Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto ka 'o ngo-ngaku moi! Ne'ena ngoi tosiwaiti ma ngale 'o co-catu 'o Ngomasa 'Itebi-tebinino. Sababu ngoi tomau ngini nianako ma gou-goungu.

² Niongano-nganono ma 'orasi ngini kowininakowasi ma Jou Yesus, ngini niodomoteke 'o barahala gee koioma-omasuwa.

³ Ngini salingou nianako, 'o nyawa gee 'o Ngomasa 'Itebi-tebini yakiparetano ge'ena koyongosewa 'ato, "'O Yesus tanu 'o dorou wamake!" Koge'enali mita komoiwa ya'akunu yongose 'ato, "'O Yesus ge'ena ma Jou," nako 'o nyawa go'ona ko 'o Ngomasa 'Itebi-tebinuwa yakiparetano.

⁴ Naga 'i'ini-'inioka 'o co-catu, ma ge'ena 'iodumu ka 'o Ngomasa 'o ngai moino ge'ena la 'o Ngomasa 'Itebi-tebinino.

⁵ Naga 'o manarama 'i'ini-'inioka ma ngale ma Jou wileleani, duga ma Jou gee 'o nyawa wile-leleani kawomatengoka.

⁶ Naga 'i'ini-'inioka 'o manarama ma ngale ma Jou wileleani, ma gee wokula-kula 'o guata ma ngale ma manaramoka ge'ena, ge'ena la ma Jo'oungu ma Dutu gee kawomatengo-tengoka gu'una.

⁷ Ma ngale to ngone poodumu nanga laha, 'o Ngomasa 'Itebi-tebini 'inakula 'o co-catu 'imakakaregu ngone moi-moino.

⁸ Moika yakikula 'o co-catu ma ngale yocawaro yobi-bicara de 'o kumati. 'Ireguka yakikula 'o co-catu ma ngale yobarija so ya'akunu yosiwaiti ma ngale ma Jo'oungu ma Dutu.

⁹ 'O Ngomasa kage'enali mita 'ikula 'o nyawa moika, 'o ngo-ngaku ma Kristusika posironga 'ikuatoka, ma naga 'ireguka 'o Ngomasa ge'ena 'ikula 'o kuasa ma ngale 'o nyawa manga panyake yakisi'aiki.

¹⁰ Moikali yakikula 'o kuasa ma ngale yodiai 'o no-nako 'ihera-herangi, de 'iregukali, yakikula 'o co-catu ma ngale yositotara ma Jo'oungu ma Dutu 'awi demo. De 'iregukali 'o Ngomasa ge'ena 'ikula 'o kuasa ma ngale yosikadelega ka'ena 'o co-catu 'o Ngomasa 'Itebi-tebinino, de ka'ena ko'uwa. Munuka yakikula ma ngale ya'akunu yobi-bicara de 'o demo 'i'ini-'inioka gee 'ihera-herangi, de naga mita yakikula ya'akunu yosiwaiti 'o demo-demo ge'ena ma ngale.

¹¹ Ge'ena 'iodumu ka 'o Ngomasa 'o ngai moi yamanarama ge'ena la 'o Ngomasa 'Itebi-tebini, 'o nyawa moi-moi yakikula 'o co-catu moteke 'o Ngomasa ge'ena ma mau.

¹² Ma Kristus ge'ena 'isi-'ade-'ade 'isoka 'o nyawa nanga roese; 'o roese ka 'o ngai moi, duga ma kia sonaa 'o gudaioka. Ma kia sonaa 'iodumu ge'ena ngaro 'o gudaioka, ma ka 'o roese moi.

¹³ Koge'enali mita ngone poodumu, 'o Yahudioka bolo ko 'o Yahudiokawa, 'o yongosi bolo ko'uwa; ngone poodumu 'o Ngomasa 'Itebi-tebini 'ina'osikokau, la ngone pomarimoi de ma Kristus la podadi ka 'o roese moi. Ngone poodumu mita nanga singinaka 'o Ngomasa 'Itebi-tebini 'imanoakau.

¹⁴ Sababu 'o roese ge'ena ma kia sonaa ka 'o ngai moiokawa ma 'ena 'o gudaioka.

¹⁵ Nako 'o dou 'ingose 'ato, "Ngoi ko 'o giamuwa, sababu ge'ena ngoi ko 'o roese ma kia sonaawa," ge'ena ko ma ngalewa 'ato 'o dou ge'ena ko 'o roesuwa ma kia sonaa.

¹⁶ De nako 'o ngauku 'ingose 'ato, "Sababu ngoi ko 'o akowa, so ngoi ko 'o roese ma kia sonaawa," ge'ena mita ko ma ngalewa 'ato 'o ngauku ge'ena ko 'o roese ma kia sonaawa.

¹⁷ Nako kogee 'o roese 'iodumu ge'ena ka 'o ako, kokia 'o roese ge'ena 'idadi 'imasi'isene? Bolo nako 'o roese 'iodumu 'idadi ka 'o ngauku, kokia 'o roese ge'ena 'iame?

¹⁸ Ngone panakokau ma Jo'oungu ma Dutu wosikokinoa 'o roese ma kia sonaa ge'ena. Moi-moi wosinoa to 'ena ma ngiika moteke to 'una wi mau.

¹⁹ Nako 'iodumu ge'ena ka 'o ngai moioka duga, ka'ena posironga 'o roese?

²⁰ So ma goungu naga 'o gudaioka 'o roese ma kia sonaa, duga ma roese ka 'o ngai moi.

²¹ Sababu ge'ena 'o ako koya'akunuwa 'ingose 'o giamika, "Ngoi kotoniparaluuwa ngona!" Bolo 'o saeke koya'akunuwa 'ingose 'o douka, "Ngoi kotoniparaluuwa ngona!"

²² 'Ena momongo 'o roese ma kia sonaa gee pamaoku koikua-kuatuwa, ngone paparaluu ma sala.

²³ De ma kia sonaa moi-moi gee pamaoku koibaragunawa, ge'enau 'ifoloi pabaraguna. Gee koidadiwa posidumu-dumutu, ge'enau 'ifoloi paleleani.

²⁴ 'O roese ma kia sonaa gee pamakeka 'isurekau, koiparaluuwau paleleani. Ma Jo'oungu ma Dutu wa'aturu nanga roese koge'ena ma rupa, so ma kia sonaa gee rekeni koibaragunawa 'ifoloi pabaraguna.

²⁵ Ma Jo'oungu ma Dutu wodiai koge'ena, la 'o roese ge'ena koimakati-tingakuwa, ma kia sonaa moi-moi 'imakakalesangi moi de moi.

²⁶ Nako ma kia sonaa moi 'isangisara, ma kia sonaa 'iregu-regu 'iodumu 'ikokisangisara mita. Nako ma kia sonaa ngai moi yosiarene, ge'ena ma kia sonaa 'iregu-regu 'iodumu 'ikokisanangi.

²⁷ Ngini nioodumu ge'ena matero ka ma Kristus 'awi roese, de ngini moi-moi mita to 'una 'awi roese ma kia sonaa.

²⁸ Koge'enali mita naga 'o jamatioka, ma Jo'oungu ma Dutu wositatapuokau 'o nyawa yoma-manarama 'o manarama 'i'ini-'inioka. Ma di-disiraka 'o su-suloko, deika 'o nabii-nabii, deika 'o guru-guru, 'asa de gee yodi-diai 'o no-nako 'ihera-herangi, deika 'ona gee yakikula 'o co-catu ma ngale 'o nyawa manga panyake yakisi'aiki, bolo yakiriwo 'o nyawa 'iregu, bolo yosi'atu-'aturu, bolo gee yobi-bicara de 'o demo 'i'ini-'inioka 'ihera-herangi.

²⁹ 'Ona koyoodumuwa ka 'o su-suloko, bolo ka 'o nabii, bolo ka 'o guru. Koyoodumuwa de manga kuasaka ma ngale yodiai 'o no-nako 'ihera-herangi,

³⁰ bolo 'o nyawa manga panyake yosi'aiki, bolo ma ngale yobicara de 'o demo 'i'ini-'inioka 'ihera-herangi, bolo yosiguti ma ngale 'o demo-demo ge'ena.

³¹ Ge'enau so ngini salingou nimariwo niosigou-goungu la niamake 'o sagala co-catu gee ma dekuoka. De 'asa tinisidumutu 'o ngekomo gee 'ifoloiosi yaowa-owa.

1 Korintus

Video 1 Korintus 12

Ikuti Kami:

KONTAK | PARTISIPASI | DONASI