Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Roo indo, Yesu mopatongawa wataNa hambela mani i topeguruNa, i wiwi Rano Tiberias. Node tuntukana:

² Bahangkia topeguruNa moguluhe inditi, iami Simo Peturu, Tomas au rauli Toporopa, Natanael hangko i boea Kana i tampo Galilea, anana Sebedeus au rodua, hai rodua topeguruNa au ntanina.

³ Nauli Simo Peturu i rangana: "Laona modala." Rauli rangana: "Lao woringkai." Lao mpuumohe mesawi i duanga hai modala i rano. Agayana i lalu hambengia iti, bara huba hambaa au kana dalanda.

⁴ Hungku mabaami, Yesu meangka i wiwi rano, agayana barahe moisa kaYesuna.

⁵ Nauliangaahe: "Halalu, ba ara baumi?" Rauli: "Bara huba hambaa."

⁶ Nauliangaahe: "Nitende dalami tanda i koanana duangami, batena ina morasikau." Motende mpuumohe dalanda, hai barapi rabuku modii, lawi ngkaya ntepuu ikane au ara i laluna.

⁷ Hangko inditi, topeguruNa au napokakaya Yesu mouliangaa Peturu: "Olou mai Pue!" Kanahadina Peturu lolitana, napusami baduna (lawi ia bara mebadu), hai mengkanawo i owai monangu lao i lorena.

⁸ TopeguruNa au ntanina, liliuhe i duanga, modii dala au buke ikane lao i wiwi rano. Barahe karao hangko i lorena, kira-kira hangatu pea mete.

⁹ Kamendaulunda i lorena, moitamohe api au tuwo inditi, hai i wongko api ara ikane hai ara wori roti.

¹⁰ Yesu mouliangaahe: "Anti mai bahangkia baana ikane au hangko nipakala."

¹¹ Simo Peturu mengkahemi i duanga hai modii dalana lao i lorena. Dala iti buke hai ikane au mahile: hangatu lima pulona hai talu baana kangkayana. Agayana nauri nodo kangkayana, bara wori mahepa dala iti.

¹² Nauli Yesu: "Maimokau maande." Bara ara hadua topeguruNa au bai mekune Iria: "HemaKo?" lawi manotomi i lalunda kaIanato Pue Yesu.

¹³ Laomi Yesu mangala roti hai Naweihe. Nodo wori kaNababehina hai ikane.

¹⁴ Itimi kataluna belana Pue Yesu mopatongawa wataNa i topeguruNa mepongka i katuwoNa hule.

¹⁵ Karoonda maande, Yesu mouliangaa Simo Peturu: "Simo anana Yona, ba nupokaahiNa meliu hangko i pepokaahinda rangamu iti Iriko?" Nauli Peturu: "Io, Pue. Nuisato kakupokaahiMu." Nauli Yesu: "Ane nodo, nukadipurahe ana dimbaKu."

¹⁶ Roo indo, Yesu mekunemi i Peturu i karombelana: "Simo, anana Yona, ba nupokaahiNa?" Nauli Peturu: "Io, Pue. Nuisato kakupokaahiMu." Nauli Yesu: "Ane nodo, nukadipurahe dimbaKu."

¹⁷ Hangko inditi, Yesu mekunemi i kataluna belana: "Simo, anana Yona, ba nupokaahiNa?" Masusa laluna Peturu, lawi Yesu mekune i kataluna belana ba napokaahi mpuu. Mewali, nauli Peturu: "Pue, Nuisa hinangkana. Nuisa kakupokaahiMu." Nauli Yesu: "Ane nodo, nukadipurahe dimbaKu.

¹⁸ Tou mpuu lolitaNgku ide: i tempomu mani mangura, nuwewe komo i pekomu, hai laoko iumba pea peundeamu. Agayana ane saemoko hangalo, ina nuhuhu tayemu rataka tauna ntanina hai raantiko lao i paidaa au bara nuunde."

¹⁹ Hai lolitaNa iti, Yesu mopakanoto noumba Peturu ina rapapate bona hangana Pue Ala rapakahile. Roo indo, nauli mbulimi Yesu i Peturu: "Meulamoko Iriko!"

²⁰ Hangko inditi, membalilimi Peturu, moita hadua topeguruNa au napokakaya Yesu au meula irihira. (TopeguruNa iti iami au mohuda i holana Yesu hangkoya tanganda maande kaindi hai mekune Iria: "Pue, hemari au ina mampobaluKo?")

²¹ Kanaitana Peturu topeguruNa iti, napekunemi i Yesu: "Pue, apa au ina mewali i rangangku iti?"

²² Nauli Yesu: "Ane Kuunde bona ia tuwo liliu duuNgku hawe i karombelana, bara paraluu nuisa! Meula peamoko Iriko."

²³ Hangko inditi, tebambarimi i topeulana Yesu, kadana ina mate topeguruNa iti. Agayana bara iti au nauli Yesu. Agayana noderi: "Ane Kuunde bona ia tuwo liliu duuNgku hawe i karombelana, bara paraluu nuisa!"

²⁴ TopeguruNa iti au moita hinangka au mewali hai au mopahawe posabina. Iami au mouki sura ide. Hai taisa katouna lolita ide.

²⁵ Ngkaya mani au nababehi Yesu, agayana ane hinangkana au Nababehi iti rauki i lalu sura, kira-kira humalele dunia ide bara handa rapambolii sura iti.

Yohanes

Video Yohanes 21

Ikuti Kami:

KONTAK | PARTISIPASI | DONASI