Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nopaḷut makow kon tua, ki Yesus minaya-mayak makow ing Galilea. Doií in Sia minayak in Yudea, sin itoi mita Yahudi moroncana molimod ko'i-Nia.
2 Dodai intua diaídon mo'onggot bo poraya'an kon Singgai Moḷoben Pondok Daun.
3 Daí ki utat mita i Yesus noguman ko'i-Nia, "Taḷa'aidon in tampat tana'a bo bayakdon in Yudea, simbaí murií-Mu mita moko'ontong doman kon oaíidan-Mu.
4 Diaíbií intau im mobuni kon onu inta inaidannya, aka mo'ibog in sia kota'auan im bayongan intau. Aka Ikow mogaid kon soaáḷ mita naí tatua, yo musti po'ontong kom bayongan dunia!"
5 (Sing ki utat-Nyapa mita tontanií diaípabií doman mopirisaya ko'i-Nia.)
6 "De'emanpabií wakutu-Ku," guman i Yesus ko'i monia, "Ta'e aka ko'i monimu, mota'aubií im pomuḷoi makow.
7 Mo'ikow in diaíbií kodoií in dunia na'a. Ta'e Aku'oi im memang kodoiíbií in dunia na'a, sin Aku'oi umuran moguman kon dunia mora'at in oaíid monia.
8 Bayakdon tontanií i mo'ikow kom poramean tatua. Aku'oi in diaípabií mayak, sin de'emanpabií wakutu-Ku."
9 Tua ing guman i Yesus ko'i utat-Nya mita, bo nogutunpa in Sia kong Galilea.
10 Naonda ing ki utat-Nya mita minayak kom poramean tatua, inumuni-uni makow ing ki Yesus bo minayak tontanií.
11 Solama pinoramean tatua, itoi mita Yahudi notayak ko'i-Nia bo nolibo magií makow, "Kon onda in Sia?"
12 Moaíntoí intau momangkoidon moyogombong soaáḷ Sia. Oyuíon i moguman: "Sia Intaubií mopia." Ta'e oyuíon doman i moguman: "Diaí! Sia mopoyaying kon intau mobayong."
13 Ta'e diaí in tobatuímai intau mobarani moguman taran-tarangan soaáḷ ki Yesus sim mosia mo'ondok kon itoi mita intau Yahudi.
14 Wakutu ing koyogotdon pinoramean, ki Yesus sinumu'ot kom Baḷoi Tuhan bo nomangkoidon nobogoi in totunduí.
15 Itoi mita i Yahudi totok noherang bo noguman, "Naondabií ing kinotota'au-Nya kon soaáḷ mita tatua, padahaḷ diaíbií dodai onda Sia nosikoḷah?"
16 Ki Yesus notubag, "Onu in sinunduí-Ku na'a de'emanbií totunduí-Ku, ta'e totunduíbií i-Nia inta nopotabaí mangoi ko'i-Nakoí.
17 Intau mita inta mo'ibog dumudui ko'i Allah, kota'auannyabií mongo nongkon i Allah in totunduí-Ku na'a andeka nongkon i-Nakoí tontanií.
18 Intau inta motunduí kon onu ing kino ibognya tontanií, sia tua i motayakbií kom baí hormaton. Ta'e intau inta moramiji simbaí hormaton ki Inta nopotabaí ko'inia yo mojujur in sia tua, bo diaíbií in uboḷ ko'inia.
19 Degaí diaíbií kinota'auan monimu kong ki Musa nobogoidon im parentah mita i Allah ko'i monimu? Ta'e diaí in tobatuímai kon sigad monimu in dinumudui kom parentah mita tatua. Nongonu sim mo'ikow mo'ibogbií molimod ko'i-Nakoí?"
20 Intau moaíntoí kon tua notubag: "Nobundai Ikow! Ki inebií im mo'ibog molimod ko'i-Nimu?"
21 Ki Yesus notubag, "Tongaí tobatuí in oaíidan pinomia-Ku bo moherang i mo'ikow.
22 Ki Musa nobogoi i atorang ko'i monimu simbaí sunaton, umpakahbií sunat tatua de'emanbií atorang nongkon i Musa, ta'e nongkon mogoguyangbií mita tungkuḷ ing ki Musa diaípa. Tuamai, umpakah singgai in Sabat mo'ikow mosunat doman kon intau.
23 Aka tua pomia'an monimu simbaí diaí moḷawang kon atorang i Musa soaáḷ sunat, yo nongonu mo'ikow tumoruíbií ko'i-Nakoí tongaí lantaran nongundam kom bayongan awak intau kon singgai in Sabat?
24 Dikabií mohakim kon intau tongaí podoyon kon onu inta ko'ontongan, ta'e podoyonbií kon inta moaídil."
25 No'iduduimai kon tua, degaí tongonumai intau in Yerusalem noguman, "Sia na'a degaí inta taya-tayakonmai intau sin limodon?
26 Ta'e indoiai mobebasbií in Sia mosingog kon tayowon intau moaíntoí, bo diaíbií im moguman kon onu bo onu ko'i-Nia. Kinota'auandon degaí im pomarentah naton kon Sia na'a in Raja Mopoposaḷamat?
27 Ta'e aka Raja Mopoposaḷamat mamangoi, yo diaíbií tobatuímai intau monota'au kon asaḷ-usuḷ-Nya! Ta'e aka asaḷ-usuḷ Intau tanion yo kinota'auanbií naton."
28 Wakutu ing ki Yesus koyogot motunduímai kom bonu im Baḷoi Tuhan, Sia nosingog noropot, kai-Nia, "Daí kinota'auan bidon monimu mongo ki ine in Aku'oi na'a bo kino-ta'auan bidon monimu in asaḷ usuḷ-Ku? Tongaí baí kota'auan monimu, kon de'emanbií ibog-Ku tontanií in namangoi. Aku'oi na'a im pinotabaíbií i-Nia inta Mobanar, ta'e diaí kinota'auan monimu in Sia.
29 Ta'e Aku'oi in nonota'aubií ko'i-Nia, sin Aku'oi nongkon i-Nia, bo Siabií tua in nopotabaí ko'i-Nakoí."
30 Dodai intua ramijiondon monia domokon in Sia, ta'e diaí tobatuímai intau mokobalií mokadai ko'i-Nia, sin de'emanpa wakutunya.
31 Nobayong ing kon sigad monia tua in nomangkoidon mopirisaya ko'i-Nia, bo noguman, "Aka Raja Mopoposaḷamat tua mamangoi, yo degaí Sia mokoaíid kon lebe mobayong in soaáḷ mita inta mokoherang nongkon Intau tana'a?"
32 Kinodongogandon intau mita im Parisi onu in iyogombong intau moaíntoí soaáḷ ki Yesus. Tuamai, mosia takin imang mita itoi nopotabaí kon tongonumai moḷoḷukad kom Baḷoi Tuhan bo modomok ko'i Yesus.
33 Ki Yesus noguman kon intau mobayong inta kom bonu im Baḷoi Tuhan, "Diaí bidon mo'onggot Aku'oi im moyotakin monimu, si mopaḷut makow kon tua Aku'oi mayakdon ko'i-Nia inta nopotabaí ko'i-Nakoí.
34 Tayakonbií monimu in Aku'oi, ta'e diaíbií mo'ulií monimu, sim mo'ikow in diaíbií mokodapot kon tampat inta bayaían-Ku."
35 Daí itoi mita intau Yahudi nosiliboíandon, "Mayak onda degaí in Intau tana'a sahingga diaí mo'ulií naton in Sia? Mayak degaí in Sia kon intau mita in Yahudi inta nogutun kom butaí intau Yunani, bo mopoyaput doman in totunduí kon intau mita in Yunani?"
36 Onu i makusud in singog-Nya: "Tayakonbií monimu in Aku'oi, ta'e diaíbií mo'ulií monimu in Aku'oi, bo mo'ikow in diaíbií mokodapot kon tampat inta bayaían-Ku?"
37 Kon singgai pangabisan nongkon poraya'an tatua, singgai inta totok moponting kom poraya'an tatua, ki Yesus sinimindog kom bonu im Baḷoi Tuhan bo nosingog noropot; "Intau inta moyogang angoidon ko'i-Nakoí bo ponginum.
38 Soaáḷ intau inta mopirisaya ko'i-Nakoí pinaisdon kom Buk Mosuci nana'a, 'Nongkon bonu ing ginanya ḷumuai im bokakak inta mobogoi ing kobiagan.'"
39 (Ki Yesus nongonguman kon soaáḷ Roho i Allah, inta bain tarima'an in intau mita inta mopirisaya ko'i-Nia. Sin wakutu intua Roho i Allah diaípa inogoi; sing ki Yesus diaípa pinomulia.)
40 Nobayong intau nokodongog kon onu in siningog i Yesus, bo kon sigad monia tua oyuíon in noguman, "Intau tanion in totu-totu'ubií kon nabi inta pino dandi mamangoi tua!"
41 Ibanea noguman, "Na'adon in Raja Mopoposaḷamat!" Ta'e oyuíon doman in noguman, "Ah de'eman! Sin Raja Mopoposaḷamat in diaíbií mamangoi nongkon Galilea!
42 Kom Buk Mosuci aim pinais, kon Raja Mopoposaḷamat in nongkon katurunanbií i Daud, bo mamangoibií nongkon lipu im Betlehem, lipu inta pinogutunan i Daud kolipod."
43 Pangabisannya intau mita momangkoidon mobobayowan soaáḷ ki Yesus.
44 Oyuíon im modomok ko'i-Nia, ta'e diaí tobatuímai intau mokobalií mokadai ko'i-Nia.
45 Naonda i moḷoḷukad mita kom Baḷoi Tuhan inta pinotabaí minayak modomok ko'i Yesus nobuidon mangoi, imang mita itoi bo intau mita im Parisi noliboí ko'i monia, "Nongonu sin diaíbií dinia mangoi monimu kon na'a in Sia tua?"
46 Daí moḷoḷukad mita tatua notubag, "Ule, diaípa dodai onda intau mosingog naí pososingog-Nya tatua!"
47 Daí intau mita im Parisi noliboí bui, "Eta degaí mo'ikow pinoyaying-Nya domandon?"
48 "Oyuíondon degaí ing kon sigad in itoi mita naton andeka intau im Parisi in nopirisaya ko'i-Nia?
49 Ta'e intau moaíntoí tana'a, diaíbií nonota'au kon hukum i Musa, kinatuḷadon im mosia."
50 Kon sigad intau mita im Parisi tatua oyuíon ing ki Nikodemus inta pernah namangoi ko'i Yesus. Ki Nikodemus noguman kon intau mita im Parisi ibanea,
51 "Podudui in hukum i Musa, tobatuí intau diaíbií mota'au hukumon aka porkaranya diaípa kinota'auan bo oaíidnya diaípa pinirikisa."
52 Daí mosia noguman ko'inia, "Eta degaí ikow nion doman in nongkon Galilea? Pirikisadon kom bonu im Buk Mosuci daí kota'auanmu bidon kon diaíbií in tobatuímai nabi mamangoi nongkon Galilea!"
53 [Nopaḷut makow kon tua bayongan intau norobuidon kom baḷoinya-baḷoinya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA