Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Me mowaõwaõ Yesu I'ila niha sau'a i'otarai wa'atumbunia.

² Lasofu khõ Yesu ira nifahaõ-Nia, "He Samahaõ, hana wa au'a niha andrõ i'oroi ba wa'atumbu? Hadia, bõrõ horõnia ma zui bõrõ horõ zatuania?"

³ Itema li Yesu, "Tenga bõrõ horõnia wa au'a ia ba tenga gõi bõrõ horõ ndra satuania. Au'a ia ena'õ la'ila niha wa'abõlõ Lowalangi khõnia.

⁴ Andrõ fatua moluo, da tahalõ halõw̃õ zamatenge Ya'o. Bõrõ me lõ ara tõ bongi, ba samõsa lõ si tola mohalõw̃õ sa'ae.

⁵ Ya'odo haga gulidanõ fatua so Ndra'o ba gulidanõ andre."

⁶ Me no aefa Iw̃a'õ da'õ Yesu, mangendrilo Ia tou ba danõ Ifaruka dambu ba gilo andrõ. Aefa da'õ Igule'õ danõ sabasõ ilo ba hõrõ niha andrõ,

⁷ Imane khõnia, "Ae'e, sasai mbawau ba mbaw̃a Ziloa." (Siloa eluahania 'Tefatenge'.) Numalõ niha andrõ ba wanasai bawania. Me mangawuli ia, izumagõ tola i'ila niha.

⁸ Si fahatõ omo khõnia awõ niha si no mangila ya'ia wangandrõngandrõ buala, lamane, "Hadia tenga niha si dadao wangandrõngandrõ buala ia andre?"

⁹ So zanguma'õ, "Ya'ia." Ba so gõi zanguma'õ, "Tenga, si fakhilikhili khõnia da'õ." Ba hiza imane niha andrõ, "Ya'odo da'õ."

¹⁰ Lasofu khõnia, "Hewisa wa tola õfuli õ'ila niha."

¹¹ Imane wanema li, "Niha sotõi Yesu zame'e ma'ifu tambu, ba Igule'õ ba hõrõgu ba Imane, 'Ae'e sasai mbawau ba mbaw̃a Ziloa.' Andrõ wa mõi ndra'o. Ba me usasai mbawagu, tola u'ila niha."

¹² Lasofu lamane, "Hezo niha da'õ?" Imane, "Lõ u'ila."

¹³ La'ohe niha andrõ khõ ndra Farizai'o.

¹⁴ Luo Sabato me luo Ibasõi danõ andrõ faoma ilo-Nia Yesu ba wamadõhõ hõrõ niha andrõ.

¹⁵ Lafuli lasofu ba niha da'õ hewisa wa tola dõhõ hõrõnia. Itema li niha da'õ, "Ilau dambu sombuyu ba hõrõgu, aefa da'õ usasai hõrõgu, ba ufuli u'ila niha."

¹⁶ Lamane õsa ira Farizai'o andrõ, "Lõ duhu wa moroi ba Lowalangi niha samalua da'e, bõrõ me Isawõ gamakhoita agama ba luo Sabato." Lamane tanõ bõ'õ, "Hezo wa tola Ifalua zahõlihõli dõdõ andre, niha si so horõ?" No fabõ'õ zinõndra niha andrõ.

¹⁷ Lafuli lasofu ba niha andrõ, lamane, "Fanguma'õu, Ya'ia zamadõhõ wa tola õ'ila niha? Na si manõ hewisa gera'erau khõ-Nia?" Imane niha andrõ, "Sama'ele'õ Ia."

¹⁸ Ba hiza lõ faduhu dõdõ niha Yahudi wa sau'a mbõrõta niha andrõ ba iada'e no i'ila niha. Lõ faduhu dõdõra fatua lõ lakaoni zatua niha andrõ,

¹⁹ ba wanofu, "Hadia sindruhu no sau'a i'otarai ba wa'atumbu nonomõ andre? Hewisa wa tola i'ila niha mangawuli iada'e?"

²⁰ Latema li satua niha andrõ, "Sindruhu onoma da'e; ba no sau'a ia i'otarai wa'atumbu.

²¹ Ba hewisa wa tola i'ila niha iada'e, lõ aboto ba dõdõma. Ba haniha zamadõhõ hõrõnia lõ ma'ila. Misofu manõ khõnia. No satua sa'ae ia, ba no tola itema li samõsa."

²² Lamanõ ira satua niha andrõ bõrõ me ata'u ira ndra salaw̃a niha Yahudi; bõrõ me no mamagõlõ ndra salaw̃a niha Yehuda, wa laheta moroi ba gosali niha so'akui wa Razo Sangorifi nifabu'u Lowalangi Yesu andrõ.

²³ Da'õ mbõrõ wa lamane ira satua niha andrõ, "No satua ia; misofu khõnia."

²⁴ Lakaoni zui niha sau'a ba mbõrõta andrõ, ba lamane khõnia, "Ae ba hõlu wa õw̃a'õ zindruhu. Ma'ila wa niha andrõ no niha si so horõ."

²⁵ Imane niha andrõ, "Hadia si so horõ ia ma lõ'õ, lõ aboto ba dõdõgu. Sambua ni'ilagu; wa sau'a ndra'o mbõrõta, ba iada'e ba no u'ila niha."

²⁶ Lafuli lamane zui khõnia, "Hadia nilau-Nia khõu? Hewisa wamadõhõ-Nia hõrõu?"

²⁷ Imane niha andrõ, "No u'ombakha'õ khõmi, ba hiza lõ omasi ami mifondrondrongo. Hana nasa wa manofu ami? Hadia omasi ami gõi tobali nifahaõ-Nia?"

²⁸ Mofõnu ira khõnia ba lamane, "Ya'ugõ nifahaõ-Nia, tenga ya'aga! Nifahaõ Moze ndra'aga.

²⁹ Sanandrõsa khõ Moze aboto ba dõdõma wa no fahuhuo khõnia Lowalangi. Ba niha andrõ, lõ na'i ma'ila heza moroi Ia."

³⁰ Itema li niha andrõ imane, "Ae, ahõli dõdõda wa lõ mi'ila heza moroi niha andrõ, hew̃a'ae no Ifadõhõ hõrõgu.

³¹ Aboto ba dõdõda wa lõ ifondrondrongo Lowalangi ba niha si so horõ. Ha samosumange Lowalangi nifondrondrongonia li, ba samalua somasi Lowalangi.

³² I'otarai mbõrõta gulidanõ, lõ irai terongo so niha sau'a i'otarai wa'atumbunia, si tola mangila niha mangawuli.

³³ Na tenga moroi khõ Lowalangi niha andrõ, tebai Ilau zi manõ."

³⁴ Latema linia ira salaw̃a niha Yehuda, lamane, "Niha si so horõ ndra'ugõ i'otarai narõ gaheu numalõ ba galizuzumõ, i'otarai wa'atumbumõ, hewisa wa'õfahaõ ndra'aga?" Lafofanõ ia ba i'otarai da'õ latenaw̃a ia we'amõi ba gosali andrõ.

³⁵ Irongo Yesu wa no lafofanõ niha andrõ moroi ba gosali. Me falukha Yesu ba niha andrõ, Imane khõnia Yesu, "Hadia, faduhu dõdõu khõ Nono Niha nifatenge Lowalangi?"

³⁶ Itema li niha andrõ, imane, "Ha niha Ia, Ama? Ombakha'õ khõgu ena'õ tola faduhu dõdõgu khõ-Nia!"

³⁷ Itema li Yesu, "No õ'ila Ia. Ya'ia zi fahuhuo khõu iada'e."

³⁸ Imane niha andrõ, "Faduhu dõdõgu, So'aya." Mangalulu ia fõna Yesu.

³⁹ Imane Yesu, "Mõi Ndra'o ba gulidanõ andre ba wamatõrõ fanguhuku; ena'õ la'ila niha sau'a, ba tobali au'a zangila niha."

⁴⁰ So õsa ndra Farizai'o samondrongo niw̃a'õ Yesu andrõ, lamane wanofu khõ-Nia, "Hadia Õw̃a'õ tõdõu sau'a ndra'aga gõi?"

⁴¹ Itema li Yesu, Imane, "Na sau'a ami, ba tenga si so horõ ami. Ba hiza bõrõ me mimane, 'Ma'ila niha,' eluahania si so horõ ami nasa."

Yohanes

Video Yohanes 9

Ikuti Kami:

KONTAK | PARTISIPASI | DONASI