Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob salpu ai, idalani Jesus ma Tanoh Galilea; seng ra Ia mardalani i Judea halani sihol do bunuhon ni halak Ia.
2 Anjaha dohor ma pesta lampolampo ni halak Jahudi.
3 Jadi ihatahon sanina-Ni ai ma hu Bani, “Misir ma Ham hunjon laho hu Judea, ase dihut susian-Mu ai mangidah horja na hinorjahon-Mu in.
4 Ai seng bani na ponop ihorjahon halak sibahenonni, anggo sihol tarbarita ia. Anggo sapala ihorjahon Ham na sonin, patalar ma diri-Mu bani dunia on.”
5 Ai age sanina-Ni ai, seng porsaya Bani.
6 Jadi nini Jesus ma hubani sidea, “Seng jumpah ope panorang-Ku, tapi tongtong do sirsir anggo panorang nasiam.
7 Sonaha ma boi sogam uhur ni dunia on bani nasiam; anggo Ahu ihasogamkon do, halani Husaksihon na jahat do horjani.
8 Nasiam ma tangkog marpesta, anggo Ahu seng tangkog hu pesta ai, halani seng jumpah ope panorang-Ku.”
9 Dob ihatahon sonai, soh ma Ia i Galilea.
10 Tapi dob tangkog sanina-Ni ai hu pesta ai, Ia pe tangkog ma, seng talar, tapi ponop do.
11 Ase ipindahi halak Jahudi ma Ia bani pesta ai, nini sidea ma, “Ai ija do Ia?”
12 Jadi buei ma sahap-sahap pasal-Si i tongah-tongah ni halak na mabuei ai. Adong na mangkatahon, “Paruhur na madear do Ia.” Na legan mangkatahon, “Lang, sipakahou halak na mabuei do Ia.”
13 Tapi seng dong na pag marsahap torang-torang pasal-Si, halani biar dompak halak Jahudi ai.
14 Bani partongahan ni pesta ai, tangkog ma Jesus hu rumah panumbahan ai mangajari.
15 Jadi longang ma halak Jahudi, nini ma, “Sonaha do pambotoh ni On pasal na tarsurat in, ai seng ongga marguru Ia?”
16 Jadi nini Jesus ma mambalosi sidea, “Ia podah-Ku seng na hun Bangku ai, tapi humbani na marsuruh Ahu do.
17 Barang ise na ra mangkorjahon rosuh ni uhur-Ni, botohonni do, barang na humbani Naibata podah-Ku, barang na Huhatahon in humbani diring-Ku sandiri.
18 Barang ise na mangkatahon humbani dirini sandiri, sangapni do na pinindahanni. Tapi na mangindahi sangap ni na marsuruh-Si, in do parsintong, seng dong na geduk ibagas dirini.
19 Ai lang domma ibere si Musa bani nasiam titah in? Hape sahalak pe seng dong humbani nasiam na mangkorjahon titah in. Mase ma iuhurhon nasiam sihol mamunuh Ahu?”
20 Jadi nini na mabuei ai ma, “Na isorapi setan do Ham. Mintor ise na mangindahi dalan laho mamunuh Ham?”
21 Jadi nini Jesus ma mambalosi sidea, “Hubahen sada horja, gabe longang nasiam haganup halani ai.
22 Ibere si Musa do bani nasiam aturan parsunaton (seng humbani si Musa namin ai, tapi humbani ompungta do), gabe bani ari Sabat pe isunat nasiam do jolma.
23 Anggo boi do sunaton jolma bani ari Sabat, ase ulang hona langgar titah ni si Musa, mase ma manggila nasiam Bangku, halani hibul sada jolma Hupamalum ari Sabat?
24 Ulang ma marguru bani pangidah tumang panguhumion nasiam, tapi pintor ma panguhum nasiam.”
25 Dob ai nini deba halak na hun Jerusalem ma, “Ai lang Ia do na sihol bunuhon ni sidea in?
26 Tonggor ma, torang ni parsahap-Ni in, anjaha aha pe lang ihatahon sidea Bani. Ai na dob torang do nani ibotoh pambobaita, Ia do Kristus in?
27 Tapi tene, ibotoh hita do harohan ni Halak on! Anggo roh Kristus in, seng dong na mambotoh atap hunja harohan-Ni.”
28 Dob ai ipagogoh Jesus ma sora-Ni mangajari i rumah panumbahan ai, nini ma, “Tongon, itanda nasiam do Ahu, anjaha ibotoh nasiam do hunja harohan-Ku. Tapi seng humbani diring-Ku sandiri Ahu roh; adong do Parsintong in, na marsuruh Ahu, na so tinanda nasiam.
29 Hutanda do Ia, ai hun Bani do Ahu, Ia do na marsuruh Ahu.”
30 Jadi ipindahi sidea ma dalan laho manangkap-Si, tapi ise pe lang na mardas tangan hu Bani, halani lape jumpah panorangni.
31 Tapi buei do humbani na mabuei ai, na gabe porsaya Bani, nini sidea, “Anggo roh Kristus, tagamon buenan tanda bahenon-Ni humbani na binahen ni Halak on?”
32 Ibogei Parisei ai ma husip-husip ni na mabuei ai pasal-Si, jadi isuruh sintua ni malim ampa Parisei ma upas laho manangkap-Si.
33 Jadi nini Jesus ma, “Tongkin nari mando Ahu rap pakon nasiam, dob ai laho ma Ahu marayak na marsuruh Ahu.
34 Pindahan nasiam ma Ahu, tapi seng jumpah nasiam. Seng tarbahen nasiam roh bani ianan-Kai.”
35 Jadi nini halak Jahudi ma samah sidea, “Huja do nani sihol misir Ia, ase lang jumpah hita be Ia? Sihol misir Ia nani hubani hasoman na manrantou i tanoh Gorik, laho mangajari halak Gorik ai?
36 Aha do arti ni hata, na hinatahonni ai, ʻPindahan nasiam ma Ahu, tapi seng jumpah. Seng tarbahen nasiam roh bani ianan-Kai?ʼ”
37 Dob ai bani ari parpudi ni pesta ai, bani matani ai, jongjong ma Jesus ijai, ipagogoh ma sora-Ni mangkatahon, “Barang ise na horahan, hu Bangku ma ia roh minum.
38 Songon na hinatahon ni surat in, ʻBah na manggoluh do mabaor humbani na porsaya Bangku!ʼ”
39 Pasal Tonduy in do na hinatahon-Ni ai, sijaloon ni halak na porsaya, ai seng ope roh Tonduy in, halani seng ipasangap ope Jesus.
40 Deba humbani na mabuei ai, na mambogei hata ai, mangkatahon, “On ma tongon Nabi ai.”
41 Na legan mangkatahon, “On ma Kristus ai!” Tapi na legan use mangkatahon, “Mintor hun Galilea ma roh ni Kristus in?
42 Ai lang ihatahon Surat in do, ia harohan ni Kristus, ai ma humbani ginompar ni si Daud anjaha hun huta Betlehem, huta ni si Daud?”
43 Masa ma parsalisihan i tongah-tongah ni bangsa in marhalani Ia.
44 Deba humbani sidea sihol manangkap-Si, tapi seng dong na pag mardas tangan Bani.
45 Jadi mulak ma upas ai bani sintua ni malim ampa Parisei, gabe ihatahon sidea ma bani sidea, “Mase lang iboban nasiam Ia?”
46 Balos ni upas ai, “Seng ongga ope adong halak na marsahap songon-Si ai.”
47 Jadi nini Parisei ai ma bani sidea, “Ai dihut do homa nasiam ipakahou?
48 Ai adong do humbani pambobai atap humbani Parisei, na porsaya Bani?
49 Tapi pitah halak na mabuei in, na so mambotoh titah in do; bursik ma sidea.”
50 Dob ai nini si Nikodemus ma, ai ma sada halak humbani sidea, na roh ijia marayak Jesus,
51 “Ai iuhumi titahta do halak, anggo lang parlobei nabogei hata-Ni, ase nabotoh atap aha na hinorjahon-Ni?”
52 Jadi nini sidea ma mambalosisi, “Ai halak Galilea do homa ham? Papangkei ma, ase ibotoh ham, na so adong bangkit nabi hun Galilea.”
53 Jadi misir ma sidea ganup hu rumahni bei.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA