Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Asum Jesus erdalan, IdahNa sekalak si nggo pentang tubuhna nari.

² Nungkun ajar-AjarNa nina, "O Guru, dosa ise nge erbahanca maka ia pentang tubuhna nari? Dosana ntah dosa orang tuana?"

³ Erjabap Jesus, "Ia pentang labo erkiteken dosana bage pe labo erkiteken dosa orang tuana, tapi gelah teridah kuasa Dibata i bas geluhna.

⁴ Kita arus ndahiken dahin si nuruh Aku sanga terang denga wari; sabap reh me gelap janah paksa si e ise pe la ngasup erdahin.

⁵ Asum Aku i bas doni enda, Aku me terang doni."

⁶ Kenca ikataken Jesus si enda, IciduriNa taneh, IadukNa taneh ras CidurNa e, jenari IdampelkenNa taneh e ku mata kalak si pentang ndai.

⁷ Kenca bage nina Jesus man bana, "To erduhap kam ku kolam Siloam." (I bas cakap Heber Siloam ertina "Isuruh".) Emaka lawes si pentang e erduhap; janah asum ia reh mulihken nggo erpengidah matana.

⁸ Jenari nungkun temanna si sada kesain bage pe si megati ngidah ia mindo-mindo nina, "Ma ia kin si biasa kundul mindo-mindo e?"

⁹ Piga-piga kalak ngatakenca, "Ia me," tapi lit ka pe si ngatakenca, "Lang, labo ia. Tapi seri rupana ras." Si nggo erpengidah e ngaku nina, "Aku me si biasa mindo-mindo e."

¹⁰ Emaka isungkun kalak ndai ia nina, "Kuga maka kam nggo erpengidah?"

¹¹ Erjabap ia, "Si igelari Jesus erbahanca aku nggo erpengidah. IciduriNa taneh, IadukNa taneh e ras CidurNa jenari IdampelkenNa ku matangku. Kenca bage nina, 'To erduhap kam ku kolam Siloam.' Emaka lawes aku ku je, janah kenca aku erduhap minter erpengidah matangku."

¹² Nungkun ka kalak ndai, "I ja dage Ia?" Erjabap ia, "La kueteh."

¹³ Asum Jesus ngaduk taneh ras CidurNa dingen mpemedakken mata kalak pentang e, rembang wari Sabat. Emaka ibaba kalak Jahudi kalak si nggo erpengidah ndai man kalak Parisi.

¹⁴ (Yoh 9:13)

¹⁵ Jenari isungkun kalak Parisi ia kai sabapna maka ia nggo erpengidah. Ngaloi si nggo erpengidah e man kalak Parisi, "IdampelkenNa ku matangku taneh si nggo IadukNa ras CidurNa. Janah kenca aku erduhap, nggo erpengidah matangku."

¹⁶ Nina piga-piga kalak Parisi, "Kalak si erbahanca e kugapa pe labo i bas Dibata nari, sabap la IperdiatekenNa Undang-undang Sabat." Nina ka deba, "Banci kin kalak perdosa erbahan tanda sengget si bagenda?" Emaka kalak Parisi e pe nggo lain-lain pendapatna.

¹⁷ Sekali nari nungkun kalak Parisi e man si nggo erpengidah ndai nina, "Ikatakenndu maka Ia me si erbahanca kam erpengidah. Genduari kuga dage pengakapndu kerna Ia?" Erjabap ia, "Ia sekalak nabi."

¹⁸ Kalak Jahudi si erkuasa la tek maka nai ia pentang, janah genduari nggo erpengidah. Emaka idilona orang tua kalak si nggo erpengidah ndai.

¹⁹ Jenari isungkunna nina, "Tuhu kin enda anakndu si tubuh pentang e? Kuga maka genduari ia nggo erpengidah?"

²⁰ Erjabap orang tuana, "Payo nge ia anak kami si pentang tubuhna nari.

²¹ Tapi la ieteh kami kuga maka nggo erpengidah ia genduari janah la ieteh kami ise erbahanca. Ia nggo mbelin, ialah sungkun! Nggo kap ia ngasup ertanggung jawab kerna dirina."

²² Bagenda jabap orang tua sabap mbiar ia kalak Jahudi si erkuasa e. Sabap nggo ersada arih kalak Jahudi si erkuasa maka ise ngakui Jesus e Raja Penampat si ipadanken Dibata, ipedarat i bas rumah persembahen nari.

²³ Erdandanken si e me maka nina orang tuana, "Ia nggo mbelin, ialah sungkuni."

²⁴ Sekali nari idilo kalak e si nggo erpengidah ndai, jenari nina, "Erpadanlah kam i lebe-lebe Dibata maka si tuhuna nge iturikenndu sabap ieteh kami si erbahanca kam erpengidah e kalak perdosa."

²⁵ Ngaloi ia, "Kerna Ia kalak perdosa ntah lang, e labo kueteh. Sada ngenca kueteh: Nai aku pentang, genduari nggo erpengidah."

²⁶ Nungkun kalak Jahudi si erkuasa e, "Kai IbahanNa man bandu? Kuga IbahanNa maka matandu nggo erpengidah?"

²⁷ Erjabap ia, "Nggo kap kukataken man bandu, tapi la ibegikenndu. Ngkai maka isungkunndu denga ka. Ntah kin kam pe ersura-sura jadi ajar-AjarNa?"

²⁸ Merawa kalak ndai man bana janah nina, "Kamlah jadi ajar-AjarNa; kami ajar-ajar Musa kap.

²⁹ Si ieteh kami Dibata ngerana arah Musa nge. Tapi kerna kalak si ikatakenndu e la ieteh kami ntah i ja nari Ia."

³⁰ Ngaloi ka si nggo erpengidah e, "Mejin kap e adi la kin ietehndu i ja nari Ia reh, sedangken nggo IbahanNa matangku erpengidah!

³¹ Sieteh maka Dibata labo megiken kalak perdosa. Kalak si mpehaga Dibata dingen si ngikutken PeratenNa nge IbegikenNa.

³² Nai-nai nari langa pernah si begi maka lit kalak si ngasup pemedakken mata kalak pentang tubuhna nari.

³³ Adi la kin ia i bas Dibata nari, labo ia ngasup erbahan kai pe."

³⁴ Ngaloi kalak Jahudi si erkuasa e, "Tubuhndu nari pe nggo kam erdosa, janah kam ipebelin-belin i bas dosa, jenari iajarindu ka atendu kami?" Kenca bage ipedarat kalak Jahudi si erkuasa e ia i bas rumah persembahen nari.

³⁵ Berita kerna kalak si pentang ndube ipedarat i bas rumah persembahen nari seh man Jesus. Emaka asum jumpa Jesus ras ia, nina Jesus man bana, "Tek kin kam man Anak Manusia si isuruh Dibata e?"

³⁶ Erjabap ia, "O Tuan, kataken man bangku ise Ia gelah aku tek man BaNa."

³⁷ Ngaloi Jesus man bana, "Nggo kap Ia idahndu. Ia kap si ngerana ras kam genduari e."

³⁸ Nina kalak ndai, "O Tuhan, tek nge aku!" Jenari erjimpuh ia i lebe-lebe Jesus.

³⁹ Jenari nina Jesus man bana, "Aku reh ku doni enda guna nehken keadilen, gelah si pentang jadi erpengidah janah si erpengidah jadi pentang."

⁴⁰ I je lit piga-piga kalak Parisi megi si ikataken Jesus. Emaka nungkun ia man Jesus nina, "Rikutken pengakapndu kami pe kalak pentang kin?"

⁴¹ Erjabap Jesus, "Adi pentang kam labo kam erdosa; tapi perbahan ikatakenndu, 'Kami erpengidah,' emaka tetap kam erdosa."

Yohanes

Video Yohanes 9

Ikuti Kami:

KONTAK | PARTISIPASI | DONASI