Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Waktu Isa lapah, Ia ngeliak ulun buta semenjak laher.

² Jelma-jelma sai nutuk Isa betanya jama Isa, "Bapak Guru, mengapi ulun inji dilaherko buta? Api ulihni ia tenggalan bedusa atau ulihni emak bakni bedusa?"

³ Isa ngejawab, "Ia buta lain hak ulihni dusani tenggalan atau dusa ulun tuhani, kidang in ulun dapok ngeliak kuasa Allah bekerja delom dirini.

⁴ Selama pagun dawah, neram haga ngerjako guaini Ia sai ngutus Nyak. Bingi haga ratong, rik sai jelma pun mak dapok beguai.

⁵ Selama Nyak di dunia inji, Nyakdo terang dunia."

⁶ Seraduni cawa injuk reno Isa melui mik tanoh, rik ngaduk lui-Ni ano jama tanoh. Kak raduni Ia ngolesko di mata jelma udi,

⁷ raduni cawa jama ia, "Mikdo kecah pudakmu di Kulam Siloam." (Siloam retini 'Diutus'.) Raduni jelma udi mik ngecahko pudakni. Waktu ia muloh, ia radu dapok ngeliak.

⁸ Tetangga-tetanggani rik ulun-ulun sai semakkungni ngeliak ia ngilu-ngilu, sunyinni cawa, "Kan ia inji jelma sai biasani mejong ngilu-ngilu?"

⁹ Wat sai cawa, "Sangun ia." Kidang wat muneh sai cawa, "Lain, ia angkah mirip jelma udi." Kidang jelma udi tenggalan cawa, "Nyakdo ia."

¹⁰ "Repa jadini sampai niku dapok ngeliak?" ani tian jama ia.

¹¹ Ia ngejawab, "Jelma sai gelarni Isa nyani cutik tanoh litak, raduni ngoleskoni di mataku rik cawa, 'Mikdo kecah pudakmu di Kulam Siloam.' Raduni nyak mik. Waktu nyak ngecahko pudakku, nyak dapok ngeliak."

¹² "Di dipa jelma udi?" tanya tian. Ia ngejawab, "Mak pandai."

¹³ Rani seno yakdo rani Sabat waktu Isa ngaduk tanoh jama lui-Ni untuk nyani ulun buta ano dapok ngeliak. Maka jelma sai jenoni buta ano diusung jama ulun-ulun Farisi.

¹⁴ (9:13)

¹⁵ Tian juga betanya jama ia repa bang ia dapok ngeliak. Ia ngejawab, "Ia ngepikko litak di mataku, raduni nyak ngecahkoni rik nyak dapok ngeliak."

¹⁶ Pepira di hantara jelma-jelma Farisi udi cawa, "Mak mungkin jelma sai ngelakuko inji asalni jak Allah, mani Ia mak ngindahko rani Sabat." Kidang jelma lain cawa, "Dipa mungkin jelma sai bedusa ngelakuko keajaiban-keajaiban injuk inji?" Raduni timbul pertentangan pendapat di hantara tian.

¹⁷ Maka ulun-ulun Farisi betanya luot jama jelma udi, "Api pendapatmu tentang Ia sai nyani niku ngeliak?" "Ia nabi," jawab jelma udi.

¹⁸ Kidang jelma-jelma sai mimpin Yahudi udi mak haga percaya bahwa ulun udi sangun buta semakkungni rik tano dapok ngeliak. Ulihni seno tian ngurau ulun tuhani,

¹⁹ rik betanya, "Temondo inji anakmu sai cawamu laher buta? Repa bang ia dapok ngeliak tano?"

²⁰ Emak bak jelma udi ngejawab, "Sangun inji anak sekam; rik ia sangun buta jak laher.

²¹ Kidang repa ia dapok ngeliak tano, sekam mak pandai. Rik sapa sai nyani ia dapok ngeliak, seno pun sekam mak pandai. Tanya gaoh jama ia, ia radu dewasa; ia dapok ngejawab tenggalan."

²² Emak bak jelma udi cawa injuk reno mani tian merabai jama jelma-jelma sai mimpin Yahudi; mani tian udi radu sepakat, bahwa jelma sai ngakui Isa sebagai Raja Penyelamat, mak ngasi lagi kuruk lamban ibadah.

²³ Renodo sebabni emak bakni jelma seno cawa, "Ia radu dewasa; tanya gaoh jama ia."

²⁴ Raduni tian ngurau luot jelma sai jenoni buta ano, rik cawa jama ia, "Besumpahdo bahwa niku haga cawa sai benor. Sekam pandai jelma udi jelma bedusa."

²⁵ "Api Ia bedusa atau mawat," jawab jelma udi, "nyak mak pandai. Kidang sai hal sai nyak pandai, tumbai nyak buta, tano nyak ngeliak."

²⁶ Raduni tian cawa lagi jama ia, "Ia bebuat api jama niku? Repa Ia nyani niku ngeliak?"

²⁷ Jelma udi ngejawab, "Radu kuceritako jama niku, kidang keti mak haga ngedengi. Mengapi keti haga ngedengini luot? Api keti haga jadi jelma sai nutuk Ia muneh?"

²⁸ Raduni tian maki ia rik cawa, "Nikudo jelma sai nutuk Ia; sekam lain! Sekam jelma sai nutuk Musa.

²⁹ Sekam pandai bahwa Allah radu cawa jama Musa. Kidang tentang jelma inji, sekam mak pandai jak ipa asal-Ni."

³⁰ Jelma udi ngejawab, "Aneh nihan bahwa keti mak pandai jak ipa asal-Ni, sedang Ia radu nyani nyak dapok ngeliak.

³¹ Ram pandai bahwa Allah mak ngedengiko ulun bedusa, melainko jelma sai ngehormati Allah, rik ngelakuko kehaga-Ni.

³² Radu jak permulaan dunia makkung pernah kedengian wat jelma nyani jelma sai laher buta dapok ngeliak.

³³ Kik jelma udi lain jak Allah, Ia mak dapok bebuat api-api."

³⁴ Jawab tian, "Api? Niku sai latap dusa jak laher, niku haga ngajar sekam?" Maka jak seno ia dilarang kuruk mik lamban ibadah.

³⁵ Isa ngedengi bahwa tian radu ngucilko jelma udi jak lamban ibadah. Ia nyepok jelma udi rik cawa jama ia, "Api niku percaya jama Anak Manusia?"

³⁶ Ulun udi ngejawab, "Sapa Ia, Tuan? Tulung keni pandai in nyak percaya jama Ia."

³⁷ "Niku radu ngeliak Ia," jawab Isa. "Iado tano sai sedang cawa jama niku."

³⁸ "Nyak percaya, Tuhan," cawa jelma udi, raduni sujud di hadapan Isa.

³⁹ Isa cawa, "Nyak ratong mik dunia inji untuk ngehakimi; in jelma sai buta dapok ngeliak, rik ulun sai dapok ngeliak jadi buta."

⁴⁰ Pira-pira ulun Farisi sai wat di dudi ngedengi Isa cawa injuk reno, raduni tian betanya jama Ia, "Maksud-Mu sekam inji buta muneh?"

⁴¹ Isa ngejawab, "Sekirani keti buta, keti mak bedusa. Kidang ulihni keti cawa, 'Sekam ngeliak,' seno retini keti pagun bedusa."

Yohanes

Video Yohanes 9

Ikuti Kami:

KONTAK | PARTISIPASI | DONASI