Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bahan maka kekelengen nge si jadi perayakenndu, tapi pe ersura-suralah kam ndatken pemere-pemere Kesah, terlebih-lebih gelah banci kam ernubuat.

² Kalak si ngerana i bas cakap Kesah labo man manusia ia ngerana tapi man Dibata, sabap manusia la ngangka cakap e, erkiteken secara pertendin ibelaskenna perkara-perkara si rahasia.

³ Tapi kalak si ernubuat man manusia nge ia ngerana; pengeranana e gunana mbangun, ngajarken dingen ngapuli kalak si deban.

⁴ Kalak si ngerana i bas cakap Kesah, dirina kap si ipekenana. Tapi kalak si ernubuat ia mbangun perpulungen.

⁵ Ateku min kerina kam ngerana i bas cakap Kesah; tapi ulin nge kuakap adi kam ernubuat. Sabap beliden gunana kalak si ernubuat asangken kalak si ngerana i bas cakap Kesah -- pala lit kalak si nuriken antusenna, gelah perpulungen e banci ibangun.

⁶ O senina-senina, bicara reh aku ndahi kam, janah ngerana aku i bas cakap Kesah, kai nge untungna man bandu? Tentu sitik pe la lit gunana, pala ngerana aku erpalasken kai si ipetangkas Dibata, ntah erpalasken pemeteh, ntah nubuat, ntah pengajaren.

⁷ Bali ras alat-alat musik, eme barang-barang si la erkesah tapi ersora, umpamana sarune ntah kulcapi, kuga ningen ngangkasa laguna adi la tangkas nadana?

⁸ Ntah pe adi si ngembus terompet perang la erturi-turin ibahanna sorana, ise nge ersikap guna erperang?

⁹ Bage me pe kerna kam; ise nge ngerti kerna berita si isehkenndu alu cakap Kesah adi pengeranandu e la iangka? Sia-sia luam kap kam e!

¹⁰ Erbage-bage cakap i doni enda, tapi labo lit sada pe si la lit ertina.

¹¹ Tapi adi la kuangka cakap si ipake kalak, bali ras kalak asing me ia nandangi aku, janah aku pe bali ras kalak asing man bana.

¹² Kueteh maka mbelin kal sura-surandu ngaloken pemere-pemere Kesah, tapi usahakenlah maka i bas kam lit pemere si mbangun perpulungen ngelebihi pemere-pemere si deban.

¹³ Emaka kalak si ngerana i bas cakap Kesah, ertotolah ia man Dibata mindo kengasupen guna nuriken antusen kai si ikatakenna e.

¹⁴ Sabap adi ertoto aku i bas cakap Kesah, tendingku nge si tuhuna ertoto, tapi ukurku labo ikut.

¹⁵ Kuga dage arusna? Arus aku ertoto alu tendingku, tapi arus ka pe aku ertoto alu ukurku. Arus aku rende alu tendingku, tapi arus ka pe aku rende alu ukurku.

¹⁶ Adi tendingku saja ngenca ngataken bujur man Dibata, kuga nina kalak si sangana erlajar i bas kiniteken ngataken "Amin" kerna pertoton pengataken bujurndu e? La mungkin iertina kai si ikatakenndu e.

¹⁷ Bicara mehuli kal pe pertotonndu i bas ngataken bujur man Dibata, labo e mbangun kalak si sangana erlajar e.

¹⁸ Bujur kukataken man Dibata sabap rusuren aku ngerana i bas cakap Kesah asangken kam kerina.

¹⁹ Tapi i bas perpulungen ulin kuakap aku ngerana lima engkebabah kata si banci iangka, guna ngajari, asangken meribu-ribu cakap Kesah si la iangka.

²⁰ O senina-senina, ula medanak perukurndu. I bas perkara kejahaten bagi anak-anak si mbaru tubuhlah min pemetehndu, tapi i bas rukur, bagi kalak dewasa min kam.

