Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Hagani keti berusaha untuk mengasihi jelma-jelma bareh. Rik berusahado juga untuk menerima karunia-karunia sai dikeniko Ruh-Ni Allah, terutama sekali kesanggupan untuk nyampaiko rencana-rencana-Ni Allah jama manusia.

² Jelma sai cawa delom bahasa sai aneh, jelma udi lain hak cawa jama manusia; ia cawa jama Allah. Mak ngedok jelma sai ngerti api sai ia cawako, mani Ruh-Ni Allah sai nyebabko ia ngucakko hal-hal sai angkah dipandai Allah.

³ Sebalikni jelma sai nyampaiko kabar jak Allah, nyampaikoni jama manusia; untuk nguatko tian, untuk ngeni semangat jama tian rik untuk ngehibur tian.

⁴ Jelma sai cawa delom bahasa sai aneh angkah nguatko dirini tenggalan gaoh, sedangko jelma sai nyampaiko kabar jak Allah nulung jemaah jadi maju.

⁵ Hara betikni kik Puari sunyin dapok cawa jama bebagai bahasa sai aneh. Kidang sai paling betik iado kik Puari dapok ngeberitako rencana-rencana-Ni Allah. Mani jelma sai nyampaiko kabar jak Allah, lebih balak jak jelma sai cawa jama bebagai bahasa sai aneh; lain halni kik jelma sai cawa delom bebagai bahasa sai aneh ano dapok ngejelasko api sai dicawakoni ano, in sunyinni jemaah mansa manfaatni.

⁶ Kik nyak seandaini ratong jama niku rik nyak cawa delom bebagai bahasa sai aneh, api gunani ano untuk keti? Mak ngedok gunani cutik pun! Lain halni kik nyak nyatako pengungkapan jak Allah, atau nyak ngejelasko hal tentang Allah, atau nyak nyampaiko kabar jak Allah, atau nyak ngajar.

⁷ Alat-alat musik sai mak benyawa cutik pun, injuk misalni suling rik kecapi, kik nada-nadani mak dimainko jama jelas, injuk repa ulun pandai lagu api sai dimainkoni?

⁸ Suatu cuntoh sai bareh lagi: Kik trumpet dibunyiko sembarangan, sapa sai haga besiap untuk beperang?

⁹ Injuk reno juga jama kesanggupanmu untuk cawa jama bebagai bahasa sai aneh. Kik Puari jama kesanggupan ano ngucakko cawa-cawa sai mak jelas, mak ngedok sai jelma pun sai dapok ngerti api sai Puari cawako. Cawa-cawamu ano haga lebon mak tantu.

¹⁰ Di dunia inji wat lamon bahasa, kidang mak ngedok sai pun jak bahasa-bahasa udi sai mak ngedok reti.

¹¹ Kidang kik nyak mak ngerti bahasa sai diucakko sai jelma, maka jelma sai makai bahasa udi merupako jelma asing tehadapku; reno muneh nyak tehadap ia.

¹² Tentang keti tenggalan, nyak pandai keti mirak nihan mansa karunia-karunia jak Ruh-Ni Allah. Kidang sai terutama nihan, harusdo keti berusaha untuk makai kesanggupan sai nulung jemaah jadi maju.

¹³ Udi sebabni jelma sai cawa delom bahasa sai aneh, harusdo ngilu jak Allah in ia dikeni juga kesanggupan untuk nerangko api sai dicawakoni udi.

¹⁴ Mani kik nyak bedua delom bahasa sai aneh, ruhku sangun bedua, kidang pikeranku mak beguai.

¹⁵ Jadi, nyak harus bebuat api? Inji sai haga kubuat: Nyak haga bedua jama ruhku, kidang nyak haga bedua juga jama pikeranku. Nyak haga menyanyi jama ruhku, kidang nyak haga menyanyi juga jama pikeranku.

¹⁶ Mani kik Puari ngucapko terima kasih jama Allah jama ruhmu gaoh, rik wat jelma bareh sai mak ngerti bahasa aneh sai jak Ruh-Ni Allah ano, maka jelma udi mak dapok cawa, "Nyak setuju" tehadap dua syukormu ano; mani ia mak pandai api sai Puari cawako.

¹⁷ Meskipun dua terima kasihmu jama Tuhan udi betik nihan, kidang dua ano mak ngedok gunani sama sekali bagi ulun bareh.

¹⁸ Nyak beterima kasih jama Allah mani nyak tenggalan dapok cawa delom lamon macam bahasa sai aneh lebih jak Puari sunyinni.

¹⁹ Kidang, di delom pertemuan-pertemuan untuk nyumbah Tuhan, nyak lebih gering makai lima cawa sai dapok dimengerti ulun jak makai beribu-ribu cawa delom bahasa sai aneh. Nyak lebih gering injuk reno in nyak dapok ngajar ulun.

