Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Usahakangi mangngamaseanga ri parannu tau siagang usahakang tongi sollanna nutarima sikamma passare battua ri RohNa Allata’ala; lomoro’ se’rea iamintu nanutarima pakkullea untu’ ampabattui sikamma rancanaNa Allata’ala mae ri rupataua.

² Inai-nai a’bicara siagang bicara appakalannasa’, teai rupataua napa’bicarai, mingka Allata’ala. Tenanniakka tau ampahangi anjo apa napaua, nasaba’ RohNa Allata’ala assarei pakkulle untu’ ampaui anjo bicara Allata’alaya bawang ampahangi.

³ Kabalekkanna, inai-nai ampabattui biritta battua ri Allata’ala, rupataua napabattuang anjo birittaya; iamintu sollanna napakajarre’ taua, nasarei sumanga’, kammayatompa nasaleori ke’nanga.

⁴ Inai-nai a’bicara lalang bicara appakalannasaka, kalennaji bawang napakajarre’; mingka inai-nai ampabattui biritta battua ri Allata’ala, natulummi jama’aka sollanna akkulle pila’ maju jama’aka.

⁵ Teai sipato’ baji’na punna akkulle ngasengko a’bicara a’rupa-rupa bicara appakalannasa’. Mingka la’bi kaminang bajika punna akkulleko ambirittakangi sikamma rancanaNa Allata’ala. Nasaba’ lompoangangi anggaranna appabattua biritta battu ri Allata’ala, naia a’bicaraya siagang bicara appakalannasa’; simmaraengi punna akkulleja napakasingariang jama’aka anjo bicara napaua, sollanna nia’ matu-matunna mae ri sikontu jama’aka.

⁶ Ebara’na inakke battu mae ri kau ngaseng nakua’bicara appakalannasa’ mae ri kau, maka apa matu-matunna mae ri kau? Mattantu tena matu-matunna manna sike’de’! Simmaraengi punna kupa’nyata apa eroka Napa’nyata Allata’ala, yareka kupakasingara’ apa-apa battua ri Allata’ala, yareka kupabattu biritta battua ri Allata’ala yareka kuajarakko.

⁷ Anjo pakkakasa’ pakkelong-kelonganga tena sikali nyawana manna sike’de’ sangkammaya sulinga siagang kacapia, punna tena nipasa’ra bajiki siagang punna tena naniko’bi’ bajiki, antekamma batena lakkulle naasseng taua angkanaya kelong apa anjo nakelonganga?

⁸ Nia’ pole conto maraeng: Punna nipasa’ra sambarangang anjo tarompe’ pa’bundukanga, maka inai lasadia ero’ a’bundu’?

⁹ Sangkamma tommi anjo ri pakkullenu a’bicara siagang a’rupa-rupa bicara appakalannasa’. Punna nupake anjo pakkullenu ampaui bicara tenaya nasingara’ battuanna, ma’nassa tena manna sitau akkulle ampahangi anjo apa nupaua. Lalanynya’ kale-kaleji a’jari tena matu-matunna anjo bicara nupaua.

¹⁰ Nia’ siapa are jaina rupanna bicara lalang ri anne linoa, mingka tenanniakka manna sirupa anjo bicaraya tania’ battuanna.

¹¹ Mingka punna takupahanga bicara napaua se’reang tau, anjo taua a’jarimi sanrapang tu battu pantarang pa’rasangang mae ri nakke; kammayatompa inakke sanrapamma’ tu battu pantarang pa’rasangang mae ri anjo taua.

¹² Na ikau ngaseng, kuassengi angkanaya cinna sikaliko anggappa pakkulle battu ri RohNa Allata’ala. Mingka lomoro’ se’rea musti nupake bajiki anjo pakkulle nugappaya untu’ antulungi jama’aka sollanna akkulle a’jari maju.

¹³ Lanri kammanami anjo, na inai-nai akkulle a’bicara appakalannasa’, parallui napala’ mae ri Allata’ala sollanna nisare todong pakkulle untu’ ampakasingaraki anjo apa napaua.

¹⁴ Nasaba’ punna appala’ doanga’ nabicara appakalannasa’ kupake, appala’ doang memang tongi nyawaku, mingka tena na’jappa pikkirangku.

¹⁵ Jari, apa musti kugaukang? Iaminne lakugaukanga: Lappala’ doanga’ siagang rohku, mingka lappala’ doang tonga’ siagang pikkirangku. Lamakkelonga’ siagang rohku, mingka lamakkelong tonga’ siagang pikkirangku.

¹⁶ Nasaba’ punna rohnuji bawang appala’ sukkuru’ mae ri Allata’ala, nania’ tau maraeng tena napahangi anjo bicara appakalannasa’ battua ri RohNa Allata’ala, takkulleai anjo taua angkana, "Cocoka’" siagang anjo pappala’ sukkuru’nu lalang pappala’ doangannu; nasaba’ tanaassengai angkana apa anjo nupaua.

¹⁷ Manna pole nasanna’ baji’na anjo pappala’ doangang sukkuru’nu mae ri Batara, mingka tena sikali matu-matunna anjo pappala’ doangannu mae ri tau maraenga.

¹⁸ Appala’ sukkurukka’ mae ri Allata’ala, lanri la’bi akkulleanganga’ a’bicara a’rupa-rupa bicara appakalannasa’ na ikau ngaseng.

¹⁹ Mingka punna a’rappungangki’ untu’ anynyomba mae ri Batara, la’bi kungaiangangi limambukua bicara kupake assala’ akkulle napahang taua, naia assa’bu-sa’bua bicara appakalannasa’ kupake natanapahanga taua. Kungaiangangi kammaya anjo, sollangku akkulle angngajaraki taua.

²⁰ Sikamma sari’battangku! Teako appikkiri’ kammai ana’-ana’. Ri passala’ nikanaya panggaukang sala, paralluko a’jari tuli kamma ana’ ca’di. Mingka ri passala’na nikanaya pikkirang, paralluko a’jari tau toamo.

²¹ Nia’ tattulisi’ lalang ri Kittaka angkanaya, "Nakana Batara, ‘Tete ri sikamma tau a’bicaraya siagang bicara appakalannasa’, erokKa’ a’bicara mae ri anne ummaka. Ba’lalo, tete ri bansa-bansa maraenga, erokKa’ a’bicara mae ri ummakKu; mingka manna nakamma, taerokai ke’nanga allangngereki kana-kanangKu.’"

²² Jari anjo pakkullea a’bicara a’rupa-rupa bicara appakalannasa’, a’jari pammatei mae ri sikamma tau tenaya natappa’; jari teai untu’ tau tappaka. Siagang pakkullea untu’ ampappiassengangi rancanaNa Allata’ala mae ri taua a’jari pammatei mae ri tau tappaka, teai mae ri tau tenaya natappa’.

²³ Lanri kammana, ebara’ angkana a’rappungang jama’aka, nampa a’bicara appakalannasa’ ngaseng sikontu jama’aka, nania’ hadere’ siapa are tu battu pantarang, yareka tu tenaya na Karisteng, tantu lanakanamo anjo taua angkanaya pongoro’ ngasengko.

²⁴ Mingka punna appabattu ngasengko biritta battu ri Allata’ala, nampa nia’ hadere’ se’re tu tenaya na Karisteng yareka tu battu pantarang, akkullemi nupakasingariang ngaseng dosa-dosana anjo taua, siagang akkullemi nasadari ngaseng dosa-dosana.

²⁵ La’jari singara’mi sikamma apa taccokkoa lalang ri atinna, sa’genna napakatuna kalenna, nampa anynyomba mae ri Allata’ala. Lamangakumi angkanaya ma’nassa nia’ tojengi Allata’ala ri tangnga-tangnganu.

²⁶ Jari, apa ngaseng battuanna anne, sari’battang? Punna a’rappungangko ero’ anynyomba ri Batara, bajiki punna nia’ akkelong, nia’ angngajara’, nia’ ampabattui apa-apa battua ri Allata’ala, nia’ a’bicara siagang bicara appakalannasaka siagang nia’ ampakasingaraki battuanna anjo bicara appakalannasaka. Mingka yangasenna anjo musti nugaukangi untu’ angngajara’ siagang untu’ kabajikannu ngaseng.

²⁷ Punna nia’ ero’ a’bicara siagang bicara appakalannasaka, musti ruamo yareka kaminang jaina tallumo tau a’le’basa’ a’bicara. Siagang musti nia’ ampakasingaraki anjo le’baka napau ke’nanga.

²⁸ Punna tena akkulle ampakasingaraki, bajikangangi punna a’mereki anjo tau akkullea a’bicara appakalannasa’. Boli’mi kamma a’bicara lalang mamo ri atinna ke’nanga mae ri Allata’ala.

²⁹ Punna nia’ rua yareka tallu tau ampabattui biritta battua ri Allata’ala, musti nia’ maraenganga antimbangi anjo apa napabattua ke’nanga.

³⁰ Mingka ebara’ angkana nia’ maraengannaya anjo tau hadereka ammempo anggappa biritta battu ri Allata’ala, naero’ napabattu anjo birittaya, musti ammari rolong anjo tau sitabanga a’bicara.

³¹ Kammami anjo carana, sa’gennu akkulle ngaseng tasse’re-se’re massing ampabattui biritta battua ri Allata’ala; sa’gennu massing akkulle ngaseng anggappa pappilajarang, kammayatompa pila’ a’jari tappa’.

³² Anjo passare battua ri RohNa Allata’ala untu’ ampabattui biritta battua ri Allata’ala, akkullei niatoro’ baji’ ri anjo tau ampabattuai.

³³ Anjo Allata’ala Nangai apa-apa niatoro’ bajika; taNangaiyai apa-apa tenaya nabaji’ atoro’na. Kamma nigaukanga ri sikontu jama’aNa Allata’ala,

³⁴ musti a’mereki tu bai’-bainea punna a’rappungangi jama’aka. Tanikellaiyai ke’nanga a’bicara. Takkulleai ke’nanga a’jari pamimping; kammaminjo ero’na hukkung agamaya.

³⁵ Punna nia’ ero’ naasseng ke’nanga, bura’nenna musti nakuta’nang ri balla’na. Tabajikai tu bai’-bainea a’bicara lalang ri pa’rappunganna jama’aka.

³⁶ Maka ikau nakabattui anjo birittaNa Allata’ala? Yareka untu’ ikauji bawang lanipabattuang anjo birittaya?

³⁷ Punna nia’ tau naassengi kalenna angkanaya nia’ pakkullena untu’ ampabattui anjo biritta battua ri Allata’ala, yareka nia’ pakkulle maraeng natarima battu ri RohNa Allata’ala, anjo taua musti nasadari angkanaya parenta battu ri Batara anne kutulisika.

³⁸ Mingka punna nia’ battu ri ke’nanga tanatarimayai anne, teako jampangi anjo tau kammaya.

³⁹ Lanri kammana, sari’battangku ngaseng, usaha mako untu’ ambirittakangi biritta battua ri Allata’ala, mingka teako pisangkai tau eroka a’bicara lalang bicara appakalannasaka.

⁴⁰ Mingka musti nubajiki siagang nuatoroki batenu anggaukangi.

1 Korintus

Video 1 Korintus 14

Ikuti Kami:

KONTAK | PARTISIPASI | DONASI