Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pěmpẹ̌tawakal᷊iko i kamene, kuměndagu sěndinganeng i kamene. Dingangu pěmpẹ̌tatuměgal᷊ẹ̌ko l᷊ai měmpěnarimạu laonggọ mararohkẹ̌ e, limembo kate mědeạu makapěnubuetẹ̌ su taumata.

² Taumata kụ mẹ̌bẹ̌bisaram bawera makạdalinaụ e, taumata ene wal᷊inewe měbẹ̌bisara ringangu taumata, i sie měbẹ̌bisara ringangu Mawu Ruata. Tawẹ apa taumata makaěnna apan niwerane, watuụ Rohkẹ̌ u Ruata e makạdiadin sie makạberang kal᷊awọu apang kětạeng su kasingkạ u Ruata.

³ Su sěmběkane ute taumata kụ makapěnubuetẹ̌ su taumata e, makapěnoghasẹ̌ si sire, waugu mamangung pěndang i sire, ringangu makapẹ̌gěllịu lahiborẹ̌ e si sire.

⁴ I saing mẹ̌bẹ̌berang bera makạdal᷊inaụ, tumbạeng mạnoghasẹ̌ batangenge hala, arawe i saing mělẹ̌habaru hengetang bọu Ruata e makạtulung jamaatẹ̌ e mạbangung.

⁵ Apạ e mapia kereu i kamene kěbị e mẹ̌bẹ̌berang haghim bera makạl᷊aherang. Kai limembong kapiane e ute kereu i kamene makahabaru manga kal᷊awọu hingidu Ruata e. U i sain měhabaru injilẹ̌ e, limembong kasěllahe wọu i sain mẹ̌bẹ̌bisara ringangu haghim bera makạl᷊aherange watụ u kai makạtualagẹ̌ apan nịbawerane e, takadeạu su kal᷊awọu jamaatẹ̌ e piạbe ual᷊ine.

⁶ Kereu andene iạ duměnta su anunu kụ iạ e makawera ringangu haghim bera makạl᷊aherange, ute apawu gunane si kamene e? Mamben tala sarang kadidị-didị! Nẹ̌tatěntangu, kereu iạ e mapal᷊ahẹu pělahabaru Ruata e, arau iạ měnualagu apa-apa, mạanuen Duata e, arau iạ měhabaru hengetangu Mawu arau iạ maněntiro.

⁷ Pakakasu musikẹ̌ e tawẹ himukude sarang kadodọ-dodọ, kere manga suling, dingangu kěcapi, u kereu manga notẹ̌ e tawe ipěnalang pakal᷊ětạ e, kereapa wue taumata e makakasingkạ u měnsang kawe lagu sude ipẹ̌kẹ̌kantarị e?

⁸ Piạ haghine wal᷊ine: Kereu slompretẹ̌ e měngkate asal᷊e matiụ, ute kai i sai wue mapulu mẹ̌sasadia mẹ̌sekẹ?

⁹ Kerene lai ual᷊ingu kasingkạ u makapẹ̌berang haghim bera makạl᷊aherange. Kereu i kamene ringangu kasingkạu e mẹ̌beram bawera tawe kal᷊aěnnaěnge, ute tawẹu sarang sěngkatau e makahěngang kai apa nịbawerane. Kěbị apan niwerang kamene e sarung mailang su kinoaěng.

¹⁰ Su runia ini e měngkai makěpal᷊ẹ̌ haghim bera e, kai tawẹu sarang sěmbaụ e tạ mangal᷊ene.

¹¹ Kai kamageng iạ e tawe makaěnna wera iwẹ̌berang pẹ̌sěngkatau e, tangu i saịewen mẹ̌bẹ̌beram bera ene e kai kere tau raghị su těngoku e; kerene lai iạ e si sie.

¹² Kerene lai i kamene, iạ masingkạu i kamene e mambem piạ kapulu makaěbạ laonggọ Marohkẹ̌ e. Kai něngalembo wọu patikụ ene e, i kamene e pěmpẹ̌tatẹ̌gehẹ̌ bue sěngapam botonge, tadeạu mẹ̌pakẹu kapelesa gunang mẹ̌tul᷊ung dingangu měmangung jamaatẹ̌ iapasombọ.

¹³ Kai ene hakịu taumata apan měmpẹ̌bisaram bera makạl᷊aherange ute, harusẹ̌be mẹ̌dorong su Mawu Ruata e tadeạu onggotangbe lain kapelesa baụgu měnualagu apan niwerane ene.

¹⁴ U kereu iạ mẹ̌kal᷊iomaneng su wera makạl᷊aherang, rohkẹ̌ku e mamben měkẹ̌kal᷊iomaneng, kai arawe tiněnnaku e tawẹ hal᷊ẹ̌ e.

¹⁵ Kụ iạ e kai mẹ̌koạ e apa tangu? Iạ e sarung mẹ̌kal᷊iomaneng u rohkẹ̌ku, kai iạ e mal᷊aing mẹ̌kal᷊iomanengu laěnnaku. Iạ e sarung mẹ̌kantarị u rohkẹ̌ku, kai iạ mal᷊aing mapulu mẹ̌kantarị u laěnnaku e.

¹⁶ Kereu i kau makitarimakasẹ su Mawu Ruata tumbạben dingangu rohkẹ̌ u samatang, dingangu piạ taumata wal᷊ine kụ tawe makaěnna wawera makạdal᷊inaụ kụ asal᷊e wọu Rohkẹ̌ u Ruata e, tangu taumata ene tawe makawera u, "Iạ e akorẹ̌ bue" sukakal᷊iomaneng tatarimakasẹ u ene; ual᷊ingu i sie wěga wue apang kụ niweranu.

¹⁷ Maningbe kakal᷊iomaneng tatarimakasẹ u su Mawu e mapia kahěngang, kaiso kakal᷊iomaneng ene e mamben tawẹ gunane su taumata wal᷊ine.

¹⁸ Iạ e makitarimakasẹ su Mawu Ruata u iạ sẹ̌saku e makạbisara su haghim bera makạl᷊aherange lembong kapiane wọi kamene kěbị.

¹⁹ Kaiso su ral᷊ungu manga komol᷊angu jamaatẹ̌ e iạ e mapiang be mẹ̌bisara manga l᷊imang kamohong kụ kaěnnaěngu taumata e sul᷊ungke ringangu hiwune su kamohong e su wera makạl᷊aherang. Endọbeng iạ mapulu kerene mědeạu makapěněntiro taumata.

²⁰ Manga anạ u sěmbaụ! Piawe makoạ kere manga rariọ, su hal᷊ẹ̌ u sipirange. Su hal᷊ẹ̌ u kararal᷊akisẹ̌ e ute i kamene kěngkakoạ'e kere manga rariọ deng tal᷊awuọ. Kai arawe su hal᷊ẹ̌ u tiněnna e, i kamene e kěngkakoạko kere taumata seng matěllang.

²¹ Su ral᷊ungu Winohẹ Susi e kạbawohẹ kere ini, "Mawu něhengetang, 'Ual᷊ingu pẹ̌baweram bera makạl᷊aherange Iạ e sarung měhengetang su manga umatẹ̌ ini e. Nangělembo kate ual᷊ingu taumata raghị e Iạ e sarung měluntinghẹ̌ su manga umatẹ̌-Ku; kai maningbe kerene e, i sire e tawe mapulu rumaringihẹ̌ bawera-Ku.'"

²² Kụ tahawisarang haghim bera makạl᷊aherange kai tatialan taumatawe tạ pangangimange, bal᷊inewe waugu taumata mạngimang. Mase tahapěhabaru hengetangu Mawu e su taumata u kai tatialan taumata mạngimang, bal᷊inewe waugu taumata tạ pangangimange.

²³ Ual᷊ingu ene ute, kereu su ral᷊ungu komol᷊angu jamaatẹ̌ e, kal᷊awọu ral᷊ohon jamaatẹ̌ e mẹ̌bisarang haghim bera makạl᷊aherange, kutẹu wọu ene riměntạe pirang katau wọu l᷊ikude, arau i sire wal᷊ine tau Sahani, nal᷊ahẹ u i sire sarung mẹ̌ngiral᷊ingu i kamene kai seng pulu kěbị!

²⁴ Kai kamageng i kamene kěbị e měhabaru hengetangu Mawu, wọu ene e ruměnta sěngkatau wal᷊ine tau Sahani e arau taumatan l᷊ikude, tangu apạewen nihabari kamene kěbị e sarung mělahẹu kal᷊awọu rosan tau ene ringangu makariadin sie mẹ̌sasěsilu rosane.

²⁵ Patikụ apan kạbawuni su ral᷊ungu naunge ipakal᷊ahẹ, hakịu i sie mẹ̌těngkasanạu watangenge kụ mạněmba Ruata. I sie sarungbe měngaku u Ruata e kahěnga-hěngangbe ene sutal᷊oarang kamene.

²⁶ Kụ manga anạ u sěmbaụ, kai apạ e ngae mangal᷊eng kěbị ene? Kereu i kamene měmpẹ̌komol᷊ẹ̌ maněmba Mawu e, ute piạem mẹ̌kẹ̌kantarị, piạem mạněntiro, piạem mělẹ̌habaru apa-apa wọu Mawu Ruata, piạem mạhumbisara su wera makạl᷊aherang dingangu piạben lai měmpẹ̌nẹ̌nualagu apan nịbawerane. Kaiso patikụ ene e harusẹ̌be koạ gunan maněntiro ringangu gunang kapapiang kěbị.

²⁷ Kereu piạu mapulu mẹ̌bisara su wera makạl᷊aherange, ute kětạu pẹ̌tahadua arau mětěngkal᷊awọ e pětahatěllung katau apẹ̌darol᷊osẹ̌ e. Dingangu harusẹ̌ piạu měnualagẹ̌ apan nipẹ̌bisaran taumata mẹ̌bawisarane ene.

²⁸ Kereu tạu makatualagẹ̌ e, tangu taumata apan mạhumbisaram bera makạl᷊aherange ene e harusẹ̌be mẹ̌těngkarěmmasẹ̌ su komol᷊ang ene. Balạe i sire pẹ̌bawisarane su ral᷊ungu naung i sire e su Mawu e.

²⁹ Darua arau těllung katau měnanubuetẹ̌ e harusẹ̌be měhabaru hengetang ene e těntal᷊angbe wal᷊ine měmpẹ̌timbangu apan niwera e.

³⁰ Kai kereu hengetangu Mawu e kai riměnta su sěngkatau wal᷊ine naiang su komol᷊ang ene, tangu i saing kạpẹ̌bẹ̌bisarane e ute harusẹ̌ měngirul᷊e.

³¹ Kụ ual᷊ingu kawe tundune kerene ute, i kamene manga anạ u sěmbaụ kěbị e, sěngkatau-sěngkatau e wotonge makapěhabaru hengetangu Mawu e; tadeạu kěbị e makapěnarimạ u těntiro, ringangu sauneng matoghasẹ̌ su pěngangimang.

³² Laonggọ bọu Rohkẹ̌ e waugu měnubuetẹ̌ e lẹ̌ul᷊ingang i sain němpěhabaru hengetang ene.

³³ Duata e kai Ruata puluang su atore; i Sie tạ karal᷊uase su hal᷊ẹ̌u pẹ̌sasilontahẹ̌. Kerẹe mạdiadi su ral᷊ungu patikụ jamạat'u Mawu,

³⁴ manga wawine e harusẹ̌be pěmpẹ̌těngkarěmmasẹ̌ su komol᷊angu jamaatẹ̌. I sire taipakawala mẹ̌bisara. I sire taipakawala makoạ pangahạ e, kerẹewe tumuhụ toratẹ̌.

³⁵ Kereu i sire mapulu měngěndung manga apa, ute i sire harusẹ̌be makiwal᷊o su kawingi sire su wal᷊e. U kai makạsamedẹ̌ kereu sěngkatau wawine e mẹ̌bisara su ral᷊ungu komol᷊angu jamaatẹ̌.

³⁶ Arau kai manga simẹ̌bang bọu anung kamene, hengetangu Mawu Ruata e? Arau kai kětạu nịdatingu anung kamene ngae hengetang ene?

³⁷ Kereu piạu makạpěndangu kai piạ tilakehu měnubuetẹ̌, arau piạ laonggọ bal᷊ine bọu Rohkẹ̌ u Ruata e, ute tau ene harusẹ̌be makapěndang batangenge u apan seng takụ niwohẹ ini e ute kai laoron Mawu e.

³⁸ Kai kereu piạu tamakatarimạu ini e ute kumbahangbe lai i sie i tarimạ.

³⁹ Kai ual᷊ingu ene ute, manga anạ u sěmbaụku, pěmpẹ̌těmpal᷊ungkangke tadeạu makapěnubuetẹ̌, kai kumbahangbe mẹ̌sẹ̌dingu apam mapulu mẹ̌bisarang haghim bera makạl᷊aherang.

⁴⁰ Kai kěbị e harusẹ̌be koạ pakapia ringangu pakaatorẹ̌.

1 Korintus

Video 1 Korintus 14

Ikuti Kami:

KONTAK | PARTISIPASI | DONASI