Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Limbah te Yesus mamparahan arepe sinde tinai intu Danau Tiberias akan kare murid Ayue. Hal te manjadi kalotoh:

² Sinde andau Simon Petrus, Tomas je inyewut "Hatatup", Natanael bara Kana hong Galilea, ewen te anak Sebedeus tuntang due murid Yesus je beken, metohe hapumpong.

³ Koan Simon Petrus dengan je beken, "Aku handak haguet malauk." "Ikei omba," koan ewen dengae. Maka ewen haguet hapan arut. Tapi ije alem te ewen jaton dinon taloh en-en.

⁴ Katika matanandau nampara lembut, Yesus mendeng intu saran pantai, tapi ewen dia katawan jete Yesus.

⁵ Yesus hamauh dengan ewen, "O anak oloh, en ain keton aton lauk?" "Jaton," koan ewen tombah.

⁶ Yesus hamauh dengan ewen, "Birik jalan keton akan hila gantaun arut, kareh keton tau dinon lauk." Palus ewen mambirik jala te, tapi dia olih manjijite awi paham kare lauk intu huange.

⁷ Murid je inyinta Yesus hamauh dengan Petrus, "Jete Tuhan!" Katika Simon Petrus mahining jete Tuhan, ie mangkepan bajue (awi ie dia habaju) palus sewu akan danum.

⁸ Kare murid je beken manuntut ie hapan arut akan hunjun petak, palus manjijit jala je kontep awi lauk. Ewen dia pire kakejaue bara saran, kurang labih saratus meter ih.

⁹ Katika ewen mohon bara arut, ewen mite aton barah apui intu hete dengan lauk intu hunjue tuntang rote.

¹⁰ Yesus hamauh dengan ewen, "Coba imbit akan hetoh belahe lauk je harun keton dinoe."

¹¹ Simon Petrus lumpat akan arut, palus manjijit jalae akan hunjun petak. Jalae te kontep awi lauk je hai-hai, samandiaie aton saratus lime puluh telo kongan. Tapi aloh lauk kare te, jalan ewen dia barabit.

¹² Yesus hamauh dengan ewen, "Ayo itah kuman." Jaton ije biti bara kare murid Ayue bahanyi misek, "Bapa toh eweh?" Basa ewen te katawan je Ie te Tuhan.

¹³ Limbah te tinai Yesus manokep ewen, manduan rote te, tuntang manenga te akan ewen. Ie mawie kalote kea dengan lauk te.

¹⁴ Jete kali je kateloe Yesus mamparahan arepe akan kare murid Ayue limbah Ie impisik bara pampatei.

¹⁵ Limbah ewen kuman, Yesus hamauh dengan Simon Petrus, "Simon anak Yona, en ikau sinta Aku labih bara ewen toh sinta Aku?" "Iyoh, Tuhan," koan Petrus, "Tuhan katawan Aku sinta Tuhan." Yesus hamauh dengae, "Keleh ikau mahaga kare anak tabiring-Ku."

¹⁶ Tingkat je kaduee tinai Yesus misek dengae, "Simon anak Yona, en ikau sinta Aku?" "Iyoh, Tuhan," koan Petrus tombah, "Tuhan katawan Aku sinta Tuhan." Yesus hamauh dengae, "Keleh ikau mahaga kare tabiring-Ku."

¹⁷ Tingkat je kateloe tinai Yesus misek dengae, "Simon anak Yona, en ikau sinta Aku?" Petrus manjadi kapehe ateie awi Yesus misek dengae sampai telo kali. Maka Petrus tombah tinai, "Tuhan, Tuhan katawan taloh handiai. Tuhan katawan aku sinta Tuhan!" Palus Yesus hamauh dengae, "Keleh ikau mahaga kare tabiring-Ku.

¹⁸ Toto haliai auh-Ku toh: Metoh ikau magon tabela, ikau kabuat mameteng kahangm, tuntang haguet akan kueh bewei ikau handak. Tapi kareh amon ikau jari bakas, ikau manjulok lengem, tuntang oloh beken je mameteng ikau tuntang mimbit ikau akan eka je ikau dia handak manalihe."

¹⁹ (Hapan kare auh te Yesus mansanan kilen ampie Petrus kareh akan matei uka Hatalla impahai.) Limbah te Yesus hamauh dengan Petrus, "Has omba Aku!"

²⁰ Metoh Petrus tampaliau, ie mite intu hila likute murid je inyinta Yesus. (Ie te je mondok tokep Yesus metoh kuman tuntang misek dengae, "Tuhan, eweh je akan mandarhaka mawi Tuhan?")

²¹ Sana mite ie, Petrus misek dengan Yesus, "Tuhan, kilen ampie tahiu ie toh?"

²² Yesus tombah, "Paribasa Aku handak ie tetep belom sampai Aku dumah, jete dia urusan ayum. Tapi ikau keleh omba Aku!"

²³ Maka baritae manjadi tayap hong marak kare murid Yesus je murid te dia akan matei. Padahal Yesus dia manyewut murid te dia akan matei, malengkan: "paribasa Aku handak ie tetep belom sampai Aku dumah, jete dia urusan ayum."

²⁴ Yohanes je manenga kasaksian tahiu kare kajadian toh. Ie kea je jari manyurate, tuntang itah katawan taloh je insanae te puna toto.

²⁵ Magon are hal beken tinai je ilalus awi Yesus. Paribasae taloh handiai te inyurat mije-mije, angatku dia sukup eka hong hapus kalunen toh uka manyuang kakare buku je handak inyurat te.

Yohanes

Video Yohanes 21

Ikuti Kami:

KONTAK | PARTISIPASI | DONASI