Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Aefa da'õ ifuli Iforoma'õ Ia Yesu samuza tõ khõ ndra nifahaõ-Nia ba mbaw̃a Diberia. Si mane wangoroma'õ-Nia Ya'ia:

² Samuza ma'õkhõ owulo ndra Simoni Fetero ba Toma nifotõi si Faero, ba Natanaeli moroi ba Kana ba danõ Galilea, iraono Zebedai'o, awõ darua tõ nifahaõ Yesu tanõ bõ'õ.

³ Imane Simoni Fetero ba danõ bõ'õ andrõ, "Mõi ndra'o manga'i i'a." Lamane tanõ bõ'õ khõnia, "Fao gõi ndra'aga." Mofanõ ira, momõi yaw̃a ba dundraha. Ba hiza sara wongi lõ ahulu ira, sara i'a lõ lasõndra.

⁴ Me ibõrõtaigõ tumbu luo, tohare Yesu, no Ilau muzizio ba gawu; ba hiza lõ la'ila wa Yesu da'õ.

⁵ Imane khõra Yesu, "He iraono, hadia so khõmi gi'a?" Latema li, lamane, "Lõ'õ."

⁶ Imane khõra Yesu, "Milau ndrialami tanõ ba gambõlõ dundraha, ba misõndra dania gi'a." Lalau ndrialara ba nidanõ, ba hiza tebai ira wondrõni mangawuli bõrõ wa'oya gi'a bakha ba ndriala.

⁷ Imane nifahaõ ni'omasi'õ Yesu andrõ khõ Wetero, "Hiza Zo'aya!" Me irongo Fetero wanguma'õ, "Hiza Zo'aya!", i'anema'õ ifake mbarunia sebua mangawuli (bõrõ me no iheta mbaru sebua andrõ khõnia) ifazaumba ia bakha ba nidanõ.

⁸ La'o'õ ia ira nifahaõ bõ'õ faoma tundraha numalõ ba danõ, awõ wa ladõni ndriala andrõ safõnu i'a. Lõ arõu i'otarai danõ so ira, ha mato otu mete.

⁹ Me mõi ira tou moroi ba dundraha, la'ila galitõ awõ gi'a yaw̃a; ba so gõi roti ba da'õ.

¹⁰ Imane khõra Yesu, "Mi'ohe ba da'e mato ha'uga rozi gi'a nisõndrami."

¹¹ Numalõ ba dundraha Zimoni, ba idõni ndriala yaw̃a ba danõ. Afõnu ndriala andrõ i'a segesolo; otu a lima wulu a tõlu rozi wa'oya fefu. Ba hew̃a'ae oya gi'a andrõ, ba lõ asika ndriala.

¹² Imane khõra Yesu, "Mi'aine manga ita." Ba samõsa lõ si barani ba gotalua ndra nifahaõ wanofu khõ-Nia, "Haniha Ndra'ugõ andre, Ama?" Bõrõ me no la'ila Ia wa So'aya.

¹³ Ihatõ'õ Ia khõra Yesu ba Ihalõ roti andrõ, ba Ibe'e khõra. Si manõ gõi wolau-Nia ba gi'a andrõ.

¹⁴ Da'e zi medõlu kali I'oroma'õ Ia Yesu khõ ndra nifahaõ-Nia me no auri Ia mangawuli moroi ba wa'amate.

¹⁵ Me no aefa manga ira, Imane Yesu khõ Zimoni Fetero, "He Simoni ono Yohane, hadia abõlõ omasi ndra'ugõ Ndra'o moroi ba niha andre?" Itema li Fetero imane, "Ya'ia, So'aya. Õ'ila wa u'omasi'õ Ndra'ugõ." Imane khõnia Yesu, "Kubaloi mbiribiri-Gu."

¹⁶ Ifuli Isofu khõnia Yesu no mendrua kali, "He Simoni ono Yohane, hadia õ'omasi'õ Ndra'o?" Imane Fetero, "Ya'ia So'aya. Õ'ila wa u'omasi'õ Ndra'ugõ." Imane khõnia Yesu, "Kubaloi mbiribiri-Gu."

¹⁷ Ba zi medõlu kali Isofu khõnia Yesu, "He Simoni ono Yohane, hadia omasi'õ Ndra'o?" Ifuli zui itema li Fetero, "He So'aya, no Õ'ila fefu hadia ia. Õ'ila wa u'omasi'õ Ndra'ugõ!" Imane Yesu khõ Wetero, "Kubaloi mbiribiri-Gu.

¹⁸ Sindruhundruhu niw̃a'õ-Gu khõu: Me ono matua na ndra'ugõ, ba ya'ugõ zama'anõ ya'ugõ ba numalõ ndra'ugõ ba zomasi'õ. Ba hiza na no atua ndra'ugõ dania, ba õ'oro'õ dangau wangandrõ tolo ba niha bõ'õ wama'anõ ya'ugõ ba ba wolohe ya'ugõ ba nahia si lõ omasi'õ."

¹⁹ (Faoma fehede andrõ I'oroma'õ Yesu hewisa wa'amate Wetero dania ba wamolakhõmi Lowalangi.) Aefa da'õ Imane Yesu khõ Wetero, "Tabu o'õ Ndra'o!"

²⁰ Me ifakhõlõ ia Fetero, i'ila moroi furi nifahaõ ni'omasi'õ Yesu. (Ya'ia andrõ zi dadao ba zinga Yesu me manga ira, sanofu khõ Yesu, "He So'aya, haniha zi manga mbõli Zo'aya?")

²¹ Me i'ila nifahaõ andrõ Fetero, isofu Fetero khõ Yesu, "He So'aya, hewisa dania niha andre?"

²² Itema li Yesu Imane, "Na omasido auri ia irugi mangawuli Ndra'o, hana õhalõ fõkhõ hõgõu da'õ. O'õ manõ Ndra'odo!"

²³ Tobali tehõngõ duria ba gotalua ndra nifahaõ Yesu wa lõ mate dania nifahaõ andrõ. Ba hiza sindruhunia tenga da'õ niw̃a'õ Yesu wa lõ mate dania nifahaõ andrõ; Da'e niw̃a'õ Yesu: "Na omasido auri ia irugi mangawuli Ndra'o, hana wa õhalõ fõkhõ hõgõu!"

²⁴ Nifahaõ andrõ zamaduhu'õ fefu salua andrõ. Ya'ia gõi zanura. Ba aboto ba dõdõda wa sindruhu niw̃a'õnia andrõ.

²⁵ Oya nasa ngawalõ nilau Yesu. Ba na muzarazara fanura, uw̃a'õ tõdõgu ambõ zi sagõrõ ulidanõ andre nahia mbukubuku nisura andrõ.

Yohanes

Video Yohanes 21

Ikuti Kami:

KONTAK | PARTISIPASI | DONASI