Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun nike Deside Isa lumbar ojok itoqan Danao Galilea, saq tesebut ẽndah Danao Tiberias.

² Sesampun rauh lẽq derike, luwẽq dengan ngiring Deside Isa, sẽngaq ie pade sampun serioq muqjizat-muqjizat saq tepiaq siq Deside Isa sewaktu Ie nyelahang dengan sakit.

³ Deside Isa taẽk ojok atas gunung, terus melinggih lẽq derike teiring siq pengiring-pengiring-Ne.

⁴ Lẽq waktu nike Hari Raye Paskah dengan Yahudi sampun rapet.

⁵ Waktu Deside Isa cingakin lẽq sekelining-Ne, Ie cingakin dengan luwẽq dateng tipaq Ie. Beterus manik Deside Isa lẽq Pilipus, "Lẽq mbẽ taoqte beli keloran, adẽq selapuq dengan niki mauq ngelor?"

⁶ (Setetune Deside Isa sampun wikan napi saq harus Ie laksaneang, laguq Ie bemanik maraq nike jari nguji Pilipus.)

⁷ Jawab Pilipus, "Ruti saq beraji satak kẽpẽng perak ndẽqne cukup umaq dengan-dengan niki, timaq sebilang dengan cume mauq pade sekediq."

⁸ Salaq sopoq pengiring Deside Isa saq lain aranne Andreas, semeton Simon Petrus matur,

⁹ "Lẽq deriki araq kanak mame bedowẽ lime ruti dait due empaq. Laguq napi artine lẽq dengan saq luwẽqne maraq niki?"

¹⁰ Manik Deside Isa, "Suruq dengan-dengan nike tokol." Lẽq taoq nike luwẽq pupaq, make dengan-dengan nike tokol lẽq pupaq -- selapuqne kire-kire lime iyu dengan mame.

¹¹ Beterus Deside Isa bait ruti nike, dait ngucap syukur tipaq Allah. Sesampun nike bagi-bagiang-Ne ruti nike ojok dengan luwẽq. Terus Ie bagi empaq nike, dait ie pade ngelor jangke puas.

¹² Sesampun selapuqne bekelor jangke besuh, Deside Isa bemanik tipaq pengiring-pengiring-Ne, "Kumpulang salo keloran nike; ndaq jangke araq saq tetetẽh."

¹³ Terus ie pade kumpulang due olas bakaq penoq salo keloran lẽman lime ruti saq tekelorang siq dengan luwẽq nike.

¹⁴ Sewaktu dengan luwẽq serioq keajaipan saq tepiaq siq Deside Isa, ie pade bebase, "Mule tetu, niki Nabi saq gen rauh ojok dunie!"

¹⁵ Deside Isa wikan ie pade mẽlẽ dateng jari paksaq Ie jari raje ie pade. Keranaq nike Deside Isa lumbar nyingkir ojok gunung mẽsaq-mẽsaq.

¹⁶ Sesampun serep jelo, pengiring-pengiring Deside Isa turun ojok danao.

¹⁷ Beterus ie pade taẽk perau mbelat danao nike lumbar ojok Kapernaum. Waktu nike sampun peteng laguq Deside Isa ndẽqman ẽndah rauh tipaq ie pade,

¹⁸ sedeng umbak lẽq danao mulai belẽq sẽngaq keras angin.

¹⁹ Sesampun belayar kire-kire lime atao enem kilomẽter, ie pade serioq Deside Isa rauh ojok perau bemargi lẽq atas aiq. Ie pade takut gati.

²⁰ Laguq manik Deside Isa lẽq ie pade, "Niki Tiang, ndaq takut!"

²¹ Make seneng gati angen ie pade terus pesilaq Deside Isa taẽk ojok dalem perau. Dait waktu nike ẽndah perau ie pade dateng lẽq taoq saq ie pade laiq.

²² Lẽq jelo jemaqne dengan luwẽq saq masih ndot lẽq itoqan danao, sadar bahwe sendẽqmanne cume araq sopoq perau lẽq derike. Ie pade nenaoq bahwe pengiring-pengiring Deside Isa sampun berangkat kadu perau nike, laguq Deside Isa nẽnten milu.

²³ Beterus perau-perau lẽman kote Tiberias dateng dait belabuh lẽq dẽkẽt taoq nike, taoq dengan luwẽq ngelorang ruti sesampun Junjungan Saq Mulie ngucapang syukur.

²⁴ Sewaktu dengan luwẽq nike serioq bahwe Deside Isa dait pengiring-pengiring-Ne ndẽq araq lẽq derike, ie pade taẽk perau-perau nike dait lumbar ojok Kapernaum boyaq Deside Isa.

²⁵ Sewaktu dengan-dengan nike bedait kance Deside Isa lẽq itoqan danao, ie pade metakẽn lẽq Deside Isa, "Bapaq Guru, piran Pelungguh rauh lẽq deriki?"

²⁶ Jawab Deside Isa, "Tiang badaq side, setetune side pade boyaq Tiang ndẽqne lantaran side pade sampun ngerti napi maksut keajaipan-keajaipan saq Tiang piaq, laguq lantaran side pade sampun bekelor jangke besuh.

²⁷ Ndaq begawẽan jari mauq keloran saq iniq bis dait sẽde. Laguq side pade harus begawẽan jari mauq keloran saq bau tahen jangke dateng idup sejati dait kekel, saq gen teicanin siq Bije Manusie, sẽngaq Ie sampun tesahang siq Allah Bapa."

²⁸ Beterus ie pade metakẽn lẽq Deside Isa, "Napi saq harus tiang pade piaq adẽq tiang pade ngelaksaneang karye saq tekayunang siq Allah?"

²⁹ Jawab Deside Isa, "Niki karye saq tekayunang siq Allah: Side pade harus percaye lẽq Ie saq teutus siq Allah."

³⁰ Beterus ie pade matur, "Lamun maraq nike, bukti napi saq gen Pelungguh icanin adẽq tiang pade serioq dait percaye lẽq Pelungguh? Napi saq Pelungguh gen laksaneang?

³¹ Leluhur tiang pade ngelorang manna lẽq padang gurun, maraq tetulis lẽq Kitab Suci, 'Allah ngicanin ie pade kelorang ruti lẽman sorge.'"

³² Terus Deside Isa bemanik lẽq ie pade, "Tiang badaq side: Setetune ndẽqne Musa, laguq Bapa Tiang saq ngicanin side ruti saq setetune lẽman sorge.

³³ Sẽngaq ruti saq teicanin siq Allah nike Ie saq turun lẽman sorge dait ngicanin idup tipaq manusie lẽq dunie."

³⁴ Terus ie pade matur, "Junjungan Saq Mulie, tunas tetep icanin tiang pade ruti nike."

³⁵ Manik Deside Isa lẽq ie pade, "Tiang niki ruti saq ngebẽng idup, dengan saq dateng tipaq Tiang, ndẽqne gen lapah malik. Dait dengan saq percaye lẽq Tiang ndẽqne gen bedak malik."

³⁶ "Laguq maraq saq sampun Tiang sampẽang lẽq side: Timaq side pade sampun serioq Tiang, side pade ndẽq percaye.

³⁷ Selapuq saq Bapa icanin tipaq Tiang gen dateng tipaq Tiang dait sai-sai saq dateng tipaq Tiang ndẽq uwah Tiang tolaq.

³⁸ Sẽngaq Tiang turun lẽman sorge, ndẽq jari ngelaksaneang kemẽlẽq Tiang mẽsaq, laguq pekayunan Ie saq ngutus Tiang.

³⁹ Dait niki pekayunan Ie saq ngutus Tiang: Adẽq selapuq saq sampun Ie icanin tipaq Tiang, ndẽq araq saq telang; laguq adẽq Tiang idupang malik lẽq ahir jaman.

⁴⁰ Mule maraq niki pekayunan Bapa Tiang: Adẽq selapuq saq serioq Bije dait percaye lẽq Ie, bedowẽ idup sejati dait kekel, dait Tiang idupang malik lẽq ahir jaman."

⁴¹ Dengan-dengan Yahudi mulai ngomẽh lẽq Deside Isa, lantaran Ie bemanik: "Tiang ruti saq turun lẽman sorge."

⁴² Ie pade bebase, "Tekan Ie niki Isa, bije Yusup? Tiang pade kenal inaq amaq-Ne! Berembẽ Ie bau paran diriq-Ne, "Ie turun lẽman sorge?"

⁴³ Beterus Deside Isa bemanik lẽq ie pade, "Ndaq ngomẽh!

⁴⁴ Ndẽq araq sopoq dengan juaq saq bau dateng ojok Tiang, lamun Bapa saq ngutus Tiang, nẽnten gadingang ie tipaq Tiang; dait sai saq dateng, gen Tiang idupang lẽq ahir jaman.

⁴⁵ Lẽq dalem Kitab Nabi-nabi tetulis maraq niki: 'Selapuq dengan gen teajah siq Allah.' Jari, selapuq dengan saq dengahang Bapa dait berajah lẽman Ie, dateng ojok Tiang.

⁴⁶ Nike ndẽqne berarti bahwe araq dengan saq sampun serioq Bapa. Cume Ie saq rauh lẽman Allah, sampun cingakin Bapa.

⁴⁷ Tiang badaq side: Setetune dengan saq percaye, bedowẽ idup sejati dait kekel.

⁴⁸ Tiang niki ruti saq ngebẽng idup.

⁴⁹ Leluhurde kelorang manna lẽq padang gurun dait ie pade ninggal ẽndah.

⁵⁰ Laguq ndẽqne maraq nike ruti saq turun lẽman sorge; dengan saq ngelorang ruti nike ndẽqne gen ninggal.

⁵¹ Tiang niki ruti saq turun lẽman sorge -- ruti saq ngebẽng idup. Dengan saq ngelorang ruti niki gen idup selaẽq-laẽqne. Ruti saq gen Tiang bẽng jari kehidupan manusie lẽq dunie, nike ragen Tiang."

⁵² Dengahne manik Deside Isa maraq nike, dengan-dengan Yahudi betungkasan sopoq kance lainne, basen ie pade, "Berembẽ Dengan niki ngicanin ite rage-Ne jari tekelorang?"

⁵³ Beterus Deside Isa bemanik lẽq ie pade, "Tiang badaq side: Setetune lamun side pade ndẽq ngelorang rage Bije Manusie dait nginem daraq-Ne, side pade ndẽq bedowẽ idup lẽq dalem diriqde.

⁵⁴ Dengan saq ngelorang ragen Tiang dait nginem daraq Tiang bedowẽ idup sejati dait kekel, dait Tiang gen idupang ie lẽq ahir jaman.

⁵⁵ Sẽngaq ragen Tiang tetu-tetu keloran dait daraq Tiang tetu-tetu ineman.

⁵⁶ Dengan saq ngelorang ragen Tiang dait nginem daraq Tiang, ie araq lẽq dalem Tiang, dait Tiang araq lẽq dalem ie.

⁵⁷ Pade maraq Bapa saq idup ngutus Tiang, dait Tiang ẽndah idup lẽman Bapa, maraq nike ẽndah halne sai-sai saq kelorang ragen Tiang gen idup lẽman Tiang.

⁵⁸ Niki ruti saq sampun turun lẽman sorge: Ndẽqne maraq ruti saq tekelorang siq leluhurde. Sẽngaq sesampun ie pade ngelorang ruti nike, ie pade ninggal ẽndah. Laguq dengan saq ngelorang ruti niki gen idup selaẽq-laẽqne."

⁵⁹ Selapuqne nike temanikang siq Deside Isa sewaktu Ie ngajahang lẽq balẽ ibadah lẽq Kapernaum.

⁶⁰ Sesampun dengah manik Deside Isa nike, luwẽq lẽq antare pengiring-pengiring-Ne matur, "Perajahan niki keras, sai saq sanggup dengahang perajahan niki?"

⁶¹ Deside Isa wikan bahwe pengiring-pengiring-Ne ngerumun mengenai hal nike. Make Ie bemanik, "Napi perajahan nike miaq side bimbang?

⁶² Berembẽ jarine ẽraq lamun side pade serioq Bije Manusie taẽk gen tulak ojok taoq-Ne semule?

⁶³ Roh saq ngicanin idup, awak manusie tetu-tetu ndẽqne araq manpaatne. Perajahan-perajahan saq Tiang sampẽang lẽq side nike roh dait idup.

⁶⁴ Laguq lẽq antare side pade araq saq ndẽq percaye." (Deside Isa sampun wikan lẽman penembẽqne sai-sai saq ndẽq mẽlẽ percaye, dait sai saq gen behianat lẽq Ie.)

⁶⁵ Terus Deside Isa bemanik malik, "Keranaq nike Tiang badaq side bahwe ndẽq araq sopoq dengan juaq bau dateng ojok Tiang, lamun Bapa nẽnten ngicanin ie paice."

⁶⁶ Mulai waktu nike luwẽq pengiring-Ne ngundurang diriq, dait ndẽq ngiring Ie malik.

⁶⁷ Beterus Deside Isa beketuan lẽq kedue olas pengiring-Ne, "Napi side pade ẽndah mẽlẽ bilin Tiang?"

⁶⁸ Simon Petrus matur lẽq Deside Isa, "Junjungan Saq Mulie, sai saq gen tiang pade laiq? Pelungguh doang saq bedowẽ idup sejati dait kekel.

⁶⁹ Tiang pade sampun percaye dait yakin bahwe Pelungguh Saq Suci lẽman Allah."

⁷⁰ Jawab Deside Isa, "Tekan Tiang mẽsaq saq pilẽq side pade, saq due olas dengan niki? Laguq salaq sopoq lẽq antare side nike Belis!"

⁷¹ Saq temaksut siq Deside Isa nike, Yudas bije Simon Iskariot. Sẽngaq timaq Yudas jari salaq sopoq lẽman kedue olas pengiring-Ne, ie gen behianat lẽq Deside Isa.

Yohanes

Video Yohanes 6

Ikuti Kami:

KONTAK | PARTISIPASI | DONASI