Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O kinanak-kinanakku, ratnan baré-baré luk ratnan Roh Meligan, ui sikal nemuyuh kali' luk matu.
2 Muyuh kali' kareb muyuh na manu, muyuh pangeh rinuid kuan akang luk na niat ineh, luk megéi ngeraruh nemuyuh.
3 Petulu muyuh kali, idi seburur pana' luk kinuyut Roh Allah, na miak pebala, "Yésus ineh kidiman!" Idi seburur pana' na miak mala, "Yésus ineh Tuhan," kudeng ieh na kinuyut Roh Meligan.
4 Inan tuda'-tuda' baré Roh, iamo' amung ineh biré Roh luk sebuleng ineh.
5 Inan tuda'-tuda' kekamen ngasa', iamo amung ineh biré Tuhan luk sebuleng ineh.
6 Idi inan tuda'-tuda' kekamen luk melalud, iamo' lalud ineh biré Allah luk sebuleng ineh kuan amung lemulun.
7 Iamo' tanu' ratnan Roh ineh biré kuan anid-anid burur, pad ngacing do' kuan amung-amung.
8 Kuan seburur, Roh maré bala ileh; idi kuan lun baken, bala kali' barén Roh ineh teh.
9 Kuan seburur, Roh ineh maré anu, idi kuan lun baken, Roh luk sebuleng ineh maré baré ngedo' lun mét.
10 Kuan seburur, Roh maré baré nganau' kekamen luk melalud, idi kuan lun baken, baré mada' luk biré Allah, idi kuan lun baken Ieh maré ileh ngiti baré luk ratnan Roh, idi baré luk baken ratnan Roh. Kuan lun baken Ieh maré buri' luk ratnan Roh, idi kuan lun baken ileh ngelio ilung buri' ineh.
11 Iamo' amung-amung ineh kekamen Roh luk sebuleng ineh teh. Ieh maré kuan anid-anid burur, maya' pianNeh sebuleng.
12 Keristus ineh mepad kudeng sebuleng burur luk mula' babpat. Sagan pana' mula' babpat, iamo' Ieh ineh sebuleng burur.
13 Kudeng ineh teh amung-amung tau, do' lun Yahudi idi lun pupu baken, do' demulun idi lun luk baken demulun, pangeh rireb mangun ku sebuleng burur, idi amung-amung tau pangeh ngirup ratnan Roh luk sebuleng ineh luk inutang kuan tau.
14 Ngaceku burur ineh pana' baken sebuleng babpatneh, iamo' mula'.
15 Kudeng kukud pebala, "Ngaceku ui baken ticu', na ui aceh babpat ratnan burur," idi baken ngaceku bala ineh kukud ineh na aceh babpat ratnan burur.
16 Idi kudeng lalid pebala, "Ngaceku ui baken mateh, na ui aceh babpat ratnan burur," idi baken ngaceku bala ineh lalid ineh na aceh babpat ratnan burur.
17 Kudeng amung burur ineh mangun ku mateh, su apehké luk ninger ineh? Idi kudeng amungneh ineh mangun ku luk ninger, su apehké luk muen ineh?
18 Iamo' Allah pangeh nemudut anid-anid babpat burur maya' pianNeh sebuleng.
19 Kudeng amung-amungdeh ineh mangun ku sebuleng babpat, su apehké burur ineh?
20 Sagan pana' babpat ineh mula', iamo' burur ineh sebuleng mo'.
21 Idi mateh na miak pebala inan ticu', "Iko na ulek kuanku." Idi uluh na miak pebala inan kukud, "Medueh na ulek kuanku."
22 Idi teh amung-amung babpat burur luk ayuneh pelaba laya', ieh ineh meluun rayeh ulek.
23 Idi babpat burur luk uen tau ngerawé na buren, ruen tau ngasa' do'-do'. Idi babpat tau luk na do' ayu ineh uen tau ngayung ku ayung luk do'.
24 Iamo' babpat tau luk do' ayu na ulek ku ayung ineh. Allah pangeh nemudut burur ineh dengan maré meluun mula' ubur kuan babpat luk na do' ayu ineh.
25 Idi na luk idi dat rurum bang burur, iamo' amung-amung babpat ineh pad-pad pasa'.
26 Kudeng sebuleng babpat ineh mét, idi amung-amung babpat ineh pana' mét teh. Idi kudeng sebuleng babpat buren, idi amung-amung babpat ineh pana' mawang niat peh.
27 Idi muyuh ini burur Keristus, idi amung-amung muyuh babpatNeh.
28 Allah pangeh nengeletep kekamen bang sidangNeh: luk pun-pun rasul-rasul, luk kedueh nabi-nabi, luk keteluh guru-guru, idi luk muci lun luk nganau' kekamen luk melalud, idi luk muci teh lun luk inan baré ngedo' lun mét, lun luk ngedengan, lun luk ngimet, idi lun luk pebala dengan buri' luk ratnan Roh.
29 Baken amung-amungdeh rasul. Baken amung-amungdeh nabi. Baken amung-amungdeh guru. Baken amung-amungdeh ineh nganau' kekamen luk melalud.
30 Baken amung-amungdeh ngalap lalud ngedo' lemulun. Baken amung-amungdeh pebala dengan buri' ratnan Roh. Baken amung-amungdeh mileh ngelio ilung buri' ineh.
31 Ngaceku ineh do' muyuh nakap dengan matu amung-amung baré luk meluun rayeh. Idi ui mada' kuan muyuh aceh dalan luk meluun do'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA