Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkin mengenai paice-paice saq teicanin siq Roh Allah. Mengenai hal nike, tiang mẽlẽ adẽq semeton-semeton nenaoq saq setetune.

² Pade inget bahwe sendẽqman side pade kenal Tuhan, side pade kena pengaruh jari turut berhale saq pakoq.

³ Side pade harus nenaoq bahwe dengan saq tepimpin siq Roh Allah ndẽq gen bebase, "Tekutuk Deside Isa!" Maraq nike ẽndah ndẽq araq sopoq dengan juaq saq bau ngaku, "Deside Isa nike Junjungan Saq Mulie!" lamun dengan nike ndẽq tepimpin siq Roh Allah.

⁴ Araq macem-macem paice lẽman Roh Allah, laguq selapuqne teicanin siq Roh saq sopoq.

⁵ Araq macem-macem pegawẽan jari ngelayanin Tuhan, laguq Tuhan saq telayanin nike, Tuhan saq sopoq ẽndah!

⁶ Araq luwẽq care Allah ngelaksaneang karye-Ne dalem kehidupante, laguq saq ngicanin kekuatan tipaq sebilang dengan nike, Allah saq sopoq ẽndah.

⁷ Laguq tipaq sebilang dengan, tepercayeang paice Roh Allah jari kepentingan bareng-bareng.

⁸ Tipaq sopoq dengan, Roh nike ngicanin paice jari bebaos siq hikmat. Tipaq saq lain Roh saq pade nike ngicanin paice jari bebaos siq penenaoq.

⁹ Tipaq sopoq dengan Roh saq pade ngicanin iman, dait tipaq saq lain Roh nike ngicanin paice jari nyelahang dengan.

¹⁰ Tipaq sopoq dengan Roh nike ngicanin kuase jari miaq keajaipan, dait tipaq saq lain Roh nike ngicanin paice jari benubuat, dait tipaq saq lain malik Roh nike ngicanin paice jari bẽde-bẽdeang macem-macem roh. Tipaq sopoq dengan Roh nike ngicanin paice jari bebaos kadu base-base saq ajaip, dait tipaq saq lain Roh nike ngicanin paice jari jelasang arti lẽman base-base saq ajaip nike.

¹¹ Selapuqne nike telaksaneang siq Roh saq sopoq nike ẽndah; sopoq-sopoq dengan teicanin paice saq husus menurut pekayunan Roh nike.

¹² Almasih nike maraq awak manusie; awak nike sopoq, laguq bedowẽ luwẽq anggote. Selapuq anggote nike, timaqne luwẽq, laguq sopoq awak.

¹³ Maraq nike ẽndah ite selapuq, timaq dengan Yahudi atao dengan bangse-bangse lain, hambe-hambe atao dengan bẽbas; ite selapuq sampun tebaptis siq Roh saq pade nike, adẽq ite tejariang sopoq lẽq rage Almasih nike. Ite selapuq sepenoqne ẽndah ngalamin Roh saq sopoq nike.

¹⁴ Sẽngaq awak nike mẽsaq ndẽqne berasal lẽman sopoq anggote doang laguq luwẽq anggotene.

¹⁵ Lamun naẽ muni, "Tiang ndẽqne ime, keranaq nike tiang ndẽqne bagian lẽman awak," nike ndẽqne berarti bahwe naẽ nike ndẽqne bagian lẽman awak.

¹⁶ Dait lamun kentok muni, "Sẽngaq tiang ndẽq penenteng, make tiang ndẽqne bagian lẽman awak," nike ẽndah ndẽqne berarti bahwe kentok nike ndẽqne bagian lẽman awak.

¹⁷ Seandẽne selapuq awak nike jari penenteng doang, berembẽ awak nike bau dengah? Atao lamun selapuq awak nike jari kentok doang, berembẽ awak nike bau ngambuq?

¹⁸ Ite serioq bahwe Allah saq noloq anggote-anggote nike lẽq awak. Sopoq-sopoq tetoloq siq Allah lẽq taoqne menurut pekayunan-Ne.

¹⁹ Lamun selapuqne cume sopoq anggote doang, mbẽ saq tesebut awak?

²⁰ Jari mule araq luwẽq anggote, laguq awak cume sopoq.

²¹ Keranaq nike, penenteng ndẽqne bau muni lẽq ime, "Tiang ndẽq merluang side!" atao ulu muni lẽq naẽ, "Tiang ndẽq merluang side!"

²² Sebalikne anggote-anggote awak saq teanggep lemah nike, ite perluang gati;

²³ dait anggote-anggote saq ite anggep kurang solah, malahan nike anggote-anggote saq ite bẽng perhatian husus. Anggote-anggote awak saq ndẽq solah ruene, malahan lebih ite perhatiang.

²⁴ Anggote-anggote awak saq sampun solah ruene, ndẽqne merluang perhatiante. Allah sampun nyusun awakte maraq nike sehingge anggote-anggote saq kurang solah tebẽng perhatian saq husus.

²⁵ Siq care nike awak nike ndẽqne tebagi-bagi; sopoq-sopoq anggote saling perhatiang sopoq kance saq lainne.

²⁶ Lamun sopoq anggote menderite, selapuq anggote saq lainne menderite ẽndah; lamun sopoq anggote tepuji, selapuq anggote saq lainne milu seneng.

²⁷ Semeton-semeton senamian bareng-bareng jari rage Almasih dait side pade sopoq-sopoq ẽndah jari anggote lẽman rage nike.

²⁸ Maraq nike ẽndah lẽq dalem jemaah, Allah sampun nentuang taoq jari macem-macem dengan: Penembẽqne rasul-rasul; kedue nabi-nabi, ketelu guru-guru, terus ie pade saq mauq paice jari miaq keajaipan-keajaipan, jari nyelahang dengan, jari nulung dengan lain, jari mimpin, dait jari bebaos kadu macem-macem base saq ajaip.

²⁹ Ie pade ndẽqne selapuqne rasul, atao nabi, atao guru. Ndẽq selapuqne mauq paice jari miaq keajaipan,

³⁰ atao jari nyelahang dengan, atao jari bebaos kadu macem-macem base saq ajaip, atao jari ngartiang base-base nike.

³¹ Keranaq nike, side pade harus berusahe pacu-pacu adẽqde mauq paice-paice saq paling utame. Laguq selanjutne niki tiang nyatayang lẽq side langan saq lebih utame.

1 Korintus

Video 1 Korintus 12

Ikuti Kami:

KONTAK | PARTISIPASI | DONASI