Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pira-pira waktu jak seno Isa mik seberang Danau Galilea, sai disebut juga Danau Tiberias.

² Sesampaini di dudi, lamon jelma nutuk Ia mani tian radu ngeliak keajaiban-keajaiban sai disani-Ni jama ngunyaiko ulun-ulun sai meruyuh.

³ Isa cakak mik atas bukit, kak radu mejong di dudi jama jelma-jelma sai nutuk Ia.

⁴ Pada waktu seno radu redik Rani Buka Paskah Yahudi.

⁵ Waktu Isa ngeliak dikeliling-Ni, Ia ngeliak jelma beduyun-duyun ratong jama Ia. Maka Ia cawa jama Filipus, "Di dipa neram dapok ngebeli kanikan, in sunyinni jelma inji dapok mengan?"

⁶ (Isa radu pandai api sai haga dilakuko-Ni, kidang Ia cawa injuk reno mani Ia haga nguji Filipus.)

⁷ Filipus ngejawab, "Ruti sai regani rua ratus duit perak mak cukup untuk jelma-jelma inji, sekalipun unggal jelma angkah dapok cutik gaoh."

⁸ Sai jelma sai nutuk Isa sai bareh, yakdo Andreas, puarini Simon Petrus, cawa,

⁹ "Di dija wat sanak bakas ngedok lima ruti rik rua iwa. Kidang api retini ano untuk jelma selamon inji?"

¹⁰ "Kayundo jelma-jelma udi mejong," ani Isa. Di rang udi wat lamon jukuk, jadi jelma-jelma udi mejong di jukuk -- sunyinni wat kira-kira lima ribu ulun bakas.

¹¹ Kak raduni Isa ngakuk ruti ano, raduni ngucap syukor jama Allah. Kak raduni jak seno Ia ngebagi-bagiko ruti ano jama ulun lamon. Kak raduni Ia ngebagi-bagiko iwa udi, rik tian mengan sepuas-puasni.

¹² Seraduni sunyinni mengan sampai betong, Isa cawa jama jelma-jelma sai nutuk Ia, "Kumpulko kelebihan kanikan udi; dang sampai wat sai tetok."

¹³ Kak raduni tian ngumpulko rua belas bakul latap kelebihan kanikan jak lima ruti sai dikanik ulih jelma lamon udi.

¹⁴ Waktu ulun lamon ngeliak keajaiban sai disani Isa, tian cawa, "Temon, injido Nabi sai diharapko ratong mik dunia!"

¹⁵ Isa pandai tian haga ratong untuk memaksa Ia jadi raja tian. Ulihni seno mikdo Ia nyingker mik daerah bebukit.

¹⁶ Waktu rani mulai di bingi, jelma-jelma sai nutuk Isa regah mik danau.

¹⁷ Raduni tian cakak jukung nyeberangi danau udi nuju Kapernaum. Rani radu kelam kidang Isa makkung juga ratong jama tian.

¹⁸ Sementara ano danau mulai begelora mani angin badai.

¹⁹ Seraduni belayar kira-kira lima atau enam kilometer, tian ngeliak Isa ratong mik jukung jama lapah di atas way. Tian merabai nihan.

²⁰ Kidang Isa cawa jama tian, "Dang rabai, inji Nyak."

²¹ Raduni jama senang hati tian nerima Ia mik delom jukung, rik waktu seno juga jukung tian ano sampai di rang tujuan.

²² Jemoh ranini jelma lamon sai masih tinggal di seberang danau, sadar bahwa jenoni angkah wat sai jukung di disan. Tian pandai bahwa jelma-jelma sai nutuk Isa radu mik jama jukung udi, sedangko Isa mak nutuk.

²³ Kak raduni pira-pira jukung jak kota Tiberias ratong rik belabuh di redik rang jelma lamon udi nganik ruti seraduni Tuhan ngucap syukor.

²⁴ Waktu jelma lamon udi ngeliak bahwa baik Isa atau jelma-jelma sai nutuk Ia mak ngedok di dudi, tian juga cakak jukung-jukung udi rik mik Kapernaum nyepok Isa.

²⁵ Waktu jelma-jelma udi betungga jama Isa di seberang danau, tian betanya jama Ia, "Bapak Guru, kapan Bapak sampai di dija?"

²⁶ Isa ngejawab, "Temon, keti nyepok Nyak lain ulihni keti radu ngerti maksud keajaiban-keajaiban sai Kusani, kidang mani keti radu mengan sampai betong.

²⁷ Dang hak beguai untuk dapok kanikan sai dapok bela rik busuk. Beguaido untuk dapok kanikan sai mak dapok busuk rik sai ngeni hurik sejati rik kekal. Kanikan udi haga dikeniko ulih Anak Manusia jama niku, mani Ia radu dilantik ulih Allah Bapa."

²⁸ Raduni tian betanya jama Ia, "Sekam haga bebuat api untuk ngelakuko kehaga Allah?"

²⁹ Isa ngejawab, "Injido sai dikehagako Allah jak keti: percayado jama Ia sai diutus Allah."

³⁰ "Kik injuk reno," cawa tian, "bukti api sai dapok Bapak keniko in sekam ngeliak rik percaya jama Bapak? Api sai haga Bapak lakuko?

³¹ Nenek muyang sekam nganik manna di padang gurun, injuk tetulis di delom Alkitab, 'Ia ngeni tian nganik ruti jak surga!'"

³² Raduni Isa cawa jama tian, "Percayado: Lain hak Musa, melainko Bapa-Kudo sai ngeni jama niku ruti sai sebenorni jak surga.

³³ Mani ruti sai dikeni Allah yakdo Ia sai regah jak surga rik ngeni hurik jama manusia di dunia."

³⁴ "Bapak," ani tian, "keniko jama sekam ruti udi selalu."

³⁵ "Nyakdo ruti sai ngeni hurik," cawa Isa jama tian. "Jelma sai ratong jama Nyak mak haga betoh luot untuk selamani. Rik jelma sai percaya jama Nyak mak haga mahu lagi selamani.

³⁶ Kidang injuk radu Kucawako jama niku, walaupun keti radu ngeliak Nyak, keti mak percaya.

³⁷ Sunyinni jelma sai dikeniko Bapa jama Nyak haga ratong jama Nyak. Nyak mak haga nulak sapa pun sai ratong jama Nyak.

³⁸ Mani Nyak regah jak surga, lain hak untuk ngelakuko kehaga tenggalan, melainko kehaga Ia sai ngutus Nyak.

³⁹ Rik injido kehagani Ia sai ngutus Nyak: in jak sunyinni jelma sai dikeniko jama Nyak, mak sai pun lebon; kidang in Nyak ngebangkitko tian waktu Rani Kiamat.

⁴⁰ Sangun injido kehagani Bapa-Ku: In sunyinni sai ngeliak Anak rik percaya jama Ia ngedok hurik sejati rik kekal, rik Nyak ngehurikko luot waktu Rani Kiamat."

⁴¹ Jelma-jelma Yahudi mulai ngomel jama Isa, mani Ia cawa: "Nyak ruti sai regah jak surga."

⁴² Tian cawa, "Kan inji Isa, anakni Yusuf? Sekam kenal emak bapak-Ni. Repa bang Ia dapok cawa bahwa Ia regah jak surga?"

⁴³ Kak raduni Isa cawa jama tian, "Dang ngomel.

⁴⁴ Mak sai jelma pun dapok ratong jama Nyak, kik Bapa sai ngutus Nyak, mak ngusung ia jama Nyak; rik sapa sai ratong, haga Kubangkitko waktu Rani Kiamat.

⁴⁵ Di delom Buku Nabi-nabi tetulis injuk reji: 'Sunyinni jelma haga diajar ulih Allah.' Jadi sunyinni jelma sai ngedengi Bapa rik belajar jak Ia, ratong jama Nyak.

⁴⁶ Udi mak bereti bahwa wat jelma sai radu ngeliak Bapa. Angkah Ia sai ratong jak Allah, radu ngeliak Bapa.

⁴⁷ Pandai mawat: Jelma sai percaya, ngedok hurik sejati rik kekal.

⁴⁸ Nyakdo ruti sai ngeni hurik.

⁴⁹ Nenek muyangmu nganik manna di padang gurun rik tian mati juga.

⁵⁰ Kidang mak injuk reno jama ruti sai ratong jak surga; jelma sai nganik ruti udi mak mati.

⁵¹ Nyakdo ruti sai ratong jak surga -- ruti sai ngeni hurik. Jelma sai nganik ruti inji haga hurik selamani. Ruti sai haga Kukeniko untuk kehurikan manusia di dunia yakdo daging-Ku."

⁵² Ngedengi seno, ulun-ulun Yahudi betangkar peperda tian. "Repa bang jelma inji dapok ngeniko daging-Ni jama neram untuk dikanik?" cawa tian.

⁵³ Raduni Isa cawa jama tian, "Percayado: Kik keti mak nganik daging Anak Manusia rik nginum rah-Ni, keti mak haga temon-temon hurik.

⁵⁴ Jelma sai nganik daging-Ku rik nginum rah-Ku ngedok hurik sejati rik kekal rik Nyak haga ngebangkitkoni pada Rani Kiamat.

⁵⁵ Mani daging-Ku temon kanikan, rik rah-Ku temon inuman.

⁵⁶ Jelma sai nganik daging-Ku rik nginum rah-Ku, tetap besatu jama Nyak, rik Nyak jama ia.

⁵⁷ Bapa sai hurik udi, ngutus Nyak rik Nyak pun hurik jak Bapa. Reno muneh jelma sai nganik daging-Ku haga hurik jak Nyak.

⁵⁸ Injido ruti sai ratong jak surga: lain hak ruti injuk sai dikanik nenek muyangmu. Mani seraduni nganik ruti ano, tian mati muneh. Kidang jelma sai nganik ruti inji haga hurik selama-lamani."

⁵⁹ Sunyinni ano diucakko ulih Isa waktu Ia ngajar di lamban ibadah di Kapernaum.

⁶⁰ Seraduni ngedengi cawa-cawa Isa ano, lamon di hantara jelma-jelma sai nutuk Ia cawa, "Pengajaran inji biak nihan. Sapa sai dapok nerimani?"

⁶¹ Isa tenggalan pandai bahwa jelma-jelma sai nutuk Ia ngomel tentang hal seno. Maka Ia cawa, "Api keti tesinggung ulihni cawa-cawa seno?

⁶² Repa jadini kanah kik keti ngeliak Anak Manusia cakak luot mik rang-Ni sai mula-mula?

⁶³ Sai nyani manusia hurik yakdo Ruh Allah. Kekuatan manusia mak ngedok gunani. Cawa-cawa sai Kuucakko jama niku inji yakdo cawa-cawa Ruh Allah rik cawa-cawa sai ngeni hurik.

⁶⁴ Kidang wat muneh di hantara keti sai mak percaya." (Isa radu pandai jak mulani, sapa-sapa sai mak percaya, rik sapa sai haga ngekhianati-Ni.)

⁶⁵ Raduni Isa cawa luot, "Renodo sebabni Nyak ngeni pandai jama niku bahwa mak sai jelma pun dapok ratong jama Nyak, kik Bapa mak memungkinkoni."

⁶⁶ Mulai saat seno lamon jelma-jelma sai nutuk Ia ninggalko Ia, rik mak haga nutuk Ia lagi.

⁶⁷ Raduni Isa betanya jama kerua belas jelma-jelma sai nutuk Ia, "Api keti juga haga ninggalko Nyak?"

⁶⁸ "Tuhan," ani Simon Petrus jama Ia, "jama sapa sekam haga mik? Cawani Tuhan ngeni hurik sejati rik kekal.

⁶⁹ Sekam radu percaya rik yakin bahwa Tuhando utusan suci jak Allah."

⁷⁰ Isa ngejawab, "Nyakdo sai milih keti rua belas jelma inji? Kidang sai di hantara keti yakdo sitan!"

⁷¹ Sai Isa maksud iado Yudas anak Simon Iskariot. Mani meskipun Yudas sai jak kerua belas jelma sai nutuk Isa, ia haga ngekhianati Isa.

Yohanes

Video Yohanes 6

Ikuti Kami:

KONTAK | PARTISIPASI | DONASI