Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i, aku rani komi mangansani mangkonong sora to nawaika i Nosa Mapasing kita.
2 Wali komi mangansani ewa wimba katuwu ngkomi tempo tawa mangaya i Pue. Tempo etu pampobuuka ngkomi nakuasang measa pasi na’akal nsira see komi mampue resi tau-tau to taa magombo.
3 Wali see naka aku rani mampaponsanika komi ewa wimba raika mampasisala tau to gombonya yako resi i Nosa Mapasing pasi tau to gombonya si’a yako resi i Nosa Mapasing. Wali ewa si’i raika mampasisala. Ane tau to gombonya yako resi i Nosa Mapasing, tau to etu tare to manganto’o, “Aku rani i Yesu ratanaa yau.” Pasi tau to gombonya si’a yako resi i Nosa Mapasing, tau to etu tare to manganto’o, “I Yesu semo i Pue.”
4 Wali sora to nawaika i Nosa Mapasing kita mpangaya-ngaya, pei i Nosa Mapasing to mangawai sora etu samba’aja.
5 Pasi palaong to naika ngkita resi i Pue mpangaya-ngaya, pei i Pue samba’aja.
6 Pasi malagi njaya to naika i mPue Allah mampakaroso raya ngkita mangika palaongiNya, pei samba’aja i Pue Allah to mampakaroso kita samparia.
7 Wali kita nawaika i Nosa Mapasing sora damampakanasaka resi sa’e Ia re’e resi kita. Pasi sora to iwaikanya kita samba’a pei samba’a etu naka pei rawaika kita datapake mangansawang samparia tau to mangaya.
8 Wali sangga’a tau i Nosa Mapasing mangawaika kapande mampaponsanika sa’e pasisalanya anu to monso pasi anu to taa monso. Pasi resi tau to yusa i Nosa Mapasing to samba’aja etu mangawaika kapande mampakanasaka sa’e tuntu i mPue Allah.
9 Pasi re’e wo’u tau to nawaika i Nosa Mapasing etu pangaya to maroso pasi tau to yusa nawaika i Nosa Mapasing etu sora see ia re’e kuasa mampakatao muni panyaki mpangaya-ngaya.
10 Panewa re’e wo’u tau to rawaika kuasa mangika palaong to taa rapobiasa. Pasi tau to yusa rawaika mawali to pantuntu tuntu i mPue Allah. Pasi re’e tau to rawaika kapande mampasisala tau to monso pu’u mangaluluka tuntu i mPue pei tau to taa. Panewa re’e wo’u tau to rawaika kapande magombo ri raya basa mpangaya-ngaya to taware igurunya. Pasi re’e seja tau to rawaika kapande mampaponsanika sa’e batuanginya gombo ntau to magombo ri raya basa to yusa etu.
11 Wali samparia sora to rawaika kita to mangaya etu paka yako resi i Nosa Mapasing to samba’aja etu. Ia semo to mangampilis to imba sora to danawaika kita samba’a pei samba’a.
12 Wali kita to mangaya i Kerisitu maya raporapaka ewa koro ntau. Apa ane samba’a tau samba’aja koronya, pei koronya etu saganya malagi. Pei nempo malagi saganya etu, ojo samba’aja koro. Pasi ewa see seja koro i ngKerisitu.
13 Apa kita nabaptis i Nosa Mapasing anu samba’aja etu darapasimba’a mawali yau samba’a koro. Kita nempo to Yahudi, nempo si’a to Yahudi pasi nempo watua nempo si’a watua, samparia mawali samba’a koro. Pasi kita samparia mangarata i Nosa Mapasing anu samba’aja etu maroo ri raya ngkita. Wali palaong etu raporapaka ewa malagi tau to manginu yako mata nue to samba’aja.
14 Wali ane ewa koro ntau, si’a samba’aja saganya. Malagi saganya.
15 Wali ane rapanya witi manganto’o, “Aku si’a pale, wali aku si’a saga ngkoro si’i.” Wimba, bara monso witi etu si’amo saga ngkoro? Taa monso!
16 Pasi ane talinga manganto’o, “Aku si’a mata, wali aku si’a saga ngkoro si’i.” Wimba, bara monso talinga etu si’amo saga ngkoro? Taa seja monso!
17 Apa ane rapanya koro etu juku mata, wimba daraika mangandonge rao? Pasi ane koro etu juku talinga, wimba daraika mangansengu bara kesaa?
18 Wali see naka i Pue Allah mangawaika kita saga ngkoro mpangaya-ngaya. Pasi ponto-ponto saganya etu naposaka i mPue Allah ri koro ewa wimba pamporani to si Ia.
19 Apa ane saganya sangayaja, kamonsonya si’a kojo anu to rato’oka koro.
20 Wali see naka malagi ngaya saganya pei samba’aja koro.
21 Wali mata taa maya manganto’oka pale, “Korom tare batuanginya resi aku!” Pasi wo’o taa maya manganto’oka witi, “Korom tare batuanginya resi aku!”
22 Kasimbalinya yako etu, saga ngkoro to napobuuka ntau taa bae kojo batuanginya, saga to etu semo to raparluu kojo.
23 Pasi saga ngkoro to kita mampobuuka taa bae kojo angganya, saga to etu semo to kita mangararamaka kojo. Pasi saga ngkoro to taa masipato nakita nsa’e, saga to etu semo to raposunsuka pake to magaya nakita nsa’e.
24 Pei saga ngkoro to magaya yami, saga to etu taa parluu wo’u bara kesaa. Wali i Pue Allah semo to mampasilonga koro, pasi Ia semo mangawaika angga to bae kojo resi saga ngkoro to kodi angganya.
25 Ia mangika ewa wetu see taa tiga’as saga ngkoro, see samparia saga ngkoro etu sewaju pamporayanginya resi yununya samba’a pei samba’a.
26 Wali ane samba’a saga ngkoro mangarata kasesa, samparia saga ngkoro etu paka mangepe seja kasesa etu. Pasi ane samba’a saga ngkoro rabarong, samparia saga ngkoro etu paka masanang seja.
27 Wali komi seja room mawali koro i ngKerisitu. Pasi komi samparia mawali saga ngkoro etu samba’a pei samba’a.
28 Wali ewa wimba naika i mPue Allah mapasilonga saga ngkoro ngkita to lino, ewa see seja nikaNya mampasilonga kita to saga ngkoro i ngKerisitu. Apa ane kita to mangaya, re’e to uyunya napilis i mPue Allah mawali pomakau i mPue Yesu. Pasi to kadua, etu semo to pantuntu tuntu i mPue. To katogo, etu semo tau to mampotundeka sa’e tuntu i mPue. Roo see re’e wo’u tau to nawaika i mPue Allah kuasa mangika palaong to taa rapobiasa. Pasi re’e seja to rawaika kuasa mampakatao muni panyaki mpangaya-ngaya. Panewa re’e wo’u tau to palaonginya mangansawang sa’e, pasi tau to mawali penatua. Pasi re’e seja to rawaika kapande magombo ri raya basa to mpangaya-ngaya to taware igurunya. Wali ewa wetu naika i mPue Allah mampasilonga saga ngkoro i ngKerisitu.
29 Pei si’a samparia tau to mawali pomakau i mPue Yesu. Pasi si’a samparia tau to mawali to pantuntu tuntu i mPue. Si’a seja samparia tau to mampotunde. Pasi si’a samparia tau to rawaika kuasa mangika palaong to taa rapobiasa
30 bara mampakatao muni panyaki mpangaya-ngaya. Si’a seja samparia tau to rawaika kapande magombo ri basa to taware igurunya, bara to rawaika kapande mamporata resi sa’e batuanginya gombo ntau to magombo ri basa to yusa etu.
31 Wali to tao-tao komi mamporani kojo sora to bae-bae batuanginya. Pei re’e to dakuto’oka komi mangkonong anu to bae kojo batuanginya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA