Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ono mbengiwa panewa Roa Paskah i Yesu pasi kami to anaguruNya yau muni njo’u Betania. Betania etu, etu semo kota nakaroo i Lasarus to nawangu muni i Yesu yako ri kapatenya seore.
2 Wali ojo karata i Yesu nja’u ria, tau rani mampalinggona Ia. Wali sira mangikaka Ia pangkoni. Tempo sira mangkoni etu, i Marta samba’a to mampookoka linggona pangkoni etu, pasi i Lasarus matunda mangkoni sindara-ndara pei i Yesu pasi linggona to yusa.
3 Pasi nja’u seja tua’i nsira dua, i Maria, nja’u banua etu. Wali ri rayanya sira mangkoni, i Maria mangkeni minya bara santongo liter, minya to magaya kojo waunya to raika yako ri kale mpinumuya sanganya narawastu. Minya etu masuli kojo olinya. Wali i Maria yau ri awe i Yesu pei mangawubu minya etu ri witi i Yesu apa manga’angga Ia. Roo see ia mapalisika wayuanya ri witi i Yesu etu. Wali juku ri raya banua etu magaya kojo waunya naika nu minya etu.
4 Pei samba’a anaguru i Yesu, etu semo i Yudas Iskariot to damamposora yau i Yesu resi baliNya, ia manganto’o,
5 “Gete! Minya etu yabi wo’u olinya yako saro ntau santo’u mapalaong! Pasi ane rapobalu, doi nu olinya etu maya rawaika yau resi tau to masiasi, wali maka pei ia taa mangika ewa see?”
6 Naka pei i Yudas manganto’o gombo etu si’a apa ia mamporayang tau to masiasi. Ia manganto’o gombo etu apa ia to palima. Pasi ia semo to mangangkongko tas to naka la’u doi nsira, wali ia mandudu mampolima doi yako ri tas etu.
7 Wali ojo panganto’o i Yudas gombo etu, i Yesu manganto’o, “Biakamo i Maria mangika palaong to etu. Apa ane tau to masiasi sangkani re’e ri oyo ngkomi wali mpia temponya komi rani mangansawang sira, komi maya mangansawang. Pei Aku taa singkasaenya sindara-ndara pei komi. Wali masipato kojo i Maria mangawubu minya to magaya waunya etu ri witingKu apa ia mampasilonga yami korongKu darapongkeli, apa tamo masae Aku damate pasi darapongkeli yau.” Etu semo gombo i Yesu mampasimbalika i Maria.
8 (12:7)
9 Wali boros kojo to Yahudi to mangandonge kareba mangkonong i Yesu Ia nja’u, nja’u Betania. See naka sira yau njo’u Betania etu. Pei si’a ojo saba i Yesu naka pei sira yau. Sira rani seja mangangkita i Lasarus to roomo nawangu muni i Yesu yako ri kapatenya.
10 Wali see naka kepalakepala nto pampue to mansongka damampopate yau i Yesu, sira mansongka damampopate yau seja i Lasarus.
11 Naka pei sira rani mampopate yau i Lasarus apa boros tau to Yahudi mampiyaika sira pei mangaya wo’u i Yesu tempo sira mangandonge sarita mangkonong ewa wimba Ia mangawangu muni i Lasarus yako ri kapatenya.
12 Wali kaeonya wo’u rao, boros kojo tau nda’a Yerusalem, sira rata mangampago Roa Paskah. Wali sira mangandonge kareba mangkonong i Yesu Ia re’e ri raya mpalinjaNya dayau ndeku Yerusalem.
13 Wali sira mangantoto ira to ewa ira nu wai to danapake nsira mangangalis jaya apa manga’angga i Yesu, apa ewa see ada nsira to Yahudi ane rata tau to bae angganya. Wali ojo pangoko nsira ira etu, sira yau mangantomu i Yesu. Sira maroso loonya sakaboo, sira manganto’o, “Tau si’i semo Makole nto Israel to ma’i napokau i mPue! Wali barong Ia!” Etu semo gombo to nato’o ntau boros.
14 Wali i Yesu mangarata keledai to damangurawa pei ipoleaNya keledai etu yau ndeku Yerusalem etu. Palaong etu mawali mangabanang gombo to ratulis yami ri raya ntuntu i mPue Allah. Gombo etu manganto’o,
15 “O komi to Yerusalem, ne’e meka! Lo’aja, tau to rata resi komi mampolea keledai etu, Ia semo Makole ngkomi.” Etu semo gombo to ratulis yami ri raya ntuntu i mPue Allah.
16 Pei tempo etu kami to anaguru i Yesu tawa mangansani batuanginya palaong to mawali etu. Pei tempo i Yesu roomo nayau muni nto’u saruga pei mangoko muni kayawaNya, tempo etu panewa kami manasamo gombo to ratulis yami mangkonong Makole to mampolea keledai etu, gombo etu mangkonong i Yesu semo. Pasi tempo etu panewa kami manasa seja mangkonong boros wo’u gombo to natulis yami nto pantuntu tuntu i mPue Allah tempo owi. Wali kami mangansani gombo etu seja mangkonong i Yesu apa kami mangkita palaong to roomo naika ntau resi Ia.
17 Wali tau boros to re’e mangkita i Yesu mangawangu muni i Lasarus yako ri kapatenya pei mampokio ia see ia masuwu muni yako ri dayonya, tau etu roomo mampakarebaka resi tau to yusa palaong to nawali etu.
18 Wali boros tau to roomo mangandonge mangkonong palaong to taa rapobiasa to naika i Yesu etu. See naka boros tau to yau mangantomu Ia tempo Ia yau ndeku Yerusalem.
19 Wali ojo pangkita nto Yahudi to aliran Parisi tau boros mangampago i Yesu etu, sira manganto’o samba’a pei samba’a, “Gete, taa kojo mawali songka ngkita! Taa mawali kita mampopate yau Ia pasi i Lasarus, apa lo’aja, samparia tau ri lino paka mangalulu yau Ia! Sira taa damangabiaka kita mangika bara kesaa resi Ia.”
20 Wali tempo etu re’e seja tau to si’a to Yahudi ri oyo ntau to yau ndeku Yerusalem damampue mampakabae i Pue Allah ri tempo Roa Paskah.
21 Tau to si’a to Yahudi etu yau resi i Pilipus to yako ri kota Betsaida nja’u propinsi Galilea. Wali sira mamporapika resi ia, sira manganto’o, “Pa’a, kami rani simparata pei i Yesu.”
22 Wali i Pilipus yau manganto’oka i Andreas, panewa sira dua yau resi i Yesu pei manganto’oka Ia mangkonong tau to si’a to Yahudi to rani simparata pei Ia etu.
23 Wali i Yesu manganto’o, to’oNya, “Naratamo temponya i Pue Allah damampapokitaka to lino kayawa to si Aku, Wiyaa nto Lino, etu semo tempo Aku darapopate yau pei mambangu muni pasi dayau muni nto’u saruga.
24 Aku manganto’oka komi, monso pu’u ane rapanya sampa’i pae, ane taa rapomuya pei mawali ewa daboo yau, pae etu taa tuwu pei tiroowa sampa’ija. Pei ane rapomuyamo pae etu mawali ewa daboo yau, pei roo see ia tuwu pei mawali malagi mpa’i. Pasi ewa wetu seja to damawali resi Aku tempo Aku rapongkeli yau, apa yako etu Aku datuwu muni, roo see malagi tau to damangarata katuwu.
25 Wali re’e tau to mampobuuka katuwunya ri lino si’i, etu semo to bae kojo batuanginya. Pei tau etu tiroo darata temponya ia damate yau, wali katuwunya etu tamore batuanginya. Pei tau to mampobuuka si’a katuwunya ri lino si’i to bae kojo batuanginya see naka ia buya rayanya mangalulu Aku, ane ewa see, katuwu ntau etu monso pu’u bae batuanginya rataka ri singkasaenya.