²¹ I bas Pustaka Si Badia lit tersurat, nina Tuhan, "Ngerana me Aku man bangsa enda alu cakap bangsa si deban Kubelasken katangKu alu babah kalak asing, tapi amin bage gia, lalap nge la ibegiken bangsa enda Aku."

²² Emaka pemere ngerana i bas cakap Kesah jadi tanda-tanda man kalak si la nggit tek, labo man kalak si tek, tapi pemere ernubuat, eme guna kalak si tek, labo man kalak si la nggit tek.

²³ Arah dampar si deban bicara asum kam pulung, kerina anggota perpulungen ngerana i bas cakap Kesah, jenari reh ku bas kalak si sangana erlajar i bas kiniteken, ntah kalak si langa tek man Jesus, ma ikatakenna maka adon kam kerina?

²⁴ Tapi adi kerina kam ernubuat jenari reh ku bas kalak si sangana erlajar i bas kiniteken, ntah si langa tek man Jesus, tentu igejapna dosana arah kerina si ibegina e, dingen igejapna maka kerina kalak mereksa ia.

²⁵ Alu bage rahasia si terbuni i bas ukurna jadi tangkas, jenari mungkuk ia, isembahna Dibata janahna ngaku, "Tuhu-tuhu kepe Dibata lit i tengah-tengahndu!"

²⁶ Kuga dage arusna o senina-senina? Adi pulung kam, sekalak-sekalak kam ngendeken ende-enden si lit i bas ia, sekalak-sekalak nehken ajarna, sekalak-sekalak nehken perkara si ipetangkas Dibata, sekalak-sekalak nehken berita i bas cakap Kesah, janah sekalak-sekalak nuriken antusen cakap Kesah e. Bahanlah si e kerina guna mbangun perpulungen.

²⁷ Adi lit kalak si atena ngerana i bas cakap Kesah, cukup me dua ntah telu kalak saja, janah sekalak-sekalak ia ngerana, bage pe lit min kalak si nuriken antusen kata e.

²⁸ Tapi adi la lit kalak si nuriken antusen cakap Kesah e, madin me sinik saja i bas perpulungen. Man dirina jine ras man Dibata saja lah ia ngerana.

²⁹ Adi nabi, dua ntah telu kalak ia si ngerana, janah kalak si deban ertimbang kerna kai si ikatakenna e.

³⁰ Tapi adi man kalak si sangana kundul megi-megi lit perkara si ipetangkas Dibata, kalak si leben ngerana ndai arus sinik.

³¹ Kerina nabi banci ernubuat alu ergiliren, gelah kerina ndatken pengajaren dingen kerina ipegegehi.

³² Penjemba Kesah guna ernubuat lit kap i teruh kuasa nabi.

³³ Sabap Dibata labo Dibata kinilaraturen, tapi Dibata kiniraturen. Bali ras i bas kerina perpulungen-perpulungen si nggo ikhususken jadi sikerajangen Dibata.

³⁴ Si diberu arus sinik i bas perpulungen. La ia ipelepas ngerana. La ia banci jadi peminpin, sue ras si ikataken Undang-undang.

³⁵ Adi perlu iakapna ia meteh sada-sada perkara, i rumah lah ia nungkun man perbulangenna. Man kemelan kap adi diberu nungkun i bas perpulungen.

³⁶ Banci kin i bas kam nari rehna Kata Dibata? Ntah man bandu saja kin Kata Dibata e ipeseh?

³⁷ Adi lit kalak si erpengakap maka ia nabi, ntah erpengakap maka i bas ia lit pemere Kesah, arus ietehna maka si kusuratken man bandu enda eme kap perentah Tuhan.

³⁸ Janah adi lit kalak si la mperdiateken si enda, ia pe ula perdiateken.

³⁹ Emaka o senina-senina, ersura-suralah kam guna ernubuat, janah ula olangi kalak si ngerana i bas cakap Kesah.

⁴⁰ Lakokenlah kerina alu metunggung dingen ratur.

1 Korintus

Video 1 Korintus 14

Ikuti Kami:

KONTAK | PARTISIPASI | DONASI