Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mi'odõdõgõ wamalua fangomasi'õ niha bõ'õ andrõ. Ba mi'odõdõgõ gõi wanõndra buala nibe'e Geheha Lowalangi andrõ, mendrua manõ wa'abõlõ ba wama'ema era'era dõdõ Lowalangi ba niha.
2 Si fahuhuo ba ngawalõ li sahõlihõli dõdõ andrõ, tenga ba niha fahuhuo ia; no khõ Lowalangi fahuhuo ia. Lõ saboto ba dõdõ hadia niw̃a'õnia, bõrõ me Eheha Lowalangi zangabõlõ'õ ya'ia wanguma'õ si ha sinangea Lowalangi zangila.
3 Ba zi tambai da'õ, niha sama'ema turia soroi Lowalangi, ba niha ifa'ema da'õ; ba wangabõlõ'õ ya'ira, ba ba wamarou tõdõra awõ wondrara tõdõra.
4 Si fahuhuo ba ngawalõ li sahõlihõli dõdõ andrõ, ha ya'ia samõsa i'abõlõ, ba hiza, sama'ema turia soroi Lowalangi, da'õ zanolo banua Niha Keriso ena'õ si tedou ira mifõna.
5 Ha wa'asõkhi na tola fahuhuo ami fefu ba ngawalõ li sahõlihõli dõdõ andrõ. Ba hiza, sabõlõ sõkhi na tola mituriaigõ gera'era dõdõ Lowalangi ba niha. Bõrõ me abõlõ ebua zama'ema turia soroi Lowalangi, moroi ba zi fahuhuo ba ngawalõ li sahõlihõli dõdõ andrõ; fabõ'õ na si fahuhuo ba ngawalõ li sahõlihõli dõdõ andrõ tola ifo'eluaha hadia niw̃a'õnia, ena'õ lasõndra gunania banua Niha Keriso.
6 Na mõi ena'õ ndra'odo khõmi ba fahuhuo ndra'o ba ngawalõ li sahõlihõli dõdõ, hadia guna khõmi da'õ? Ma'ifu lõ hadõi gunania! Fabõ'õ na u'ombakha'õ khõmi gera'era dõdõ Lowalangi, ma zui ufa'ema ni'ilagu sanandrõsa khõ Lowalangi, ma zui u'ombakha'õ hadia nilau Lowalangi ba niha, ma zui mamahaõ ndra'odo.
7 Si manõ gõi ba ngawalõ zo li si lõ noso, si mane surune, ba kezafi. Na lõ lahaogõ wamoli, hewisa wa la'ila niha hadia ni'anunõisi?
8 Sambua tõ dumaduma tanõ bõ'õ: Na telau dorofe si lõ atatua, haniha zama'anõ ya'ia ba wanuwõ?
9 Si manõ gõi ba wa'abõlõmi wahuhuosa ba ngawalõ li sahõlihõli dõdõ andrõ. Na mitõtõi wehede si lõ eluaha ba wa'abõlõ da'õ, ma'ifu lõ sangila hadia niw̃a'õmi. Taya manõ wehedemi da'õ muzawili.
10 Oya ngawalõ li ba gulidanõ andre, ba lõ hadõi moroi ba gotalua li andrõ zi lõ hadõi eluaha.
11 Ba hiza, na lõ aboto ba dõdõgu li niw̃a'õ zi samõsa niha, ba sangoguna'õ li da'õ hulõ niha bõ'õ ia khõgu; si manõ gõi ndra'odo khõnia.
12 Aboto ba dõdõgu wa omasi sibai ami misõndra mbuala moroi ba Geheha Lowalangi. Ba si fõfõna sibai, mi'odõdõgõ wangoguna'õ fa'abõlõ andrõ, soguna ba wanolo banua Niha Keriso ena'õ tedou mifõna.
13 Da'õ mbõrõ wa lõ tola lõ i'andrõ khõ Lowalangi si fahuhuo ba ngawalõ li sahõlihõli dõdõ andrõ ena'õ Ibe'e wa'abõlõ khõnia gõi ba wangombakha hadia ia niw̃a'õnia andrõ.
14 Bõrõ na mangandrõ ndra'o ba li sahõlihõli dõdõ, mangandrõ sa gehehagu, ba hiza lõ mohalõw̃õ i gera'eragu.
15 Tobali, hadia nilaugu? Da'e nifaluagu dania: Mangandrõ ndra'o dania faoma ehehagu ba mangandrõ gõi ndra'o faoma era'eragu. Manunõ ndra'o faoma ehehagu, ba manunõ gõi ndra'o faoma era'eragu.
16 Bõrõ na mi'andrõ saohagõlõ khõ Lowalangi ha faoma ehehami manõ, ba na so niha bõ'õ si lõ aboto ba dõdõ li sahõlihõli dõdõ soroi Geheha Lowalangi andrõ, ba tebai imane niha andrõ, "Fao dõdõgu" ba wangandrõ saohagõlõ andrõ khõmi; bõrõ me lõ aboto ba dõdõnia hadia niw̃a'õmi.
17 Hew̃a'ae sõkhi sibai wangandrõ saohagõlõmi andrõ khõ Zo'aya, ba hiza ma'ifu lõ guna wangandrõmi andrõ ba niha bõ'õ.
18 U'andrõ saohagõlõ khõ Lowalangi bõrõ me tola fahuhuo ndra'o ba ngawalõ li sahõlihõli dõdõ andrõ tõra moroi ba khõmi fefu.
19 Ba hiza, ba wa'owulowulo ba wamosumange So'aya, abõlõ omasi ndra'o u'oguna'õ lima ngawua wehede si tola aboto ba dõdõ niha, moroi na ufake ngahõngahõnõ wehede ba li sahõlihõli dõdõ. Abõlõ omasi ndra'o ena'õ tola ufahaõ niha.
20 He ya'ami ira talifusõ! Bõi hulõ wangerangera ndraono wangerangerami. Ba wa'alõsõkhi, akha lõ mamalõ hulõ ndraono side'ide ami. Ba ba wangerangera, ena'õ tobali niha satua ami.
21 No tesura ba Mbuku Ni'amoni'õ, "Imane So'aya, 'Fahuhuo Ndra'o dania ba mbanua-Gu andre, ba niha si fahuhuo ba li sahõlihõli dõdõ. Ba fahuhuo Ndra'o dania ba mbanua-Gu nifa'ema niha bõ'õ; hew̃a'ae si manõ, ba lõ omasi ira sa'atõ lafondrondrongo wehede-Gu.'"
22 Ba hiza, buala fahuhuosa ba ngawalõ li sahõlihõli dõdõ no sambua tandra ba niha si lõ faduhu tõdõ, tenga ba niha si no faduhu tõdõ. Ba buala wangombakha era'era Lowalangi ba niha, no tandra ba zi faduhu tõdõ, tenga ba zi lõ faduhu tõdõ.
23 Bõrõ da'õ, na ba wa'owulo mbanua Niha Keriso, fahuhuo fefu ndrotondroto mbanua Niha Keriso ba ngawalõ li sahõlihõli dõdõ, ba tohare niha moroi baero, ma zui si tenga Niha Keriso, tatu lawalinga no owõhõ ami fefu!
24 Ba hiza na nifa'emami turia soroi Lowalangi, ba na tohare samõsa zi tenga Niha Keriso ma zui niha moroi baero, ba fanuriagõmi andrõ dania zangoroma'õ fefu horõ niha andrõ, irege aboto ba dõdõra horõra.
25 Lafaehagõ fefu zi tobini bakha ba dõdõra, ba la'ide'ide'õ ira wamosumange Lowalangi. Lafaduhu'õ wa sindruhundruhu so Lowalangi ba gotaluami.
26 Tobali, hadia geluaha da'õ fefu, ya'ami ira talifusõ? Na owulo ami ba wamosumange Lowalangi: so zanunõ, so zangombakha hadia ia zoroi Lowalangi, so zi hede ba li sahõlihõli dõdõ, ba so zangombakha hadia ia geluaha niw̃a'õ andrõ. Ba hiza, lõ tola lõ'õ mulau da'õ fefu ba wamahaõ saekhu ba zi sõkhi.
27 Na so zi hede ba li sahõlihõli dõdõ, fondrege wa'ato darua ba ma datõlu ya'i zamalua da'õ lafalalilali. Ba lõ tola lõ'õ so zamo'eluaha hadia niw̃a'õ zi fahuhuo andrõ.
28 Na lõ hadõi si tola mamo'eluaha akha lahonogõ ira ya'ira si fahuhuo ba li sahõlihõli dõdõ andrõ. Akha fahuhuo ira bakha ba dõdõra manõ khõ Lowalangi.
29 Darua ma datõlu zama'ema turia soroi Lowalangi ba latimba tõdõra tanõ bõ'õ nifa'ema andrõ.
30 Ba na tohare duria soroi Lowalangi andrõ ba zi samõsa niha ba gotalua zi dadao ba gangowuloa andrõ, akha ibato fahuhuo si fahuhuo andrõ.
31 Ba zi manõ, tola mifa'ema duria soroi Lowalangi andrõ, dozi ami: ena'õ fefu oi manema famahaõ ba tobali itugu abõlõ wamati.
32 Fa'abõlõ soroi Geheha ba wama'ema turia soroi Lowalangi tola lafatõrõ ya'ira sama'ema turia andrõ.
33 Lowalangi ba no Lowalangi somasi fa'atofõfõ; tenga Lowalangi somasi fawukasa Ia. Bakha ba gotalua mbanua Lowalangi,
34 akha lahonogõ ira ira alawe ba gowuloa mbanua Niha Keriso. Lõ tetehegõ fahuhuo ira. Tebai tobali sondrõnia'õ ira; no tesura da'õ ba huku agama.
35 Na omasi ira la'ila hadia ia, akha lasofu khõ wo'omora ba nomo. Fangaila sindruhundruhu na fahuhuo ndra alawe bakha ba gowuloa mbanua Niha Keriso.
36 Hadia moroi khõmi daroma li Lowalangi? Ma zui ha khõmi tefa'ema daroma li andrõ?
37 Na so zanguma'õ tõdõnia so mbuala khõnia wama'ema turia soroi Lowalangi, ma zui so mbuala tanõ bõ'õ moroi ba Geheha Lowalangi, akha aboto ba dõdõ niha andrõ wa no fareta soroi Zo'aya nisuragu andre.
38 Ba hiza na so zi lõ manema da'e, bõi mi'onangegõ ia.
39 Bõrõ da'õ, mi'osindruhugõ wama'ema turia soroi Lowalangi, ya'ami ira talifusõgu, ba hiza, bõi mitenaw̃a niha si fahuhuo ba ngawalõ li sahõlihõli dõdõ andrõ.
40 Akha mulau fefu da'õ faoma fangenanõ ba famõfõ'õ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA