Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkai joo malemi Puang Isa lian sambali'na Tasik Galilea to disanga too Tasik Tiberias.

² Gaja buda tau mpeundii, sanga nakitamo to tanda mejangngaran napaden ke mpamalagahhi tomasaki.

³ Anna endek de' buntu-buntu Puang Isa, nacumadokko jao sola anak gurun-Na.

⁴ Ia joo wattu madoi'mo nadete' to pangrameanna to-Yahudi disanga pangramean Paskah.

⁵ Mengkita mengguririkmi Puang Isa nasiassa'-assa' bangmi to tau ratu lako Ia, mangkadami lako Filipus nakua, "Umbomo la dinii nnalli kande nawa'ding kumande ngasan tee tau?"

⁶ Sitonganna naissenmo Puang Isa to apa la napugauk, apa naanggai'ra mangkada susi joo, nasaba' madoangngi nnuji kamatapparanna Filipus.

⁷ Mebalii Filipus nakua, "Na moi dua ratuh dinar diallian roti tee tau pada budanna, te'dapa nalaganna' moi naditawai sisangti'pekra."

⁸ Den mesa' anak gurun-Na Puang Isa disanga Andreas, sile'tona Simon Petrus, mangkada nakua,

⁹ "Inde' to pea muane mbawa lima roti na dua bale, apa la siagiraka nakande tee tau pada budanna?"

¹⁰ Nakua Puang Isa, "Suai tuu mati' tau nacumadokko." Jaji cumadokkomi joo tobuda mpennampah reu, sanga buda reu jio. Agi-agi den limang sa'bu tau ke muane manda dibilang.

¹¹ Naalai Puang Isa joo roti, namangkurru sumanga' lako Puang Allataala. Mangkai joo natawa-tawanmi tobuda joo roti, namane' ntawa-tawan tooi joo bale, nakumande to tau sabarahna.

¹² Ia tonna barahmo to tau, nakuamo Puang Isa lako anak gurun-Na, "Rempunni to torrona, danggi' nasajang."

¹³ Napasirempunni naden sangpulo dua baku' ponno to torrona joo lima roti nakande tobuda.

¹⁴ Ia tonna kitami tobuda joo tanda mejangngaran napaden Puang Isa, nakuamo, "Ia tonganmo tee to nabi napau Puang Allataala tonna anu' la ratu tama lino."

¹⁵ Naissen Puang Isa kumua la ratui joo tobuda la mparukui menjaji rajana. Iamo joo namale messarak de' buntu.

¹⁶ Ia tonna la bongimo malemi do' randan tasik to anak gurun-Na Puang Isa.

¹⁷ Malillinmi na te'da unapa naratu to Puang Isa lako to nanii anak gurun-Na, iamo joo naendek de' lopi to anak gurun-Na, nalamban mangnguju lian kota Kapernaum.

¹⁸ Mangpamulami to bombang, sanga mangngiri'mi to angin bara'.

¹⁹ Agimo lima iarika annan kilo nanii manglopi, mane'ri ngkitai to Puang Isa lumingka jao wai mpendete'i to lopinna, anna silajatan to anak gurun-Na.

²⁰ Apa nakua Puang Isa ngkuanni, "Ee, danggi' mimalaja'! Aku' tee."

²¹ Ia tonna sa'dingmi anak gurun-Na to gamaran-Na, masannangmi ntarimai napaendekki de' lopi, nata'pa ratumo lako randan tasik to napangngujui.

²² Masawanna joo too, naissenmi tobuda to torropa sambali'na tasik kumua mesa'ra to lopi jio, namalemi napake anak gurun-Na Puang Isa, apa te'da namale Puang Isa.

²³ Apa ia joo wattu denmi ba'tu pira-pira lopi ratu jio mai kota Tiberias nakenden sikandoppi' to nanii mangka ngkurru sumanga' roti Puang Isa nakande tobuda.

²⁴ Ia tonna kitami tobuda kumua te'damo Puang Isa jio, na moi toda anak gurun-Na, endek todami de' joo lopi namale lako kota Kapernaum nnangah Puang Isa.

²⁵ Ia tonna ampa'mi tobuda to Puang Isa jio sambali'na tasik, mekutanami lako nakua, "Oo Guru, piranra taratu inde'?"

²⁶ Mebalimi Puang Isa nakua, "La miingaran tee kadang-Ku' kumua, iara miangahna', sanga barahmo kamu' mangka ngkande roti, tangngia nasaba' miissenni apa battuananna joo tanda mejangngaran kupugauk.

²⁷ Danggi' mimangjama nnangahhi to kande la cappu' ba'tu buruk. Apa iara miangah to kande te'da nalaburuk, to la mben kamu' katuoan melo te'da cappa'na. Ia joo kande, iamo to la kuben kamu' Aku', Anak Mentolino, sanga mangka napangpeissenan Ambe'-Ku' Puang Allataala kumua natarimana'."

²⁸ Mekutana omi lako Puang Isa nakua, "Apara nakadoangngi Puang Allataala la kipugauk?"

²⁹ Mebalii Puang Isa nakua, "Iamo tee to nakadoangngi Puang Allataala jio mai kalemi: la matappa' kamu' lako kale-Ku' kumua Aku'mo to nasua Puang Allataala."

³⁰ Mekutana pole' omi lako Puang Isa nakua, "Ia ke susii tuu, tanda apara tapugauk kikitai, angkiwa'ding ngkatappa'iki'? Apara la tapugauk?

³¹ Ia to tojolota' mangka ngkande kande disanga manna jio padang pallawangan, susi to diuki' lan Sura' Allataala kumua, 'Nabenni kande jao mai suruga nakandei.'"

³² Nakua Puang Isa ngkuanni, "La miingaran tee kadang-Ku' kumua, tangngia Nabi Musa tonna anu' to mben kamu' kande jao mai suruga, apa Ambe'-Ku' Ia to mben kamu' kande tongan jao mai suruga.

³³ Na ia to kande napangben Puang Allataala, Aku'mo to mellao jao mai suruga, na mpangben katuoan melo te'da cappa'na lako tolino."

³⁴ Nakua omo tuu lako tau ngkuanni, "Oo Puang, taben punalakan joo kande."

³⁵ Nakua omo Puang Isa, "Aku'mo kande to mben katuoan tolino. Ia to toratu lako Aku', te'da tarruhmo nalatangbarah. Ia to tomatappa' lako Aku', te'da tarruh toomo nalamawakke.

³⁶ Apa mangkamo kamu' kukuan, 'Moi mikitamo, te'da mimatappa'.'

³⁷ Sininna to tonapangben Ambe' lako Aku', iamo la ratu lako kale-Ku'. Na moi inda ke ratumi, te'da kutanglantarimai.

³⁸ Sanga mellaona' jao mai suruga, tangngia kumua pakkaeloran-Ku' la kupugauk, apa pakkaeloran-Na Ambe'-Ku' to ssuana'.

³⁹ Iamo tee pakkaeloran-Na to Ambe' to kumua sininna to tau nabenmo', moi mesa' te'da nalamasolang, apa la kupatuo pole' ke Kiama'mi lino.

⁴⁰ Na pakkaeloran-Na too, to kumua ia to tonnissenmi kumua Aku'mo Anak Allataala nakatappa'ina', la ntarima katuoan melo te'da cappa'na, na la kupatuo pole' ke Kiama'mi lino."

⁴¹ Sipangnuku-nukuanni to to-Yahudi lako Puang Isa, sanga ia to nakua, "Aku'mo kande to mangka mellao jao mai suruga."

⁴² Pada nakuamo, "Ah, Iamo Puang Isa to anakkana Yusuf. Kiissen to tomatuan-Na! Matumbai nawa'ding kumua, 'Mellaona' jao mai suruga?'"

⁴³ Nakua Puang Isa ngkuanni, "Danggi' misipangnuku-nukuan.

⁴⁴ Moi mesa' tau te'da ngkullei ratu lako Aku', ke te'da na Ambe'-Ku' to ssuana' mpupembalikki to penawanna. Na ia to toratu lako Aku', la kupatuo pole' ke Kiama'mi lino.

⁴⁵ Den diuki' lan sura'na nabi kumua, 'La napaggurui Puang Allataala sininna joo tau.' Iamo joo ia to tompesa'dingngi Ambe', la ratu lako Aku'.

⁴⁶ Ia joo tangngia battuananna kumua denmo tau mangka ngkita Ambe'-Ku', saliwanna mane' Aku' mandara, to pole jio mai Puang Allataala.

⁴⁷ La miingaran tee kadang-Ku' kumua, ia to tomatappa' nnampuimo katuoan melo te'da cappa'na.

⁴⁸ Aku'mo kande to mpatuo tau.

