Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ta’ saapa abidda dhari jareya Isa meyos ka temorra Talaga Galilea, se enyamae keya Talaga Tiberiyas.

² Sanapa’na ka jadhiya laju etoro’ bunte’ oreng sabannya’na sabab reng-oreng jareya la nangale’e kaajiban-kaajiban se mabaras reng-oreng sake’.

³ Isa ongga ka gumo’, pas alenggi e jadhiya ban red-moredda.

⁴ E bakto jareya la para’ Are Raja Paskana Yahudi.

⁵ E bakto ngoladi ka sakalenglengnga, Isa laju ngagali ja’ bannya’ oreng anyo-ronyo noro’ Salerana ka jadhiya. Daddi Isa laju adhabu ka Filipus, "E dhimma melleya roti, sopaja reng-oreng rowa bisa’a ngakan?"

⁶ (Isa adhabu kantha jareya terro ngojiya Filipus, sababsanyatana Salerana la ngagali apa se bakal elampa’agiya.)

⁷ Filipus mator, "Sanare ngobangana roti kantos dhu ratos pesse salaka ta’ kera cokop eteddha reng-oreng ka’dhinto’, sanare rang-sorangnga namong eparenge bil-satembil."

⁸ Badha moredda Isa se laen, se anyama Andreyas, iya areya taretanna Simon Petrus, mator,

⁹ "E ka’dhinto’ badha na’-kana’ lalake’ kasorang se gadhuwan roti lalema’ sareng juko’ dhadhuwa’. Namong ponapa artena monggu ka oreng se saka’dhinto bannya’epon."

¹⁰ "Reng-oreng jareya soro toju’," dhabuna Isa. E kennengngan jareya bannya’ rebbana, daddi reng-oreng jareya toju’ e rebba, bannya’na ra-kera badha lema ebu oreng lalake’an.

¹¹ Isa mondhut roti gella’, laju asokkor ka Allah. Saellana jareya rotina egi-bagi ka oreng se sabannya’na jareya. Bariya keya juko’na egi-bagi. Reng-oreng se badha e jadhiya padha ngakan sanyang-kennyangnga.

¹² Saellana kabbi padha kennyang se ngakan, Isa adhabu ka red-moredda, "Kassa’ pakompol lebbina kakanan jareya; ja’ sampe’ badha se tabuwang."

¹³ Red-moredda laju makompol bin-lebbinna roti se ekakan reng-oreng jareya, bannya’na gi’ kare dhubellas karanjang.

¹⁴ E bakto nangale’e kaajiban se epabadha Isa jareya, oreng se bannya’ jareya laju padha ngoca’, "Oreng reya pajat Nabbi se earep rabuna ka dunnya!"

¹⁵ Isa ngagali ja’ reng-oreng jareya nyanderra maksa’a Salerana epadaddiya ratona. Daddi Isa laju nyengla ka kennengngan se amo’-gumo’.

¹⁶ E bakto la molae malem, red-moredda Isa toron ka talaga.

¹⁷ Saellana jareya laju ongga ka parao, entas talaga entara ka Kapernaum. Are la malem, tape Isa gi’ ta’ rabu.

¹⁸ Sabatara jareya angenna laju tandhes ban omba’na raja.

¹⁹ Saellana se alajar olle ra-kera lema’ otaba nem kilometer, red-moredda Isa jareya nangale’e Isa alomampa e attas aeng nyander ka paraona. Red-mored jareya ce’ tako’na.

²⁰ Tape Isa adhabu, "Ella, ta’ osa tako’, areya Sengko’!"

²¹ Red-moredda ce’ sennengnga, Isa eatore maso’ ka dhalem paraona, ban e bakto jareya keya parao buru la napa’ ka kennengngan se etojju.

²² Kalagguwanna reng-oreng se bannya’ se gi’ badha e penggirra talaga tao ja’ gella’na e jadhiya pera’ badha parao settong. Reng-oreng jareya tao ja’ red-moredda Isa la mangkat nompa’ parao jareya, tape Isa ta’ meyos abareng. Bi’ red-moredda jareya Isa edina’agi.

²³ Saellana jareya badha o-parao dhari Tiberiyas alabbu e seddi’na kennengnganna reng-oreng jareya ngakan roti saellana Isa asokkor ka Allah.

²⁴ E bakto reng-oreng jareya tao ja’ Isa ban red-moredda tadha’ e o-parao jareya, kabbi laju padha ongga ka o-parao jareya, terros alajar ka Kapernaum nyare’e Isa.

²⁵ E bakto atemmo bi’ Isa e bara’ dhajana talaga, reng-oreng jareya laju padha atanya, "Guru, bilaepon Panjennengngan se tanduk dha’ ka’dhinto’?"

²⁶ Dhabuna Isa, "Saongguna, ba’na reya padha nyare’e Sengko’ polana ba’na ngakan sampe’ kennyang, banne polana ba’na ngarte apa maksodda kaajiban-kaajiban jareya.

²⁷ Ba’na ja’ alako polana terro olleya kakanan se bisa tadha’ ban bucco’. Ba’na kodu alako sopaja ba’na olleya kakanan se ta’ bisa bucco’ ban se madhateng odhi’ se saongguna ban se langgeng. Ba’na bakal narema’a kakanan jareya dhari Pottrana Manossa, sabab Pottrana Manossa jareya la elanti’ bi’ Allah Rama."

²⁸ Reng-oreng jareya laju atanya ka Isa, "Ponapa se elakonana abdina sopaja kengenga ajalannagi kasokanna Allah?"

²⁹ Dhabuna Isa, "Se daddi kasokanna Allah iya areya sopaja ba’na parcaja’a ka Salerana se eotos Allah."

³⁰ "Manabi saka’dhinto," ca’na atorra reng-oreng jareya, "ponapa bukte se eduduwagiya Panjennengngan me’ olle abdina sadaja parcaja ka Panjennengngan? Ponapa se elampa’agiya Panjennengngan?

³¹ Bangatowa abdina sadaja adha’ar manna e ra-ara, kadi se ampon esebbuttagi e dhalem Alketab, ‘Allah apareng roti dhari sowarga se ekakana reng-oreng jareya.’"

³² Isa laju adhabu ka reng-oreng jareya, "Paparcaja, ya: Banne Mosa, tape Tang Rama se apareng ka ba’na roti se saongguna dhari sowarga.

³³ Sabab roti paparengnga Allah iya areya Salerana se toron dhari sowarga ban apareng odhi’ ka manossa e dunnya reya."

³⁴ "Pa’," ca’na atorra reng-oreng jareya, "ngereng abdina sadaja parenge roti gapaneka salanjangnga."

³⁵ "Sengko’ reya Roti se aberri’ kaodhi’an," dhabuna Isa ka reng-oreng jareya. "Oreng se nyander ka Sengko’ ta’ kera lapar salanjangnga. Ban oreng se parcaja ka Sengko’ ta’ kera pelka’ salanjangnga."

³⁶ "Tape akantha se la ekoca’agi Sengko’ ka ba’na, maske ba’na nangale’e Sengko’, ba’na ta’ parcaja.

³⁷ Sengko’ ta’ nolaga sapa’a bai se nyander ka Sengko’.

³⁸ Sabab Sengko’ toron dhari sowarga, banne polana ajalannagiya Tang karep dibi’, tape ajalannagiya kasokanna Salerana se ngotos Sengko’.

³⁹ Dineng kasokanna Salerana se ngotos Sengko’ jareya iya areya: sopaja sakabbiyanna oreng se eparengngagi ka Sengko’ ja’ sampe’ badha settonga se elang; tape sopaja Sengko’ maodhi’ pole reng-oreng jareya e Are Keyamat.

⁴⁰ Sabab se daddi kasokanna Tang Rama iya areya: Sopaja sakabbiyanna oreng se la nangale’e Pottrana Allah ban parcaja ka Salerana andhi’ odhi’ se saongguna ban langgeng. Ban bi’ Sengko’ epaodhi’a pole e Are Keyamat."

⁴¹ Reng-oreng Yahudi molae pek-ngacepek ka Isa, sabab Isa adhabu: "Sengko’ reya roti se toron dhari sowarga".

⁴² Ca’na reng-oreng jareya, "Jarowa gu ta’ Isa, ana’na Yusup ta’ iya? Sengko’ kennal ka rama ebuna! Baramma me’ pas ngoca’ ja’ aba’na toron dhari sowarga?"

⁴³ Isa laju adhabu ka reng-oreng jareya, "Ella ja’ pek-ngacepek terros.

⁴⁴ Tadha’ oreng se bisa nyander ka Sengko’, kajabana ebakta ka Sengko’ bi’ Rama se ngotos Sengko’; ban sapa se nyander ka Sengko’ jareya bi’ Sengko’ epaodhi’a pole e Are Keyamat.

⁴⁵ E dhalem Ketab Bi-nabbi esebbuttagi kantha reya, ‘Sakabbiyanna oreng bakal eburuga bi’ Allah.’ Daddi sakabbiyanna oreng se ngedhing dhabuna Rama ban olle pangajaran dhari Salerana, nyander ka Sengko’.

⁴⁶ Maksod Sengko’ banne nerrangngagiya ja’ badha oreng se la nangale’e Rama. Coma Salerana se asalla dhari Allah se la nangale’e Rama.

⁴⁷ Ba’na ebala’ana, ya: Oreng se parcaja, andhi’ odhi’ se saongguna tor langgeng.

⁴⁸ Sengko’ reya roti se aberri’ kaodhi’an.

⁴⁹ Bangatowana ba’na ngakan manna e ra-ara tape padha mate keya.

⁵⁰ Tape roti se toron dhari sowarga ta’ kantha jareya; oreng se ngakan roti jareya ta’ kera mate.

⁵¹ Sengko’ reya roti se toron dhari sowarga — roti se aberri’ kaodhi’an. Oreng se ngakan roti reya bakal odhi’a salanjangnga. Roti se bi’ Sengko’ ebagiya kaangguy odhi’na manossa e dunnya reya iya areya Tang daging."

⁵² Ngedhing parkara jareya, reng-oreng Yahudi se badha e jadhiya laju padha apadu sampe’ ramme. "Baramma oreng reya se bisa’a aberri’ dagingnga se esorowa kakan ka sengko’ ban ba’na?" ca’na reng-oreng jareya.

⁵³ Isa adhabu ka reng-oreng jareya, "Paparcaja, ya. Mon ba’na ta’ ngakan dagingnga Pottrana Manossa ban ta’ ngenom dharana, ba’na ta’ kera odhi’ ongguwan.

⁵⁴ Oreng se ngakan Tang daging ban ngenom Tang dhara, andhi’ odhi’ se saongguna tor langgeng; sarta’anna bi’ Sengko’ epajaga’a pole e Are Keyamat.

⁵⁵ Sabab Tang daging reya kakanan onggu ban Tang dhara nom-enoman onggu.

⁵⁶ Sapa se ngakan Tang daging ban ngenom Tang dhara daddi settong bi’ Sengko’, ban Sengko’ bi’ aba’na.

⁵⁷ Rama se odhi’ rowa ngotos Sengko’, ban Sengko’ reya odhi’ dhari Rama keya. Bariya keya sapa se ngakan Tang daging bakal odhi’a dhari Sengko’.

⁵⁸ Areya’ roti se toron dhari sowarga: banne roti akantha se ekakan bangatowana ba’na. Sabab saellana ngakan roti jareya bangatowana ba’na mate keya. Tape oreng se ngakan roti reya bakal odhi’a salanjangnga."

⁵⁹ Jareya kabbi edhabuwagi Isa e bakto Salerana morok e kennengnganna kabakteyan e Kapernaum.

⁶⁰ Saellana ngedhing dhabuna Isa se kantha jareya, bannya’ moredda se padha ngoca’, "Pangajaran reya taberra’ gallu. Sapa se bisa’a narema!"

⁶¹ Isa dibi’ ngagali ja’ red-moredda ngacepek parkara jareya. Daddi laju adhabu, "Apa polana Tang ca’-oca’ jareya ba’na ta’ noro’a Sengko’ pole?

⁶² Baramma mon ompamana ba’na dhaggi’ nangale’e Pottrana Manossa ongga abali ka kalenggiyanna se asal?

⁶³ Se maodhi’ manossa iya areya Errohna Allah. Kakowadanna manossa dibi’ tadha’ gunana. Pa-apa se ekoca’agi Sengko’ reya dhabuna Errohna Allah se aberri’ kaodhi’an.

⁶⁴ Tape gi’ badha e antarana ba’na se ta’ parcaja." (Dhari dha’-adha’na Isa la ngagali pa-sapa se ta’ endha’ parcaja ban sapa se bakal akiyanat ka Salerana.)

⁶⁵ Isa laju adhabu pole, "Jareya sababba arapa Sengko’ me’ ngoca’ ka ba’na ja’ ta’ kera badha oreng settonga se nyander ka Sengko’ mon banne kasokanna Rama."

⁶⁶ Molae dhari jareya bannya’ moredda Isa se ta’ endha’ ngereng Isa pole.

⁶⁷ Isa laju mareksane ka moredda se dhubellas, "Apa ba’na ta’ nyengga’a keya?"

⁶⁸ "Guste," ca’na atorra Petrus, "Nyengga’a ka pasera abdidalem? Dhabuepon Junandalem apareng kaodhi’an se saongguna sareng se langgeng.

⁶⁹ Abdina ampon parcaja sareng yakin Junandalem ka’dhinto’ otosan se socce dhari Allah."

⁷⁰ Isa adhabu, "Gu ta’ Sengko’ se mele ba’na se dhubellas oreng reya, ta’ iya? Tape settong e antarana ba’na erroh jahat!"

⁷¹ Se emaksod Isa iya areya Yudas ana’na Simon Iskariyot. Sabab maske Yudas reya tamaso’ sala settong dhari moredda Isa se dhubellas, tape Yudas jareya se akiyanada ka Isa.

Yohanes

Video Yohanes 6

Ikuti Kami:

KONTAK | PARTISIPASI | DONASI