26 Wali tau, nempo to Yahudi pasiwa tau to si’a to Yahudi etu, ane rani mawali to papolaongingKu, tau etu taa maya taa damangalulu Aku see nempo imbare Aku re’e, nja’u seja ia. Wali i sema tau to mawali to papolaongingKu, tau etu dana’angga mPa’angKu.”
27 Wali yako etu i Yesu manganto’o wo’u, “Aku masusa rayangKu ri tempo si’i mampobuuka kasesa to daKurata. Pei kesaa to daKuika? Aku taa maya mampokaika resi Pa’angKu manganto’o, ‘Pa’a, palaes Aku yako ri kasesa to daKurata.’ Gete, Aku taa kojo maya manganto’o ewa wetu, apa naka pei Aku ma’i see damangarata kasesa to etu semo.”
28 Wali ojo karoonya i Yesu manganto’o gombo etu, Ia makai-kai resi i Pue Allah, Ia manganto’o, “Pa’a, papokitaka to lino kayawaMu see sira damangabarong Komi!” Wali ojo karoonya i Yesu manganto’o pokai-kai etu, mansaka radonge loo yako ndate saruga, loo etu manganto’o, “Aku roomo mampapokitaka to lino kayawangKu, pasi Aku damampapokitaka wo’u sira ri tempo to darata.”
29 Wali tau boros to nja’u nja’u ria tempo etu, sira mangandonge seja loo etu. Wali re’e sira to manganto’o loo etu loo lamoa. Pasi re’e wo’u sira to manganto’o loo etu loo mpomakau i mPue Allah yako ndate saruga mampogomboka i Yesu.
30 Pei i Yesu manganto’oka sira, “Loo to nudonge ngkomi etu yako resi i Pue Allah. Wali loo etu naka pei radonge si’a ojo damangansawang Aku. LooNya etu radonge damangansawang komi semo.
31 Wali ratamo temponya i Pue Allah damangahuku dosa nto lino. Pasi ratamo temponya Ia damanganangi i Kepala nto pantipu to mangkuasang lino si’i.
32 Pei ane Aku, tempo Aku rapaku pei raokotaka ri kaju pasape, tempo etu Aku mangansale samparia tau dama’i resi Aku.”
33 Wali etu semo gombo i Yesu resi tau boros etu. Naka pei Ia manganto’o gombo etu damampaponsanika resi sira ewa wimba jayanya Ia darapopate yau.
34 Wali tau boros etu batabata raya nsira apa sira mampobuuka i Yesu Ia semo Makole parajanji i mPue Allah. See naka sira manganto’oka Ia, “Porenta ngkita re’e to ratulis to manganto’o i Kerisitu, Makole parajanji i mPue Allah, Ia datuwu singkasaenya. Pei Komi manganto’o Komi, Wiyaa nto Lino, taa maya taa rapaku pei raokotaka ri kaju pasape. Wali ane Komi darapopate yau, ane ewa see wimba, bara tau to yusa wo’u to mawali Wiyaa nto Lino?”
35 Wali i Yesu mangansono, to’oNya, “Aku tamo masae kojo maroo ri oyo ngkomi. Aku maya raporapaka ewa pansona to mampakaremeka komi jaya to monso apa Aku mampotundeka komi jaya to monso etu. Wali lulu Aku tempo Aku tiroowa re’i resi komi see komi mangansani jaya to monso. Apa tamo masae Aku dayau, wali tempo Aku yau etu tamore pansona resi komi see naka kodi majoli komi ewa tau to malinja ri raya mburi. Pei ane tau to malinja ri raya mburi, ia taa maya mangkita jaya, wali ia taa mangansani bara imbanjo nakanjo’u.
36 Wali monso pu’u Aku mampotundeka komi jaya to monso. Wali tempo Aku tiroowa re’e resi komi, sarumaka Aku see komi maya mawali tau to mangansani anu to monso. Apa ane ewa see komi raporapaka ewa tau to tuwu ri raya ngkareme.” Wali ojo karoonya i Yesu manganto’oka sira gombo etu, Ia mayoko pei maroo nja’u tampa to taa nansani nsira.
