Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dung i dipatidahon Jesus ma diriNia sanoli nari tu angka siseanNia i di Dano Tiberias. Songon on ma baritana di na nipatidahonNia diriNia:

² Lagut ma hatiha i si Simon Petrus dohot si Tomas na nigoaran muse si Linduat, dohot si Natanael halak Kana na di Galilea, songon i muse angka anak ni si Zebedeus rap dohot dua halak nari sisean ni Jesus na asing.

³ Jadi didok si Simon Petrus ma tu halahi, "Kehe ma jolo au manjala!" "Dohot ma hami," ninna donganna na asing i tusia. Jadi kehe ma halahi manigor marparau. Hape umpe sangkibung ihan dapot halahi na saborngin i.

⁴ Jadi dung bincar mataniari, ro ma Jesus, jongjong ma Ia di topi ni dano i; tapi nada diboto halahi dope, bahaso Jesus do i.

⁵ Didok Jesus ma tu halahi, "Adong dehe ihan di hamu, dakdanak?" ning Ia. "Inda," ninna halahi.

⁶ Didok Jesus ma tu halahi, "Sampakkon hamu ma jala i tu siamun ni parau i, dapotan ihan ma hamu annon." Dung i disampakkon halahi ma jala ni halahi tu dano i, hape nada tarsarat halahi be mangulahi hara ni bahat ni ihan di bagasan.

⁷ Didok sisean haholongan ni Jesus i ma tu si Petrus, "Tuhan i do i!" ning ia. Jadi dung dibege si Petrus didok bayo i, "Tuhan i do i," manigor dipake ia ma abitnia mangulahi (harana madung sanga buka baju ia) mangambur ma ia tu aek i.

⁸ Anggo na asing i marparau ma halahi mandapoti tu darat, hara ni na manyarat jala na marisi ihan na gok i. Nada pola sadia dao halahi sian darat, tar hira-hira saratus meter do.

⁹ Dung mijur halahi sian parau i, diida halahi ma adong disi banggar na gara dohot ihan na nipanggang di ginjangna i; adong muse do roti disi.

¹⁰ Didok Jesus ma tu halahi, "Oban hamu tuson deba ihan na baru dapotmunu i."

¹¹ Kehe ma si Simon Petrus tu parau i, manyarat jalannia tu darat. Gok jala i dohot ihan na godang-godang; saratus lima pulu tolu sudena. Haru pe songon i bahat ni ihan i, nada pola jabat masibak jala i.

¹² Dung i didok Jesus ma tu halahi, "Mangan ma hita jolo!" Tapi nada adong sian angka siseanNia i na puluk manyapai, mandok, "Ise do hamu Amang?" Harana sude do halahi mamboto, Tuhan i do i.

¹³ Dung i dipadonok Jesus ma tu halahi, dibuat Ia ma roti i, lalu dilehen Ia ma tu halahi. Laing songon i ma dibaen Ia ihan i.

¹⁴ On ma patolu-nolihon dipatidahon Jesus diriNia tu angka siseanNia i dung mulak mangolu Ia sian na mate.

¹⁵ Dung mangan halahi, didok Jesus ma tu si Simon Petrus, "O Simon, anak ni si Jona, humolong dehe rohamu mida Au, ulang halahon?" ning Ia. Dialusi si Petrus ma, "Olo Tuhan. Diboto Ho do Tuhan holong ni rohangku tu Ho." Didok Jesus ma tusia, "Antong parmahani ma angka biri-biringKu."

¹⁶ Didok Jesus ma tusia padua-nolihon, "O Simon anak ni si Jona! Holong do rohamu mida Au?" ning Ia. Dialusi si Petrus ma, "Olo Tuhan. Diboto Ho do holong ni rohangku tu Ho." Didok Jesus ma tusia, "Antong parmahani ma biri-biringKu!"

¹⁷ Patolu-nolihon laing disapai Jesus dope tusia, "O Simon anak ni si Jona. Holong do rohamu mida Au?" ning Ia. Gabe marsak ma si Petrus hara ni na nisapaan ni Jesus i ia jabat tolu noli di na nidok ni Jesus, "Holong dehe rohamu mida Au?" Tapi laing dialusi si Petrus ma, "O Tuhan diboto Ho do Tuhan sasudena. Diboto Ho do Tuhan na holong rohangku mida Ho!" Dung i didok Jesus ma tusia, "Antong parmahani ma angka biri-biringKi.

¹⁸ Tutu do na Hudok on tu ho: Anggo dompak poso ho, dihobasi ho do dirimu jana mardalani ma ho sanga tu dia pe giotmu. Tapi muda dung matobang ho saulahon, surduhononmu ma tanganmu, jana halak na asing noma manghobasi ho jana maroban ho tu inganan na so giot ni rohamu."

¹⁹ (Jadi na paboahon sanga na tarbia do parmate ni si Petrus saulahon laho pasangap Debata, i do na nidok ni Jesus disi.) Dung i didok Jesus ma tu si Petrus, "Ihutkon ma Au!" ning Ia.

²⁰ Di na manaili si Petrus, diida ia ma sisean haholongan ni Jesus i di pudinia. (I ma na juguk di lambung ni Jesus hatiha na mangan borngin-borngin i, na manyapai tu Jesus, "O Tuhan, ise dehe na giot manghianat i tu Ho?")

²¹ Dung diida si Petrus ia, didok ia ma tu Jesus, "Bia ma halak on saulahon Tuhan?" ning ia.

²² Ninna Jesus ma mangalusi, "Muda jop rohangKu laing mangolu ia lopus ro Au mangulahi, ahana ma i di ho. Salaku ihutkon ma Au!" ninna Jesus.

²³ Jadi sar ma hobar di tonga-tonga ni angka sisean ni Jesus paboa na so mate sisean na sada i. Hape nian nada adong didok Jesus, na so mate ia; anggo na nidok ni Jesus songon on do, "Muda jop rohangKu laing mangolu ia lopus ro Au, aha na ma i di ho!" ning Ia do.

²⁴ Jadi sisean on ma na mangalehen hasaksian taringot tu angka na masa on. Laing ia muse do na manyuratkon on. Jana taboto do bahaso na tutu na nidoknia i.

²⁵ Bahat dope nian angka pambaenan ni Jesus. Sugari nisuratkon i sudena pasada-sada, ning rohangku na satano on pe nada tuk inganan ni angka buku sisuraton.

Yohanes

Video Yohanes 21

Ikuti Kami:

KONTAK | PARTISIPASI | DONASI