Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ane rapana, molambina kapande hangko i Inao Malelaha bona mololitana i lalu basa malaeka ba basa manusia au bara kuisa, agayana bara maahi lalungku, bara mpuu ara bunduna katuwongku. Ope-ope kapande iti nodo pea pomoni ndonge ba porio-riona timbonga.

² Ane rapana, molambina kapande mopahawe lolita hangko i Pue Ala hai molambina ope-ope kapande hangko i Pue Ala au bara raisa rangangku, hai ane maroho pepoinalaingku pane kubuku mopalimba bulu, agayana bara maahi lalungku, bara mpuu ara bunduna katuwongku.

³ Ane ope-ope anu-anungku kuweihe tauna au meahi-ahi tuwonda, hai kukira watangku rahuwe mate anti peulangku i Pue Yesu, agayana bara maahi lalungku, bara mpuu ara bunduna katuwongku.

⁴ Apa lempona au rauli ahi? Tauna au mampokaahi hangka ranganda, sabarahe hai maroa lalunda, barahe mahina, barahe mampopetoya, barahe mampemahile,

⁵ barahe makasara, barahe mohaoki peundeanda haduduanda, bara koi inaonda, hai barahe mepailalu.

⁶ Ane maahike i ranganta, lempona, bara tapokatana apa au kadake, tapokatana apa au manoto,

⁷ mantahake i lalu hinangka kapari, mepoinalai liliuke, meharunga liliuke, hai sabara liliuke kehapi ba apa pea au morumpake.

⁸ Ahi bara ara kahopoana. Agayana ane arake au mapande mopahawe lolita hangko i Pue Ala, hambela tempo kapande iti barapi ina ara. Ane arake au mapande mololita i lalu basa au hangko i Inao Malelaha, hambela tempo kapande iti ina mokahopoa. Ane molambike kapande hangko i Pue Ala bona moisake apa au bara raisa ranganta, hambela tempo, kapande iti barapi raparaluu.

⁹ Lawi ide-ide makura mani ope-ope kapande au tahumba hangko i Pue Ala. Mogalori tauna au mopahawe lolita hangko i Pue Ala, makura mani kapande iti.

¹⁰ Agayana ane hawe tempona Pue Ala mampopeawa hinangkana, barapi ara kapande iti. Barapi raparaluu.

¹¹ Pandirina ane anangkoi manina, mololitana nodo anangkoi; pekiringku hai lalungku nodo wori anangkoi. Agayana ide-ide, mahilemona; kupalehimi apa au kubabehi hangkoya. Nodo wori, hambela tempo kapande au tahumba hangko i Inao Malelaha ina mokahopoa.

¹² Lawi ide-ide, ikita nodo tauna au mampeita hambua lengge i pampewaoa au mogawu-gawu, lawi bara mani taisa hinangkana i katou-touana. I alo au ina mai, hangko taisari hinangkana, lawi ina tapombelindoa Pue Ala hai ina taita i katongawaana. Ide-ide, makura mani kamapandeku. Agayana i alo au ina mai, ina kuisa ntepuu hinangkana, nodo wori Pue Ala moisana.

¹³ Mewali, ide-ide, ara talu pakana au hangangaa tababehi: mepoinalaike i Pue Ala, meharungake i dandina Pue Ala, hai maahike i hangka ranganta. Agayana hangko i talu pakana iti, au melumbu kamaroana iami ahi.

1 Korintus

Video 1 Korintus 13

Ikuti Kami:

KONTAK | PARTISIPASI | DONASI