o nyawa ma dudunino. Koge'enali mita 'una wamaoku ngoi 'isoka 'o nyawa ma dudunino.

¹² Ma ngale ngini ma sirete, ngoi tanako ngini nioduaka ma sala niamake 'o sagala co-catu 'o Ngomasa 'Itebi-tebinino. Ma 'ifoloiosi 'iparaluu ge'ena salingou ngini nimariwo ma ngale niapake niabarija gee yakiriwo 'o jamati yakisikuata.

¹³ Ge'enau so 'o nyawa gee yobi-bicara 'o demo-demo 'ihera-herangi, salingou yomaga'asoko ma Jo'oungu ma Dutuka la wakikula yadadi yosiwaiti 'okia naga yongose-ngose ge'ena.

¹⁴ Sababu nako ngoi tolahidoa de 'o demo 'ihera-herangi, ge'ena 'ai singinaka tolahidoa ma 'ai di-dibangi koimanaramuwa.

¹⁵ So ngoi salingou 'okia todiai? Neda dua ngoi tadiai: Ngoi 'asa tolahidoa de to ngoi 'ai singina ma mau, de mita de 'ai di-dibangi. Ngoi 'asa tonyanyi de to ngoi 'ai singina ma mau, de mita tomau tonyanyi de 'ai di-dibangi.

¹⁶ Sababu nako ngini nio'amalaha ma Jo'oungu ma Dutuka ka de 'ania singina ma mau duga, de naga 'o nyawa 'iregu koyasahewa 'o demo 'ihera-herangi 'o Ngomasa 'Itebi-tebinino ge'ena, ge'ena 'ona koyongosewa 'ato, "Ia ma goungu! 'Amin" 'ani 'amalaha ma betongo ge'ena, sababu 'ona koyanakowa 'okia ngini niongose.

¹⁷ Ngaro nia lahidoa ma ngale nio'amalaha ma Jouka posironga 'isureka, ma ge'ena ma faedaa ka ma eta ma koi'iwa sababu koyakisikuatuwa 'o nyawa 'iregu.

¹⁸ Ngoi to'amalaha ma Jo'oungu ma Dutuka sababu de ngini nioodumu ma ngoiosi 'ifoloide tobi-bicara de 'o demo 'i'ini-'inioka gee 'ihera-herangi.

¹⁹ Ma nako 'o lo-lomu ma sigoronaka ma ngale powisuba ma Jou, ngoi toduaka tapake 'o demo 'o betongo muruoni gee 'o nyawa 'iregu 'idadi yasahe, la 'uwa tapake 'o demo 'ihera-herangi ma betongo 'icaanoka ma koyasahewa. Ngoi toduaka koge'ena, la 'idadi 'o nyawa takidotoko.

²⁰ 'Esa moi riaka dodoto ka 'o ngo-ngaku moi! Tanu 'ania di-dibangi 'uwa 'isoka 'o ngowa-ngowaka. Tanu ngini 'isoka 'o ngowaka ma dingoono gee 'o dorou koyanakowasi yodiai. Ma nako 'o di-dibangioka ge'ena ngini salingou niodadi 'o balusu.

²¹ Naga 'o Buku 'Itebi-tebinoka 'isitulisuku konee, "Ma Jou wongose 'ato, 'Ma ngekomo 'o nyawa gee yobi-bicara de 'o demo-demo ma somoa, ngoi 'asa tobicara 'ai 'umatika ne'ena. De dua ma ngekomo 'o nyawa ma dudunino, ngoi 'asa tobicara 'ai 'umatika ne'ena. Ngaro koge'ena ma, 'ona yooluku yosigisene 'ai demo.'"

²² So 'o co-catu ma ngale yosibicara 'o demo-demo gee 'ihera-herangi ge'ena ma no-nako ma dumutu 'o nyawa gee koyongaku-ngakukawa, so ko ma dumutuwa 'o nyawa gee yongaku-ngakuka. De 'o co-catu ma ngale yositota-totara ma Jo'oungu ma Dutu 'awi mau, ge'ena ma no-nako 'o nyawa yongaku-ngakuka, so ko ma dumutuwa 'ato 'o nyawaka gee koyongaku-ngakuwa.

²³ Sababu ge'ena nako 'o jamati nimalomuno de nioodumu niobicara de 'o demo 'i'ini-'inioka gee 'ihera-herangi, la 'o nyawa ma dudunino bolo gee koyongaku-ngakuwa yoboa, ma raiokau dua 'ona yongose ngini nioodumu nito-togosanga!

²⁴ Ma nako ngini nioodumu niositotara 'o habari ma Jo'oungu ma Dutuno, de gee koyongaku-ngakuwa bolo 'o nyawa ma dudunino yoboa, ge'ena 'okia naga ngini nioodumu niositota-totara 'asa 'isidumutu 'o nyawa go'ona manga sowono de 'idadi yanako to 'ona manga sowono.