²⁰ Puari-puari! Dangdo bepiker injuk sanak-sanak. Delom hal kejahatan, hagani keti tetap injuk sanak lunik. Kidang delom pemikeran, hagani keti jadi jelma sai radu dewasa.

²¹ Delom Alkitab tetulis injuk reji, "Tuhan cawa, 'Liwat jelma-jelma sai cawa jama bahasa sai ganjil, Nyak haga cawa jama umat inji. Bahkan liwat ulun-ulun asing, Nyak haga cawa jama umat-Ku, kidang injuk reno, tian mak haga ngedengi cawa-Ku.'"

²² Jadi karunia untuk cawa jama macam-macam bahasa sai aneh iado sebagai tanda untuk jelma sai mak percaya, lain untuk jelma sai percaya. Rik karunia untuk ngeni pandai rencana-Ni Allah jama manusia iado tanda untuk jelma sai percaya, lain untuk jelma sai mak percaya.

²³ Ulihni seno, kik seandaini di delom pertemuan jemaah, sunyin jemaah cawa delom bebagai bahasa sai aneh, raduni ratong pepira ulun-ulun luah, atau ulun-ulun sai lain Kristen, tantu ulun-ulun udi haga nyangko keti radu luangan sunyinni!

²⁴ Kidang kik Puari sunyinni nyampaiko kabar jak Allah, raduni ratong sai jelma sai lain Kristen atau sai jelma luah, maka hal-hal sai diberitako ulih Puari sunyinni haga nunjukko dusa-dusa jelma udi rik nyani ia sadar jama dusa-dusani.

²⁵ Hal-hal sai tesegok di delom hatini haga dinyatako, sehingga ia haga ngerendahko dirini raduni nyumbah Allah. Ia haga ngaku bahwa Allah temon-temon wat di tengah-tengah keti.

²⁶ Jadi Puari-puari, api retini sunyinni ano? Kik keti bekumpul untuk nyumbah Tuhan, wat sai nyanyi, wat sai ngajar, wat sai ngeni pandai hal jak Allah, wat sai cawa delom bahasa sai aneh, rik wat sai ngejelasko api sai dicawako ano. Kidang sunyinni ano harus dilakuko untuk ngajar rik untuk kebetikan sunyinni.

²⁷ Kik wat sai haga cawa delom bahasa sai aneh, harusdo rua atau paling lamon telu jelma gaoh secara begiler. Rik harus wat sai ngejelasko api sai dicawako ulih jelma sai cawa udi.

²⁸ Kik mak ngedok sai dapok ngejelaskoni, maka jelma-jelma sai cawa delom bahasa sai aneh udi harus ngehema delom pertemuan ano. Tagando tian cawa delom hati gaoh jama Allah.

²⁹ Rua atau telu jelma sai ngedok kabar jak Allah harus nyampaiko kabar ano sementara sai bareh mempertimbangko api sai dicawako ano.

³⁰ Kidang kik seandaini kabar jak Allah ratong jama sai jelma bareh sai mejong pada pertemuan udi, maka jelma sai sedang cawa, mesti taru.

³¹ Jama cara injuk reno, Puari-puari sunyinni, satu per satu dapok nyampaiko kabar jak Allah; in sunyinni dapok nerima ajaran rik jadi makin percaya.

³² Karunia jak Ruh untuk nyampaiko kabar jak Allah dapok dikendaliko ulih jelma sai nyampaiko kabar ano.

³³ Allah iado Allah sai gering jama ketertiban; Ia lain Allah sai gering kekacauan. Injuk sai belaku di delom sunyin jemaah-Ni Allah,

³⁴ bebai harus ngehema pada waktu pertemuan jemaah. Tian mak diizinko cawa. Tian mak ngasi nyating pimpinan; ano nutuk hukum agama.

³⁵ Kik tian haga ngemandai hal, tian harus nanyako udi jama kajong tian di lamban. Meliom nihan kik sai bebai cawa di delom pertemuan jemaah.

³⁶ Api kedo cawa-Ni Allah ratong jak keti? Atau angkah jama niku gaoh cawa udi disampaiko?

³⁷ Kik wat jelma sai ngerasa ngedok karunia untuk nyampaiko kabar jak Allah, atau ia ngedok karunia sai barehni jak Ruh-Ni Allah, jelma udi harus sadar bahwa api sai kutulis inji iado perintah-Ni Tuhan.

³⁸ Kidang kik wat sai mak nerima inji, dangdo ngeperhatiko ia.

³⁹ Ulihni seno, Puari-puari, berusahado untuk nyampaiko kabar jak Allah, kidang dang ngelarang ulun sai haga cawa delom bebagai bahasa sai aneh.

⁴⁰ Kidang sunyinni harus betik dilakuko rik teratur.

1 Korintus

Video 1 Korintus 14

Ikuti Kami:

KONTAK | PARTISIPASI | DONASI