37 Wali boros kojo palaong to taa rapobiasa to roomo naika i Yesu ri pangkita nu mata nto Yahudi, pei nempo ewa see tiroo boros sira to taa mangaya Ia.
38 Wali palaong etu mangabanang gombo to nato’o yami nto pantuntu tuntu i mPue Allah, i Yesaya, tempo owi. Gombo etu manganto’o, “Pue, tare tau to mangaya kareba to nato’o ngkita. Pasi tare tau to mangansani batuanginya palaong to naika i mPue mampaponsanika tau kuasaNya.” Etu semo to nato’o i Yesaya.
39 Pasi i Yesaya mamporata wo’u gombo i mPue Allah to manganto’o, “Aku roomo mampakabuta mata nsira naka ne’e sira mangkita, pasi Aku roomo mangaba’a pampobuuka nsira naka ne’e sira mangansani. Aku mangika ewa wetu naka ne’e sira mangandolika tango nsira resi Aku see Aku damampakatao sira.” Etu semo gombo i mPue Allah to naparata i Yesaya. Wali gombo etu mampakanasa yami mangkonong tau to mangkita palaong to taa rapobiasa to naika i Yesu, pei sira tiroo taa mangaya Ia.
40 (12:39)
41 Wali naka pei i Yesaya mangantulis gombo etu apa ia roomo rapapokitaka yami kayawa i Yesu, wali ia mangantulis mangkonong i Yesu semo.
42 Pei nempo re’e tau tu’a nto Yahudi to taa mangaya i Yesu, pei re’e seja boros sira to mangaya Ia. Pei sira taa mampongakung pangaya nsira etu ri tango ntau boros, apa sira meka resi to Yahudi to aliran Parisi. Apa sira mampobuuka to Parisi etu tamo damangabiaka sira masua ri banua to napampotunde nsira.
43 Pasi re’e wo’u sabanya naka pei sira taa mampongakung pangaya nsira, etu semo sira mangepe bae wo’u batuanginya resi sira ane to lino mangabarong sira sakowa i Pue Allah mangabarong sira.
44 Wali i Yesu maroso looNya manganto’o, “I sema tau to mangaya Aku, si’a ojo Aku to ia mangaya. Tau etu mangaya seja Ia to nampokau Aku.
45 Pasi tau to mangkita Aku, tau etu mangkita seja Ia to nampokau Aku.
46 Wali Aku ma’i ri lino si’i damawali ewa pansona to mampakaremeka to lino jaya to monso, see samparia tau to mangaya Aku si’amo ewa tau to ojo malinjalinja ri raya mburi.
47 “Wali ane tau to mangandonge gombongKu pei taa mampalaika, si’a Aku to damangahuku ia. Apa Aku ma’i si’a damangahuku to lino. Aku ma’i damampalaes sira.
48 Pei tau to mampobo’o Aku pasi to taa mampodongeka gombongKu, re’e kojo anu to damampakanasa tau etu masipato rahuku. Anu to mampakanasa etu, etu semo gombo to Aku roomo manganto’o. Apa ane temponya i Pue mosumo darata, tempo etu tau to mampobo’o Aku ia darahuku singkonong pei gombo to Aku roomo manganto’o etu.
49 Apa tempo Aku manganto’o gombo etu, si’a Aku pu’unya. Pa’angKu to nampokau Aku, Ia semo to mamporentangika Aku mangkonong gombo to Aku damanganto’o pasi to Aku damangamporata.
50 Pasi Aku mangansani porenta mPa’angKu etu mawali pu’u ngkatuwu to singkasaenya resi tau to mampalaika. Wali see naka tempo Aku magombo, Aku magombo singkonong pei anu to nato’oka mPa’angKu Aku manganto’o.” Wali etu semo to nato’o i Yesu mampakanasaka tau boros i Pue Allah semo pu’u nu gomboNya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA