Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngaro ngoi 'idadi tosibicara 'o nyawa ma demo 'i'ini-'inioka, bolo ngaro ka de 'o mala'ekatiou ma demo, ma nako kotakidorawa 'o nyawa, ge'ena 'ai demo-demo ge'ena duga kaiamokie matero ka 'o liwanga de 'o damunu ma 'ilingi, duga ma faedaa koi'iwa.

² Ngaro ngoi ta'akunu tositotara 'o habari ma Jo'oungu ma Dutuno de tasahe 'o do-dotoko 'iti-tiai gee 'o nyawa 'iregu koyanako-nakowasi, mita takokinako 'o sagala moi-moi de tongaku ma sala ma Jo'oungu ma Dutuka sigado tadiai 'o gigie 'imato'oraka, ma nako kotakidorawa 'o nyawaka, ge'ena ngoi 'ai faedaa ka ma eta ma koi'iwa!

³ Ngaro 'ai harataa 'iodumu takisibula-bula 'o nyawa yosusa-susaka, de 'ai roese tokula ma ngale yatuuku, ma nako kotakidorawa 'o nyawaka, 'iodumu ge'ena ma faedaa ka ma eta ma koi'iwa.

⁴ 'O nyawa gee yakidora-dora 'o nyawa 'ireguka, 'ona ge'ena yosabari, manga singina 'isure, koi'iwa 'o daleana, koya'ena-'enawa, de koi'iwa 'o gedenge.

⁵ 'Ona koyomadaduiewa, koyotabangamowa, koyopakisaawa 'o nyawa 'iregu yamoteke to 'ona ma sirete manga mau. Koitaituwa yomadegese ma ngale, de mita koyomado-donoakuwa manga singinaka.

⁶ 'O nyawa gee yakidora-dora 'o nyawa 'ireguka, 'ona koyoduakuwa 'o dorou. 'Ona yoduaka 'iti-tiai.

⁷ 'Ona yotahani yodaari 'o sagala moi-moi, 'ona ya'akunu manga ngo-ngaku tatapu 'ikua-kuata, de tatapu yomasinganono ma Jo'oungu ma Dutuka ngaro kokia naga bato ma lugo. De tatapu yosabari ngaro 'okia naga bato 'idadi.

⁸ 'O dora ge'ena dua kaisi'ado-'adonika koitogumuwa. Ma 'o nyawa gee yositota-totara 'o Habari ma Jo'oungu ma Dutuno 'asa kaitogumoka, de 'o nyawa gee yobi-bicara 'o demo 'i'ini-'inioka 'ihera-herangi 'asa kayomaogoroka. De gee yodoto-dotoko ma ngale 'o nyawa winako ma Jo'oungu ma Dutu 'asa yomaogoro.

⁹ Sababu to ngone nanga barija de nanga guata ma ngale positotara 'o habari ma Jo'oungu ma Dutuno, koitotomuawasi.

¹⁰ Dua 'asa ma 'orasi ya'adono ma Jo'oungu ma Dutu wadiai 'iodumu 'itotomo, de gee koito-totomuwa 'asa 'iisanga.

¹¹ Gee ngoi ka 'o ngowaka ma dingoonosi, tobicara 'isoka 'o ngowaka ma dingoono, 'ai ro-rasa 'isoka 'o ngowaka ma dingoono, de tomatibangi 'isoka 'o ngowaka ma dingoono. Ne'ena ngoi tobalusokau, 'ai gokoie 'isoka 'o ngowa-ngowaka gee ta'umokau.

¹² 'Okia naga gee ngone pamake ma 'orasi ne'ena, ge'ena 'isoka 'o gurumini 'iga-gamusanga 'o kasinaaka. Ma dua ngone 'asa pamake 'iwai-waiti. Ma 'orasi ne'ena ngoi kotanakowasi 'o sagala moi-moi, ma dua 'asa tanako 'okia sonaa moi-moi 'isoka ma Jo'oungu ma Dutu woinako 'itiai.

¹³ So ma ngale ma 'orasi ne'ena, naga 'o ngai sa'ange salingou ngone tatapu padiai, ge'ena la: Pongaku, pomasinganono ma Jo'oungu ma Dutuka, de pomakadora moi de moi. 'O ngai sa'ange ge'ena 'ifoloiosi 'iparaluu ge'ena la 'o nyawa pakidora.

1 Korintus

Video 1 Korintus 13

Ikuti Kami:

KONTAK | PARTISIPASI | DONASI