Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'iduanga de 'o Yesus ma moiosi womasidumutu 'awi do-domoteika 'o Tiberias ma talaga ma batingoka. Koneda 'idadi:

² Ma moi ge'ena 'o Simon Petrus, 'o Tomas gee wisironga 'o Sago, 'o Natanael 'o Kana ma soanino 'o Galileaka, 'o Zebedeus 'awi ngowa-ngowaka, de 'o Yesus 'awi do-domoteke 'iregu yamididi yomalomuno.

³ De 'o Simon Petrus kawongosekau 'onaka, "Ngoi tomau totagi 'o naoko totagoko." 'Ona kayongosekau, "Ngomi ma miomoteke." So 'ona yotagi 'o ngo'otiruku yoparene. Ma 'o obiri moi ge'ena 'ona ko 'okia-kiawa.

⁴ Gee 'o wange 'ikurue 'ibaoro de 'o Yesus woma'okode 'o talaga ma batingoka, ma 'ona kowinakowa 'ato 'una ge'ena 'o Yesus.

⁵ 'O Yesus kawongosekau 'onaka, "'Esa moi, ngini de nia naokoka?" 'Ona yosango, "Koi'iwa."

⁶ 'O Yesus kawongosekau, "'Ania soma nia'umo nia ngo'otiri ma ginirauku. Ngini 'asa nimadamake 'o naoko." Ge'enaka de manga soma ge'ena ya'umo, duga gee ya'umoku de koya'akunuawau yatobaka sababu ma naoko kage'enau ma gudaioka ma soma ma dodaka.

⁷ 'O do-domoteke gee 'o Yesus wisiboso-bosono de yogiamanai ma sala kawongosekau 'o Petrusika, "Dokauda ge'ena ma Jou!" 'O Simon Petrus wo'isenoka 'ato gu'una ma Jou, de womabaju (sababu 'una kowomabajukuwa) de womatebulu 'o 'akeruku wosikaisa 'o dudungisa.

⁸ 'O do-domoteke 'iregu-regu yotu'uru 'o dudungisa 'o ngo'otiruku ma de ma soma yotobaka ma naoko 'i'oma-'omanga. 'Ona 'o dudungoka 'ena koikurutokowa, poilia 'o meteri 'o ratusu moioko.

⁹ Gee 'ona yo'uti 'o dudungisa, de yamake 'o 'uku ma ngaboso ge'enaka de ma dekuoka 'o naoko de 'o roti.

¹⁰ 'O Yesus kawongosekau 'onaka, "Bika nia'asano 'o naoko 'o ngai muruoni gee 'asa kaniatagokino."

¹¹ 'O Simon Petrus woparene 'o ngo'otirie de watobaka ma soma ge'ena 'o dudungisa. Ma soma ge'ena 'o naoko ya'oma-'omanga 'iodumu kaila-laagomo, 'o ngodumu ratusu moi de 'o nagi motoa de sa'angeka. De ngaro koge'ena ma gudaioka, 'o soma ge'ena koi'etonguwa.

¹² 'O Yesus kawongosekau 'onaka, "Nou po'odomo." 'O do-domoteke go'ona komoiwa yomoroini yosano 'unaka, "'Aba ngona nagu'una?" Sababu 'ona yanakokau 'ato 'una ma Jou.

¹³ Ge'enaka de 'o Yesus womasisori 'onaka wa'ese 'o roti ge'ena de wakikula 'onaka. 'O naoko mita koge'enali wadiai.

¹⁴ Ne'ena ge'ena ma warasa ma sa'ange 'o Yesus womasidumutu 'awi do-domoteika, gedagee 'una wisimomikokali wosongenukou de.

¹⁵ Yo'odomo yaduangino de 'o Yesus kawongosekau 'o Simon Petrusika, "Ee Simon 'o Yohanes 'awi ngowaka, ngona de 'ona ne'ena, ngona? 'ifoloi noisibosono?" 'O Petrus wosango, "Ma goungu Jou. Jou ngona nanako ngoi tonisibosono ngona." 'O Yesus wosango, "Nakisowohi 'o nyawa gee 'ingaku-ngaku ngoi, matero ka 'o domba yoso-sowohi yojaga manga domba."

¹⁶ Ma warasa ma modidi 'o Yesus wongose 'o Petrusika, "Ee Simon 'o Yohanes 'awi ngowaka, ngona noisibosono ngoi?" 'O Petrus wosango, "Ma goungu Jou. Jou ngona nanako ngoi tonisibosono." 'O Yesus kawongosekau 'unaka, "Nakisowohi 'o nyawa gee 'ingaku-ngaku ngoi, matero ka 'o domba yoso-sowohi yojaga manga domba."

¹⁷ Ma warasa ma sa'ange 'o Yesus wongose 'unaka, "Ee Simon 'o Yohanes 'awi ngowaka, ngona noisibosono ngoi?" 'O Petrus 'awi singina 'isusa sababu 'o Yesus wosano 'unaka sigado ma sa'ange. So 'o Petrus wosangoli, "Jou, ngona nanako 'okia sonaa 'iodumu. Ngona nanako ngoi tonisibosono ngona Jou!" Ge'enaka de 'o Yesus kawongosekau 'unaka, "Nakisowohi 'o nyawa 'ingaku-ngaku ngoi, matero ka 'o domba yoso-sowohi yojaga manga domba.

¹⁸ Ma gou-goungu 'itiai 'ai demo ne'ena: Ma 'orasi ngona ka 'o dogu'urunosi, ngona ma sirete 'ani gorona nabulu, de kiaka naga bato notagi moteke to ngona 'ani mau. Ma dua nako ngona noperekikou, ngona 'ani giama nodukulaka, de 'o nyawa 'iregu nipusuku de ni'asa kiaka naga gee ngona nooluika."

¹⁹ ('O Yesus koge'ena wongose ge'ena wosidumutu kokia dua 'o Petrus wosongene, ma ngale wisitedene ma Jo'oungu ma Dutu.) Ge'ena 'iduanga de 'o Yesus kawongosekau 'o Petrusika, "Tatapu noimoteke ngoi!"

²⁰ Gedagee 'o Petrus womadutumu 'awi dudunoko de wimake 'o do-domoteke gee 'o Yesus wisiboso-bosono de yogiamanai ma sala. ('Unau ge'ena gee 'o 'orasi 'ipasa-pasa yomakadateuku de 'o Yesus ma 'orasi yo'odomo, de gee wosano 'o Yesusika 'ato, "Jou, nago'ona dua niwukunu?")

²¹ Wimakeka de 'o Petrus kawosanokau 'o Yesusika, "Jou kokia nanuda?"

²² 'O Yesus wosango, "Nako kogee ngoi tomau 'una kawo'ahu-'ahu sigado ngoi toboali, ge'ena ko to ngonawa 'ani 'aturu. Ma ngona tatapu noimoteke ngoi!"

²³ So ma habari ge'ena 'o do-domoteke yokoki'isenokau 'ato 'o do-domoteke gu'una dua kowosongenuwa. 'Ena momongo 'o Yesus kowongosewa 'ato 'o do-domoteke gu'una dua kowosongenuwa, ma 'ena wongose 'ato, "Nako kogee ngoi tomau 'una kawo'ahu-'ahu sigado ngoi toboali, ge'ena ko to ngonawa 'ani 'aturu."

²⁴ 'O Yesus 'awi do-domoteke gu'unau gee wosisa-sakisii 'iodumu ne'ena. De 'unau mita wotulisi ne'ena. De ngone poodumu panako 'okia naga wongose ge'ena ma goungu 'itiai.

²⁵ 'Okia sonaa 'iregu-regu 'o gudaiosi gee 'o Yesus wokadi-diai. Nako kogee 'iodumu ge'ena patulisi pamoi-moi, ngoi tamao 'o duniaka ne'ena kayapailoka 'isidaoto ma buku gee dua 'ituli-tulisuku ge'ena.

Yohanes

Video Yohanes 21

Ikuti Kami:

KONTAK | PARTISIPASI | DONASI