⁴⁹ Mangkamo to tojolomi ngkande kande disanga manna tonna anu' jio padang pallawangan, namate unai.

⁵⁰ Apa te'da nasusi joo to kande mellao jao mai suruga. Ia to tongkandei joo kande, te'damo nalamate.

⁵¹ Aku'mo kande to mellao jao mai suruga, kande to naputuo tau. Ia to tongkandei tee kande, la tuo tarruhhi. Ia to kande la kuben tau lan lino naputuoi, iamo tee batang kale-Ku'."

⁵² Ia tonna sa'dingngi to-Yahudi joo kadan-Na, napada ia sipekka nakua, "Umbo nakua tee tau wa'ding la mbenki' batang kale-Na takande?"

⁵³ Iamo joo nakua Puang Isa ngkuanni, "La mikatappa'i kumua, ia ke te'da mikandei to batang kale-Ku' na te'da miiso'i to rara-Ku' Aku', Anak Mentolino, te'da miampui katuoan tongan.

⁵⁴ Ia to tongkande batang kale-Ku' sola tonniso' rara-Ku', iamo to nnampui katuoan melo te'da cappa'na na la kupatuo pole' ke Kiama'mi lino.

⁵⁵ Nasaba' ia to batang kale-Ku', iamo kande tongan, na ia to rara-Ku', iamo apa diiso' tongan.

⁵⁶ Na ia to tongkande batang kale-Ku' na nniso' rara-Ku', da'tanni memmesa' sola Aku' na Aku' toda memmesa' sola ia.

⁵⁷ Ia to Ambe'-Ku' to ssuana', Iamo naputuo tau. Susi Aku' tuo jio mai kale-Na, susi toomi to tongkande batang kale-Ku', la tuo jioi mai kale-Ku'.

⁵⁸ Mangkamo nakande tojolomi to kande disanga manna, namate unai. Apa ia to tongkandei tee kande kubenni, te'damo nalamate, apa la tuo tarruhmo, sanga Aku'mo tee to kande mellao jao mai suruga."

⁵⁹ Ia ngasanmo tee napau Puang Isa tonna mangngajahhi lan bola passambajangan jio kota Kapernaum.

⁶⁰ Ia tonna mangkamo to tobuda ssa'dingngi joo kadan-Na Puang Isa, budai to tonturu'i kumua, "Ah, gaja sussa tee pangngajah, na indara ia la ntarimai!"

⁶¹ Naissen Puang Isa kumua sipangnuku-nukuanni tuu lako tau nakuanni, "Misa'dinganraka tee kadang-Ku'?

⁶² Na umbomo susi jajinna ke mikitana' Aku', Anak Mentolino, endek pole' de' ngenan jolo-Ku'!

⁶³ Roh Allataala to naputuo tau. Te'da lalo pakullena to tolino. Ia tee kada kupauan kamu', iamo kadan-Na Roh Allataala to mpangben katuoan.

⁶⁴ Apa den unapa kamu' to te'dapa mimatappa'." Naissen jolomo Puang Isa kumua indara to la cia' ngkatappa'ii, sola indara to la mpangpejokkoanni.

⁶⁵ Nakua Puang Isa, "Iamo joo mangkamo kamu' kukuan, 'Moi mesa' tau te'da nakullei ratu lako Aku', ke te'da napuelohhi Ambe'-Ku'.'"

⁶⁶ Mammula joo wattu buda tau mboko'i pole'i, na cia'mo nturu'i.

⁶⁷ Mekutanami Puang Isa lako to sangpulo dua anak gurun-Na nakua, "La male todamora kamu'ka ssalaina'?"

⁶⁸ Mebalimi Simon Petrus nakua, "Oo Puang, inda opara la kinii male? Na Kita' mandara to mpau kada mpangben katuoan melo te'da cappa'na.

⁶⁹ Matappa'mokan na kiissenmo kumua Kita'mo to pesua mattantun-Na Puang Allataala."

⁷⁰ Mebalimi Puang Isa nakua, "Aku'ra to mpilei kamu' tee tau sangpulo dua. Apa den mesa' tonatamai setang lan tangnga-tangngami."

⁷¹ Ia to nasanga Puang Isa, iamo joo Yudas anakkana Simon Iskariot. Sanga moi na ia joo Yudas sala mesa'na jio mai to sangpulo dua anak gurun-Na, apa iamo la mpangpejokkoanni.

Yohanes

Video Yohanes 6

Ikuti Kami:

KONTAK | PARTISIPASI | DONASI