Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tou ti Isa nao-nao, ilontonga-Liyo mota ta pito'o lonto ombongo lomayi.

² Mongomuri-Liyo lohintu o-Liyo odiye, ”Guru, yilongola tawu boti pilotutuliyo mayi pito'o? Tiyo boti ta o dusa meyalo mongodula'aliyo?”

³ Tametao li Isa odiye, ”Tiyo pilotutuliyo mayi pito'o dila o ayitaliyo wolo u tiyo o dusa meyalo mongodula'aliyo o dusa, bo alihu karaja lo Allahuta'ala popobilohuliyo mayi moli batanga lo ta pitoa boyito.

⁴ Tou donggo dulahu ito musi mokaraja mao karaja lo Allahuta'ala ta lopoahu mayi ola-U. Sababu wonu uhuyi ma ledungga, ito ma didu mowali mokaraja.

⁵ Tou Wau donggo to duniya boti, Wau tinela ta mo'obanga duniya boti.”

⁶ Tou lapatao lobisala odito, Tiyo lonula lo yiyohu ode huta wawu ilulawu-Liyo huta boyito lo yiyo-Hiyo. Lapatao pilomade-Tiyo mota lata'a boyito ode mato lo ta pitoa boyito

⁷ wawu lobisala ode oliyo odiye, ”Ponaolo yio mota pohimamutao to kulamu lo Silowam.” Silowam artiliyo ta ilahula. Tawu boyito ma lonao mota lohimamuto to kulamu boyito. Tou ma lohuwalingayi, matoliyo luli lo'onto.

⁸ Bo tawu-tawuwala ta to tihediyo wawu tawu-tawuwala wuwewo ta mototaliyo deu tiyo ta mohihileya, nga'amila bibisalawa odiye, ”Tiyo botiye tawu ta mololayita hulo-huloa hemolohileya meyalo dila?”

⁹ Woluwo ta hepoloiyawa odiye, ”Memangi tiyo ta botiye.” Tawu wuwewo poli hepoloiyawa odiye, ”Dila, tiyo ngope'e mohumayawa wolo ta mohihileya boyito.” Tiyo loloiya mao ode olimongoliyo odiye, ”Banari, Wau boti ta hemolohileya boyito.”

¹⁰ Timongoliyo loloiya mao ode oliyo odiye, ”Wololo mola yio boti ma lowali lo'onto?”

¹¹ Tiyo lolametao odiye, ”Ta tanggu-tanggula ti Isa lohutu mao huta lowali latao, lapatao pilomade-Tiyo matou turusi lobisala ode olau odiye, ’Ponaolo wawu mota pohimamutao yio to kulamu lo Silowam.’ Watiya ma lonao wawu mota lohimamuto, tunggulo mato latiya ma lo'onto.”

¹² Timongoliyo lohintu ode oliyo odiye, ”Toutonu tiyo boyito?” Tiyo lolametao odiye, ”Dila otawau.”

¹³ Timongoliyo lodelo mao ta pilo'oluli li Isa matoliyo boyito ode tawu ta o pahamu Parisi.

¹⁴ Dulahe pilohutuwa li Isa latao wawu lopo'oluli mao ta pitoa boyito dulahe hepotabiya lo tawu lo Yahudi.

¹⁵ Tawu ta o pahamu Parisi olo lohintu mao oliyo odiye, ”Wololo mola yio ma lowali lo'onto?” Tametiyo mao odiye, ”Tiyo lomadeto latao to mato latiya, wawu lapatao watiya ma lohimamuto wawu tou boyitolo mato latiya ma lo'onto.”

¹⁶ Ngololota ta o pahamu Parisi lobisala odiye, ”Tiyo boyito dila lonto Allahuta'ala, sababu Tiyo dila dihu-dihu aturangi lo dulahe hepotabiyalo.” Tawu wuwewo poli lobisala odiye, ”Wololo ta o dusa mowali mohutu tuwo-tuwotala odiye?” Timongoliyo ma lowali bubutola.

¹⁷ Timongoliyo loloiya ode tawu boyito odiye, ”To pahamumu Tawu boyito wololo, sababu Tiyo ma lopo'oluli matomu?” Tawu boyito lolametao odiye, ”Tiyo boyito Nabi.”

¹⁸ Bo mongotauwa lo tawu lo Yahudi boyito dila paracaya deu tawu boyito memangi pito'o wawu masatiya ma lowali lo'onto. Uwitolo sababuliyo timongoliyo lotiyangayayi mongodula'aliyo

¹⁹ wawu lohintu ode olimongoliyo odiye, ”Banari tiyo boti walai mongoli ta pitoa lonto ombongo lomayi? Wololo tiyo ma lowali lo'onto?”

²⁰ Mongodula'aliyo lolametao odiye, ”Walao lamiyatiya tiyo wawu memangi tiyo boti pito'o tou pilotutuliyo mayi.

²¹ Bo wololo tiyo ma lowali lo'onto, dila otawa lamiyatiya. Tatonu ta lopo'oluli oliyo, dila otawa lamiyatiya. Yintuwa mao oliyo sababu tiyo ma leidamango wawu mowali molameto hihilawo.”

²² Timongoliyo loloiya odito sababu timongoliyo mohe lo mongotauwa lo tawu lo Yahudi. Sababu otawa limongoliyo mongotauwa boyito ma loheluma deu wonu woluwo ta mongaku ti Isa te Almasih ta pilojanjiya lo Allahuta'ala, tawu boyito dila mowali momaso ode bele hepotabiyalo.

²³ Uwitolo alasani lo mongodula'aliyo loloiya deu tiyo ma leidamango wawu ma mowali molameto lohihilawo.

²⁴ Timongoliyo loibodeyi poli tawu boyito wawu loloiya ode oliyo odiye, ”Nte potadiya mola yio to talu Allahuta'ala deu yio ma mopolele mayi lo u banari. Sababu otawa lami Tawu boyito tawu o dusa.”

²⁵ Tawu boyito lolametao odiye, ”O dusa meyambo dila, uwito dila urusani latiya, bo tuwawu u otawa latiya deu watiya pito'o wawu masatiya ma mo'onto.”

²⁶ Timongoliyo poli loloiya ode oliyo odiye, ”Wolo u pilohutu-Liyo olemu? Wololo Tiyo lopo'oluli matomu?”

²⁷ Totametiyo mao odiye, ”Ma yilapato pilolele mayi latiya, bo timongoli dila modungohu. Yilongola timongoli donggo muli ohila modungohu? Timongoli boti tanu ma ohila mowali muri-Liyo olo.”

²⁸ Timongoliyo helotadiya oliyo wawu loloiya odiye, ”Yio muri lo Tawu boyito, bo ami muri li nabi Musa.

²⁹ Sababu u otawa lami Allahuta'ala ma lopotunggulayi lo Pirimani ode oli nabi Musa. Bo tomimbihu Tawu boyito, dila otawa lami lonto utonu Tiyo.”

³⁰ Ta pilo'oluli li Isa matoliyo boyito loloiya ode olimongoliyo odiye, ”Mo'oherani timongoli boti dila motota lonto utonu Tiyo, padahali Tiyo ma lopo'oluli matou.

³¹ Otawanto deu Allahuta'ala yito dila modungohe ta heodusawa; Tiyo modungohe ta salehe wawu ta turuti to parenta-Liyo.

³² Lonto bobohuwaliyo lo duniya dipo pe'enta mao ilodungohe woluwo ta lopo'oluli tawu ngota ta pilotutuliyo mayi pito'o.

³³ Humaya lomao Tawu boyito dila lonto Allahuta'ala, Tiyo dila mowali mohutu wolo-wolo.”

³⁴ Mongotauwa lo tawu lo Yahudi lolametao odiye, ”Yio boti ta lonto ombongo lomayi ma o dusa, ohila mongajari olami!” Tou boyitolo timongoliyo ma longentela oliyo momaso ode bele hepotabiyalo.

³⁵ Tou ti Isa lo'odungoheo deu ta pilo'oluli-Liyo matoliyo boyito ma ilentela lo mongotauwa lo tawu lo Yahudi momaso ode bele hepotabiyalo, Tiyo lololohe tawu boyito sambe lotapuLiyo wawu lohintu ode oliyo odiye, ”Yio paracaya meyalo dila ode Walao Manusiya?”

³⁶ Tawu boyito lolametao odiye, ”Guru, tatonu Tiyo? Poleleya mayi alihu watiya paracaya ode o-Liyo.”

³⁷ Tameti Isa ode oliyo odiye, ”Tiyo ma ilontongamu wawu Tiyo hemobisala wolemu.”

³⁸ Tawu boyito loloiya odiye, ”Eya, Watiya paracaya!” Lapatao tiyo losujudu to talu li Isa.

³⁹ Lapatao ti Isa loloiya odiye, ”Nonao-U mayi ode duniya boti memomuto'o, alihu ta pito'o mowali mo'onto wawu ta mo'onto mowali pito'o.”

⁴⁰ Tawu-tawuwala ta o pahamu Parisi ta woluwo teto lo'odungohe loiya li Isa boyito, lapatao loloiya ode o-Liyo odiye, ”Tingga harapu-Mu ami boti hepitoa?”

⁴¹ Ti Isa loloiya mao ode olimongoliyo odiye, ”Wonu timongoli boti pito'o, timongoli dila heodusawa. Bo sababu timongoli hepoloiyawa deu timongoli mo'onto, uwito mopopatatayi deu dusa limongoli debo tatapu woluwo to olimongoli.”

Yohanes

Video Yohanes 9

Ikuti Kami:

KONTAK | PARTISIPASI | DONASI