²⁵ 'O sagala dorou gee manga singina ma dodaka 'asa yanako, so 'ona 'asa yomasitipokoku de wisuba ma Jo'oungu ma Dutuka. 'Ona 'asa yongaku ma gou-goungu 'ato ma Jo'oungu ma Dutu naga nginioka.

²⁶ 'Esa moi riaka dodoto ka 'o ngo-ngaku moi! Ngini salingou niodiai koneda: Nako ngini nimatoomuno ma ngale winisuba ma Jou, munuka yonyanyi, munuka yodotoko, munuka yositotara 'o kianikia ma Jo'oungu ma Dutuno, munuka yobicara de 'o demo 'ihera-herangi, munuka yosiwaiti ma demo-demo ge'ena. Ma ge'ena 'iodumu niadiai salingou ma dumutu nimakariwo nimasikakuata.

²⁷ Nako munuka yomau yobicara de 'o demo gee 'ihera-herangi, salingou kayamididi bolo yaika 'ikudai ge'ena yaruange, ma yomamoi-moi. De salingou de ma 'ena yosiwaiti 'okia naga yongose yobi-bicara go'ona.

²⁸ Nako komoiwa yadadi yosiwaiti, ge'ena gee yobi-bicara de 'o demo 'ihera-herangi go'ona salingou yomarii-riidi 'o lo-lomuoka ge'ena. Madaka la 'ona yobicara ma Jo'oungu ma Dutuka ka manga singina ma dodaka duga.

²⁹ Yamididi bolo yaruange gee 'onaka de ma 'ena 'o habari ma Jo'oungu ma Dutuno, salingou yositotara ma habari ge'ena, de ma 'orasi ge'ena 'iregu-regu 'ona yatiba-tibangi 'okia naga gee yongose-ngose.

³⁰ Ma nako kogee 'o nyawa 'ireguoli gee yoboa-boano 'o lo-lomuoka ge'ena yomau yositotara 'o habari ma Jo'oungu ma Dutuno, ge'ena gee yobicara 'isira-sira go'ona salingou yomaogorikasi.

³¹ Koge'ena ma ngekomo, ngini nioodumu moi-moi 'idadi niositotara 'o habari ma Jo'oungu ma Dutuno; la ngini nioodumu 'idadi nimadamake 'o do-dotoko de 'idadi 'ifoloiosi niongaku.

³² 'O co-catu 'o Ngomasa 'Itebi-tebinino ma ngale yositotara 'o habari ma Jo'oungu ma Dutuno, ge'ena 'idadi 'o nyawa gee yositota-totara 'o habari ge'ena yosi'aturu.

³³ Sababu ma Jo'oungu ma Dutu 'una ge'ena woduaka 'isi'aturu yaowa-owa de pomarimoi, 'una kowoduakuwa 'iruahe. 'Isoka gee yadi-diai ma Jo'oungu ma Dutu 'awi jamati 'iodumoka

³⁴ 'o nge-ngeweka salingou kayomarii-riidi gee ma 'orasi 'o jamati 'imalomuno. 'Ona koyakisidabiwa yobicara. 'Ona koidadiwa yodadi saeke, ge'ena moteke 'o besesongo gee 'o Musa wositota-totara.

³⁵ Nako 'ona yomau yanako 'o kianikia, ge'ena salingou manga woaka 'asa de yosano manga rokatika. Koyadaenuwa nako 'o ngeweka mimoi mobicara 'o jamati ma lo-lomuoka.

³⁶ Ma Jo'oungu ma Dutu wi demo ge'ena ko nginiokawa de yaino! De 'o demo ge'ena 'isitotara duga ka nginikawa.

³⁷ Nako 'o nyawa naga yoma-mao manga co-catu de ma 'ena ma ngale yositotara 'o habari ma Jo'oungu ma Dutuno, bolo 'ona manga co-catu 'iregu 'o Ngomasa 'Itebi-tebinino, 'o nyawa go'ona salingou yanako 'ato 'okia naga gee tatulisuku ne'ena ge'ena 'o pareta ma Jouno.

³⁸ Ma nako naga munuka yooluku yadawongo ne'ena, 'uwa niakidaarika.

³⁹ Sababu ge'ena 'Esa moi, niomariwo ma ngale niositotara 'o habari ma Jo'oungu ma Dutuno, ma 'uwa koniakisidabiwa 'o nyawa gee yomau yobicara de 'o demo 'i'ini-'inioka gee 'ihera-herangi.

⁴⁰ Duga 'iodumu ge'ena salingou niadiai de nia gokoie yaowa-owa de 'isidi-diaiku.

1 Korintus

Video 1 Korintus 14

Ikuti Kami:

KONTAK | PARTISIPASI | DONASI