Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Liakdo hara Allah mengasihi ram, sehingga ram diakui sebagai anak-anak-Ni. Rik sangun ramdo anak-anak-Ni Allah. Udido sebabni dunia sai jahat inji mak kenal jama ram, mani dunia mak kenal jama Allah.

² Puari-puari sai tecinta! Ram tano iado anak-anak-Ni Allah, kidang keadaan ram kanah makkung jelas. Kidang ram pandai bahwa kik Almasih ratong, ram haga jadi injuk Ia, mani ram haga ngeliak Ia delom keadaan-Ni sai sebenorni.

³ Sunyinni jelma sai ngedok harapan inji tehadap Almasih, ngejaga dirini in temon-temon suci, mekecah jak dusa injuk repa Almasih sai suci.

⁴ Jelma sai nyani dusa, ngelanggar hukum-Ni Allah, mani dusa yakdo pelanggaran tehadap hukum-Ni Allah.

⁵ Keti pandai bahwa Almasih ratong untuk ngehapusko dusa-dusa manusia, rik bahwa mak ngedok dusa delom diri-Ni.

⁶ Sunyin jelma sai hurik besatu jama Almasih, mak terus-menerus nyani dusa. Jelma sai terus-menerus nyani dusa, mak pernah ngeliak Almasih atau tentang Ia.

⁷ Anak-anakku, dang naganko sapa pun juga nyesekko keti. Jelma sai ngelakuko kehaga-Ni Allah iado anak-Ni Allah injuk repa Almasih iado Anak-Ni Allah.

⁸ Kidang jelma sai terus-menerus nyani dusa iado anakni iblis, mani sifatni iblis bedusa radu jak mula-mula. Untuk injido Anak-Ni Allah ratong, yakdo untuk ngehancorko guaini iblis.

⁹ Jelma sai radu jadi Anak-Ni Allah, mak terus-menerus nyani dusa, mani sifat-Ni Allah tenggalan wat jama ia. Rik mani Allah udi Bapani, maka ia mak dapok terus-menerus nyani dusa.

¹⁰ Injido bidani hantara anak-anak-Ni Allah jama anak-anakni iblis: sapa sai mak ngelakuko kehaga-Ni Allah, atau mak mengasihi puarini, ia lain anak-Ni Allah.

¹¹ Jak mula-mula radu disampaiko kabar inji jama niku: Ram harus mengasihi peperda ram.

¹² Dangdo ram injuk Kain, sai jadi anakni iblis rik ngebunuh puarini tenggalan. Api sebab Kain ngebunuh puarini? Mani hal-hal sai dilakukoni salah, kidang hal-hal sai dilakuko puarini ano benor.

¹³ Ulihni seno, Puari-puariku, dang hiran kik jelma-jelma dunia inji nyuohko keti.

¹⁴ Ram pandai bahwa ram radu luah jak kematian, rik malih mik hurik. Ram pandai ano, mani ram mengasihi peperda puari ram. Jelma sai mak mengasihi, retini masih dikuasai ulih kematian.

¹⁵ Jelma sai menyuohko puari iado jelma sai ngebunuh, rik keti pandai bahwa sai jelma ngebunuh mak ngedok hurik sejati rik kekal.

¹⁶ Jama jalan injido ram pandai cara mengasihi peperda ram: Almasih radu nyerahko hurik-Ni untuk ram. Ulihni seno, ram juga harus nyerahko hurik ram untuk puari-puari ram!

¹⁷ Kik sai jelma sai batin ngeliak puarini mejerih, kidang mak haga nulung puarini udi, injuk repa jelma udi dapok ngucakko bahwa ia mengasihi Allah?

¹⁸ Anak-anakku! Dang ram mengasihi angkah di banguk atau angkah jama cawa gaoh. Hagani ram mengasihi jama kasih sai sejati, sai dibuktiko jama perbuatan ram.

¹⁹ Renodo carani ram pandai bahwa ram tegolong anak-anak-Ni Allah sai benor, rik hati ram dapok tenang di hadap-Ni Allah.

²⁰ Ram pandai, bahwa kik ram disalahko ulih hati ram, pengetahuan-Ni Allah lebih balak jak pengetahuan hati ram, rik bahwa Ia pandai sunyinni.

²¹ Jadi Puari-puariku sai tecinta, kik hati ram mak nyalahko ram, ram dapok ngehadap Allah jama kebanian.

²² Rik api sai ram kilu jak Ia, ram mansa ia, mani ram taat jama perintah-perintah-Ni rik ngelakuko api sai nyenangko hati-Ni.

²³ Sai Ia perintah jama ram iado: Ram harus percaya jama Anak-Ni, yakdo Isa Almasih, rik ram harus saling mengasihi, injuk sai radu diperintahko Almasih jama ram.

²⁴ Sunyin jelma sai taat jama perintah-perintah-Ni Allah, hurik besatu jama Allah rik Allah besatu jama tian. Rik ram pandai bahwa Allah hurik besatu jama ram, mani Ia radu ngeniko Ruh-Ni jama ram.

1 Yohanes

Video 1 Yohanes 3

Ikuti Kami:

KONTAK | PARTISIPASI | DONASI