Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kiniko tantang parkaro pambarian-pambarian nan dibarikan dek Roh Allah. Tantang parkaro itu, ambo niyo supayo sudaro-sudaro mangatawui nan sabananyo.

² Cubolah kana, dikutiko angku-angku alun tawu jo Tuhan, angku-angku tapangaruah untuak manuruikkan barhalo nan bisu.

³ Angku-angku musti tawu andaknyo, baraso urang nan dipimpin dek Roh Allah, indak ka bisa doh mangatokan, "Takutuaklah Isa!" Baitu pulo sabaliaknyo, indak surang juwo doh urang nan ka bisa mangatokan, "Isa Almasihlah Tuhan!" jikok urang tu indak dipimpin dek Roh Allah.

⁴ Ado bamacam-macam pambarian dari Roh Allah, tapi kasadonyo tu dibarikan dek Roh nan Ciyek tu juwo.

⁵ Ado bamacam-macam karajo urang, untuak malayani Tuhan, tapi Tuhan nan dilayani tu, Tuhan nan Ciyek tu juwo!

⁶ Ado babagai-bagai caro urang, untuak mangarajokan karajo Tuhan, tapi nan mambarikan kudaraik kabake satiyok urang untuak bakarajo, adolah Allah nan Ciyek tu juwo.

⁷ Untuak kabaiakkan kito kasadonyo, Roh Allah bakarajo disatiyok urang, sacaro sandiri-sandiri.

⁸ Kabake nan surang, Roh tu mambarikan kalabiahan untuak mangecek, sainggo jikok inyo mangecek manganduang kuwaso. Kabake nan lain, Roh nan itu juwo, mambarikan kalabiahan, sainggo urang tu bisa manarangkan tantang Allah.

⁹ Roh nan Ciyek tu juwo, mambarikan kabake urang nan surang lai, kalabiahan nan luwa biaso untuak ba iman kapado Isa Almasih; sadangkan kabake nan lain Roh tu mambarikan kuwaso, untuak mancegakkan urang.

¹⁰ Kabake nan surang, dibarikan kuwaso untuak mampabuwek mukjizat, kabake nan lain dibarikan kalabiahan, untuak ma agiah tawu apo-apo rancana Allah. Kabake nan lain, Roh tu mambarikan kalabiahan, untuak bisa mampasisiahkan nama nan pambarian dari Allah, nama nan indak. Ado urang nan dibari kalabiahan, untuak mangecek jo babagai-bagai bahaso nan ganjie, ado pulo urang nan dibari kalabiahan, sainggo inyo bisa manarangkan arati bahaso-bahaso nan ganjie tu.

¹¹ Kasadonyo tu dikarajokan dek Roh nan Ciyek tu juwo; satiyok-tiyok urang dibari pambarian nan tasandiri, tasarah kabake Roh nan mambarikan tu.

¹² Isa Almasih tu, samo jo bakcando tubuah manusia; tubuah tu hanyo ciyek, tapi tadiri dari banyak angguato. Kasadonyo angguato tu, biyapun inyo banyak, tapi marupokan satu tubuah.

¹³ Baitu pulo kito kasadonyo, biya urang Yahudi, ataupun nan indak urang Yahudi, budak-budak ataupun urang-urang mardeka; kito kasadonyo lah dipamandikan dek Roh nan itu juwo, supayo kito dijadikan ciyek di tubuah Isa Almasih. Kito kasadonyo lah mangalami pulo Roh nan Ciyek tu sapanuahnyo.

¹⁴ Dek karano, apo nan dinamokan tubuah, indak ciyek doh angguatonyo, tapi banyak.

¹⁵ Santano kaki mangatokan, "Ambo ko indak tangan doh, dek karano itu, ambo indak tamasuak tubuah doh." Apokoh iyo, kaki indak tamasuak tubuah?

¹⁶ Jikok talingo mangatokan, "Dek karano ambo ko indak mato, mako ambo ko indak tamasuak tubuah doh." Apokoh iyo, talingo indak tamasuak tubuah.

¹⁷ Santano kaciyek-annyo tubuah tu hanyo mato, baa caronyo tubuah tu ka dapek mandanga? Atau jikok kaciyek-annyo tubuah tu hanyo talingo, baa pulo caronyo tubuah tu ka dapek mambaunni?

¹⁸ Tapi Allahlah nan manampaikkan kasadonyo angguato tu di tubuah. Satiyok-tiyok angguato, dilatakkan di tampaiknyo dek Allah manuruik kahandak-Nyo.

¹⁹ Jikok kaciyek-annyo tubuah tu, hanyo ciyek angguato sajo, jadi namanyo nan dinamokan tubuah?

²⁰ Batua tubuah tu banyak angguatonyo, tapi nan dinamokan tubuah hanyo ciyek.

²¹ Dek karano itu, mato indak dapek doh bakato kabake tangan, "Wa-ang indak paralu di den doh!" atau kapalo bakato ka kaki, "Wa-ang indak paralu di den doh!"

²² Tapi malah sabaliaknyo, angguato-angguato tubuah nan di anggap lamah, itulah nan sangaik kito paralukan;

²³ baitu pulo angguato nan kito anggap indak baitulah ba arago, malah itulah nan musti labiah kito aragowi. Angguato-angguato tubuah nan indak patuik dipaliyekkan, malah itu nan musti labiah kito paratikan.

²⁴ Angguato tubuah nan patuik diliyek, indak lai mamaralukan paratian kito. Allah lah manyusun tubuah kito, bakcando nan kiniko, sainggo angguato nan kurang ba arago, labiah di aragowi.

²⁵ Jo caro nan baitu, tubuah tu indak tabagi-bagi; satiyok-tiyok angguato samo-samo mamparatikan.

²⁶ Kok umpamonyo ado ciyek angguato nan sansaro, mako kasadonyo angguato nan lain sato pulo sansaro; jikok ado ciyek angguato nan dipuji, mako kasadonyo angguato nan lainnyo sato pulo bagadang ati.

²⁷ Angku-angku kasadonyo adolah tubuah Isa Almasih, jadi satiyok angku-angku adolah angguato dari tubuah tu.

²⁸ Baitu pulo di dalam jamaat, Allah lah nan manampaikkan satiyok-tiyok urang di tampaiknyo: Nan partamu rasul-rasul; nan kaduwo nabi-nabi, nan katigo guru-guru, sudah tu, ado pulo urang-urang nan dibari kuwaso untuak mampabuwek mukjizat, kudian ado pulo urang-urang nan dibari kalabiahan, sainggo inyo punyo kuwaso untuak mancegakkan urang, ado pulo nan dibari kalabiahan untuak suko manolong urang, kok indak untuak mamimpin, kok indak untuak mangecek jo babagai-bagai bahaso nan ganjie.

²⁹ Urang-urang tu indak kasadonyo doh rasul, atau nabi, ataupun guru. Indak kasadonyo pulo doh nan punyo kuwaso untuak mambuwek mukjizat,

³⁰ atau untuak mancegakkan urang, atau untuak mangecek jo babagai bahaso nan ganjie, atau untuak ma aratikan bahaso-bahaso nan ganjie tu.

³¹ Dek karano itu, andaknyo angku-angku ba usawo basungguah-sungguah, untuak mandapekkan pambarian-pambarian nan paliang tarutamu, dari Roh Allah. Tapi, kiniko ambo ka manunjuakkan kabake angku-angku jalan nan paliang baiak.

1 Korintus

Video 1 Korintus 12

Ikuti Kami:

KONTAK | PARTISIPASI | DONASI