Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasa de 'o Yesus wotagi-tagi 'o Galileaka wakilolituku. 'Una wooluika 'o Yudeaka, sababu ge'enaka doka gee yopa-pareta 'o Yahudioka yomau wito'oma.

² Ma 'orasi ge'ena 'o Yahudioka manga Wange ma Amoko gee yosironga 'o Da-darusu ma Katu 'o Soka-soka ma rame 'isoriokau.

³ So 'o Yesus 'awi riaka dodoto kayongosekau 'unaka, "Namadaka 'o ngii ne'ena de notagi 'o Yudeaka, la 'ani do-domoteke 'idadi yamake mita 'ani manarama 'o no-nako 'ihera-herangi nodiai.

⁴ Nako 'o nyawa wimoi womau la 'o nyawa wikokinako, ge'ena 'okia naga wadi-diai gee koidadiwa wosigi'iunino. Nako ngona nomau 'o nyawa 'iodumu ninako, salingou notagi nosidumutu 'o no-nako 'ihera-herangi 'o nyawa 'iodumika!"

⁵ (Sababu to 'una ma sirete 'awi riaka dodoto mita koyongakuwa.)

⁶ 'O Yesus wongose 'onaka, "Ma ngale ngoi, ge'ena ko ma 'orasuawasi tomasidumutu 'o kawasaka. Ma ngini, 'o 'orasi 'isinoimi kaidadi.

⁷ 'O nyawa 'o duniaka ne'ena konidu'udukuwa nginika. Ma ngoino ge'ena 'idu'uduku, sababu ngoi kaitaurika tosidemo 'ato manga di-diai 'itorou.

⁸ Tagi ka ngini niaika doka 'o wange ma amoko ma rameka. Ngoi kotaikawa sababu ngoi tomasidumutu ma 'orasi koya'adonuawasi."

⁹ 'O Yesus koge'enau wongose 'awi riaka dodotika, de 'una mita ge'ena 'o Galileakasi womanoa.

¹⁰ Gee 'o Yesus 'awi riaka dodoto yotagioka 'o Da-darusu ma Katu 'o Soka-soka ma Wange ma Amoko ma rameka, de 'o Yesus kawomasiriidino wotagi ma rameka ge'ena komoiwa winakoka.

¹¹ Ma rame-rame ge'ena ma do'ingono gee, 'o Yahudioka manga balu-balusu wikanonu de yokasano, "'O Yesus kiaka?"

¹² Manga gudai yomakakasudu yomasikademo ma ngale 'una. Munaka yongose 'ato, "'Una 'o nyawa ma owa." Munuka yongose 'ato, "Ko'uwa! 'Una 'o nyawa manga gudai wakisiliba."

¹³ Ma komoiwa yomoroini yobicara yosita-tarangika ma ngale 'una, sababu yakimodongo gee 'o Yahudioka manga balu-balusika.

¹⁴ 'O rame-rame ma doda de 'o Yesus wowosanga ma Jou 'awi Woaka de wodotoko.

¹⁵ 'O Yahudioka manga balu-balusu go'ona yoherangi ma sala de kayongosekau, "Kokia so 'o nyawa nu'una koge'ena ma gudai wanako, 'ena 'una koma'iwa 'o 'agamaka yodoto-dotoko widotoko?"

¹⁶ 'O Yesus wosango, "Gee ngoi tosidoto-dotoko ne'ena, ge'ena ko to ngoiwa ma sirete 'ai do-dotoko, ma 'ena to ma Jo'oungu ma Dutu gee woisulo-suloko.

¹⁷ 'O nyawa gee yomau ma Jo'oungu ma Dutu 'awi mau yamoteke, 'asa yanako 'ai do-dotoko ge'ena 'iboa ma Jo'oungu ma Dutuno bolo ka ngoino.

¹⁸ 'O nyawa gee yosidotoko ka to 'ona ma sirete manga do-dotoko, ge'ena yomau ka 'onaka yakihoromati. Ma 'o nyawa gee yomau la wihoromati 'unaka gee woisulo-suloko, 'o nyawa go'ona yoloa.

¹⁹ Ma Jo'oungu ma Dutu 'awi besesongo 'o Musa wositotarokau nginika! Ma naga nginioka komoiwa yamoteke 'o besesongo ge'ena. De 'ido'oa so niomau nito'oma?"

²⁰ 'O nyawa yoku-kudai go'ona kayongosekau, "Nitokatuku gee de! Nago'ona yomau nito'oma?"

²¹ 'O Yesus wosango, "'O no-nako 'ihera-herangi ka 'o ngai moi tadiai Pomaoma-omasa ma Wangeka, de ngini nioherangi de nitu'uduku.

²² Ma 'o Musa winikula 'o 'atorangi ma ngale niomasuna, ngaro 'o suna ge'ena ko 'o Musanowa ma mulaenge, so 'ena ka nanga edete de nanga dotumosi 'o Musa kowi'iwasi 'ena. Ge'enau so Pomaoma-omasa ma Wangeka ma ngini niomau 'o nyawa niakisuna.

²³ Ngini niakisuna 'o ngowaka 'o nauru Pomaoma-omasa ma Wangeka ge'ena ma ngale la 'uwa niaparene 'o besesongo gee 'o Musa wositota-totara ma ngale 'o suna, de 'ido'oa so niongamo ngoino gee 'o nyawa manga roese ma panyake tosi'aiki 'itiaioka Pomaoma-omasa ma Wangeka?

²⁴ 'Uwa niakihakimi 'o nyawa moteke ka gee pamake-make, ma 'ena niatibangi niosidi-diai la moteke 'iloa-loa."

²⁵ Ge'enaka de 'o Yerusalem ma nyawa yamuruo naga kayongosekau, "Ma rai nu'unau gee ne'ena naga winonu-nonu yomau wito'oma!

²⁶ Winimake 'una wobicara womasuka-suka 'o kawasa ma bionoka, de nanga balu-balusu ka moi ma kokiawa yongose 'unaka! Poilia to ngone nanga balu-balusu yanakokau 'ato 'una ne'ena ma Koana 'o Nyawa Wosilaha-laha.

²⁷ Duga nako ma Koana 'o Nyawa Wosilaha-laha gu'una woboa, ge'ena komoiwa yosido-dogumu 'awi 'asali! Ma ne'ena ngone panako 'o nyawa nu'una 'awi 'asali."

²⁸ Ge'enaka de gee 'o Yesus wodotoko ma gu-gudaioka ma Jou 'awi Woaka de wosigasoko waamo-amokie wongose 'ato, "Ngini nianako ngoi ne'ena ma kia, de 'ai 'asali kiano? Ngaro koge'ena ma ngoi toboa ge'ena ko to ngoiwa ma sirete 'ai mau. 'Una gee woloa-loa de salingou powingaku-ngaku woisulokino. Ma ngini kowininakowa 'unaka gee.

²⁹ Ngoi towinako 'una, sababu ngoi 'ai 'asali 'unano, de 'unau woisulokino."

³⁰ Ma 'orasi ge'ena 'ona yomau 'o Yesus witagoko, ma komoiwa yomoroini wi'ao, sababu ma 'orasi koya'adonuawasi.

³¹ 'O nyawa yoku-kudaioka go'ona manga gudai yongaku 'unaka, de yongose, "Gee ma Koana 'o Nyawa Wosilaha-laha gu'una woboa, done 'unasi? 'ifoloi 'ikudai wodiai 'o no-nako 'ihera-herangi de 'o nyawa nu'una? Ma rai ko'uwa sababu 'unau ge'ena ma Koana 'o Nyawa Wosilaha-laha."

³² 'O Farisioka yamuruo naga yo'isene 'ato naga 'o nyawa yoku-kudaioka go'ona yamuruo naga yomakakasudu yomasikademo ma ngale 'o Yesus, ge'enau so 'o Farisioka de 'o 'imam ma sae-saeke yosuloko ma Jou 'awi Woa ma jo-jaga yamuruo naga yaika 'o Yesus witagoko.

³³ 'O Yesus wosidemo 'o nyawa yoku-kudaika ge'ena ma Jou 'awi Woaka, "Ka 'o 'orasi moiou ngoi de de nginiosi. Ge'ena 'ipasa de ngoi 'asa tolio gee woisulo-suloika.

³⁴ Ngini 'asa ninonu ngoi, ma konimakewau, sababu ngini konia'akunuwa niaika 'o ngiika gee kiaka ngoi ge'enaka."

³⁵ Ge'enaka de 'o Yahudioka manga balu-balusu yomakadongose moi de moi, "'O nyawa nu'una kiaka wotagi so ngone koidadiwa powimake? Bolo 'una womau wotagi 'o Yahudi ma nyawaka gee yogogere 'o daeraa 'ireguoka naga 'o Yunanioka, de wakidotoko 'o Yunani ma nyawa?

³⁶ 'Okia 'awi dumutu wongose 'ato dua ngone powinonu ma kopowimakewau, de ngone koidadiwa paika gee kiaka naga 'una womanoa?"

³⁷ 'O rame-rame ge'ena ma wange ma du-du'uruokau, ge'ena la 'o wange gee 'ifoloiosi yosilamo-lamo, 'o Yesus woma'okode ma Jou 'awi Woa ma dodaka de wosigasoko wongose 'ato, "'O nyawa gee manga kibiti 'idudu-dudungu, yotagino ngoino la 'o 'akere yo'okere.

³⁸ Gedagee yongaku-ngaku ngoino, 'o Buku 'Itebi-tebinoka naga 'isitulisuku konee: 'Manga singina ma dodano doka 'o 'akere gee 'o nyawa 'inasi'ahu-'ahu 'i'uisi 'isasu-sasuru.'"

³⁹ ('O Yesus wobi-bicara ma ngale 'o Ngomasa 'Itebi-tebini, gee dua 'imanoa 'o nyawaka gee yongaku-ngaku 'unaka. Sababu ma 'orasi ge'ena 'o Ngomasa 'Itebi-tebini koyakikulawasi; ngano 'o Yesus kowosongenuawasi de kowisitedenuawasi.)

⁴⁰ 'O nyawa manga gudai yo'isenoka 'okia naga 'o Yesus wongose, de munuka kayongosekau, "'O nyawa nu'una ma raiokau 'o Nabii gee ma Jo'oungu ma Dutu wojajiokau 'ato dua woboa!"

⁴¹ Munukali yongose 'ato, "Nu'una ma Koana 'o Nyawa Wosilaha-laha!" Ma munukali yongose 'ato, "Tei, ma Koana 'o Nyawa Wosilaha-laha de 'awi 'asali 'o Galileano?

⁴² Sababu naga 'o Buku 'Itebi-tebinoka 'isitulisuku 'ato ma Koana 'o Nyawa Wosilaha-laha 'una ge'ena 'awi 'asali 'o Dautino de dua woboa 'o Betlehemuno, ge'ena la 'o Dautu 'awi soanino."

⁴³ Ma duanguku 'o nyawa-nyawa koyomakadaenuawau moi de moi sababu yatiba-tibangi ma ngale 'o Yesus.

⁴⁴ Munuka yomau witagoko, ma komoiwa yomoroini wi'ao.

⁴⁵ Ma 'orasi ma Jou 'awi Woa ma jo-jaga gee yakisulo-suloko yotagi 'o Yesus witagoko go'ona yoboanoli, 'o 'imam ma sae-saeke de 'o Farisioka go'ona yosano 'onaka, "'Ido'oa so kowini'asanowa ne'enano?"

⁴⁶ Ma Jou 'awi Woa ma jo-jaga go'ona yosango, "Tei, koma'iwasi 'o nyawa yobi-bicara ma sure 'isoka 'una!"

⁴⁷ 'O Farisioka go'ona kayongosekau, "Bolo nginika mita winisilibakau?

⁴⁸ Naga done de ma 'enau? to ngone nanga balu-balusu bolo 'o Farisioka yongakuokau 'unaka?

⁴⁹ Ma 'o nyawa yoku-kudai no'ona, 'ona koyanakowa 'o Musa 'awi besesongo, de ngaro ka kokiau naga ma 'ona ge'ena ma Jo'oungu ma Dutu wakikorosauokau."

⁵⁰ 'O Farisioka wimoi ge'ena la 'o Nikodemus gee ma moi woboa 'o Yesusino. 'Una kawongosekau 'o Farisi ma nyawa 'ireguka gee,

⁵¹ "Moteke nanga 'agama ma besesongo, koidadiwa pakihukumu 'o nyawa moi nako kopo'isenuawasi 'okia yongose de manga parakara kopalega ma diaiwasi."

⁵² 'Ona yosango, "Ngona mita 'o Galileano? Kanalega ma diai bato 'o Buku 'Itebi-tebini! Ngona 'asa namake 'o nabii koi'iwa ma 'asali 'o Galileano!"

⁵³ [Ge'enaka de 'o nyawa yoodumu yokokilio moi-moi manga woaka.]

Yohanes

Video Yohanes 7

Ikuti Kami:

KONTAK | PARTISIPASI | DONASI