Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Parayak nasiam ma haholongon in, porluhon nasiam partonduyon, tapi siporlunan, ai ma panjahaion.
2 Ia na marhata na legan, sedo jolma na pinarsahapkonni, tapi Naibata do. Ise pe lang na mangarusi, ai rusia do ihatahon ibagas tonduy.
3 Tapi na manjahai, jolma do iparsahapkon, laho pauli-ulihon, mamodahi ampa mangapohi.
4 Na pauli-ulihon dirini do na marhata na legan, tapi kuria in do ipauli-uli na manjahai.
5 Marosuh do uhurhu namin, anggo haganup nasiam marhata na legan, tapi harganan do na manjahai. Halak na manjahai surungan do ai humbani na marhata na legan, anggo seng lanjar ipatorang, laho pauli-ulihon kuria in.
6 Ai pe, nasiam sanina, anggo roh ahu bani nasiam marhata na legan, aha ma gunani ai bani nasiam, anggo seng huhatahon bani nasiam pangungkabon atap habotohon atap panjahaion atap pangajarion?
7 Umpamani parugas na so manggoluh, songon sordam atap husapi, anggo samak sorani, sonaha ma boi botohon atap na isordamkon atap na ihusapihon?
8 Anjaha anggo seng torang sora ni tarompit, ise ma na ra marugas laho hu parporangan?
9 Sonai ma nasiam pasal sahap na legan ai. Anggo isahapkon nasiam hata na so torang, sonaha ma boi botohon na hinatahon nasiam? Ai lang songon na marsahap bani logou mando in?
10 Buei do tongon bagei ni sahap i dunia on, anjaha sada pe lang na so adong artini.
11 Anggo lang hubotoh arti ni hata ai, gabe bangsa na legan ma ahu bani na marsahap ai, anjaha na marsahap ai pe gabe bangsa na legan ma bangku.
12 Anjaha sonai ma nasiam, halani ihaporluhon nasiam do partonduyon, pindahi nasiam ma hasurungan, laho pauli-ulihon kuria in.
13 Halani ai martonggo ma parhata na legan ai, ase tarpatorangsi.
14 Anggo martonggo ahu ibagas hata na legan, tonduyhu do na martonggo soh do anggo pingkiranku.
15 Ase sonaha ma bahenon? Martonggo ma ahu ibagas tonduyhu, tapi sihol martonggo do ahu homa ibagas pingkiranku. Mandoding ma ahu ibagas tonduyhu, tapi sihol mandoding do ahu homa ibagas pingkiranku.
16 Ai anggo mamuji ham ibagas tonduymu, sonaha ma tarbahen halak na dihut ijai mangkatahon amen bani hata tarima kasihmu ai, anggo seng iarusi?
17 Dear do namin hata tarima kasih ai, tapi seng paulihon ai bani hasoman.
18 Tarima kasih do uhur hubani Naibata, halani pandeinan ahu marhata na legan marimbang nasiam haganup.
19 Tapi anggo ibagas kuria in, rosuhan do uhurhu mangkatahon lima hata na tararusi humbani saloksa ibagas hata na legan, ase tarajari ahu na legan.
20 Nasiam sanina, ulang ma dakdanak nasiam ibagas paruhuron, dakdanak ma nasiam pasal hajahaton, tapi matoras ma bani paruhuron.
21 Bani titah in tarsurat do, “Marhitei parhata na legan ampa marhitei bibir ni halak na legan sihol marsahap do ahu bani bangsa in, tapi age pe sonai, seng tangihonon ni sidea Ahu,” nini Tuhan in.
22 Ase tanda do sahap na legan, sedo bani na porsaya, tapi bani na so porsaya do, tapi anggo panjahaion sedo bani na so porsaya, tapi bani na porsaya do.
23 Ase anggo martumpu haganup kuria in, anjaha marhata na legan haganupan, anjaha adong masuk parguru atap na so porsaya, ai lang hatahonon ni sidea ma na gila nasiam?
24 Tapi anggo haganup manjahai, anjaha adong masuk na so porsaya atap parguru, gabe haganup ma marsipaingat bani, anjaha haganup ma manguhumi na ibagas uhurni,
25 gabe talar ma ponopan na ibagas uhurni, gabe manrogop ma ia, marsombah bani Naibata, anjaha marhatongonkon, na tongon do Naibata i tongah-tongah nasiam.
26 Ase sonaha do, nasiam sanina? Anggo martumpu nasiam, adong do bani na sada doding, bani na sada pangajarion, bani na sada pangungkabon, bani na sada sahap na legan, bani na sada hatorangan, tapi haganupan ai laho pauli-ulihon kuria in ma namin.
27 Anggo adong na marhata na legan, sungkup ma dua atap sibuenan ma tolu halak, anjaha sada-sada ma, anjaha sahalak ma na patorangkon.
28 Tapi anggo seng adong na patorangkon, sip ma ia i lobei ni kuria in; bani dirini ampa bani Naibata ma ai ihatahon.
29 Anggo nabi, dear ma dua atap tolu halak manjahai, anjaha na legan ai manimbangi.
30 Tapi anggo dapotan pangungkabon sada halak na hundul ijai, sip ma na parlobei ai.
31 Ai bulih do nasiam haganup manjahai sada-sada, ase haganup dapotan podah ampa sipaingat;
32 anjaha pambalosi do tonduy ni nabi bani nabi in,
33 ai seng iharosuhkon Naibata na geor, tapi damei do. Songon bani haganup kuria ni halak na mapansing in,
34 parsip ma naboru ibagas kuria in; ai seng patut mangkatahon hata sidea, tapi pambalosi ma, songon na hinatahon ni titah in.
35 Tapi anggo adong na sihol sibotohon ni sidea, isungkun ma i rumah paramangonni, ai pantang do bani parinangon marsahap i kuria in.
36 Ai humbani nasiam do luar hata ni Naibata? Atap hubani nasiam do hansa das in?
37 Ganup ma mamingkir, nabi atap partonduy ia ibotoh ma, ia na husuratkon bani nasiam, in ma parentah ni Tuhan.
38 Tapi anggo adong na mangakui in, seng siakuan ia!
39 Ai pe, nasiam sanina, haporluhon nasiam ma na manjahai, tapi ulang ma pandang nasiam na marhata na legan.
40 Asal ma haganup mardalan dear anjaha maratur.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA